Azaya 61 - Bible

Ŋ̀uŋ-ma ƃô tuŋ lɛ́lɛɛi

¹ Ŋ̀wála-wâla kélee Yâwɛɛi Ŋɔmɔ̃̂leŋ káa ḿbôlu. A ńziye zu a ńdɛɛ, a gɛ́ɛ ŋá dùŋ lɛ́lɛɛi ƃô gôlo-ƃelai dîa, diai dílii toɔɔ̂i pôlui, ŋá díŋa nɛnɛ, diai díkaa kɔ-sôŋ laa sui, ŋá díŋuŋ-mâ ƃó túŋ tòo, diai díkaa kpini-pɛrɛ mui ŋá dí maa-tee.

² A ńdɛɛ a gɛ́ɛ ŋá Yâwɛɛ ŋɔkóraŋ lɛ́lɛɛi maa tûŋ too. Ŋ̀elei a seri, Yâwɛɛ a pâi pâi ŋɔnûai ŋuŋ-ma ƃó mɛ̂ni ma, é díkpɔara ƃelai yée mɛi ɣalei. A ńdɛɛ a gɛ́ɛ diai wɔ́lɔi, ŋá díŋa nɛnɛ,

³ Diai díkaa maloŋ tôo maa su Zãiyɔŋ, ŋá pâi díŋa-nɛnɛ̂i. Ŋa pâi kâloŋ ƃɔrɔ lɛ́lɛɛ seêi díŋûa luu pɔ́ɔ ŋá. Ŋa pâi wúlɔ pûi díŋûa lii-nɛ̃ɛ kɛ́ ƃò dîa dífa ŋɔ́nɔ malôŋ see ƃò. Ŋa pâi gɛ̂i nûa díkɛ dílaa ma yɛ̂ɛ núu a yokpo tòo ma. Ŋa pâi ǹii-too pôlu mɔleŋ kulâi díkponôi. Da pâi dítôlii a teniŋ ƃô wuru-ŋa nyii Yâwɛɛ ǹyaa kpîŋ è zì a gɛ́ɛ nûa díkɛ ǹáa màa tɛ̀.

⁴ Da pâi daa-lêe-ŋai nyii dípuɔɔ su a kôyaai, tɔɔ̂i pôlu ŋɔ́nɔ.

⁵ Ŋɔ̃́ya-ŋa da pâi kɛ̂i ká ƃála-ŋai ŋá kɔnîi. Da pâi kɛ̂i tíi kɛ̂i kákpâlaŋ-ŋai ŋá, díkɛ kákpɔmɔ-ƃa kpalaŋ-ŋai mɛi kâa.

⁶ Da pâi ká tôlii a Yâwɛɛ ŋɔsâla láa-soŋ ƃela, Ɣâla ŋɔtíi kɛ́-ƃela. Ka pâi ǹɔii-ŋûŋ-ŋai dítɔɔ-sãai ŋàa-nɛ̃̂ɛ kulâi, ká kɛ́ yoŋka tèe a gɛ́ɛ díkaa a ká pɔ́ɔ.

⁷ Káŋumɛi da káƃaa-kûla-maai da pâi kpɛɛ̂i. Ka pâi seêi ká kpɔɔi lɔii su, kátɔɔ-laai su é kɛ́tɛ gîei feerɛ. Koi-nɛ̃̂ɛ a pâi kɛ̂i kâa wɔ́lɔ-wɔlɔ.

⁸ Yâwɛɛ è mò ǹyɛɛ, “Ŋá teniŋ ƃô-laa wɛ́lini, ŋuma da wôya m̀ɛni ƃɛlɛ fé ŋ́goi. Ŋa pâi ŋánûai féla-fêi a tɔ̃yâ laa, ŋá wɔ́lɔ-wɔlɔ da wɔlɔ-wɔlɔ kpanaŋ-woo kɛ́ díyêei.

⁹ Ǹɔii-ŋûŋ-ŋai kélee da pâi díkɔlɔnîi. Diai nyii pâi ŋánûai kâai, da pâi ŋánûai kɔ́lɔnîi a gɛ́ɛ díkaa a ŋánûa nyii-ŋai ŋá lûwa tòo dîai.”

¹⁰ M̀ɛnii Yâwɛɛ è gɛ̀i Zerusâlɛŋ a m̀aa koi-nɛ̃ɛ kula. Zerusâlɛŋ a m̀aa ɣíri yɛ̂ɛ nɛnî ƃé liî surɔ̂ŋ kulâi. Ɣâla a Zerusâlɛŋ m̀aa ɣíri a ƃálo-laa da yee-tɛɛ maa lâa.

¹¹ Berei kpɔ́ nɔ́ da sí-sɛŋ sì la, é sóo é ƃɔlɔi, Ŋ̀wála-wâla kélee Yâwɛɛi a pâi ŋɔnûai ƃâloi. À kɛ̀ tí, ǹɔii-ŋûŋ-ŋai su ƃelai kélee da pâi ǹaa maa tɛ̂i.