Amɔsə 7 - Bible

Zĩ̂ai bîlaŋɔɔi gotói mai

¹ Ŋá zĩ̂a kàa nyíi Ɣâla Yâwɛɛ è nɛ̀ ḿâi. Zĩai ŋí su, ŋá gàa é gotó kpɛtɛ a tãi galai è pɔmûnii la a tãi veerɛ-ɣelei. Ǹyaŋ è kɛ̀ a tãi veerɛ-ɣelei gâloŋ ŋɔkala téeɛi pôlu ma.

² Tãi dí kpɛ̀ɛ la a galai miiɛ Ǹɔii mai, ŋá mò, ńyɛ̂ɛi, “Óo Kúnuu-namui Ɣâla, zu-mɛni lɛɛ, ŋa íkperâi fêi! Ilɔii malôŋ káa. Gáa a lɔii kuro-te fíi kpɛɛ.”

³ Malôŋ è tòo Ɣâla Yâwɛɛ ma m̀ɛnii ŋí ma, ǹyɛɛi, “Vé pâi kɛ̂i.”

Zĩ̂ai bîlaŋɔɔi ŋɔŋ mai

⁴ Ŋá ŋɔ́nɔ zĩ̂a da kpɛ́ni kàa. Zĩai ŋí su, Ɣâla Yâwɛɛ è ŋɔŋ tɛ̂ɛ a mɛni ŋá-teeɛ, ǹyaŋ ŋɔŋ è ǹya-loa-ŋai kélee kpàla, ǹyaŋ èi pɔri ǹɔii kérenîi.

⁵ Nya ƃe ŋá mò, “Óo Kúnuu-namui Ɣâla Yâwɛɛ, ŋa íkperâ fêi a gɛɛ í kpéra mà. Ilɔii malôŋ káa. Gáa a lɔii kuro-te fíi kpɛɛ.”

⁶ Malôŋ è tòo Ɣâla Yâwɛɛ ma m̀ɛnii ŋí ma máŋ, ǹyɛɛi, “Nyíŋi fé pâi kɛ̂i máŋ.”

Zĩ̂ai bîlaŋɔɔi zɛŋ-kɔɔŋ sɛŋ mai

⁷ Ɣâla Yâwɛɛ è ŋɔ́nɔ mɛni da kpɛ́ni lɛ̀ ḿâ zĩ̂a su. Ŋázĩ̂ai su, ŋá Ɣâla Yâwɛɛ kàa. È kɛ̀ tɔɔ̂-ni pɛ́rɛ kaŋ kɔlɛ, nyii dí dɔ̀ɔ a sɛŋ-kɔɔŋ-sɛŋ, ǹyaŋ sɛŋ-kɔɔŋ-sɛɛ è kɛ̀ ǹyêei.

⁸ Nya ƃe è ḿarê kɛ̀ ǹyɛɛi, “Emɔ, lé ƃé ƃa gâai?” Nya ƃe ŋá mò mà, ńyɛ̂ɛi, “Sɛŋ-kɔɔŋ-sɛŋ.” Nya ƃe è mò ḿâ ǹyɛɛi, “Gáa, ŋa sɛŋ-kɔɔŋ-sɛŋ lâai Eezuɛ-ŋai sáma nyii-ŋai díkaa a ŋánûai. Fé pâi ŋɔ́nɔ dísu-mɛni lɛɛ̂i.

⁹ Aise ŋɔsâla-kula kwaa-ŋai ma su a pâi karâi, Eezuɛ ŋɔɣâla-pɛrɛ kpaya-kpayai su é kara, ǹyaŋ ŋa pâi tɔɔ̂i Zɛroboaŋ ŋɔpɛ́rɛi ma a ƃóa-sɔ̂kpɔ.”

Emɔ da Amazia

¹⁰ Nya ƃe Bɛtɛ sala láa-soŋ-nuui Amazia è worɛ̂ tɛ̀ɛ Eezuɛ kaloŋ Zɛroboaŋ pɔ-naa, ǹyɛɛi, “Emɔ a ípaa mɛni kpɛtɛ gíli ŋá Eezuɛ-ŋai sáma, ǹyaŋ ǹɔii fa pɔ̂ri ŋɔwóo-ŋai kélee mu.

¹¹ M̀ɛni-ŋai Emɔ e mòi, dia ká ŋí, ‘Zɛroboaŋ a pâi ƃóa-sɔkpɔ-saa kɛ̂i, Eezuɛ é kúla ŋɔlɔii su é lí luɛ-laa su.’ ”

¹² Amazia ǹyaŋ, è mò Emɔ ma, ǹyɛɛi, “Óo zee ƃó-nuui, kula ƃé í lí. Lí Zuda lɔii su í ílaa míi naa í Ɣâla maa-mɛni ƃó naa ǹaa-tuɛ.

¹³ Kɛ́lɛ ífe wɔ́lɔ ŋɔ́nɔ Ɣâla maa-mɛni ƃò ǹaa-tuɛ Bɛtɛ, kpɛ́ni fêi ǹaa káa a gâloŋ ŋɔɣâla-pɛrɛ kɛ́tɛi kɛ̂i, ǹaa kɛ́ ƃò a gâloŋ ŋɔkâloŋ-pɛrɛ kɛ́tɛi kɛ̂i.”

¹⁴ Nya ƃe Emɔ e Amazia wóo su tòo, ǹyɛɛi, “Ɣâla ŋɔlóno kɛ́-nuu fa ńyãa, kpaa máŋ Ɣâla ŋɔlóno kɛ́-nuu ǹóŋ, kɛ́lɛ ŋ́gaa a ƃála mɛi káa-nuu, ŋ́gɛ ƃò a fîi wuru mɛi káa-nuu.

¹⁵ Kɛ́lɛ Ɣâla Yâwɛɛ è ŋ́gùla ŋaƃála-ŋai túɛ, ǹyɛɛ ḿâi, ‘Lí í tuɛ mɛ̂ni ƃó ŋánûai Eezuɛ-ŋai dîa.’

¹⁶ M̀ɛni ma, Ɣâla Yâwɛɛ ŋɔwóoi mɛ̂ni nâa. Í mò yɛ̂, ‘Ífe tuɛ-mɛni ƃò a nyɔ́mɔɔ é pîlaŋ Eezuɛ-ŋai dîa, ífe wóo nyɔ́mɔɔ ƃò é pîlaŋ Aise ŋɔpɛ́rɛi ma.’

¹⁷ M̀ɛni ma, Ɣâla Yâwɛɛ è mò, ǹyɛɛ, ‘Ínɛnîi a pâi kɛ̂i a wulu-wulu-nɛni daa-leei su, ƃóa-sɔ̂kpɔ é ílônii sinaai da ílônii-nɛyaa páa. Ílɔii ŋáa a pâi kɔlɛ̂i a gbua-kpuaa, yá kpîŋ í sáa lɔii su nyii ve Ɣâla mɛni kɔ́lɔnii, ǹyaŋ da pâi Eezuɛ-ŋai kulâi dílɔii su a tɔ̃yâ dí lí a dia luɛ-laa su.’ ”