Tɔɔɓɛlaa veelɛ 8 - Bible

Sunɛŋ Nɛnii è pà pôlu

¹ Sunɛŋ nɛnii nyii Ilasa è wɔ́lɔ ǹóŋ-surɔŋ mu sìɣe saa yêei, Ilasa è mò ma, ǹyɛɛi, “Yâwɛɛ a mó a gɛɛ puru kɛ́tɛ a pâi toôi ǹɔii su ƃɛ́ a kóraŋ lɔ́ɔlu mɛi feerɛ. Íkaa-laai su-ƃelai síɣe í lí a dia kwaa da kpɛ́ni ma é lɛ́ɛ la zu tãi tí é tɛ́ɛ.”

² Ǹɛnîi è gɛ̀ nɔ́ yɛ̂ɛ berei ŋâla-naloŋ, Ilasa è mò la mai. È lì a ŋɔkáa-laai su-ƃelai Felesia-ŋai dílɔii kpîniŋ su. Da ŋɔkáa-laai su-ƃelai dí kɛ̀ naa a kóraŋ lɔ́ɔlu mɛi feerɛ.

³ Góraŋ lɔ́ɔlu mɛi feerɛi kpɛɛ ŋá, ǹɛnîi è kùla Felesia-ŋai dílɔii su é pá pôlu Eezuɛ lɔii su. Tãi è pà lai, è lì kpɔ́ Gâloŋ pɔ́ naa ŋ̀áa ma é pɛ́lɛ a gɔ́ɔ a gɛɛ é ŋɔpɛ́rɛi da ŋɔlɔii sɔlɔ ƃó pôlu.

⁴ Tãi tí yée mu, gâloŋ è kɛ̀ Ilasa yée-mu-nuui, Gaiza marê kɛ̂i mɛni kpaya-kpaya-ŋai m̀ɛni ma Ilasa è dí kɛ̀i.

⁵ Tãi Gaiza è kɛ̀ lônoi la gâloŋ pɔ̀i, gɛ́ mò mà berei Ilasa è nɛnî tɔnɔ ǹóŋ-surɔŋ mù sìɣe la saa yêei, ǹɛnîi da ǹóŋ-surɔŋ dí pà naa. Gaiza è mò ǹyɛɛ, “Ŋánuu-namui, ǹɛnîi kpîŋ ká ŋí Ilasa è ǹóŋ-surɔŋ mu sìɣe saa yêei.”

⁶ Gâloŋ è ǹɛnîi marê kɛ̀ é pîlaŋ mɛnii ŋí ma. Ǹɛnîi è mɛnii kélee ƃò mà kɛ̀i. Nya ƃe gâloŋ è mò ŋɔtíi-kɛ-ƃelai dɔnɔ ma ǹyɛɛi, “Ŋa ŋ̀wɛ̂lii í gáa a gɛɛ nɛnîi ŋí é zãai kélee sɔlɔ ƃó pôlu gáa a bɔɔi, é pɛ́lɛ zɛŋ kâoi kélee ma dí zɔ̀lɔ ƃô ŋɔsí-sãai su é kúla ŋ̀elei ma è kùla la Eezuɛ lɔii su é tóo sâa ma.”

Ilasa da Siria Kaloŋ Bɛŋada

⁷ Tãi da tɛɛ pôlu ma, Ilasa è lì Dɛmɛika ŋɔtaa-leei su a gɛɛ é Siria Kaloŋ Bɛŋada naa káa nyii kɛ̀ kɔ̂lɛi. Tãi Bɛŋada è mɛ̀ni la a gɛɛ Ilasa è kɛ̀ naai,

⁸ È mò Azae ma, “Lí í ŋâla-naloŋ Ilasa marê kɛ́ a gɛɛ é Yâwɛɛ marê kɛ́ à kɛ̀ ŋa pâi ƃâloi? Ƃa kɛ̀ liî, lí ḿî bɔ́ a sama-sɛ̂ŋ.”

⁹ Azae è lì Ilasa pɔ́ a kpîri nyii soo-fáleŋ buu náaŋ dí zìɣe a zãai da gbɛ̀tɛ Dɛmɛikai ǹɛ́lɛ-lɛlɛɛ-ŋai a sama-sɛ̂ŋ. È Ilasa kàa ǹyɛɛ mai, “Iyee-mu-nuui gâloŋ Bɛŋada a ŋ̀wɛ̂lii é gɔ́lɔŋ à kɛ̀ a pâi ƃâloi?”

¹⁰ Ilasa è mò Azae ma ǹyɛɛi, “Mó mà a pâi ƃâloi. Kɛ́lɛ Yâwɛɛ aâ fúlɔi máŋ mó mâ a gɛɛ a pâi saâi.”

¹¹ Ilasa è ŋɛ́i pìlaŋ Azae ma gɛ́ gàa kpɔ́ sĩi a zu kôya é lɛ́ɛ la zu ŋumɛ kɛ́ Azae kɛ̀. Nya ƃe Ilasa è pɛ̀lɛ wɔ́lɔɔ ma.

¹² Azae è marê kɛ̀ ǹyɛɛ mai, “Ńâŋ, lé ƃé íkaa wɔ̂lɔi?” Ilasa è zu tòo ǹyɛɛ mai, “Ŋa wɔ̂lɔi kpɛ́ni fêi, ŋa mɛni ŋánaai kɔ́lɔŋ ya pâi gɛ̂i a Eezuɛ-ŋai. Ya pâi dítaa-lee-ŋai ma tínaŋɔɔ a gala-ŋai kérenii, í dí yáŋkpa-ŋai páa. Ya pâi kpîŋ dí kwaatâra-ŋai ŋuŋ wólo-wôloi, í dí koo-nɛ̂ni-ŋai koi ƃéla a ƃóa-sɔ̂kpɔ.”

¹³ Azae è zu tòo ǹyɛɛi, “Ŋa pɔ̂ri mɛni saŋ kɛ́ɛ tí kɛ́ pere kɛ̂i léŋ? Ŋ́gaa nɔ́ a yée-mu-nuu kɛ́ɛ nɔ́ yɛ̂ɛ ɣîla ǹyaŋ wála-wâla-laa kɛ́ɛ tí fé ǹyéei.” Ilasa è zu tòo ǹyɛɛ mai, “Azae, Yâwɛɛ a mó mâ a gɛɛ ƃía ƃé pâi kɛ̂i a Siria kaloŋ ninai.”

¹⁴ Azae è lène pôlu Bɛŋada pɔ́ naa. Bɛŋada é marê kɛ́ ǹyɛɛ mai, “Lé ƃé Ilasa è mò yâi?” “Ilasa ǹyɛɛ ƃa pâi ƃâloi.”

¹⁵ Kɛ́lɛ bôlu ma ɣelei Azae è seɣe kpi-kpi-tili sìɣe é nyɔɔ a yá, é bɛlɛ gâloŋ Bɛŋada ŋuŋ mɛi. Zeɣe yɔ̂ɔi è lɛ̀ɛ ŋuŋ mɛi é lɛ́ɛ la zu é sáa. Naa pôlu ma Azae è kɛ̀ a Kâloŋ bɔ́ɔ ŋá.

Dí Zɛoraŋ kɛ̀ a kâloŋ Zuda

¹⁶ Tãi Eezuɛ kaloŋ Zoraŋ è kɛ̀ la ŋɔkâloŋ-laai su a kóraŋ lɔ́ɔlui, dí Zɛoraŋ kɛ̀ a kâloŋ Zuda. Zoraŋ ŋí ǹâŋ láa ƃé kɛ̀ a Eɣa. Zɛoraŋ yaŋ ŋɔnaŋ láa ƃé kɛ̀ a Zɛosafa.

¹⁷ Tãi Zɛoraŋ è gâloŋ-laai sɔlɔ ƃô lai, è kɛ̀ a kóraŋ buu saaƃa káo feerɛ. Zeɛɛ è kɛ̀ Zerusâlɛŋ a kóraŋ lɔ́ɔlu mɛi saaƃa gɛ́ ŋɔkâloŋ-laai kɛ̀.

¹⁸ Zɛoraŋ è kɛ̀ a zɔŋ nyɔ́mɔɔ é Yâwɛɛ wóo píli. È kɛ̀ a zɔŋ nyɔ́mɔɔ yɛ̂ɛ Eɣa ŋɔkáa-laai su-ƃelai da. Kpɛ́ni fêi è Eɣa ǹóŋ nɛnii kùla a nɛnî nyii ǹyée pìli mɛni nyɔ́mɔɔ kɛ́ɛ sui. È kɛ̀ a zɔŋ nyɔ́mɔɔ kpɔ́ yɛ̂ɛ Eezuɛ kaloŋ-ŋai.

¹⁹ Kɛ́lɛ Yâwɛɛ fé fáa ní ma a gɛɛ é Zuda su-kara, kpɛ́ni fêi, è wɔ́lɔ kpanaŋ-woo kɛ̀ ŋɔyée mu-nuui Deeƃé yêei a gɛɛ ŋɔkáa-laai su nuu ta a pâi nɔ́ wɔ́lɔ kɛ̂i a kâloŋ Zuda lɔii mɛi.

²⁰ Tãi Zɛoraŋ è kɛ̀ nîi la a kâloŋ, Idɔŋ-ƃelai dí tɔ̀ɔ Zuda ma. Dí dílɔii kpîniŋ kɛ̀ a ŋuŋ-ma ƃô lɔii dí díkpîŋ kaloŋ sèe dímɛi.

²¹ Nya ƃe Zɛoraŋ è ŋɔkɔ́-kɔ-keleŋ-ŋai kélee sìɣe é lí Zâa taa-leei su ƃɛ́i ma Idɔŋ lɔii ŋɔkɔ-kûluƃa-ŋai dí tìnaŋ naa dîa da ŋɔkɔ-kûluƃa-ŋai túɛ-ƃelai. Maa kpînii tí, è ƃɔ̀ díyee mu é pú. Ŋɔkɔ-kûluƃa-ŋai kélee dí pù dí táa-tâa dí lí dípɔ-taai tɛi-tɛi.

²² Zuda lɔii fé ŋɔ́nɔ wɔ́lɔ pɔri ní ma a gɛɛ é Idɔŋ lɔii kpiniŋ kɛ́ mu pôlu. Lɛna taai è tɔ̀ɔ máŋ dîa a maa tãi tɔnɔi tí.

²³ Mɛni da kpɛ́ni-ŋai kélee Zɛoraŋ è gɛ̀ a tãi è kɛ̀ la a kâloŋ, dí pɔ̃yɛ̂i Zuda kaloŋ-ŋai dí mɛni-pɔ̂lɔ kɔlɔi su.

²⁴ Zɛoraŋ è sàa dí nòo ǹâŋ pɔlɔ-ŋai kɔlɛ Zerusâlɛŋ. Ǹóŋ Aɣazia ƃé lɛ̀ɛ bɔ́ɔ ŋá a kâloŋ.

Dí Aɣazia kɛ̀ a kâloŋ Zuda

²⁵ Tãi Zoraŋ è kɛ̀ la a kâloŋ Eezuɛ a kóraŋ puu káo feerɛi, dí Aɣazia kɛ̀ a kâloŋ Zuda. Aɣazia ǹâŋ láa ƃé kɛ̀ a Zɛoraŋ. Zoraŋ ǹyaŋ ǹâŋ láa ƃé kɛ̀ a Aɣa.

²⁶ Aɣazia è kɛ̀ a kóraŋ buu feerɛ káo feerɛ tãi è kɛ̀ la a kâloŋ. Zeɛɛ è kɛ̀ Zerusâlɛŋ nɔ́ a kóraŋ tɔnɔ. Ǹee láa ƃé kɛ̀ a Atalia. È kɛ̀ a Eezuɛ kaloŋ Oŋari ǹóŋ ŋɔɔ-lòŋ.

²⁷ Tãi kpɔ́ nɔ́ Aɣazia è nɛnî kùla la Eɣa ŋɔkáa-laai su, gɛ́ ƃò nâa a dítai, è tùa kpɔ́ nɔ́ yɛ̂ɛ dia. È Yâwɛɛ wóo pìli a mɛni nyɔ́mɔɔ kɛ́ɛ.

²⁸ Gâloŋ Aɣazia da Eɣa ǹóŋ Zoraŋ nyii kɛ̀ a Eezuɛ kaloŋ, dí kɔ́ pɛ̀lɛ Siria kaloŋ Azae da ŋɔkɔ-kûluƃa-ŋai dîa. Dí pɛ̀lɛ dîa Lemɔ Gilia taa-leei su. Siria kɔ-kuluƃa-ŋai dí Zoraŋ wàna gɔ́i tí su.

²⁹ Nya ƃe Zoraŋ è lì pôlu Zariɛɛ taa-leei su a gɛɛ é lɛ́ɛ naa é ƃálo. Nya ƃe Zuda kaloŋ, Zɛoraŋ ǹóŋ Aɣazia è lì naa nàa kâai.