Tɔɔɓɛlaa veelɛ 22 - Bible

Dí Zosâya kɛ̀ a kâloŋ Zuda

¹ Zosâya è kɛ̀ a kóraŋ lɔ́ɔlu mɛi saaƃa a tãi dí gɛ̀ la a kâloŋ ǹâŋ pɔ́ɔ ŋá Zuda. È kɛ̀ gâloŋ-laai su a kóraŋ buu saaƃa káo tɔnɔɔ. Zeɛ́ɛ è kɛ̀ Zerusâlɛŋ taa-leei su. Ǹee ƃé kɛ̀ Boka-nuui Adaia ǹóŋ-nɛnii Zedida.

² Zosâya è Yâwɛɛ wóo mɛ̀ni a tãi kélee kpɔ́ nɔ́ yɛ̂ɛ berei ǹâŋ pɔlɔi Deeƃé a kâa gɛ̀ lai.

Dí Dɔ̂ŋ Kɔlɔi kàa

³ Gâloŋ Zosâya ŋɔkâloŋ-laa koraŋ buu káo lɔ́ɔlu mɛi saaƃai su, è mò ŋɔkɔlɔ pɔ̃yɛ-nuui Mɛsulaŋ ǹóŋ Azalia ŋɔloŋ Sapâŋ ma, “Lí Yâwɛɛ ŋɔpɛ́rɛ kɛ́tɛi la

⁴ Í mó zâla-laa soŋ-nuui kɛ́tɛi, Akia ma é mó ŋâla-pɛrɛ kɛ́tɛi mɛi-kaa-ƃelai dîa a gɛɛ dí zɛŋ káoi kélee ŋáa tɛ́ gîe ma nyii ǹûai da dɛ̀ɛi.

⁵ Akia é dɛɛ zinâai pɔ́ díkaa ŋâla-pɛrɛ kɛ́tɛi kpɛtɛ mɛnii láa-tuɛi. Da pɔri zɛŋ kâoi da siɣêi dí

⁶ díi kɛ́-ƃelai féla fé la. Zɛŋ káoi nyii pâi lɛɛ̂i da pɔri wúru-ƃela-ŋa da kɔni sɔ̃ɔ kpanaŋɔɔ-ŋa yâi la díi kɛ́ mɛni ma.

⁷ Díkaa a teniŋ-ƃo-ƃela. Mɛni ma, da kpɛ̀ɛ, kúfe pâi dí marê kɛ̂i a gɛɛ dí díkoraŋ ƃó.”

⁸ Safâŋ kɛ́ɛ ŋâla-pɛrɛ kɛ́tɛi lai, Akia è Ɣâla ŋɔtɔ̂ŋ kɔlɔi kàa ŋâla-pɛrɛ kɛ́tɛi mu é dɛɛ Safâŋ pɔ́. Safâŋ è gɔlɔi sîɣe é ǹóno.

⁹ Naa pôlu ma, Safâŋ è lì pôlu Gâloŋ Zosâya pɔ́ é góraŋ ƃó mì. È mò ǹyɛɛi, “Í gɔmɛnɛ-ƃela kpaya-kpayai dí zɛŋ kâoi kélee ŋáa tɛ̀ gîe ma dí dɛɛ ŋâla-pɛrɛ kɛ́tɛi kpɛtɛ mɛnii mɛi-ƃelai pɔ́.”

¹⁰ Nya ƃe Safâŋ nyii kɛ̀ a gâloŋ ŋɔkɔlɔ-pɔ̃yɛ-nuui è mò ma, “Kɛ́lɛ mɛni da kpɛ́ni káa naa. Zâla laa-soŋ-nuu kɛ́tɛi, Akia è gɔlɔi ŋí tɛ̀ɛ ḿbɔ.” Nya ƃe è gɔlɔi lôno gâloŋ mî.

¹¹ Tãi Gâloŋ Zosâya è mɛnii mɛ̀ni la kɛ̀ Ɣâla Ŋɔtɔ̂ŋ Kɔlɔi sui, malôŋ è tòo mà é maa-seɣe fála.

¹² Naa ŋá ma, gâloŋ è zâla láa soŋ-nuui Akia, ŋɔkɔlɔ pɔ̃yɛ-nuui Safâŋ, Safâŋ ǹóŋ Aikaŋ, Makaia ǹóŋ Abɔ da ǹúui a tíi kɛ̀ ǹyaa gâloŋ kpono mai, Asaia tòli díkîe ma ǹyɛɛ dîai,

¹³ “Ka lí ká Yâwɛɛ marê kɛ́ lé ƃé a ŋ̀wɛ̂lii a gɛɛ kú gɛ́i? Ńâai la Yâwɛɛ líi a pɔri kɛ̂i a ŋwánaa ḿâ da diai kélee díkaa Zuda lɔii sui, kpɛ́ni fêi, kúnûa pɔlɔ-ŋai dífe dɔ̂ŋ-ŋai ŋí mɛi káa ní, dí ma tûa kɛ́ nyii-ŋai díkaa gɔlɔi ŋí su, dí lɛ́lɛɛ kúmɛni mai.”

¹⁴ Nya ƃe Zâla láa soŋ-nuui Akia, ŋɔkɔlɔ pɔ̃yɛ-nuui Safâŋ, Safâŋ ǹóŋ Aikaŋ, Makaia ǹóŋ Abɔ da ǹúui a tíi kɛ̀ ǹyaa gâloŋ kpono mai, Asaia dí kùla naa ŋá ma, dí lí a gɛɛ dí lóno Ɣâla ŋɔlóno kɛ́-nuui Ɔda pɔ́. Ɔda bɔ̂ŋ ƃé kɛ̀ a Sɛluŋ nyii gâloŋ ŋɔseɣe-ŋai mɛni è kɛ̀ mai. Ɔda seeɛ́ è kɛ̀ Zerusâlɛŋ taa-leei ŋûa-pere. Tãi dí kòyaŋ la ŋɔpɛ́rɛi mui,

¹⁵ è mò dîa ǹyɛɛi, “Gâloŋ Zosâya ƃé ká tɛ̀ɛ ƃɛ́, ǹyaŋ m̀ɛnii ká ŋí Yâwɛɛ Eezuɛ Ŋɔɣâlai a m̀ôi mài,

¹⁶ ‘Zosâya, ńyãa ƃa Yâwɛɛ! Ŋa pâi mɛnii ŋí kɛ̂i, ŋa pâi gâai a gɛɛ ǹɔii-ŋuŋ ŋí da dîai kélee díkaa zui, dísu a pâi karâi. A pâi kɛ̂i kpɔ́ nɔ́ yɛ̂ɛ berei gɔlɔi ŋí a môi lai.

¹⁷ Zuda-ƃelai da díyee kúla ḿû. Da sâla-ŋa kùla Ɣâla da kpɛ́ni-ŋa dîa. Da díkpɔɔi kpɛtɛ ɣâla-ŋai fɛ̀li. Ḿva pɔ̂ri fâai mɛni sîi ŋí ma. Ńii ŋwânai kpɔ́ a ŋánaa.

¹⁸ Zosâya, íwoli tɔ́ɔ m̀ɛnii ma ŋa pâi gɛ̂i.

¹⁹ Ŋa berei káa ímalôŋ è tòo la yâ tãi í ǹono la a gɛɛ ǹɔii da zu-ƃelai kélee su a pâi karâi kpɔ́ kpoŋ-kpoŋ dí kúla ŋ́ɛi. Í íma sêɣe fàla maloŋ tôo-maa su ǹyaŋ ŋa íwɔlɔ-woo mɛ̀ni.

²⁰ Mɛni ma, ŋa pâi ǹɛɛ̂i naa í sáa lii-sêe su, ŋá lɛ́ɛ pâi ƃɛ́ su karâi.’ ” Zinâai dí kùla dí lí pôlu a m̀ɛnii su too wôoi Ɔda è mò dîai gâloŋ Zosâya pɔ́.