Azaya 5 - Bible

Ŋ̀ulei bîlaŋɔɔi gbɔmɔ kpâlaŋ mai

¹ Tɔɔ ŋá wule tóo ŋáwɛli kɛ́-maa nuui ma. Ŋáwɛli kɛ́-maa wulei pîlaŋɔɔi ŋɔkpɔmɔ kpâlaŋ ma. Ŋáwɛli kɛ́-maa nuui ŋɔkpɔmɔ kpâlaŋ è kɛ̀ lɔii lɛ́lɛɛ ma yée pɛ́rɛ ma.

² Ŋáwɛli kɛ́-maa nuui è gwaai ma sìŋ, é gɔni-ŋai kélee kúla naa. È kpɔmɔ kpâa lɛ́lɛɛ-ŋa sì naa. È yeŋkêŋ tɔ̀ɔ gbâlaŋ sâmai. È lóa tèe ƃɛ́i a pâi kɛ̂i gbɔmɔ-ƃai táŋ-nîi naai. È maa kpɛ̂ŋ kɛ̀ a gɛɛ gbɔmɔ-ƃai kpɔlu tãi é seri, kɛ́lɛ gbɔmɔ-ƃai kélee è kɛ̀ a gbona-kpônaa.

³ Nya ƃe ḿbarâŋ-nuui è mò ǹyɛɛi, “Káai a Zerusâlɛŋ da Zuda-ƃelai, ka káwoli tɔ́ɔ ḿâ. Ka kɛ́ a kúloai mɛni ŋá-tee ƃela kwa ŋákpɔmɔ kpalaŋ kúloai.

⁴ Lé tii kpîŋ ƃé gbɔmɔ kpâlaŋ ŋí ŋá ḿve niî gɛ́ níi? Kɛ́lɛ tãi ŋa lì la naai, ḿve ƃa lɛ́lɛɛ káa ní. Nyii ŋá gàa naai, è kɛ̀ a kpona-kpônaa ńyii ŋ́ili fé kɛ ni m̀ai.

⁵ “Ŋa pá nɛɛ̂i naa ká m̀ɛnii kɔ́lɔŋ ŋa pâi gɛ̂i a ŋá kpɔmɔ kpâlaŋ. Gbakii dínaŋɔ̂ɔi m̀ai, ŋa pâi ŋ̀ôlo-wôloi. Fɛnɛ-sãa da pâi kɛ̂i dílaa miî naa díkɛ ǹaa tàŋ-taŋ.

⁶ Ŋa pâi ǹɛɛ̂i naa galai yée é tɛ́ɛ m̀a. Ḿve pâi ǹaa kpɛtɛ̂i, kpaa máŋ ŋá galai fála naa. Ǹaa a pâi kɛ̂i nɔ́ a m̀ɛi-pɛlɛɛ a tânaŋ da ŋalêŋ kpɔlɔ. Ŋa pâi m̀ôi ŋ̀elei su ma a gɛɛ vé ŋɔ́nɔ nɛ̀ɛ naa tuna é pú naa.”

⁷ Gbɔmɔ kpâlaŋ ŋí káa a Ŋ̀wála-wâla kélee Yâwɛɛ pɔ́ɔ. Eezuɛ-ƃelai ƃa gbɔmɔ kpâlaŋ è zìi. Zuda-ƃelai ƃa ǹaa si-sãa lɛ́lɛɛ-ŋai. A ŋ̀wɛ̂li nûa díkɛ teniŋ-ƃô mɛni-ŋa kɛ̀, kɛ́lɛ díkaa nɔ́ núu paâi. A ŋ̀wɛ̂lii díkɛ tɔ̃yâ mɛni kɛ̀, kɛ́lɛ maloŋ too-maa wɔlɔ-woo nɔ́ ƃé a mɛni lá da díluanîi.

Azaya è lòno é pîlaŋ wôya mɛni kɛ́ɛ ma

⁸ Kpalo-ƃêlaai diai dîa da kɛ̂ pɛrɛ-ŋa tɔ̂ɔi gîe kɔlɛ, díkɛ lɔii kpîniŋ támaa maa sôŋ kwaa-ŋa ma díkɛ ǹya díkɛ bù dípɛrɛ-ŋai da dílɔii-ŋai dîa, dífa ǹɛɛ naa núu da kpɛ́ni-ŋa dí da sɔlɔ ƃôi. Da ŋ̀wɛli nɔ́ dí tèe-tee díkɛ ƃò seêni ǹɔɔi pûŋ sâmai dí tèe-tee.

⁹ Kɛ́lɛ, Ŋ̀wála-wâla kélee Yâwɛɛi, a môi ǹyɛɛi, “Tɔ̃yâ ma, bɛ́rɛ kpaya-kpaya lɛ́lɛɛ-ŋai ŋí kélee da pâi lɛɛ̂i a dípûŋ.

¹⁰ Dí máŋ kpɔmɔ ƃâ kpaa lɛ́lɛɛ sí éekà lɔ́ɔlu ma, ŋwã̂ai tìŋ tɔnɔ nɔ́ ƃé da pâi zɔlɔ ƃôi naa. Da kulûŋ puu kpalaŋ ŋá-tii kɛ̀, mɔlɔŋ-kûluŋ tɔnɔ nɔ́ ƃé da pâi dêei naa.”

¹¹ Kpalo-ƃêlaai diai dîa da dí mù sìɣe a ɣele wâla pɛ̀pɛ dí lɛ́ɛ lɔɔ kpelêi é lɛ́ɛ la zu ɣele wûlii é kɛ́, ǹɔɔi é dí kɛ́.

¹² Da kɛ̂ kɔnîŋ ɣalêi, díkɛ gbùŋ-gbuŋ tùa, díkɛ ƃɔɔ fɛ̂ɛ, díkɛ lɔɔ kpêle díkuu-ŋai su. Kɛ́lɛ dífa târe m̀ɛni-ŋai su Yâwɛɛ a gɛ̂i.

¹³ M̀ɛni ma, da pâi liî a dia luɛ-lâa su. Dílaa túɛ-ƃelai da pâi saâi a puru, dínûai dísaa a kpele wɛ̂li.

¹⁴ Puru ŋánaa káa saa-táa kɛ̂i. A ǹá táa kpɔ́ a zu kɛ́tɛ a gɛɛ é Zerusâlɛŋ nua kpaya-kpayai kpéle da ǹyóo-yoo-ƃelai da kɛ̂ lii-nɛ̃ɛ kulâi naai.

¹⁵ Ƃaa kûla-maa a pâi sɛ̂lɛnii núu-kpune ma. Ŋume a pâi yoŋka-ƃelai paâi.

¹⁶ Kɛ́lɛ Ŋ̀wála-wâla kélee Yâwɛɛi maa fa wɔ́lɔ yèŋ. Gáa a Ɣâla Maa Waa. A ŋɔteniŋ ƃô-laai lɛ̂ ŋɔmɛni ŋá-teɛɛ sã́ai su nyii a gɛ̀ ŋɔnûai samai.

¹⁷ Ƃála lônii-ŋa da pâi kɛ̂i dílaa miî daa pîleŋ-ŋai ŋá, ƃoli lônii-ŋa dia máŋ díkɛ díkɔnɔ̃ŋ sɔlɔ ƃô naa.

¹⁸ Kpalo-ƃêlaai diai dîa da sɔnyɔ̂ŋ ɣàla a lɛ́ɛ pere, díkɛ sɔnyɔ̂ŋ ɣàla a kéleŋ ɣála ɣɛlii.

¹⁹ Da kɛ̂ môi dîyɛɛ, “Tɔɔ Eezuɛ Ŋɔɣâlai é m̀ɛnii kɛ́ wɛ̀ a maa félaa. Tɔɔ é ŋɔkono-teei ŋàa-see kɛ́ wɛ̀ a maa félaa a gɛɛ kú nàa káa kúa kpîŋ. Tɔɔ Eezuɛ Ŋɔɣâla Maa Waai é ŋɔmɛni kpɛtɛɛi ŋàa sèe kɛ́. Tɔɔ kú m̀ɛni káa gáa gíli-ŋai.”

²⁰ Kpalo-ƃêlaai dîa. Da mɛni lɛ́lɛɛ sìɣe a mɛni nyɔ́mɔɔ, dí kɛ́ mɛni nyɔ́mɔɔ sìɣe a mɛni lɛ́lɛɛ. Kpíni káa díyêei a kwaa ponoɔɔ. Kwaa ponoɔɔ kɛ́ ƃò díyêei a kpíni. Sɛŋ nɛ̃ɛ ŋwânai dí lá. Sɛŋ ŋwánaa nɛ̃ɛ dí lá.

²¹ Kpalo-ƃelaai diai dîa da díkpîŋ tarei sîɣe nɔ́ a táre lɛ́lɛɛ é tɛ́ɛ núu kélee ŋ̀ɔi ma.

²² Kpalo-ƃelaai diai dîa da díkpîŋ sìɣe a wála-wala-ƃela lɔɔ kpele mɛni mai, dílii kpeléɛɛ lɔɔ sumoɔ́ɔ kpelêi.

²³ Kpalo-ƃêlaai diai dîa da yèe pɛlɛ ǹá sɛŋ-kao sòŋ, díkɛ nûa dímɛni-sâa ŋá tèe a wôya-perei.

²⁴ M̀ɛni ma, berei kpɔ́ ŋɔŋ a ŋuŋƃe kpâla da kala kpâla kèreŋ lai, bere ƃé Ɣâla a pâi gɛ̂i la a dia. Díkɔɔ a pâi lûlai dímu, díyee é kpála-kpàla dîa. A pâi kɛ̂i tí, kpɛ́ni fêi, da díyee kúla Ŋ̀wála-wâla kélee Yâwɛɛi nyii gáa a Eezuɛ Ŋɔɣâla Maa Waai ŋɔtɔ̂ŋ-ŋai mu.

²⁵ M̀ɛnii ŋí ƃa gɛ́ Yâwɛɛ a ǹíi ŋwána ŋɔnûai dîa. A dísu-kara a lii ŋwâna-pere. A gɛ́ ǹyée kpaya-kpayai da kpɛ̃lîŋ. Ǹûai poma a táa-tâa bere lêe-ŋai dîa. Berei máŋ gáa tí lai, Yâwɛɛ ŋɔlii ŋwânai ŋáa fé niî yeŋ ní ǹyaŋ a pâi dí kula maa kɛ̂i.

²⁶ A pâi ŋɛi-kɛ-maa maa-ŋa lɛ̂i ǹɔii-ŋûŋ-ŋai dîa nyíi-ŋai dínaa kôya-koyaai a gɛɛ dí pá. Diai ǹɔii kóyɛŋ mai, a pâi dítôlii a koro-wôo. Da pâi pâi Zerusâlɛŋ a kîrɛ.

²⁷ Díta fíi fé pâi kpɛɛ̂i kpaa máŋ é karêŋ. Díta fé pâi nyiî a ŋuŋ, kpaa máŋ nyii é tɛ́ɛ la. Díta ŋɔbɛ̂tii fé pâi têei, kpaa máŋ ŋɔkpáŋ-kpalii ɣɛli é tée.

²⁸ Dísɔla-ŋai ŋá séneɛ̂i, díkerâŋ-ŋai ŋá tɛ́ɛ. Díkɔ kɔ́-soo-ŋai sôlo kpanaŋɔ̂ɔi yɛ̂ɛ kɔni-ƃela-ŋa. Díkɔ kɔ́-keleŋ-ŋai da kîrɛ sìɣe yɛ̂ɛ tínaŋ fãa su-kpanaŋɔɔ.

²⁹ Díkɔ kuluƃa-ŋai da kɛ̂ lâɣii yɛ̂ɛ yala-sulu-ŋa da sua sôŋ díkɛ lì la díkɛ kpèɣe mɛi nyíi núu da fa pɔ̂ri gulâi díyêei.

³⁰ Maa ɣêlei tí, díkpeɣe wôo a pâi kɛ̂i Eezuɛ mɛi yɛ̂ɛ yúo too tîŋ. Malôŋ mɛni tee-tee a pâi kɛ̂i naa. Ŋ̀elei su a pâi kɛ̂i a gbíniɛɛ.