Tɔɔɓɛlaa veelɛ 5 - Bible

Ilisa a Neema ƃàlo

¹ Nalôŋ tɔnɔ da è kɛ̀ naa Siria kaloŋ yée mu da kɛ̂ ma Neema. È kɛ̀ a gɔ-kûluƃa-ŋai mɛi-nûu kɛ́tɛ. È kɛ̀ a núu kɛ́tɛ lɛ́lɛɛ ŋɔmɛi-nuui ŋɛ́i, ƃaa-kɛ́-maa támaa kɛ́ ƃò ǹyêei maa mɛni ma. Kpɛ́ni fêi, zârai ƃé Yâwɛɛ è Siria-ƃelai kɛ̀ dí díkpɔara-ƃelai yée mɛi ɣále. È kɛ̀ a kɔ-kûluƃa kponoi kpanaŋɔɔ lɛ́lɛɛ, kɛ́lɛ kpono ma kɔlɔ-fela nyɔ́mɔɔ è kɛ̀ ma.

² Tãi tɔnɔ Siria-ƃelai dí lì kɔ̂i Eezuɛ-ŋai pɔ́. Dí Eezuɛ nɛni-loo tɔnɔ sòŋ a kɔ-sôŋ dí pá la. È kɛ̀ tíi kɛ̂i Neema ŋɔnɛnîi mî.

³ Ɣele tɔnɔ da nɛnî-looi è mò ŋɔmɛi-nuui ma ǹyɛɛi, “Ŋa ŋ̀wɛ̂lii kpɔ́ a gɛɛ ŋánuu-namui é lí é Ɣâla ŋɔlóno-kɛ-nuui káa nyii gáa Sameriai. A pɔri ma é m̀álo ŋɔkpono-ma kɔlɔ-fela nyɔ́mɔɔi yêei.”

⁴ Neema è lì ŋɔnuu-namui pɔ́naa é m̀ɛnii ŋí ƃó ma nyii Eezuɛ nɛni-looi è mòi.

⁵ Siria kaloŋ è mò ǹyɛɛi, “Gɛ̀ ní, a nɛ̃ɛ ma mɛni kélee é kɛ́, ya liî. Ŋa pâi kɔlɔ pɔ̃yɛ̂i ŋá dɛɛ ípɔ a gɛɛ í lí la Eezuɛ kaloŋ pɔ́.” Nya ƃe Neema è lì a sɛŋ kâo kole kpua-kpua wála buu saaƃa, gôo kpua-kpua wála lɔ́ɔlu mɛi da, da seɣe sîi da kpɛ́ni lɛ́lɛɛ-ŋa puu.

⁶ Gɔlɔi è lì la Eezuɛ kaloŋ pɔ́i ŋ̀óo ká ŋí, “Ŋ́gaa ńyee mu-nuui Neema tɛɛ̂i ípɔ naa a gɛɛ í m̀álo ŋɔkpono ma kɔlɔ-fela nyɔ́mɔɔi ŋí yêei.”

⁷ Tãi Eezuɛ kaloŋ è gɔlɔi lôno lai, è ŋɔyokpoi fàla-fala lii-too pôlu su ǹyɛɛi, “Ɣâla ƃa ńyãa? Ŋa pɔri núu paâi kpaa máŋ ŋá pá la pôlu fúlu-laa su? Lé ƃé kɛ̀ nalôŋ ŋí a núu tɛɛ̂i ḿbɔ naa a gɛɛ ŋá m̀álo ŋɔkpono ma kɔlɔ-fela nyɔ́mɔɔi yêei? Berei káa a ŋ́gɔ̂rii la a laa-sâai.”

⁸ Tãi Ŋ̀âla-naloŋ Ilasa è mɛ̀ni la a gɛɛ Eezuɛ kaloŋ è ŋɔyokpoi fàla lai, è ŋ̀orɛ̂-wooi ŋí tɛ̀ɛ bɔ́ naa: “Í íyokpoi fàla lé mɛni ma? Nalôŋ tɛ́ɛ ḿbɔ naa. A pâi gɔlɔnîi a gɛɛ Ɣâla ŋɔlóno kɛ́-nuu káa Eezuɛ.”

⁹ Nya ƃe Neema è lì a ŋɔsoo-ŋai da ŋɔkɔ́-kɔ keleŋ-ŋai é kpéra a dia Ilasa ŋɔpɛ́rɛi lá.

¹⁰ Ilasa è worɛ̂ woo ƃó-nuu tɛ̀ɛ Neema pɔ́ naa é mó mà ǹyɛɛi, “Lí í íwaa gîei lɔ́ɔlu mɛi feerɛ Zɔdiŋ Ya-leei su. Gɛ̀ ní ƃa pâi ƃâloi í kɔlɔ-felai yêei íkpono mâ é kɛ́ nɛ̃ɛ-nɛ̃ɛ.”

¹¹ Kɛ́lɛ Neema è kùla naa a lii-ŋwâna gɛ́ lì. È mò ǹyɛɛi, “Ŋá kɛ̀ gâai nɔ́ a gɛɛ a pâi kulâi é pá ḿbɔ naa é tɔ́ɔ é Ŋɔɣâlai Yâwɛɛ láa tóli é ǹyée sãa mɛi ƃɛ́i gɔlɔ-fêlai káa naai, é ḿbalo gbono ma kɔlɔ-felai nyɔ́mɔɔi ŋí yêei.

¹² Dɛmɛika ya-leei-ŋai, Abana da Fapa dífe lɛ́lɛ ní é tɛ́ɛ Eezuɛ lɔii su ya-lee-ŋai kélee dîa? Ḿvêei pɔri ŋ́waâi dí su ŋá ƃálo?” È tìnaŋ pôlu lii-ŋwâna pere su é lí.

¹³ Neema yée-mu-nuui è lì bɔ́ naa ǹyɛɛ mai, “Ńâŋ, eêi kɛ̀ Ɣâla ŋɔlóno-kɛ-nuui eêi mɛni kɛ́ là wálaa ta ƃò yâ a gɛɛ í gɛ́, í lâai la ífe kɛ́ ní pâi gɛ̂i? Mɛni ma, ífa pɔ̂ri liî í íwaa ǹyái su í ƃálo?”

¹⁴ Nya ƃe Neema è lì é tóo Zɔdiŋ Ya-leei su gîei lɔ́ɔlu mɛi feerɛ, yɛ̂ɛ berei Ŋ̀âla-naloŋ è mò la mài. È ƃàlo ŋɔkpono ma kɔlɔ-fela nyɔ́mɔɔi yêei, gɔlɔ ma é kɛ́ nɛ̃ɛ-nɛ̃ɛ yɛ̂ɛ lôloŋ.

¹⁵ Da ŋɔnûai dí lène pôlu Ilasa pɔ́naa ŋɔpɛ́rɛi lá. È tɔ̀ɔ ŋɛ́i ǹyɛɛ mai, “Ŋa nâa gɔ́lɔŋ a gɛɛ Ɣâla da kpɛ́ni fé ɣele mâ é kúla Eezuɛ lɔii Ŋɔɣâlai pôlu. Kpera yɛ̂, íyee sée zama-sãai ŋí mu é kúla íyee-mu-nuui yêei.”

¹⁶ Ɣâla ŋɔlóno kɛ́-nuui è zu tòo ǹyɛɛ mai, “Berei vúlu-laa ɣalai káa la ɣele ma a tɔ̃yâ-pere nyii ŋa tíi kɛ̂i mìi, fé pâi sɛŋ da sonîi íyêei.” Berei máŋ Neema è kpàla la ǹá a gɛɛ é zama-sãai sóŋ, vé fáa ní ma.

¹⁷ Neema è mò mà ǹyɛɛi, “À kɛ̀ ífe íyee seêi ŋásama-sãai mu, gɛ̀ ní, ǹɔii ŋí ma pɔ̂rɔi da tɛɛ ḿbɔ, ńyãai a íyee mu-nuui, nyii soo fáleŋ feerɛ da pɔ̂ri ziɣêi a gɛɛ ŋá lí la ḿbɔ-taâi. Ǹyaŋ fé pâi ŋɔ́nɔ kéreŋ-sala-ŋa kulâi da sâla da kpɛ́ni-ŋa Ɣâla da kpɛ́ni ma fɛ̂ɛ nɔ́ Yâwɛɛ.

¹⁸ Ŋá ŋ̀wɛ̂lii Yâwɛɛ é ńyãai a íyee-mu-nuui ŋ́zu-mɛ̂ni lɛɛ mɛni tɔnɔi ŋí mɛni ma. Nya ƃa, tãi Asiria kaloŋ nyii gáa a ŋánuu-namui a lí a ńyãa Asiria lɔii ŋɔɣâlai Limɔŋ ŋɔpɛ́rɛi mu vɛ̀li mɛni ma, Gâloŋ ǹyaŋ a tíɣiŋ ma kwa ǹyaa kú kúmaa pɛ́lɛ gɔ́ɔ mu, ŋá kili-kɛ-zui ƃa a gɛɛ Yâwɛɛ a pâi ŋ́zu-mɛ̂ni lɛɛ̂i.”

¹⁹ Ilasa è mò ǹyɛɛi, “Lí lii-see su.” Nya ƃe Neema è pɛ̀lɛ liɛɛ ma. Gɛɛ a kula naa ma a da lòŋ,

²⁰ Ŋâla-naloŋ Ilasa yée-mu-nuui, Geaza è mò gbîŋ ma ǹyɛɛi, “Ŋánuu-namui a tée Siria nuui Neema ma a lí kpɛ́ni-kpɛni. Ve sɛŋ da kɔlɛ ní! Berei Yâwɛɛ, vúlu-laa ɣalai káa la ɣele ma a tɔ̃yâi, ŋa pâi gbɛ̂i ŋá sɛŋ da sɔlɔ ƃó ǹyêei.”

²¹ Nya ƃe Geaza è Neema kpɛ̀ a kîrɛ. Tãi Neema è gàa la kwaa kôya ma gɛ́ pà bɔ́ a kîrɛi, è kpèra é kúla ŋɔkɔ́-kɔ-keleŋ su é lí a gɛɛ da ǹyaa dí koyâŋ. Neema è marê kɛ̀ ǹyɛɛ mai, “Kú mɛni?”

²² Geaza è zu tòo ǹyɛɛi, “Mɛni nyɔ́mɔɔ fé naa. Ŋánuu-namui è ńdɛ̀ɛ ípɔ naa ǹyɛɛi, ‘Ɣâla ŋɔlóno-kɛ-ƃela kpului su kpakoloi veerɛ dí pà ḿbɔ naa lonii ma dí kúla Ifiraŋ, ǹyée lɔii su. Kpera yɛ̂ɛ, sɛŋ kâo kole kpua-kpua wála saaƃa da seɣe maa fáleŋ seɣe feerɛ tɛ́ɛ ḿî, ŋá dɛɛ dí pɔ́.’ ”

²³ Neema è zu tòo ǹyɛɛi, “Sɛŋ kâo kole kpua-kpua wála lɔ́ɔlu mɛi da síɣe.” È Geaza kperâi fè a gɛɛ é dí síɣe. Neema è dí pù ƃɔrɔ feerɛ su é dí lá ɣíri é bɛlɛ seɣe ma fáleŋ seɣe feerɛ ma. È dí tɛ̀ɛ ǹyée-mu-ƃelai veeerɛ pɔ́. Dí lì a dia Geaza tuɛ.

²⁴ Tãi Geaza è pà la ǹyéei mai, è zãâi kùla Neema yée-mu-ƃelai yêei é dí lɔ́ Ilasa ŋɔpɛ́ri mu. È mò gbakolo-ŋai dîa a gɛɛ dí lí. Diaŋ dí lì.

²⁵ Nya ƃe è lɔ̀ é tɔ́ɔ ŋɔnuu-namui Ilasa ŋɛ́i. Ilasa è marê kɛ̀ ǹyɛɛ mai, “Geaza, mí ƃé í kɛ̀ naai?” Geaza è zu tòo ǹyɛɛi, “Íyee-mu-nuui fé li ní kwaa da ma.”

²⁶ Kɛ́lɛ è mò ma ǹyɛɛi, “Ŋámɔlêŋ fé kɛ́ ní íkɔlɛ tãi nalôŋ è kùla la ŋɔkɔ́-kɔ-keleŋ su é pîlaŋ a gɛɛ ka ǹyaa ká koyɛ̂ŋ? Sɛŋ kâo soŋ tãi ƃe ŋí, kpaa máŋ seɣe, wúlɔ-wuru kpalaŋ, kpɔmɔ-ƃa kpalan, ƃála-ŋa, taa-tûlɛ-ŋa kpaa máŋ núu yée-mu-ƃela?

²⁷ Neema ŋɔkpono ma kɔlɔ-fela nyɔ́mɔɔi a pâi í sonîi ka ísuui su-ƃela kélee wɔ́lɔ-wɔlɔ da wɔ́lɔ-wɔlɔ.” Geaza è kùla Ilasa ŋɛ́i é lí ǹyaŋ gbono ma kɔlɔ-fela nyɔ́mɔɔi è zòŋ. Gbono ma gwaa kélee è kole-kole yɛ̂ɛ yee kôle pé-pe.