Azaya 32 - Bible

Teniŋ-ƃô kâloŋ

¹ Kâloŋ tɔnɔ da a pâi pâi a ɣele da. A pâi kâloŋ-laa kɛ̂i a ƃɛlɛ pêre. A pâi ŋɔnûai mɛi kâai a teniŋ-ƃô pere. Ŋɔtíi kɛ́-ƃela kpaya-kpayai da pâi tíi kɛ̂i a teniŋ-ƃô-pere

² Gâloŋ ŋí da ŋɔtíi kɛ́-ƃela kpaya-kpayai da pâi Eezuɛ maa kɔ̃ɔ̂i ŋɔkpɔara-ƃelai yêei. Da pâi kɛ̂i m̀ɛi yɛ̂ɛ ya-ɣɛ̂li ƃé ɣilînii lɔii kpâla ma. Da pâi kɛ̂i m̀ɛi yɛ̂ɛ kɔni kɛ́tɛ niniŋ fɛ̃ɛ-kpâlaŋ su.

³ À kɛ̀ tí Eezuɛ-ƃelai da pâi díŋɛi lá-ƃôi dí díwoli tɔ́ɔ Ɣâla ma.

⁴ Diai da mɛni ŋá tèe a maa félaai, da pâi díkpîŋ tãi siɣêi mɛni ŋá tée mɛ̂ni ma. Diai dínɛŋ ɣiriɛɛi, dínɛŋ lá a pâi fúlonîi.

⁵ Núu da fé pâi ŋumɛ mâa tɛɛ̂i diai dítarei fé seri ní zui da pɔ́, kpaa máŋ é ƃaa kɛ́-maa tɛ́ɛ wôya-nuu da pɔ́.

⁶ Ǹúui ŋɔtárei lá fé fɛ́ɛ níi, m̀aa lono nɔ́ ƃé a gɛ̀. M̀ɛni kélee a mò kpaa máŋ é gɛ́i, gélee tɔɔ̂i Yâwɛɛ ma. Mɛni nyɔ́mɔɔ-ŋa nɔ́ ƃé a gíli ŋá sìa é pîlaŋ dîa. Gɛ-mɛni kélee tɔɔ̂i Yâwɛɛ ma. A nɛ̃ɛ ma puru é núu da pàa, kpaa máŋ kpele-wɛ̂li, vé kpáan m̀aa-nûui mɛ̂ni ma.

⁷ Ǹúui ŋɔtárei fé seri ní zui, káa a núu nyɔ́mɔɔ, gɛ́ mɛni nyɔ́mɔɔ sii támaa kɛ̀. A gôlo-ƃelai su kàra a ŋɔlɛ́ɛ mɛni-ŋai, va ǹɛɛ naa dí dítɔ̃yâi sɔlɔ ƃó.

⁸ Kɛ́lɛ ǹúui dáreɛi, a tûa a ƃaa kɛ́-maa-pere. È wɛ́lini a tɔ̃yâ mɛni.

M̀ɛni ŋá-teɛɛi da sɛŋ kɛ́ɛ a gɛ́-pere pɔlɔi

⁹ Nɛyâa, ka kámu-siɣe ká tɔ́ɔ káai kánîa kɛ̂i, lii-sɛ̂lɛŋ da fé kâai, ka káwoli tɔ́ɔ ḿâ.

¹⁰ Kálii lâai lonii ma, kɛ́lɛ kálii a pâi toôi pôlu kóraŋ tɔnɔ tɛɛ pôlu ma. Kákɔnɔ̃ŋ kélee a pâi kpɛɛ̂i.

¹¹ Ka wɔ́lɔ tûa kánîa kɛ̂i. Lii-sɛ̂lɛŋ da fé kâa. Kɛlɛ yao a pâi pâi kákɔlɔ̂i lonii ma. Ka kámaa kpôloŋ ká malôŋ seɣe too kâa.

¹² Ka kákeŋe lá túa ká sée ká wɔ́lɔ a malôŋ-pere, kpɛ́ni fêi, kási-sãa sí kwaa-ŋai ma kélee su a kara.

¹³ Kala nyɔ́mɔɔ-ŋa da kpɛtɛ naa, ǹaa kélee a kɛ́ a ɣalêŋ kpɔlɔ-ŋa. Ka wɔ́lɔ ká taa-lêei mɛ̂ni ma nyii ká kɛ̀ naa kákɛ lii-nɛ̃̂ɛ kulai.

¹⁴ Núu da fé pâi lɛɛ̂i gâloŋ-pɛrɛi mu. Ǹaa a pâi lɛɛ̂i kpɛ́ni-kpɛni. Dímaa kɔ̃ɔ lɔii-ŋuŋ-ŋai da ziɣãŋ-ŋai dí tínaŋɔɔ̂i daa-lêei mai, gélee su a pâi karâi. Ǹaa a pâi kɛ̂i a fɛnɛ-sãa kɛ̂i da taa-tûlɛ-ŋa láa miî.

¹⁵ Ǹaa à kɛ̀ tí, Ɣâla a pâi ŋɔmɔ̂leŋ tɛɛ̂i. Ǹɔii a pâi ŋɔ́nɔ penêi a lɔii lɛ́lɛɛ sí-sãa kpɛtɛ mɛ̂ni ma.

¹⁶ Nûa da pâi kɛ̂i tɔ̃yâ da teniŋ-ƃô mɛni-ŋa kɛ̂i ǹɔii gwaa kélee.

¹⁷ Mɛi-kâa laa lɛ́lɛɛ mɛni da lii-sêe da pâi kɛ̂i ǹɔii su. A pâi kɛ̂i tí, kpɛ́ni fêi, nûa da pâi kɛ̂i tɔ̃yâ da teniŋ-ƃô mɛni-ŋa kɛ̂i a díkîe-ni.

¹⁸ Ɣâla ŋɔnûai dífe pâi ŋɔ́nɔ kɛ̂i lii-sɛ̂lɛŋ su. Díŋuŋ ma a pâi kɛ̂i a m̀óɔɔ díkɛ ƃò lii-sêe su.

¹⁹ Kɛ́lɛ sãɔɔ a pâi pûi ŋ̀olâi su, daa-lêei é wólo.

²⁰ Yá a pâi kɛ̂i naa zí-sãai mɛni ma, kala támaa kɛ́ ƃò naa ǹiŋa-ŋai da ŋ̀wɛlɛ-sôo-ŋai mɛni ma. Ǹyaŋ a pâi kɛ̂i a lii-nɛ̃̂ɛ núu kélee ma.