Azaya 38 - Bible

Gâloŋ Ɛsekaya è kɔ̀lɛ, é ƃálo

¹ Tãi tɔnɔ da Gâloŋ Ɛsekaya è kɔ̀lɛ kpɔ́ ǹaa é lɛ́ɛ a gùro-té gɛ́ pà saâi. Nya ƃe Emɔ ǹóŋ Azaya è lì bɔ́ naa a gɛ́ɛ é gáa. Azaya è kɛ̀ a Ɣâla ŋɔlóno kɛ́-nuu. È m̀o Gâloŋ Ɛsekaya ma ǹyɛɛi, “Yâwɛɛ a m̀ôi yâ a gɛ́ɛ í íkɛ-mɛni-ŋai kélee pú ŋ̀ɛli ma, kpɛ́ni fêi, ífe pâi kulâi gɔlɔ-fêlai ŋí su. Ya pâi saa tí-ti ƃôi.”

² Nya ƃe Gâloŋ Ɛsekaya è tìnaŋ bɛ́rɛ kâŋ ma pere é Ɣâla fɛli ǹyɛɛi,

³ “Óo Ŋáɣâlai Yâwɛɛ, ḿaa mɛ̂ni kíli é lɛ́ɛ íŋa. Gáa, ŋa tíi kɛ́ yɛ̂ a ńii kélee a teniŋ ƃô-pere. Ŋa kɔ́ kpɔ́ a zu kôyaa a gɛ́ɛ ŋá m̀ɛni-ŋai kɛ́ nyii-ŋai yà m̀o ḿâi.” Nya ƃe Ɛsekaya è wɔ̀lɔ kpɔ́ a ŋ̀ánaa.

⁴ Ǹaa pôlu ma, Yâwɛɛ è mò Azaya ma

⁵ a gɛɛ é lí pôlu Ɛsekaya pɔ́ naa a ŋorɛ̂-wooi ŋí. “Ɛsekaya, ńyãa ƃa Yâwɛɛ Ɣâla nyii ínâŋ pɔlɔi Deeƃé a kâa vɛ̀lii. Ŋaâ ífɛli-wooi mɛ́ni, ŋa íkaa íkɛ wɔ́lɔ ḿâ. Ŋa pâi ǹɛɛ̂i naa íkɛ ɣele ma a kóraŋ puu káo lɔ́ɔlu.

⁶ Ŋa pâi íŋuŋ-maa ƃôi ka Zerusâlɛŋ taa-leei ŋí Asiria kaloŋ yêei. Ŋa pâi daa-lêei ŋí maa-kɔ̃ɔ̂i.

⁷ “Ńyãa Yâwɛɛ ŋa pâi ŋɛi-kɛ-maa sîi da lɛ̂i yâ nyii pâi ǹɛ̂i yâ a gɛ́ɛ m̀ɛnii ŋa m̀ôi, ŋa pâi ŋ̀aa-see kɛ̂i.

⁸ Gâlai Gâloŋ Eeɣa è dɔ̀ɔi, ŋa a pâi gɛ̂i ǹinîŋ é lí pôlu-pere a kɔ́ɔ ƃɔ́rɔnîi puu.” Nya ƃe vóloi è lène pôlu a kɔ́ɔ ƃɔ́rɔnîi puu.

⁹ Tãi Gâloŋ Ɛsekaya è kùla la gɔlɔ-fêlai sui, è laa maa-tɛ̂ wule tɔnɔ pɔ̃̀yɛ ǹyɛɛi,

¹⁰ “Ŋá kɛ̀ gâai ŋa pá saâi nɔ́ tãi kpua yée mu, ŋá lí zaa-ƃelai pɔ́ naa, ŋá ŋáɣeniɛi kpéli kpɛ́ɛ naa-pere.

¹¹ Ŋá kɛ̀ gâai fúlu-sãa kélee sáma ŋ̀éniɛi ŋí su, fé kɛ́ ní ŋɔ́nɔ pâi Yâwɛɛ kâai, kpaa máŋ núu-kpune da.

¹² Ŋáfulu-laai è kɛ̀ nɔ́ pâi kùla ńyêei yɛ̂ɛ da ƃûu tàa. È kùla nɔ́ ńyêei yɛ̂ɛ yee a kùla gena ma. Ŋá kɛ̀ gâai yɛ̂ɛ Ɣâla a pá ŋáfulu-laai kulâi ńyêei ƃe tí.

¹³ Ŋá wɔ̀lɔ a kpíni da fólo yɛ̂ɛ ǹyaa ƃé yala-sûlu a kɛ̀ ŋ́gao ɣâlei ŋ́gbonôi. Ŋá kɛ̀ gâai yɛ̂ɛ Ɣâla a pá ŋáfulu-laai kulâi ńyêei ƃe tí.

¹⁴ Ŋ́gɔlɔ è kɛ̀ saâi ḿâ, ŋ́oo ŋá yeŋɔɔ. Ŋá kɛ̀ nyîɣɛi yɛ̂ɛ tòloŋ, ŋ́ɛi fa ŋɔ́nɔ kwaa kâa a ǹɛ́lɛɛ. Ǹuu-namui, ŋ́uŋ ma ƃó í ŋ́gula m̀ɛni-kpɔ̂lui ŋí su.

¹⁵ Lé ƃé ŋa pɔ̂ri m̀ôi? Yâwɛɛ ǹyaa kpîŋ a m̀ɛnii ƃó ḿâ a pâi gɛ̂i, ǹyaŋ a gɛ̂i. Ńii ŋwânai, nyii fé pâi ŋ́ɛi.

¹⁶ Ǹuu-namui, ŋa pâi kɛ̂i ɣele ma yá tɔnɔ í mɛni ma. Ḿalo mî, í ǹɛɛ naa ŋá lɛ́ɛ ɣele ma.

¹⁷ Ya ŋá lii-ŋwânai pene a lii-nɛ̃ɛ. Ya ŋ́uŋ ma ƃó, ya ŋ́gula mɛni nyɔ́mɔɔ támaa perei. Ya ńzu mɛ̂ni lɛɛ ŋásɔnyɔ̂ŋ-ŋai kélee mɛ̂ni ma.

¹⁸ Saa-nûu da fa pɔ̂ri ílaa maa tɛ̂i saa-táa. Kili kɛ-zu fé saa-nûu da yêei íteniŋ ƃô-laai mɛ̂ni ma.

¹⁹ Vúlu-ƃelai nɔ́ ƃé da pɔ̂ri ílaa maa tɛ̂i yɛ̂ɛ berei ŋa gɛ̂i lai. Ǹóŋ káa-ƃelai nɔ́ ƃé da íteniŋ ƃô-laai maa mɛni ƃò dínîa-pɛlɛɛi dîa.

²⁰ Yâwɛɛ, ya ŋ́uŋ ma ƃó. Kwa pâi wule toôi, kú ɣale-sãa ɣale, kú ílaa maa tɛ́ a fólo da kpíni Ípɛrɛ Kɛ́tɛi mu.”

²¹ Gâloŋ Ɛsekaya é lɛ́ɛ pâi ƃâloi, Azaya é mò ma a gɛ́ɛ é fîi-wurii m̀á da kùla é gîiŋ é gbɔrɔ pɛ́lɛ m̀ũai-ŋá, gɛ̀ ní a pâi ƃâloi.

²² Gâloŋ Ɛsekaya è Azaya marê kɛ̀ ǹyɛɛ mai, “Ŋ̀ɛi kɛ́-maa ƃa lé pâi ǹɛ̂i ḿâ a gɛ́ɛ ŋa pâi ƃalôi, pɔrî kɛ́ ƃò ńyêei ŋɔ́nɔ a gɛɛ ŋá lí pôlu Ŋ̀âla-pɛrɛ Kɛ́tɛi mui?”