Azaya 54 - Bible

Yâwɛɛ è Eezuɛ-ŋai wɛ́lini

¹ Zerusâlɛŋ, íkaa nɔ́ yɛ̂ɛ kpóma nɛ̂ni. Kɛ́lɛ wule tóo, í koi-nɛ̃ɛ kula. Ya pá nîa-pɛlɛɛ támaa maa sɔlɔ ƃôi é tɛ́ɛ ǹɛnîi ma da bɔ̂ŋ díkaa niî tûai.

² Íƃûui íkaa mùi, zu kɛ́tɛ í mù-seɣe-ŋai fúloŋ a zu kɛ́tɛ. Bîlaŋ wuru-ŋai da dɔɔ wuru-ŋai kɛ́ a gbanaŋɔɔ.

³ Ya pâi ílɔii ŋɔkoyaŋ-perei kulâi pôlu m̀éla kélee ma. Ínûai da pâi seêi ǹɔii ma nyii ǹɔii-ŋuŋ da kpɛ́ni su-ƃelai díkaa naai. Daa-lêe-ŋai lɛ̂ɛ a pilêŋ ŋái, ǹaa láa a pâi fɛ̂ɛi a núu-kpune.

⁴ Ífe yào, núu da fé pâi ŋɔ́nɔ ƃâa kulâi yâm íƃɛlɛ é tóo. Ya pâi niâi ŋ̀umɛi ma íkɛ zu ínuu-tɔɔ-laai sui. Ŋ̀umɛi íkɛ zu ípɔɔ-nɛ̂ni-laai sui, ya pâi niâi gélee ma.

⁵ Íkpɛtɛ-nuui a pâi kɛ̂i yɛ̂ɛ ípɔ̂ŋ. Íkpɛtɛ-nuui kpîŋ láa ƃa Ŋ̀wála-wâla kélee Yâwɛɛ. Eezuɛ Ŋɔɣâla Maa Waai ƃa íŋuŋ ma ƃó nuui. Ǹyaa ƃa ŋ̀éniɛi kélee kpɛtɛ Ɣâlai.

⁶ Eezuɛ, íkaa yɛ̂ɛ nɛnî kpela, nyíi bɔ̂ŋ a ǹyée kúla m̀u, ǹíi toɔ́ɔ pôlu a ŋ̀ánaai. Kɛ́lɛ Ɣâla a ítoli pôlu ǹyɛɛi,

⁷ “Ŋá ńyee kùla ímu a tãi kpua loŋ. Kɛ́lɛ wɛli kɛ́-maa kpânaŋ sarâi, ŋa pâi ílɛɣɛ̂i ḿâ.

⁸ Ŋá ńii ŋwàna yâ, ŋá ŋ́ɛi lóo yâ tãi kpua yée mu, kɛ́lɛ ŋa pâi íŋɛi malôŋ kâai ŋáwɛli kɛ́-maa kpanaŋ sarâi, wɔ́lɔ-wɔlɔ da wɔ́lɔ-wɔlɔ.” Ńyãa Yâwɛɛ ká ƃálo-nuui ƃé mò tí.

⁹ “Ŋá wɔ́lɔ ńgono tèe Nôa yêei a gɛ́ɛ fé pâi ǹɔii su-karâi a yá. M̀ɛni ma, ŋà ŋ́gono tée a gɛ́ɛ fé pâi ŋɔ́nɔ ńii ŋwânai yâ a dɔnɔ kpîŋ. Fé pâi lônoi yâ, kpaa máŋ ŋá íkula maa kɛ́.

¹⁰ Ǹyée kpaya-kpayai da bɛlɛ-pɛlɛɛi da pâi wôlo zu, kɛ́lɛ ŋáwɔlɔ-wɔlɔ wɛli kɛ́-maai kóyaŋ fé m̀a. Ŋákpanaŋ-wooi tɔɔ̂i nɔ́ ƃa dɔɔ̂i.” Ńyãa Yâwɛɛ ŋámaloŋ kâai káa nɔ́ naa ímɛni ma.

Zerusâlɛŋ ninai

¹¹ Yâwɛɛ a m̀ôi ǹyɛɛi, “Óo Zerusâlɛŋ taa-leei, yái pɔ̂ri mâa fé yɛ̂, íkɛ mɔ̃lɛi, nyii núu da fé naa é íŋa-nɛnɛi, ŋa pâi íkpôŋ seêi sãai kɛ̂i a kɔni sɔ̃ɔ kpanaŋɔɔ-ŋa.

¹² Ŋa pâi yeŋkêŋ-ŋa tɔɔ̂i a kɔni sɔ̃ɔ kpanaŋɔɔ-ŋa, ŋá ká siɣãŋ-ŋai lá-sãai kpɛtɛ a kɔni fóloɔ yɛ̂ɛ ŋɔŋ lêŋ ŋá kásiɣãŋ-ŋai tɔ́ɔ a kɔni sɔ̃ɔ kpanaŋɔɔ-ŋa.

¹³ “Ńyãa kpîŋ ŋa pâi sɛŋ-lɛ̂i kálônii sinaai dîa. Ŋa pâi gɛ̂i díƃûu ƃó, dílii seɛɛ.

¹⁴ Teniŋ-ƃô da tɔ̃yâ-laa da pâi gɛ̂i ká tɔɔ̂i é kpanaŋ. Núu da fé pâi ká lúanîi, kpaa máŋ é ká maa-yao. Mɛni mĩli-miliɛɛ da fé pâi kulâi káŋɛi é gɛ́ ká yao.

¹⁵ À kɛ̀ núu da a kɔ́ pɛ̀lɛ kâa, gɛ̀ ní ńyee fé zu. Ǹúui nyii kélee paî kɔ̂i kápɔi, káyee a pâi tɛɛ̂i m̀a.

¹⁶ “Ńyãa ƃé kɔli-ɣale-ƃela kpɛ̀tɛ. Da filɛ-ŋa kpɛ̀tɛ, díkɛ dífɛ̀ɛ vilɛ kêre-ŋai mu, díkɛ kɔ́ kɔ́-sãa kpɛ̀tɛ naa. Ŋá kɔ́ kɔ́-ƃela kpɛ̀tɛ máŋ. Dia ƃa gɔli-sãai ŋí sìɣe, díkɛ nûa pàa a dia.

¹⁷ Kɛ́lɛ núu da fé pâi pɔrîi mɛni da kɛ̂i a káa a gɔ́ kɔ́-kɔli sãai ŋí da. Núu da a lɛ́ɛ mɛni da ƃò a kálaa, ka pâi zu kula pêre kɔ́lɔnîi. Ŋa pâi ŋátii kɛ́-ƃelai maa kɔ̃ɔ̂i, ŋá gɛ́ díkpɔara-ƃelai da yée fa pɔ̂ri dîa.” Ńyãa Yâwɛɛ ƃé m̀o tí.