Azaya 53 - Bible

¹ Ǹûai dí zu tòo dîyɛɛi, “Gbɛ̂ɛ ƃa pɔ̂ri lâai a m̀ɛni-ŋai kwa môi, kpaa máŋ gbɛ̂ɛ ƃa tá wɔ́lɔ Yâwɛɛ ŋɔwála-wala-laa kɛ́tɛi kaai?

² Yâwɛɛ ƃé gɛ̀ ŋɔtíi kɛ́-nuui kɛ́ ƃûu ƃò yɛ̂ɛ sí-sɛŋ ƃé lɔii lɛ́lɛɛ ma. Gbɛtɛ-pêre fé kɛ́ ní sɛŋ nyii núu a gàa, ǹíi mu é síɣe m̀ɛni ma. Sɛŋ da fé kɛ́ ní m̀a nyíi a pɔ̂ri núu da líi kulâi.

³ Kú kúyee kùla m̀u, kú tɔ́ɔ m̀a. È m̀ɔ̃lɛ sɛŋ sôli maa támaa yêei. Núu da fé kɛ́ ní fúlɔi máŋ ŋ̀wɛ̂lii é ŋ̀ɛ́i láa m̀a. Kú gàa nɔ́ a núu kpɛ́ni-kpɛni.

⁴ “È m̀ɔ̃lɛ-laai sîɣe nyii maa-nɛ̃ɛ̂i kɛ̀ kú gɛ́i, é m̀ɛni sôlii káa nyii maa-nɛ̃ɛ̂i kɛ̀ kú tɛ́ɛ zui. Kú kɛ̀ gâai yɛ̂ɛ ǹyaa ƃé Ɣâla è m̀ɛni kula maai tí kpɛ̀tɛ m̀ɛni ma.

⁵ Dí ǹokwa, dí ŋ̀wána-ŋwâna kúsɔyɔ̂ŋ-ŋai kú gɛ̀i, m̀ɛni ma. Dí ǹokwa kútua-pere nyɔ̂ŋ-ŋai mɛni ma. Kwa kɔlɔi pôno sɔlɔ ƃô ŋɔmɛni sôli káai, da ŋɔlòkwaa ŋ̀ólii su.

⁶ Kúkelee kú kɛ̀ nɔ́ yɛ̂ɛ ƃála láŋɔɔ-ŋa. Kú kɛ̀ nɔ́ liî kúkpîŋ ŋuŋ ma. Kɛ́lɛ m̀ɛni kula maai kɛ̀ kúmɛni mai, Yâwɛɛ è gélee pù ŋ̀ûa. Kúa ƃé m̀aa nɛ̃ɛ̂i kɛ̀ kú m̀ɛni kula maai ŋí sɔlɔ ƃó.

⁷ “Nûa dí mɛni nyɔmɔɔ kɛ̀ la, kɛ́lɛ vé woo nyɔ̂ŋ da pìli ní núu da ma. È kɛ̀ nɔ́ yɛ̂ɛ ƃála ƃé da liî la baa mɛ̂ni ma, kpaa máŋ ƃála ƃé da ǹéɣa têei, díniŋɔɔ, ŋ̀óo fé tɛ̂i.

⁸ Dí zòŋ, dí lí la a gɛɛ dí bàa, ǹyaŋ núu da fé kpáaŋ ní kɛ̀ m̀aa mɛ̂ni ma. Dí bàa kúnûai dísɔnyɔ̂ŋ mɛ̂ni ma.

⁹ Berei máŋ vé wɔ́lɔ sɔnyɔ̂ŋ da kélee kɛ́ lai, kpaa máŋ é lɛ́ɛ kɛ́i, maa nɛ̃ɛ̂i kɛ̀ dí ǹoo ƃɛ́i da ŋ̀wana lɔ̂ɔ-ƃelai lôo naai, kɛ́lɛ dí ǹoo tɔɔ-nûu ƃolôŋ su.”

¹⁰ Yâwɛɛ a m̀ôi ǹyɛɛi, “Ńyãa ƃé gɛ̀ gɛ́ mɔ̃̀lɛ. Ŋɔsaai è kɛ̀ a sâla, ŋuŋ ma ƃô da su-mɛni lɛ̂ɛ mɛni ma. A pâi ǹônii kâai. À kɛ̀ tí ŋɔfúlu-laai su a pâi kôyaai. Yâwɛɛ ŋɔmɛni kpɛtɛɛi ŋ̀aa see pâi kɛ̂ zarâi.

¹¹ Ŋɔmɔ̃́lɛ-laai pôlu ma, lii-nɛ̃̂ɛ a pâi kɛ̂i m̀a. Ŋɔmɔ̃́lɛ-laai fé pâi kɛ̂i kpɛ́ni-kpɛni. Ńii lâai ŋátíi kɛ́-nuui mɛ̂ni ma. A pâi núu támaa dímɛni kula maa kɛ́ɛi maa mɛni solii siɣêi. Ŋa pâi núu támaa dísɔnyɔ̂ŋ su mɛni lɛɛ̂i zarâi.

¹² Ŋa pâi gɛ̂i ƃâa kɛ́ ƃò m̀a núu-kpune sáma, m̀u-wuyɛɛ, wála-wala-laa su kɛ́tɛ kɛ́ ƃò ǹyêei, kpɛ́ni fêi, è ŋɔfúlu-laai tɛ̂ɛ gbîŋ yee ma, da zɔnyɔ̂ŋ-ƃelai dí mɔ̃́lɛ a bɔriɛɛ. È sàa núu támaa dísɔnyɔ̂ŋ-ŋai mɛni ma. È Ɣâla fɛ̀li a gɛ́ɛ é dísu mɛni lɛɛ.”