Azaya 2 - Bible

Wɔ́lɔ-wɔlɔ da wɔlɔ-wɔlɔ lii-see

¹ Ŋ̀orɛ̂-wooi ká ŋí Ɣâla è dɛ̀ɛ a Emɔ ǹóŋ Azaya a gɛɛ é mó Zerusâlɛŋ da Zuda-ƃelai dîai.

² Ɣele-ŋa da pâi, maa tãi tí, ǹyéei Yâwɛɛ Ŋɔpɛ́rɛ Kɛ́tɛi káa tɔɔ-ni mai, a pâi kɛ̂i ŋ̀éniɛi su yee kpaya-kpayai kélee mɛi. A pâi kɛ̂i a dɔɔ́ dɛɛ́ ǹyée-ŋai kélee dîa. Lɔii-ŋuŋ-ŋa su-ƃela da pâi kɛ̂i kɔ̂i a gɛ́ɛ dí tɛ́ naa.

³ Núu támaa da pâi pâi dîyɛɛi, “Ka pá kwáa lí Yâwɛɛ ŋɔyéei tôŋ su. Ka pá kwáa lí Zeeka Ŋɔɣâlai Ŋɔpɛ́rɛi mu. Ǹaa ƃé a pâi m̀ɛni-ŋai lɛ̂i naa kûa a gɛ́ɛ kú sía a dia. Nyíŋi ƃé pâi gɛ̂i kú kúɣeniɛi kɛ́ yɛ̂ɛ berei a ŋ̀wɛ̂lii lai. Kɛ́lɛ Yâwɛɛ ŋɔsɛŋ lɛ́ɛi a kûla Zerusâlɛŋ. Zãiyɔŋ Yeei ma ƃé a lôno naa ŋɔnûai pɔ́.”

⁴ Ǹuu-namui a pâi mɛni su kpɛtɛ̂i núu támaa loai. A pâi mɛni su kpɛtɛ̂i ǹɔii-ŋuŋ wála-wala-ŋai sáma. Da pâi díkɔ-kɔ ƃoa-sɔkpɔ-ŋai ɣalêi a kwaa sí kali. Da pâi díkpala-ŋai ɣalêi a mɔlɔŋ tée ƃoa-ŋa. Lɔii-ŋuŋ da fé ŋɔ́nɔ pâi kɔ́ pɛlɛ̂i m̀arâŋ lɔii-ŋuŋ ma. Dífe pâi ŋɔ́nɔ kɔ́-kɔ pere ma kɔ̂rii.

⁵ M̀ɛni ma, káai a Zeeka ŋɔsuui su-ƃelai, kwaa sia gwaa ponoɔɔi su nyii Yâwɛɛ a dɛ̀ɛ kúpɔi.

Ɣâla a pâi ǹyoŋka-ƃelai su-karâi

⁶ Óo Ɣâla, yaâ íyee kúla ínûai mu nyii-ŋai díkaa a Zeeka ŋɔsuui su-ƃelai. Da ǹɔii láa fɛ́ɛ a póniŋ kɛ́ pêre sii támaa nyii-ŋai kùla vóloi kulâi-pere da nyii-ŋai kùla Felesia-ŋai dílɔii sui. Da díyee sée lɔii-ŋuŋ da kpɛ́ni-ŋa su-ƃela tûa-pere mu.

⁷ Eezuɛ lɔii tɔɔ̂i a káne da gôo. Dífe pâi kpɛɛ̂i naa. Kɔ́ kɔ́-soo da kɔ́-keleŋ tâmaai naa. Dífe pâi kpɛɛ̂i naa.

⁸ Dílɔii láa fɛ̂ɛi a ɣâla-pɔkɔɔŋ támaa. Da zãai fɛ̂li nyii-ŋai dia kpîŋ dí díkpɛ̀tɛ a díyeei.

⁹ Ƃâa a pâi kulâi núu-kpune ma é ŋumɛ. Yâwɛɛ, ífe dísu-mɛni lɛ̀ɛ!

¹⁰ Ka pú ká tɛ́ ǹyée-ŋai tôŋ su ká káloo gɔni wôlo-ŋai su. Ka lóa tée ǹɔii ma ká pú kálɔ zu ká kúla Yâwɛɛ ŋɔlii-ŋwânai da ŋɔfólo-laa kɛ́tɛi perêi.

¹¹ Ɣele a pâi tãi Yâwɛɛ a pâi núu-kpune ŋɔsu-mɛni kɛ̂tɛi da ŋɔyoŋka mɛni-ŋai kélee kperâi. Yâwɛɛ ǹyaa tɔ̂nɔ kpéŋ nɔ́ ƃé núu-kpune a pâi kɛ̂i ǹáa maa tɛ̂i, gɛ́ ƃaa kɛ́ maa tɛ̂ɛ bɔ́.

¹² Ŋ̀elei tí ƃé Ŋ̀wála-wâla kélee Yâwɛɛi a pâi ŋ̀wála-wala-ƃelai kélee yée mɛi ɣâlei la, é ǹyoŋka-ƃelai da ŋ̀ɛi-tɛ-ƃelai ŋáa yéŋ.

¹³ Ŋ̀elei tí ƃé, a pâi ŋɔ́nɔ Lɛƃanɔŋ sîda wuru kpaya-kpaya koya-koyaai su karâi la. A pâi mɛni tɔ̂nɔi tí kɛ̂i a ôo wuru-ŋai díkaa Basãŋ lɔii sui.

¹⁴ A pâi ǹyée pɛlɛ-pɛlɛɛi da gbaya-kpayai wôloi, ǹaa é kɛ́ a nɛ́ɣɛ ŋá.

¹⁵ Ǹyeŋ-keŋ-ŋai da zĩɣaŋ-ŋai díkaa a núu maa kɔ̃ɔ kwaa mai, a pâi gélee wôloi.

¹⁶ A pâi tîma kpaya-kpaya lɛ́lɛɛ-ŋai da kûla Sipîiŋ lɔii sui, kélee su kara-kârai.

¹⁷ A pâi núu-kpune ŋɔsu-mɛni kɛ̂tɛi da ŋɔyoŋka mɛni-ŋai kélee kperâi. Yâwɛɛ ǹyaa tɔ̂nɔ kpéŋ nɔ́ ƃé núu-kpune a pâi kɛ̂i ǹáa maa tɛ̂i, gɛ́ ƃaa kɛ́ maa tɛ̂ɛ bɔ́.

¹⁸ Da pâi ŋ̀âla-pɔkɔɔŋ-ŋai kélee su karâi ǹɔii su a maa tãi tí.

¹⁹ Yâwɛɛ à pà a gɛɛ é ǹɔii su-ƃela maa yao, núu-kpune a pâi kɛ̂i ǹoôi kɔni-wôlo-ŋa su ǹyée-ŋai tôŋ su da ǹóa-ŋai ǹɔii mai a gɛɛ dí díloo Yâwɛɛ ŋɔlii-ŋwânai da ŋɔfólo-laa kɛ́tɛi perêi.

²⁰ Maa ɣêlei tí a sèri, ǹûai kélee da pâi pûi. Gáne-ŋai da gôo-ŋai dí díkpɛ̀tɛ a díɣâla-pɔkɔɔŋ-ŋai dí gélee lɛ́ɛ a ŋ̀ina-ŋai da ǹɔfu-ŋai pɔ́ɔ.

²¹ Yâwɛɛ a pà a gɛɛ é ǹɔii su-ƃelai maa-yao, ǹûai da pâi pûi dí díloo kɔni wôlo-ŋa su ǹyée-ŋai tôŋ su. Da pâi gɛ̂i tí a gɛɛ dí díloo Yâwɛɛ ŋɔfólo-laai da ŋɔwála-wala-laai perei.

²² Lé ƃa núu-kpune a gɛɛ í íkili tɔ́ɔ ma? Gáa nɔ́ a pɔ̂rɔ.