Azaya 48 - Bible

Ɣâla Yâwɛɛ ƃa tínaa tuɛ-pere mɛnii

¹ Káai a Eezuɛ-ŋai kùla Zuda ŋɔsuui sui, ka káwoli tɔ́ɔ ḿâ. Ká káfòo a Yâwɛɛ láa a gɛ́ɛ Eezuɛ Ŋɔɣâlai ǹyaa tɔnɔ nɔ́ ƃé ka pâi kɛ̂i vɛlîi. Kɛ́lɛ ka lɛ́ɛ kɛ̂i.

² Ka m̀ôi a yoŋka pere a gɛ́ɛ Zerusalɛɛŋ taa-lee maa waai su lonii ƃa káa. Kákili tɔɔ̂i Eezuɛ Ŋɔɣâlai Yâwɛɛ ma. Ǹáa ƃa Ŋ̀wála-wâla kélee Yâwɛɛ.

³ Kɛ́lɛ Yâwɛɛ a m̀ôi kâa ǹyɛɛi, “M̀ɛnii ŋa gɛ̂i, ŋá wɔ́lɔ m̀ó a tãi su kôyaa. Ǹyaŋ gélee è a m̀aa félaa.

⁴ Ŋá kɛ̀ a gɔ́lɔŋɔɔ a gɛ́ɛ kákaa a wolii kpɔ̂lɔ-ƃela. Káŋuŋ su kpanaŋɔɔ̂i yɛ̂ɛ kɔli da ƃara.

⁵ M̀ɛni-ŋai kélee kɛ̂i lônii mai, ŋa wɔ́lɔ dímaa mɛni ƃó kâa. Ŋá gɛ̀ tí a gɛ́ɛ káfa la m̀ó la a gɛ́ɛ kákpɛtɛ ɣâla-ŋai ƃé gɛ̂i díkɛ kɛ̀.

⁶ “M̀ɛni-ŋai ŋá m̀o a gɛ́ɛ da pâi kɛ̂i, da kɛ̂. Káa kpîŋ kákaa a maa sêre-ŋa. M̀ɛni-ŋai pâi kɛ̂i ŋa pâi m̀ôi kâa. Fé niî fúlɔi da maa kili ŋa pono tɛ̀ɛ ní káta pɔ́.

⁷ Da pâi kɛ̂i lônii ma. Díkaa a m̀ɛni-ŋai da fé tá kɛ́ ní a bɔlɔ. Dîi pà kɛ̂i, kâi m̀ôi a gɛ́ɛ ká mɛni da kɔ́lɔŋ é pîlaŋ dîa.

⁸ Fé kákili ŋá pono ní da mɛni su naa túɛ, kpɛ́ni fêi, fé láa ní a káa. Kákaa a tɔɔ-ma-ƃela é síɣe kámaa sɔlɔ ƃó tãi ma. M̀ɛnii ŋí ƃé gɛ̀ fé maa kili-ŋa pono tɛɛ ní la kápɔ, a gɛɛ ká táre zu.

⁹ “Ŋà pâi ńii maa sônii ńaai maa mɛni ma. Fé pâi kásu karâi. Ŋa pâi gɛ̂i tí a gɛ́ɛ ká ńaa maa tɛ́.

¹⁰ Ŋaâ kásu kɔ̀ɔŋ a mɛni kpɔ̂lu ŋánaa, ŋa kámaa kpɛ́ɛ yɛ̂ɛ núu a káne seɣeŋ a gbó kula ma, kɛ́lɛ fé mɛni lɛ́lɛɛ da kélee káa ní kákponôi

¹¹ M̀ɛni-ŋai ŋa gɛ̂i, ŋa gɛ̂i ńaai mɛni ma. Fé pâi ǹɛɛ̂i naa ƃâa é kúla ḿâ. Fé pâi ǹɛɛ̂i naa kwa núu da kú kpɔ́ŋ ŋáfolo-laai ma. Ŋáfolo-laai káa nɔ́ a ńyãa tɔnɔ ḿbɔɔ.”

Yâwɛɛ è Sarɔ sìɣe a ŋɔtíi kɛ́-nuu kɛ́tɛ

¹² Yâwɛɛ è mò ǹyɛɛi, “Káai a Eezuɛ lonii, Zeeka ŋɔsuui su-ƃelai, ka káwoli tɔ́ɔ ḿâ. Káa ƃé ŋa kásìɣe zu a ŋátii kɛ́-ƃela. Ŋa m̀ôi kâa a gɛ́ɛ ńyãa ƃa Ɣâla. Ńyãa ƃa m̀ɛnii kélee kɔ́ɔ-pîlanii da gbɛɛ ŋái.

¹³ Ńyãa ƃé ǹɔii kpóŋ sèe. Ńyãa ƃé ŋ̀ele-kɔ̂lɔŋ kpɛ̀tɛ ŋá dɛ́ ǹɔii m̀ɛi pere. Ŋa lòno dípɔ, da ŋ́oo m̀ɛni.

¹⁴ “Kákelee ka lɛɣɛ a kákîe-ni ká káwoli tɔ́ɔ. Kákpɛtɛ ɣâla-ŋai nenɛ̂ ƃé m̀ɛni-ŋai ŋí ƃo kâa naa túɛi a gɛ́ɛ ŋátii kɛ́-nuui Sarɔ a pɔ̂ri kɔ́ pɛlɛ̂i Babelɔŋ ma é naa-ƃelai yée mɛi ɣálei?

¹⁵ Ńyãa ƃé Sarɔ tòli. Ŋa pâi deniŋ tɔɔ̂i gɛ́ mɛni kélee su. M̀ɛnii kélee a pâi gɛ̂i, a pâi ƃûu ƃôi ǹyêei.

¹⁶ “M̀ɛni ma, ka lɛɣɛ a ńyãa ká káwoli tɔ́ɔ m̀ɛnii ma ŋa pâi m̀ôi kâai. Fé m̀ɛni-ŋai ŋí da ƃó ní kâa loo perei a gɔ́ɔ pîlanii. M̀ɛni-ŋai kélee ŋa m̀ôi gáa a tɔ̃yâ.” Ǹuu-namui Yâwɛɛ a ŋɔmɔ̂leŋ pú ŋ́gbonôi a ńdɛɛ.

Yâwɛɛ è mɛni kpɛtɛɛ kɛ̀ ŋɔnûai mɛni ma

¹⁷ Eezuɛ Ŋɔɣâla Maa Waai, Yâwɛɛ nyii gáa a Eezuɛ ŋuŋ ma ƃó Ɣâla Maa Waai a m̀ôi ǹyɛɛi, “Ńyãa ƃa Káɣâlai Yâwɛɛ. Ŋa sɛŋ lɛ̀ kâa a gɛ́ɛ ká mɛni lɛ́lɛɛ sɔlɔ ƃó zu, ŋ́gɛ káteniŋ tɔ̀ɔ ƃɛ́i maa nɛ̃ɛ̂i ka lí naai.

¹⁸ “Kâi ŋátɔ̂ŋ-ŋai mɛi kâa, lii-sêe êei kɛ̂i káyêei yɛ̂ɛ ya-lêe, káteniŋ ƃô-laai kɛ́ ƃò káyêei yɛ̂ɛ yúo à kɛ̀ toôi.

¹⁹ Kálônii dîi pâi kɛ̂i a dítamaa yɛ̂ɛ ŋãya, díwɔ̂ lonii támaa yɛ̂ɛ yûo ma ŋãya. Fêi pâi ǹɛɛ̂i naa dílaa é kpɛ́ɛ ǹɔii ma, kpaa máŋ lɔii-ŋuŋ su-ƃela dí dísu kara.”

²⁰ Ka lí ká kúla Babelɔŋ lɔii su. Ka pú ká kúla Babelɔŋ-ƃelai yêei. Ká lí ká ǹíi-nɛ̃ɛ tuŋ ƃó kwaa kélee ma ɣelêi-pere a gɛ́ɛ nûa kélee dí mɛni. Ka lí ká mó kâai, “Yâwɛɛ è ŋɔtíi kɛ́-ƃelai Eezuɛ-ŋai ŋuŋ ma ƃó.”

²¹ È díkùla vɛ̃ɛ-kpâlaŋ su fãai su. Kpele-wɛ̂li fé ŋɔ́nɔ dípaa ní. È gɔnii ƃêla, yá é kúla zu dí gbele.

²² Yâwɛɛ è m̀o ǹyɛɛi, “Lii-sêe fé ŋwana-lɔ̂ɔ nuu da mɛni ma.”