Azaya 52 - Bible

Ɣâla a pâi Zerusâlɛŋ ŋuŋ ma ƃôi

¹ Ka káŋɛi lá ƃó, ká kámu-siɣe, kákponôi é kpanáŋ, óo Zerusâlɛŋ-ƃela. Káai a Ɣâla ŋɔtaa-lêe maa waai su-ƃelai, ka kámaa ɣíri a káseɣe lɛ́lɛɛ-ŋai. Ŋ̀ɔ̃ya-ŋai ká taa-lêei su kàrai, da fé pâi ŋɔ́nɔ tɛ̂i kátaai su.

² Ka kámu-siɣe m̀uluŋ su, ká kákɔɔ ŋá kpɛ́mɛŋ. Zerusâlɛŋ-ƃela, ká tɛ́ gâloŋ see-sɛŋ ŋá. Óo Zãiyɔŋ kɔ-soŋ-ŋa, ka ǹyɔlɔ-ŋai kúla kákɔŋ ma.

³ Ŋ̀wála-wâla kélee Yâwɛɛ a m̀ôi ŋɔnûai dîa ǹyɛɛi, “Núu da fé sɛŋ da kɔ̀lɛ ní kápôlu dílɛɛ pâi liî a káa luɛ-laa su, ǹyaŋ núu da fé pâi sɛŋ da kɔlɛ̂i káŋuŋ ma ƃó mɛni ma.

⁴ Ká lì Ize lɔii su kákɛ ƃò naa a ŋɔ̃́ya-ŋa. Asiria-ŋai dífe sɛŋ da kpɛ̀ɛ ní kámɛni ma. Ká kɛ̀ naa, díkɛ kálùaŋ.

⁵ Kákɛ̀ kɔ-sôŋ-laai Babelɔŋ-ŋai yêei dílɔii su. Dífe sɛŋ da kpɛ̀ɛ ní kámɛni ma. Kámɛi-ƃelai da yoŋka têei, dífe ƃaa kɛ́-maa tɛɛ̂i ḿbɔ.

⁶ Ɣele da a pâi, ŋa pâi ńaa lɛ̂i ŋɔ́nɔ, ǹyaŋ da pâi gɔ́lɔnîi a gɛ́ɛ ńyãa ƃa Ɣâla nyíi lòno dípɔi.”

⁷ Ka gáa, gáa a mɛni lɛ́lɛɛ a gɛɛ í lii-sêe tuŋ ƃó-nuu káa gɛ́ kùla ǹyée-ŋai su. A pâi a lii-see maa tûŋ lɛ́lɛɛ. A m̀ôi Zãiyɔŋ-ƃelai dîa ǹyɛɛi, “Káɣâlai ƃa gâloŋ.”

⁸ Daa-lêei maa kpɛ́-ƃelai da lâɣii. Da wule toôi gîe ma a koi-nɛ̃ɛ pere. Dia kpîŋ da Yâwɛɛ kâai a díkpɔɔi ŋɛi-gao, gɛ́ lène pôlu Zãiyɔŋ.

⁹ Ka koi-nɛ̃ɛ wule-ŋa too ɣelêi pere, káai Zerusâlɛŋ bilêŋ ŋái. Yâwɛɛ a pâi ŋɔtaa-lêei ŋuŋ ma ƃôi, é ŋɔnûai ŋa-nɛnɛ.

¹⁰ Yâwɛɛ a pâi tíi kɛ̂i a ŋɔwála-wala laa maa waai, é ŋɔnûai ŋuŋ ma ƃó, ŋ̀éniɛi gwaa kélee su-ƃelai dí ǹaa káa.

¹¹ Káai kélee ka Ŋ̀âla-pɛrɛ Kɛ́tɛi mu-sãai mɛi kâai, ka ká kpîŋ maa wáa, ká kúla Babelɔŋ, Káfe lɛ̀ɣɛ sɛŋ da ma nyii m̀aa fé wàa níi.

¹² Káfe pâi kulâi naa a kîrɛ lônii ma, kpaa máŋ ká kɔ́ a gɛ́ɛ ká pú. Káɣâlai Yâwɛɛ a pâi tɔɔ̂i kátuɛ. Eezuɛ Ŋɔɣâlai ǹyaa kpîŋ a pâi kámɛi kâai.

M̀ɔ̃lɛ-laa yee mu-nuui

¹³ Yâwɛɛ è m̀o ǹyɛɛi, “Ŋá pâi gɛ̂i a gɛ́ɛ m̀ɛnii kélee ńyee mu nuui a ǹyée pìli zui, ŋ̀aa-see é kɛ́ ǹyêei a ǹɛ́lɛɛ, ƃaa kɛ́-maa kɛ́ ƃò m̀a.

¹⁴ Diai kélee gàai, díla è kɛ̀ kpɔ́. Gɛ́ pere maa è fàleŋ, vé ƃóloŋ ní kɛ̀ núu-kpune ma.

¹⁵ Ǹɔii-ŋuŋ-ŋai su-ƃelai lá è kpàla dîa a m̀aa mɛ̂ni, kâloŋ-ŋa lá é kɛ́ nɔ́ kpɔ́ a kili ŋa pû-pere. Da pâi kwaa kâai dí m̀ɛni-ŋai ŋá káa nyíi-ŋai dífe kɛ́ ní a gɔ́lɔŋɔɔi.”