Amɔsə 9 - Bible

Ɣâla Yâwɛɛ ŋɔmɛni ŋáa téeɛi

¹ Ŋa Kúnuu-namui kàa tɔɔ̂-ni ŋ̀âla-teƃelei kɔlɛ, ǹyɛɛi, “Bɛ́rɛ yée-mu nɔ̃ɔ-ŋai lókwa a gɛɛ bɛ́rɛi kwaa kélee é kpɛ̃lîŋ, í díwolo ǹûai kélee ŋûa. Nyii-ŋai pâi lɛɛ̂i, ŋa pâi dípaâi a m̀óa-sɔkpɔi. Dɔnɔ kpîŋ fé pâi pûi. Dɔnɔ kpîŋ fé pâi kulâi zu.

² A nɛ̃ɛ ma dí díloo saa-taa ŋa pâi díkulâi naa. A nɛ̃ɛ ma máŋ dí tɛ́ ŋ̀ele-kɔlɔŋ su, ŋa pâi díyenîi ǹɔii ma.

³ A nɛ̃ɛ ma kpîŋ dí díloo Kamɛɛ Yeei tôŋ su, ŋa pâi serîi naa ŋá díkula naa. Da dílòo máŋ yúo kpóŋ ma, ŋa pâi môi yúo-zere kalii ma é lí naa é dí nyíŋ.

⁴ A nɛ̃ɛ máŋ díkpɔara-ƃelai dí lí a dia luɛ-laa su, ŋa pâi m̀óa-sɔkpɔi kɛ̂i é dípaa. Ŋ́ɛi a pâi kɛ̂i dîa, mɛni nyɔ́mɔɔ mɛni ma, mɛni lɛ́lɛɛ fêi.”

⁵ Kúnuu-namui Ɣâla ká ŋí nyii a lɛ̂ɣɛ ǹɔii ma é séɣeŋ, zu-ƃelai kélee díwɔlɔi, é gɛ́ ǹɔii kɛ́ tɛ̀ gɛ́ yèŋ yɛ̂ɛ Ǹâai Ya-leei Izei.

⁶ Nyàa ƃe ŋɔtaai tɔ̂ɔ ɣâla-taa, é gɔ́ɔ ǹɔii ma. Nyàa ƃe yá kùla yúo su é bú ǹɔii su. Ǹáa ƃa Kúnuu-namui.

⁷ Ɣâla Yâwɛɛ è mò ǹyɛɛi, “Óo Eezuɛ-ƃela, ka Itiopia-ƃelai káfe nɔ́ ŋ́ɛi a núu tɔ̂nɔ? Fé Eezuɛ-ŋai kula ní Ize lɔii su, ŋá Felesia-ŋai kúla Kulîi, ŋá Siria-ŋai kúla Kîɛ?

⁸ Kúnuu-namui e mò, ǹyɛɛ, ka gáa, Ǹúu-namui Ɣâla ŋɛ́i káa zɔnyɔ̂ŋ lɔnii-ŋuŋ mɛi, ǹyaŋ ŋa pâi zu karâi ǹɔii su. É máŋ kɛ́ tí, fé pâi Zeeka ŋɔnûai kélee su karâi.

⁹ “Ka gáa, ŋa pâi môi a gɛɛ dí Eezuɛ lɔii fɛ́ɛ ǹɔii-ŋûŋ-ŋai sáma yɛ̂ɛ berei da mɔlɔŋ fɛ̂ɛ la, gáo dɔnɔ kpîŋ fa tôo ǹɔii mai.

¹⁰ Ƃóa-sɔkpɔ a pâi zɔnyɔ̂ŋ-ƃelai kélee paâi ŋánûai sáma, diai da mò, dîyɛɛi, ‘Sɔnyɔ̂ŋ fé pâi wɔ́lɔ serîi kûa.’ ”

Eezuɛ a pâi tɔɔ̂i ŋɔ́nɔ pôlu

¹¹ Maa-ɣelei tí ŋa pâi Deeƃé ŋɔpɛ́rɛi siɣêi ŋá dɔɔ, nyii doɔ̂i, ŋá bɛ́ŋ pɛ́lɛ, ŋá mu siɣe ŋá dɔɔ yɛ̂ɛ berei è wɔ́lɔ kɛ̀ a dɔɔ́ lai,

¹² a gɛɛ dí Idɔŋ-ƃelai kpéli-ŋai yée mɛi ɣále da ǹɔii-ŋuŋ kélee nyii-ŋai ńaa káa dîai.

¹³ Yâwɛɛ ǹyɛɛ, “Ka gáa, ŋ̀ele-ŋai díkaa pâi, tãi gwaa sí-nuui a pâi kɛ̂i la mɔlɔŋ tee-nuui pôlu, gbɔmɔ ƃa lúaŋ-nuui kɛ́ ƃò zí-sɛŋ sí-nuui pôlui. Wã̂ai nɛ̃ɛ a pâi kulâi ǹyée kpaya-kpayai da ǹyée pɛlɛ-pɛlɛɛi su.

¹⁴ Ŋa pâi pâi pôlu a ŋánûai Eezuɛ-ŋai nyii-ŋai kɛ̀ luɛ-laa sui. Da pâi dítaa wóloɔ-ŋai tɔɔ̂i pôlu dí sée dísu. Da pâi kpɔmɔ ƃa kpalaŋ-ŋai kɛ̂i dí ŋwã̂ai kula dísu dí gbele. Da pâi máŋ sûa-ŋa kulâi dí sí-sãa sí dísu dí mii.”

¹⁵ Yâwɛɛ ǹyɛɛ, “Ŋa pâi dísîi dílɔii su, ǹyaŋ núu fé pâi ŋɔ́nɔ wɔ́lɔ dí kulâi dílɔii su nyii ŋá dɛ̀ɛ dípɔi.”