Tɔɔɓɛlaa veelɛ 9 - Bible

Dí Zewu kɛ̀ a kâloŋ Eezuɛ

¹ Ɣele tɔnɔ ta, Ilasa è Ɣâla ŋɔlóno-kɛ-ƃela kpéle-ŋai dɔnɔ tòli ǹyɛɛ mai, Ɔ̂le wulɔ sanei ŋí síɣe í lí íkpîŋ kpɛtɛ a maa félaa í lí la Lemɔ Gilia.

² Ƃà seri naa, Zewu kɔ́ri nyii gáa a Zɛosafa ǹóŋ, gɛ́ ƃò a Niŋsi ǹóŋ lóŋ. Ƃa gàa, ziɣe í lí la ka ǹyaa ká feerɛ kwaa ma lôŋpo da su.

³ Ye Ɔ̂le wulɔi ŋí da pú ŋûa a gɛɛ é nɛ́ ǹyaa ƃé gáa nâa a gâloŋ ninai. Mó mà ƃîɛi, “Yâwɛɛ nyɛ̀ɛ, ‘Ŋaâ íkɛ a kâloŋ Eezuɛ mɛi.’ Ya gɛ̀ tí, bɛ́rɛi lá ƃó í kúla naa a maa félaa í lí. Ífe tɔ̀ɔ nàa kɔlɛ ma sɛŋ da kélee mɛni ma!”

⁴ Ɣâla ŋɔlóno kɛ́-nuui ŋí nyii kɛ̀ a nyáŋkpai, è lì Lemɔ Gilia.

⁵ Tãi è sèri la naai, è gɔ-kûluƃa-ŋai túɛ-ƃelai kàa dí ŋáa tɛ́ɛ díkîe ma kwaa tɔ̂nɔ ma koyâŋ su. È mò dímɛi-nuui ma ǹyɛɛi, “Nalôŋ, worɛ̂-woo káa ńyêei ímɛni ma.” Zewu è marê kɛ̀ ǹyɛɛ mai, “Kúai ŋí ƃɛ́i, gbɛ̂ɛ ƃé ya faâi mai?” Ɣâla ŋɔlóno kɛ́-nuui è zu tòo ǹyɛɛ mai, “Nalôŋ, ƃía ƃè, yái a dímɛi-nuui.”

⁶ Nya ƃe Zewu è mù sìɣe da ǹyaa dí lɔ́ bɛ́rɛi mu. Ɣâla ŋɔlóno-kɛ-nuui è Ɔ̂le wulɔi sîɣe é bú Zewu ŋûa ǹyɛɛ ma ŋorɛ̂-wooi ká a kulâi Eezuɛ Ŋɔɣâlai Yâwɛɛ yêei ǹyɛɛi, “Ńyãa ƃa Yâwɛɛ ǹyaŋ ŋa nâa í síɣe zu a gɛɛ í kɛ́ a kâloŋ ŋánûai Eezuɛ mɛi.

⁷ Ŋa ŋ̀wɛ̂lii a gɛɛ í ínuu-namui Eɣa ŋɔkáa-laai su-ƃelai kélee su kara. Ŋa ŋ̀wɛ̂lii ŋá Zɛsebɛɛ kula-maa kɛ́. Kpɛ́ni fêi è ńyee-mu-ƃelai nyii-ŋai kɛ̂ a ŋálono kɛ́-ƃelai da ŋátii-kɛ-ƃelai kpéli-ŋai kélee paa.

⁸ Gbakolo-ŋai da zinâ-nɛyãai kélee Eɣa ŋɔkáa-laai sui, fɛ̂ɛ dí sáa a nɛ̃ɛ ma kpîŋ é kɛ́ a núu ŋuŋ-maa-ƃoɔɔ kpaa máŋ luɛ.

⁹ Ŋa pâi Eɣa ŋɔpɛ́rɛi kula-maa kɛ̂i kpɔ́ nɔ́ yɛ̂ɛ Neba ǹóŋ Zɛroboaŋ da Aiza ǹóŋ Baasa dípɛrɛ-ŋai.

¹⁰ À kɛ̀ a Zɛsebɛɛ, ɣîla-ŋa da pâi boma miî Zariɛɛ kpiniŋ su. Gbua da fé pâi lɛɛ̂i.” Nya ƃe è kɛ̀ tí, Ɣâla ŋɔlóno-kɛ-nuui è gbôŋ lá ƃò é pú a kîrɛ.

¹¹ Tãi Zewu è kùla la é lí pôlu marâa kɔ-kuluƃa-ŋai túɛ-ƃelai pɔ́i, dɔ̀nɔ è marê kɛ̀ ǹyɛɛi, “Kú mɛni naa? Lé ƃé m̀óo-nuui tí a ŋ̀wɛ̂lii?” Zewu è zu tòo ǹyɛɛi, “Ká ǹúui tí kɔ́lɔŋ da berei a lôno lai.”

¹² Dí mò ma dîyɛɛi, “Kpaa, kúfe gɔ́lɔŋ. Lé ƃé è mò yâi? Mó kûa.” Zewu è zu tòo ǹyɛɛi, “Worɛ̂-woo è kɛ̀ ǹá é kúla Yâwɛɛ yêei. È mò a gɛɛ Yâwɛɛ a ńziɣe zu a gɛɛ ŋá kɛ́ a Eezuɛ kaloŋ ninai.”

¹³ Tãi dí nyíŋi mɛ̀ni lai, dí díseɣe-ŋai kùla dîa a maa-félaa dí dípɛŋ gɔ́ɔ mu núu siâi gɛ́ tɛ̀ bɛ́rɛi ŋ̀elêi ƃɛ́i è kɛ̀ tɔɔ̂-ni naai. Dí tɔnɔ da è túru fɛ̀ɛ. Dí kélee dí làɣi a gîe ɣelêi-pere dîyɛɛi, “Zewu káa a kâloŋ.”

Dí Eezuɛ kaloŋ Zoraŋ pàa

¹⁴ Nisiŋ ǹóŋ Zɛosafa ŋɔloŋ Zewu è nâa gbɛ̀tɛ gíli ŋá a gɛɛ é tɔ́ɔ Gâloŋ Zoraŋ ma. Tãi ŋí ƃé Zoraŋ da Eezuɛ kɔ-kuluƃa-ŋai kélee dí kɛ̀ kɔ̂i la a gɛɛ dí Lemɔ Gilia taa-leei maa-kɔ̃ɔ Siria kaloŋ Azae da ŋɔkɔ-kûluƃa-ŋai yêei.

¹⁵ Gâloŋ Zoraŋ è nâa kɛ̀ ƃâloi Zariɛɛ mɛni ŋánaai yêei Siria kɔ-kuluƃa-ŋai dí gɛ̀ lai. Tãi tí yée mu, Zewu è kɛ̀ Lemɔ gɛ́ mɛni kpɛtɛɛ kɛ̀ a gɛɛ é Zoraŋ paa. È mò ŋɔkɔ-kûluƃa-ŋai túɛ-ƃelai dîa ǹyɛɛi, “À kɛ̀ ká ŋ̀wɛ̂lii a gɛɛ ŋá kɛ́ a kâloŋ, gɛ̀ ní, káfe nɛ̀ɛ naa núu da kélee fé kùla daa-lêei ŋí su é lí a mɛnii ŋí tuŋ Zariɛɛ é mó Zoraŋ ma.”

¹⁶ È kɛ̀ tí, Zewu è pìli ŋɔkɔ́-kɔ-keleŋ su gɛ́ lì Zariɛɛ, kpɛ́ni fêi, Gâloŋ Zoraŋ è kɛ̀ naa fii-tɔ̂ɔ su ƃɛ́i Zuda kaloŋ Aɣazia è lì naa a gɛɛ é gáa.

¹⁷ Tãi daa mɛi-káa-nuui kɛ̀ Zariɛɛ è lɛ̀ɛ la bɛ́rɛ kôyai ŋ̀elêi é Zewu káa pâi kwaa kôya ma da ŋɔkɔ-kûluƃa-ŋai, è làɣi a ɣelêi-pere é mó Gáloŋ Zoraŋ ma ǹyɛɛi, “Ŋ́gaa kpakolo kpulu kâai pâi soo-ŋa mɛi.” Zoraŋ è mò ǹyɛɛi, “Ka soo-sia-nûu tɔnɔ tɛ̀ɛ dí túɛ é dí marê kɛ́, ká pà naa-kaa kɛ̂i lii-sêe su?”

¹⁸ Gɔ-kûluƃa-ŋai dɔnɔ è lì é seri Zewu ma é mó ma ǹyɛɛi, “Gâloŋ Zoraŋ a ŋ̀wɛ̂lii é gɔ́lɔŋ à kɛ̀ ká pà naa-kaa kɛ̂i lii-sêe su?” Zewu è ŋ̀óo su tòo ǹyɛɛ mai, “Lé ƃé ya ŋ̀wɛ̂lii í gɛ́ a lii-sêe? Tɛɛ ńyãa pere í tóo gbɔŋ su ŋánûai sáma!” Tãi tɔnɔi tí yée mu daa mɛi káa-nuui è mò Zoraŋ ma ǹyɛɛi, “Ŋánuu-namui, zoo-sia-nuui è sèri ǹûai dîa, kɛ́lɛ vé pâi pôlu.”

¹⁹ Nya ƃe Zoraŋ è soo-sia-nûu da kpɛ́ni tɛ̀ɛ nyii lì Zewu pɔ́naa ǹyɛɛ mai, “Gâloŋ a ŋ̀wɛ̂lii é gɔ́lɔŋ à kɛ̀ ká pà naa-kaa kɛ̂i lii-sêe su?” Zewu è zu tòo, “Lé ƃé ya ŋ̀wɛ̂lii í gɛ́ a lii-sêe? Tɛɛ ńyãa pere í tóo gbɔŋ su ŋánûai sáma!”

²⁰ Daai mɛi káa-nuui kɛ̀ bɛ́rɛ kôyai ŋ̀elêi è mò Gâloŋ Zoraŋ ma ǹyɛɛi, “Ŋánuu-namui, zoo-sia-nuui è sèri ǹûai dîa, kɛ́lɛ vé pâi pôlu ǹyaa máŋ. Zoo-sia-nuui tí a zooi sîai a ƃoo-pere yɛ̂ɛ Nisiŋ ǹóŋ ŋɔɔ-loŋ Zewu.”

²¹ Zoraŋ è mò ǹyɛɛi, “Ka ŋákɔ-kɔ-keleŋ kɛ́ a gbɛtɛɛ mî.” Naa pôlu ma da Zuda kaloŋ Aɣazia dí tɛ̀ dí kɔ́kɔ-keleŋ-ŋai su dí lí a gɛɛ da Zewu-ni dí koyâŋ. Dí kélee dí kòyaŋ Zariɛɛ-nuui Naƃo ŋɔlɔii kpuai ma.

²² Tãi Zoraŋ è Zewu kàa lai, è marê kɛ̀ ǹyɛɛ mai, “Zewu, ziai káa léŋ, í pà a lii-sêe naa-kaa sia?” Zewu è zu tòo a mare kɛ̂ɛ ǹyɛɛi, “Lii-sêe a gɛ̀ léŋ é kɛ́ naa? Ílee Zɛseƃɛɛ è ǹúui kélee kɛ̀ díkɛ Ɣâla pɔkɔɔŋ-ŋa fɛ̀li, díkɛ tela wúlu kɛ́-pere maa kɔ̂ri.”

²³ Zoraŋ è tìnaŋ a kîrɛ é láɣi a ɣelêi-pere ǹyɛɛi, “Aɣazia, kú pú kú kúla ƃɛ́. Ƃáre ká ŋí ŋ̀á tɛ̂ɛi kúperêi.” Tãi Zoraŋ è kɛ̀ kɔ̂i la a gɛɛ é púi,

²⁴ Zewu è ŋɔsɔlai kûla é Zoraŋ ƃóŋ là m̀óoŋ loai. Gbálai è ƃɔ̀ ǹíi su é kúla geŋei pere. È tòo ŋɔkɔ́-kɔ-keleŋ su a boma.

²⁵ Zewu è mò ŋɔkɔlɛ-ma-nuui Bika ma ǹyɛɛi, “Zoraŋ poma síɣe í bili í doo ǹɔii kpûai ma nyii wɔ́lɔ kɛ̀ a Zariɛɛ-nuui Niƃo pɔɔi. È lɛ̀ɛ íkili-ŋa tãi kwa ya kwa kâa kɛ̀ kɔ́-kɔ keleŋ-ŋa siâi la gîe kɔlɛ Zoraŋ ǹâŋ Eɣa pôlui? Maa tãi tí ƃé Yâwɛɛ è wɔ́lɔ mò la Eɣa mà é pîlaŋ Zoraŋ ma.

²⁶ Yâwɛɛ è mò ǹyɛɛ, ‘Ŋá wɛ́ɛ Niƃo ŋãa kâa da ǹônii sinaai. Mɛni ma ŋa pâi í kɛ̂i í véla-fe ká ǹɔii kpuai ŋí ma.’ Boma síɣe í bili ǹɔii kpuai tí ma nɔ́ yɛ̂ɛ berei Yâwɛɛ wóo káa lai.”

Dí Zuda kaloŋ Aɣazia pàa

²⁷ Aɣazia è mɛni-ŋai ŋí kélee naa kàa gɛ́ kɛ̀. È kɔ̀ a gɛɛ é pú é lí Bɛ-Agaŋ daâi. Kɛ́lɛ Zewu è gbɛ̀ gɛ́ làɣi a ɣelei pere ǹyɛɛi, “Ka baa ǹyaa máŋ.” Nya ƃe ŋɔkɔ-kûluƃa-ŋai dí Aɣazia ƃòŋ a kpála tãi è kɛ̀ pûi la gɛ́ ƃò pere mâ a gɛɛ é lí Gɔ̂ɔ nyii gáa Ibiliaŋ taai kɔlɛ mai. È lɛ̀ɛ liî é seri Mɛgido ƃɛ́i è sàa naai.

²⁸ Aɣazia ŋɔyée-mu-ƃelai dí boma sîɣe kɔ́-kɔ-keleŋ tɔnɔ su dí lí la Zerusâlɛŋ ƃɛ́i dí nòo naa ǹâŋ pɔlɔ-ŋai kɔlɛ Deeƃé ŋɔtaai su.

²⁹ Eɣa ǹóŋ Zoraŋ kɛ́ɛ a kâloŋ ŋɔkóraŋ buu káo tɔnɔi su ƃé dí Aɣazia kɛ̀ la kâloŋ Zuda lɔii su.

Dí ǹɛnî kaloŋ Zɛsebɛɛ pàa

³⁰ Nya ƃe Zewu è lì Zariɛɛ. Tãi Zɛsebɛɛ è mɛ̀ni lai, è wée sii da kpɛ́ni-ŋa sìa ŋ̀ɛ́i-gɔlɔŋ pôlu, é ŋuŋ-lêɣa kpɛtɛ, é ŋuŋ kúla vãa-lâɣi soŋ-kpôŋ lá, gɛ́ maa-kpɛ̂ŋ kɛ̀ a gɛɛ é gáa.

³¹ Tãi Zewu è kɛ̀ lɔ̂i la gɛ́ tɛ̀ɛ daa-lêei ŋɔgalai lai, Zɛsebɛɛ è lɛ̀ɛ bɛ́rɛi ŋ̀elêi gɛ́ Zewu tòli a ɣelêi-pere ǹyɛɛi, “Í pà ƃɛ́ lé mɛni ma Ziŋri ǹóŋ, ƃíai ínuu-namui gâloŋ pâai!”

³² È ŋ̀ɛ́i tɛ̀ ɣelêi é vãa-lâɣi soŋ-kpôŋ lá káa é mare kɛ̂ɛ kɛ́, “Núu ta kâa ŋ̀elei tí su nyii gáa ŋáƃelai mai? Gbɛ̂ɛ ƃé naa?” Gâloŋ ŋɔpɛ́rɛ kɛ́tɛi mu tii-kɛ́-ƃelai veerɛ kpaa zaaƃa dí díŋuŋ kûla vãa-lâɣi soŋ-kpôŋ lá.

³³ Zewu è mò ǹyɛɛi, “Ka zɔnyɔ̂ŋ nɛnii tí kúla vãa-lâɣi soŋ-kpôŋ tí lá Ká doo ǹɔii ma.” Nya ƃe dí gùla dí dòo ǹɔii ma ŋ̀ãa da é táa-tâa bɛ́rɛ kaŋ mâ da zoo-ŋai kɛ̀ naa kɔlɛ mai. Nya ƃe Zewu è sìa boma mɛi a ŋɔsoo-ŋai.

³⁴ Zewu è lɔ̀ gâloŋ-pɛrɛ kɛ́tɛi mu, é mii-sɛ̂ŋ mii, é kpele-sɛ̂ŋ kpele. Gɛ́ɛ tí, è mò ŋɔtíi-kɛ-ƃelai da-ni dîa ǹyɛɛi, “Berei máŋ è kɛ̀ a zɔŋ nyɔ́mɔɔ lai, è kɛ̀ a kâloŋ ǹóŋ-nɛni, mɛni ma, ka ǹóo yɛ̂ɛ berei maa-nɛ̃ɛi é kɛ́ lai.”

³⁵ Kɛ́lɛ tãi ǹûai dí kùla la bɛ́rɛi mu dí pîlaŋ ŋ̀enei ŋá a gɛɛ dí bomai síɣe dí lí la ǹóo mɛni mai, zɛŋ nɔ́ dí gaai ƃé kɛ̀ a ŋuŋ-kônoŋ, ǹyée feerɛ da gɔ́ɔ feerɛ ma kâo-ŋai.

³⁶ Dí lì pôlu dí mɛnii ŋí ƃó Zewu ma nyii mò ǹyɛɛi, “Yâwɛɛ è mò ŋɔlóno-kɛ-nuui Ilaza ma a gɛɛ ɣîla-ŋa da pâi Zɛsebɛɛ poma miî ƃɛ́ Zariɛɛ.

³⁷ Ǹyaŋ Yâwɛɛ è wɔ́lɔ mò a gɛɛ gáo a pâi taa-tâai ǹɔii su gwaa kélee yɛ̂ɛ lì-lɔɔ̂i, núu da fé pâi pɔrîi é gɔ́lɔŋ ǹyɛɛ, Zɛsebɛɛ ká ŋí.”