Azaya 51 - Bible

Zerusâlɛŋ ŋa-nɛnɛ woo-ŋai

¹ Yâwɛɛ è m̀o ǹyɛɛi, “Ka káwoli tɔ́ɔ ḿâ, káai wɛ̂lii a ŋuŋ ma ƃôi. Káai ŋ̀wɛ̂lii a kpɔŋ mâai, ka pá ḿbɔ. Ka ká kíli ŋá sía é pîlaŋ gɔnii ma nyii ká kùla zui, ká kákili ŋá sía ƃɛ́i ma dí gɔnii tí sàa naai.

² Ka kákili ŋá sía é pîlaŋ kákaa-ƃela pɔlɔ-ŋai Eberaɣɛ̃ɛ, da Seera ni dîa nyii-ŋai ká kùla díkponôi. Tãi ŋá Eberaɣɛ̃ɛ tòli lai, lóŋ fé kɛ́ ní ǹyêei, kɛ́lɛ ŋá lûwa tòo m̀a, zuu é kɛ́ ma. Ŋá gɛ̀ ŋɔsuui su é kɛ́tɛ.

³ “Ŋa pâi Zerusâlɛŋ ŋɛ́i malôŋ kâai, da diai kélee lɛ̀ɛ naa bilêŋ ŋái. Berei máŋ ǹaa káa la a fɛ̃ɛ-kpâlaŋ sui, ŋa pâi ǹaa kɛ̂i yɛ̂ɛ Idɛŋ Suai su. Ǹaa a pâi kɛ̂i yɛ̂ɛ Yâwɛɛ ŋɔsûai su. Ǹaa-ƃelai da pâi kɛ̂i lii-sêe su, díkɛ koi-nɛ̃ɛ kùla. Da pâi kɛ̂i wule toôi, díkɛ sɛɣɛ̂i fêe tɛ̀ɛ ḿbɔ.

⁴ “Ka káwoli tɔ́ɔ ḿâ, ŋánûa. Ka ŋ́oo mɛni, lɔii-ŋuŋ. Ŋa pâi ŋátɔ̂ŋ tɛɛ̂i ǹɔii-ŋuŋ-ŋai pɔ́, ŋátɔ̃yâ mɛni ŋá-teɛɛi kɛ́ ƃò a kwaa ponoɔɔ dímɛni ma.

⁵ Ŋá ŋuŋ ma ƃoi a lɛɣɛ̂i kpɔ́ a maa félaa. Ŋáŋuŋ ma ƃôi a lí kpɔ́ póŋ-poŋ. Ńyãa kpîŋ ƃé pâi kɛ̂i ŋánûai láa túɛ. Yúo kpono ma lɔii-ŋuŋ-ŋai da ḿaa kpɛ́nîi, kili kɛ̀ zú kɛ́ ƃò díyêei ḿaa mɛ̂ni ma a gɛɛ ŋá díŋuŋ ma ƃó.

⁶ Ka káŋɛi tɛ́ ɣelêi, ká ŋ̀elei su káa, ka ǹɔii ma káa. Ŋ̀elei su sãai kélee da pâi da pâi lánîi yɛ̂ɛ luri. Ǹɔii a pâi pɔlɔ̂i yɛ̂ɛ seɣe, zu-ƃela kélee dí sáa yɛ̂ɛ koôŋ-sãa. Kɛ́lɛ ŋáŋuŋ ma ƃô-laai káa ǹaa núu kélee mɛni ma wɔ́lɔ-wɔlɔ da wɔlɔ-wɔlɔ.

⁷ “Ka káwoli tɔ́ɔ ḿâ, káai kélee ká tɔ̃yâ mɛni kɔ́lɔŋ, ŋátɔ̂ŋ maa mɛni kɛ́ ƃò kálii ŋai. Káfe yào diai dîa da ɣɛ́lɛ maa kûla kákponôi, díkɛ kálàraŋ, dí gɛ́ kámaa é kpɛ̃liŋ.

⁸ Da pâi tɛɛ̂i yɛ̂ɛ fili-ŋa da seɣe mîi. Kolo-ŋa da pâi dímiî yɛ̂ɛ da yee fũ̂a m̀ii. Kɛ́lɛ ŋáŋuŋ ma ƃô-laai káa naa ǹúu suu-ŋai kélee mɛni ma wɔ́lɔ-wɔlɔ da wɔ́lɔ-wɔlɔ.”

⁹ Yâwɛɛ, ímu-siɣe, í kpɔ́ŋ kûa! Kúŋuŋ ma ƃó a íwala-walai, yɛ̂ɛ berei í gɛ̀ la kóraŋ támaa tɛɛ pôlu mai. Ƃía fé yúoi-zere kalii Leɣa su-tèe-tee a gbua-kpûaa?

¹⁰ Yá ƃé gɛ̀ yúo é kpála é tóo gáo ma, í pere láa zâmai, a gɛ́ɛ diai í díŋuŋ ma ƃoi, dí tɛ́ɛ naa.

¹¹ Diai Yâwɛɛ è díŋuŋ ma ƃoi, da pâi lenêi pôlu. Da pâi tɛ̂i Zerusâlɛŋ, díkɛ wule tôo, kâloŋ ƃɔrɔ-ŋa kɛ́ ƃò díŋûa, díkɛ koi-nɛ̃ɛ kula. Dílii fé pâi ŋɔ́nɔ toôi pôlu dí malôŋ see ƃó.

¹² Yâwɛɛ è m̀o ǹyɛɛi, “Ńyãa ƃa íŋa-nɛnɛ. Ya yaôi núu-kpune ma lé mɛni ma? Núu-kpune ǹônii káa nɔ́ yɛ̂ɛ kala.

¹³ Ya nia íkpɛtɛ nuui Yâwɛɛ ma íkɛ̀-ɣéniɛi su. Ǹyaa ƃé ŋ̀elei kpɛ̂tɛ, é ǹɔii zônoŋ su kɔni-ŋai lâa ǹâai. Lé ƃé yao káa nɔ́ la kákɔlɔi kákpɔara-ƃelai mɛ̂ni ma nyíi-ŋai díkpîŋ kpɛtɛɛi a gɛ́ɛ dí kásu-karai? Dílii ŋwânai fé pâi sɛŋ da kɛ̂i a kâa.

¹⁴ Diai kpini-pɛrɛ-ŋa mui, da pâi ŋuŋ ma ƃô sɔlɔ ƃôi ɣele kpɛ́-kpɛ̂ɛ tɛɛ́ pôlu ma. Dífulu-laai su a pâi kɛ̂i a gôyaa m̀ii-sãai maa nɛ̃ɛ̂i dímɛni mai, da kôlo fé pâi toôi dîa.

¹⁵ “Ńyãa ƃa Yâwɛɛ, Káɣâlai Ńyãa ƃé yúo tùmo-tumo gɛ́ tòo a gɛ́ɛ díŋ é kúla. Ńaa ƃa Ŋ̀wála-wâla kélee Yâwɛɛ!

¹⁶ Ŋá ŋ́oo pù ká lá, ŋá káloo ńyee pôlu. Ńyãa ƃé ŋ̀ele-kɔ̂lɔŋ fulomo ŋá ǹɔii zonoŋ su kɔni-ŋai láa ǹâai. Ŋá m̀o Zãiyɔŋ-ƃelai dîa, ‘Káa ƃa ŋánûai.’ ”

Zerusâlɛŋ ŋɔmɔ̃́lɛ-laai a kpɛɛ

¹⁷ Zerusâlɛŋ-ƃela, ka káŋɛi lá ƃó ká kámu-siɣe ká tɔ́ɔ. Yâwɛɛ a ká kula maa kɛ́ a ŋ̀ánaa, kákɛ kɛ̀ tàka-taka, yɛ̂ɛ ǹyaa ƃé ka lɔɔ kpéle, kɛ́lɛ ká kula maa kɛ́ɛ a nâa gula kɛ̂ɛ ƃó.

¹⁸ Kálaa túɛ-nuu fé ma é káteniŋ tɔ́ɔ. Núu da fé kásama é sía a káa. Kálônii-sinaai ká dímaa sɔlɔ ƃoi, da fé dísama é káyee sóŋ, é sía a káa.

¹⁹ Mɛni kpɔ̂lu seɛ́ɛ gîe mɛi feerɛ ŋánaa a láa kâa. Kɔ́ a kálɔii su kara, puru kɛ́ kápàa, Kámalôŋ káa nuu da fé ŋɔ́nɔ ma.

²⁰ Kálônii-sinaai da foâi, díkɛ ƃò lâani bere-lêe-ŋai ma. Da kɛ́ nɔ́ yɛ̂ɛ pîlaŋ sua a tòo loŋso ŋɔƃáre ŋá. Ɣâla líi ŋwânai dîa. Da too Ɣâla ŋɔƃárei ŋá.

²¹ M̀ɛni ma, káai a Zerusâlɛŋ-ƃelai mɔ̃́lɛ̂i, kákɛ kɛ̀ tàka-taka yɛ̂ɛ núu a lɔɔ kpele ǹyaŋ lɔɔ fé kâai,

²² Káɣâlai Yâwɛɛ nyíi a ká maa kɔ̃ɔi ǹyɛɛi, “Ŋá ńii ŋwàna kâa, ŋá gɛ́ kákɛ kɛ̀ tàka-taka yɛ̂ɛ núu a lɔɔ kpêle. Kɛ́lɛ ŋa pâi ńii ŋá yenîi kâa. Káfe pâi ŋɔ́nɔ kɛ̂i tàka-taka yɛ̂ɛ núu a lɔɔ kpêle.

²³ Diai kɛ̀ mɛni ŋánaa kɛ̂i a káai, dia ƃé ŋa pâi gɛ̂i tí a dia. Dí kɛ̀ m̀ôi kâa dîyɛɛ, ‘Ka láa kú sía kápôlu.’ Dí kɛ̀ siâi naa yɛ̂ɛ nûa da kɛ̀ siâi pere-lêe-ŋa ma.”