Amɔsə 3 - Bible

¹ Eezuɛ-lonii, ka káwoli tɔ́ɔ ŋ́óoi ma ŋa môi a kaláai, nyii ŋa môi a kasuu kélee láa, nyii ŋá gùla Ize lɔii sui:

² “Káa nɔ ƃe ŋá kalɛ̀ ǹɔii-ŋûŋ-ŋai kélee sama. M̀ɛni ma ŋa pâi tɔ̂ŋ kpɛ́i kâa kásɔnyɔ̂ŋ-ŋai kélee mɛni ma.

Ɣâla ŋɔlóno kɛ́-nuui ŋɔtíi

³ “Núu feerɛ da pɔ̂ri siâi díkîe pôlu, à kɛ̀ díwoo fé zu tɔnɔɔ?

⁴ Yala-sulu a pɔ̂ri kpêɣei wolâi, à kɛ̀ vé niî sua soŋ ní? Yala-sulu-loŋ wóo a tɛ̂ kpɛ́ni, à wàla seŋ da soŋ?

⁵ Ŋɔni a pɔ̂ri kɔ̂i a ƃáre, à kɛ̀ dífe m̀árei tɛ́ ní? Ƃáre a bɔ̀ara kpɛ́ni, à kɛ̀ sɛŋ da fé lɛɣɛ ní ma?

⁶ Da pɔ̂ri kɔ́-turu fɛ̂ɛi taâi, daa-ƃelai dífa yâo? Kpalo a ƃêla kpɛ́ni taa ma, à kɛ̀ Ɣâla Yâwɛɛ fé m̀éla ní?

⁷ Tɔ̃yâ ma, Ɣâla Yâwɛɛ fa niî mɛni da kɛ̀, fɛ̂ɛ é ŋɔloo-mɛni-ŋai kélee lɛ́ ŋɔlóno kɛ́-ƃelai dîa, nyii-ŋai díkaa a ǹyée mu-ƃelai,

⁸ Yala-sului a kpèɣe, gbɛ̂ɛ ƃé vé pâi yaôi? Ɣâla Yâwɛɛ a lóno, gbɛ̂ɛ ƃé vé pâi ŋ̀óo su kulâi?”

Sameria ŋɔsɔnyɔ̂ŋ-ŋai

⁹ Ka m̀ó Asɔdɔ koli-ŋai da Ize koli-ŋai su, kâai, “Ka káŋa tɛ́ mà Sameria Yeei ma, ká berei káa daa-ƃelai wóo fé la zu tɔnɔɔi, da berei ŋwana-lɔɔ káa la zui.”

¹⁰ Dífe mɛni lɛ́lɛɛ kɛ́-pere kɔ́lɔŋ, nyii-ŋai da ŋwana-lɔɔ mɛni da ŋúma-mɛni lòo díkoli-ŋai sui.

¹¹ M̀ɛni ma, Kúnuu-namui Ɣâla è mò, ǹyɛɛ, “Íkpɔara-nuu a pâi ǹɔii ma tínanii, é íwala-walai kúla íyêei, é íkoli-ŋai su kara.”

¹² Ɣâla Yâwɛɛ è mò ǹyɛɛi, “Berei nɔ́ m̀ála-mɛi káa-nuui a ƃála-wɛrɛ feerɛ kpaa ƃála-woli kpua kùla-yeei kɛ̀ la yala-sulu lái, bere nɔ́ ƃé da pâi Eezuɛ-ŋai kula yêei kɛ̂i la, nyii-ŋai díkaa Sameria see ní kâloŋ see-sɛŋ-ŋá, kpaa máŋ dígbìŋ-seɣe sɔ̃ɔ kpanaŋɔɔ-ŋai mɛi.”

¹³ Kúnuu-namui Ɣâla è mò, ǹyɛɛi, “Ka káwoli tɔ́ɔ ka Zeeka ŋɔsuui maa sêre-faa kɛ́.

¹⁴ Ŋelei ŋa pâi tɔ̂ŋ kpɛ̂i la Eezuɛ-ŋai dîa dísɔnyɔ̂ŋ-ŋai mɛni mai, maa-ɣelei tí ŋa pâi tɔ̂ŋ kpɛ̂i Bɛtɛ ɣala-teƃele-ŋai dîa. Ǹyaŋ Ŋ̀âla-teƃele-ŋai mĩla a pâi têei dîa é tóo ǹɔii ma.”

¹⁵ Kúnuu-namui e mò, ǹyɛɛi, “Ŋa pâi vólo-ɣele pɛrɛi su karâi da sama-ɣele pɛrɛi. Zéle-nyiŋ pɛrɛ-ŋai su a pâi karâi, bɛrɛ kpaya-kpayai dítãi é kpɛ́ɛ.”