Azaya 29 - Bible

Zerusâlɛŋ su-kara mɛni

¹ Kpalo-ƃêlai Ɣâla ŋɔtêbelei, Deeƃé ŋɔtaa-lêei Zerusâlɛŋ ma. Daa-lêei ŋí Deeƃé è wɔ́lɔ kɛ̀ seêni zu gɛ́ sama-sãa támaa tɛ̀ɛ, gɛ́ kúu kpaya-kpaya-ŋa kɛ̀ a kóraŋ kéleei, ǹaa su a pá karâi.

² Yâwɛɛ a pâi mɛni kpɔ̂lu ŋánaa lâai ǹaa-ƃelai dîa. Díla-sɛŋ nɔ́ ƃé pâi kɛ̂i a wɔ́lɔ su-kɛ́tɛ. Ǹaa a pâi kɛ̂i a Ɣâla-teƃele nyíi ŋ̀á kélee káa a ŋãa tee-teei.

³ Yâwɛɛ a pâi naa maa tînani é naa soŋ ƃéla kélee ma.

⁴ Zerusâlɛŋ taa-leei, ya pâi kɛ̂i wɔ̂lɔi yɛ̂ɛ mɔ̂leŋ ƃé wɔ̂lɔi ŋ̀óo kɛ́ kùla ǹɔii mu-pere nyíi núu da fa târe zui.

⁵ Zerusâlɛŋ, íkpɔara-ƃelai kélee su a pâi karâi. Da pâi lâni kpɔ́ nɔ́ yɛ̂ɛ fãa a tɛ̀ɛ a muluŋ-kpôlo. Ǹyaŋ a pâi kɛ̂i tí a màa félaa, gúlaa a núu. À kɛ̀ tí,

⁶ Ŋ̀wála kélee Yâwɛɛi a pâi íŋuŋ ma ƃôi a ŋ̀ele-gbâna ŋɔŋ, lɔii wóloɔɔ zu, tínaŋ-fãa su kpanaŋɔɔ da ŋɔŋ lêŋ su kɛ́tɛ.

⁷ À kɛ̀ tí, gɔ-kuluƃa-ŋai kélee kɔ̂i daa-lêei pɔ́i, Ɣâla a pâi dísu-karâi da díkɔ kɔ́-sãai kélee. Dímaa mɛ̂ni a pâi kɛ̂i nɔ́ yɛ̂ɛ see-woo nyii kûla núu kíli ŋá a màa félaai.

⁸ Ǹɔii-ŋuŋ-ŋai da gbɛ̀tɛ a gɛ́ɛ dí kɔ́ pɛ́lɛ Zerusâlɛŋ mai, díƃoloŋɔɔ̂i ǹúui ma puru a zoŋ a ŋ̀ánaa nyii a tɛɛ la a pela nyiî-pere, a ŋ̀ɛ́i lá-ƃo burui kɛ́ ƃò m̀ai, kpaa máŋ díƃoloŋɔ̂ɔi ǹúui ma kpele-wɛ̂li ŋánaa káa m̀a, nyii a tɛɛ la, a gbele seêi-pere, a ŋ̀ɛ́i lá-ƃo, gbele-wɛ̂lii kɛ́ ƃò niî m̀ai.

Núu kɛ́ɛ va ǹyée sèe lia-wôo mu

⁹ Ka kɛ́ tûai yɛ̂ɛ ƃoo-ƃela ǹyaŋ káfe ƃoo ní! Ka kɛ́ nɔ́ tûai yɛ̂ɛ ŋɛi-pu-ƃela ǹyaŋ káŋɛi fé pú ní! Ka kɛ́ nɔ́ kɛ̂i tàka-taka ǹyaŋ lɔɔ fé káŋuŋ su!

¹⁰ Káai a Ɣâla ŋɔlólo kɛ́-ƃelai, Yâwɛɛ a kákɛ tiiyɔɔ. A pá kápûi nyii su-kôyaa su. Káa ƃé ǹɛ̂lɛɛi ká kɛ́ a ŋ̀ɛ́i-gao, kɛ́lɛ kátûa-pere a gɛ́ a káŋɛi pú.

¹¹ Káfe ŋɔ́nɔ târei ŋ̀orɛ̂ woo-ŋai su Ɣâla a dɛ̀ɛ a káa zĩ̂a sui. Dímaa mɛ̂ni a kɛ́ nɔ́ yɛ̂ɛ kɔlɔ ƃé yɔlɛ kpíniŋɔɔ̂i la kpoo toɔ́ɔ ǹá zɔɔŋ toɔ́ɔ. Ya m̀aa kɔ̂lɔi tɛ̂ɛ kɔlɔ lóno-nuu da pɔ́ yɛ̂ ma kpera yɛ̂ gɔlɔi ŋí lóno ḿî, a pâi m̀ôi yâ a gɛɛ va pɔ̂ri gɔlɔi ŋí lônoi, kpɛ́ni fêi, ǹáa tɛ̂ɛi zɔɔŋ toɔ́ɔ.

¹² À kɛ̀ máŋ yà dɛ̀ɛ núu da pɔ́ nyíi vé kɔlɔ kɔ́lɔŋ yɛ̂ m̀a kpera yɛ̂ gɔlɔ ŋí lóno ḿî, a pâi m̀ôi yâ a gɛɛ vé kɔlɔ kɔ́lɔŋ.

¹³ Ǹuu-namui è m̀o ǹyɛɛi, “Ǹûai ŋí da lɛɣɛ̂i nɔ́ a ńyãa a díla-woo folo. M̀aa kɛ́-maai da dɛɛ̂i ḿbɔi, vé kulâi dílii su. Da ḿvɛlîi nɔ́ kpɛ́ni-kpɛni. Díɣâla mɛni kɛ́ɛi káa nɔ́ a núu-kpune tûa-pere nyíi-ŋai da m̀aa kɔ́ri, gɛ́ ƃò díli ŋai.

¹⁴ M̀ɛni ma, ŋa pâi mɛni mĩli-miliɛɛ-ŋa da mɛni kpaya-kpaya-ŋa kɛ̂i díŋɛi. Ŋa pâi gɛ̂i dáre-ƃelai dísamai, díkili ŋá é tɛi, ŋá gɛ́ mɛni lɛ́lɛɛ da kélee fa kûla ŋ̀ôya tare-ƃelai kponôi.”

Gili kɛ zúi gáa tínaa tuɛ-pere mɛni mai

¹⁵ Kpalo-ƃêlai diai dîa da dímɛni kpɛtɛɛ-ŋai lôo Yâwɛɛ mai. Dímɛni kpɛtɛɛ-ŋai kélee káa loo-pêrei. Da kɛ̂ gâai yɛ̂ɛ núu da fé díkâai.

¹⁶ Da m̀ɛnii kélee kpâmo a dôŋ. Pɔ̂rɔ leɣi da gbɛtɛ-nuu, gbɛ̂ɛ ƃé mɛni kpanaŋɔɔ̂i? Ǹúui a sɛŋ da kpɛtɛi, m̀aa sɛ̂ŋ a pɔ̂ri m̀ôi maa nuui ma ǹyɛɛi, “Yá fé ŋ́gbɛtɛ ní,” kpaa máŋ é mó ǹyɛɛ, “Ífe m̀ɛnii kɔ́lɔŋ ya gɛ̂i”?

¹⁷ Ǹaa kuro à kɛ̀ tí, wôla a pâi pênei a kpâlaŋ ŋá tii kɛ́ lɔɔ, kpâlaŋ ŋá tii kɛ́ lɔɔ kɛ́ pène a wôla.

¹⁸ M̀aa ɣêlei tí, diai díwoli tíniŋɔɔ̂i, da pâi mɛni mɛnîi. Núu à kɛ̀ kɔlɔ lônoi díkɔlɛ, da pâi m̀aa nûui ŋɔkɔlɔ lóno-wooi mɛnîi. Ŋ̀ɛi-pu-ƃelai da pâi kwaa kâai.

¹⁹ Yâwɛɛ a pâi gɛ̂i lii-nɛ̃ɛ kɛ́ ƃò diai dîa nûa díkɛ̀ lúanii. Eezuɛ Ŋɔɣâla Maa Waai a pâi gɛ̂i gôlo-ƃelai dí kɛ́ lii-nɛ̃ɛ kùla.

²⁰ Diai da nûa maa yâo díkɛ sãa kùla díyêei, da pâi lânii. Diai da ɣɛ́lɛ maa kûla Ɣâla kponôi, díŋuŋ lá a pâi pilîi. M̀ɛni nyɔ́mɔɔ kɛ́-ƃelai kélee su a pâi karâai.

²¹ Diai kélee da lɛ́ɛ pɛ̀lɛ nûa dîa a gɛ́ɛ dímɛnii é nyɔ́ŋ m̀ɛni-sâa ƃó kwaa mai, Ɣâla a pâi m̀aa-ƃelai su-karâi. Diai da tɔ̀ɔ m̀ɛni nyɔ́mɔɔ kɛ́-ƃela pôlu a wôya pere a gɛ́ɛ ǹúui zɔŋ fé m̀aa mɛ̂nii su ŋɔmɛnii é nyɔ́ŋ, Ɣâla a pâi maa-ƃelai kula maa kɛ̂i.

²² M̀ɛni ma, Eezuɛ Ŋɔɣâlai nyíi Eberaɣɛ̃ɛ ŋuŋ ma ƃò mɛni kpɔ̂lu su a m̀ôi ǹyɛɛi, “Ŋánûa, fé pâi ńyee kulâi kámu káƃɛlɛ é tóo. Fé pâi ǹɛɛ̂i naa núu da é ká ŋumɛ.

²³ Ka kákpɔɔi lonii kâa kásama, nyii ŋá dɛ̀ɛ kápɔi, ka pâi gɔ́lɔnîi a gɛ́ɛ ńyãa ƃa Eezuɛ Ŋɔɣâla Maa Waai. Gɛ̀ ní, ka pâi ŋ́gɔlɔnîi ká ńaa síɣe a m̀aa waa, ka ƃaa kɛ́-maa tɛ́ɛ ḿbɔ, ká ńyãai a Eezuɛ Ŋɔɣâlai láa maa tɛ́.

²⁴ Diai dítarei lá fé fɛ́ɛ níi, da pâi târei ḿaa mɛ̂ni su, dí ŋásɛŋ-lɛɛi maa mɛ̂ni siɣe a tɔ̃yâ.”