Tɔɔɓɛlaa veelɛ 16 - Bible

Dí Eɣa kɛ̀ a Kâloŋ Zuda

¹ Tãi Eezuɛ kaloŋ Pika è kɛ̀ la ŋɔkâloŋ-laai su a kóraŋ puu káo lɔ́ɔlu mɛi feerɛi, dí Eɣa kɛ̀ a kâloŋ Zuda. Eɣa ŋí ǹâŋ láa ƃɛ́ kɛ̀ a Zotaŋ.

² Eɣa è kɛ̀ a kóraŋ buu feerɛ a ma tãi tí. Zeɛ́ɛ è kɛ̀ Zerusâlɛŋ taa-leei su ǹyaŋ è kɛ̀ gâloŋ-laai su a kóraŋ puu káo lɔ́ɔlu mɛi da. Eɣa fé kɛ́ ní a zɔŋ lɛ́lɛɛ yɛ̂ɛ ǹâŋ pɔlɔi Deeƃé nyii wɔ́lɔ Yâwɛɛ líi laai. Kɛ́lɛ è Yâwɛɛ wóo pìli.

³ Eɣa è kɛ̀ máŋ a zɔŋ nyɔ́mɔɔ kpɔ́ a ŋánaa yɛ̂ɛ Eezuɛ kaloŋ pɔlɔ-ŋai. È ǹóŋ-surɔŋ kùla a kéreŋ sâla Ɣâla-pɔkɔɔ-ŋa dîa. Mɛnii ŋí è kɛ̀ a sɔnyɔ̂ŋ su kɛ́tɛ Yâwɛɛ ŋɛ́i. Zɔnyɔ̂ŋ ŋí ƃé ǹɔii ŋûŋ kpéli-ŋai dí wɔ́lɔ kɛ̀ gɛ̂i nyii gɛ̀ Yâwɛɛ kɛ́ dísu kàra a gɛɛ Eezuɛ-ŋai dí pá dí sée naa, ǹɔii é kɛ́ a dípɔɔ.

⁴ Eɣa è kɛ̀ kpɔ́ nɔ́ sâla kulâi gɛ́ kéreŋ-sɛŋ kúŋ-nɛ̃ɛ kèreŋ ǹûai dí Ɣâla-pɔkɔŋ fɛli kwaa-ŋai ma, ǹyée-tɔɔ-ŋai tôŋ su da ŋúru kpaya-kpayai ninîŋ mu.

⁵ Siria Kaloŋ Leziŋ da Eezuɛ kaloŋ Pika dí pà dí kɔ́ pɛ́lɛ Zerusâlɛŋ ma dí tínaŋ naa ma. Kɛ́lɛ dífe pɔri ní Eɣa ǹyée mɛi ɣâlei.

⁶ Maa tãi tí yée mu, Idɔŋ kaloŋ è Ila taa-leei kula-yeei kɛ̀ pôlu. È Zuda-ƃelai kélee kpɛ̀ naa. Nyíti pôlu ma, Idɔŋ-ƃelai dí pà dí sée naa. Ǹyaŋ díkaa nîi naa é tóo sâai ŋí ma.

⁷ Zuda kaloŋ Eɣa è worɛ̂ tɛ̀ɛ Asiria kaloŋ Tigila Pileza pɔ́ naa ǹyɛɛ mai, “Ŋ́gaa a íyee-mu-nuu da íloŋ. Kpera yɛ̂ɛ, pá í kpɔŋ-maa tɛɛ ḿbɔ í ŋáfulu-laai maa-kɔ̃ɔ kpɛ́ni fêi, Siria Kaloŋ Leziŋ da Eezuɛ kaloŋ da kɔ́ pɛ́lɛ mâ.”

⁸ Eɣa è zɛŋ kâo kolei da gôoi kùla ŋâla-pɛrɛ kɛ́tɛi mu da gâloŋ-pɛrɛ kɛ́tɛi é dɛ́ɛ ŋ̀orɛ̂-woo ƃó-ƃelai pɔ́ a gɛɛ dí lí la a sama-sɛŋ Gâloŋ Tigila Pileza pɔ́.

⁹ Tãi kpɔ́ nɔ́ Gâloŋ Tigila Pileza è ŋorɛ̂-wooi ŋí mɛ̀ni lai, è ǹyée sèe mù. È ŋɔkɔ-kûluƃa-ŋai sìɣe dí lí Siria. È kɔ́ pɛ̀lɛ Dɛmɛika taa-leei ma. È gâloŋ Leziŋ pàa é naa-ƃelai sóŋ a kɔ-sôŋ-ŋa. È lì a díkelee Kîɛ taa-leei su é díkɛ a luɛ-ŋa.

¹⁰ Tãi da tɛ̀ɛ pôlu ma, Eɣa è lì Dɛmɛika taa-leei su a gɛɛ da Gâloŋ Tigila Pileza dí koyaŋ. Tãi Gâloŋ Eɣa è kɛ̀ la naai, è Ɣâla-teƃele da kàa naa. Nya ƃe è bɔkɔ̂ŋ kpɛ̀tɛ é dɛ́ɛ pôlu zâla láa-soŋ-nuui Yuraya pɔ́ naa a gɛɛ é da kpɛtɛ mì. È gili-ŋa pônoi kélee tɛ̀ɛ berei a pɔ̂ri gbɛtɛ̂i lai.

¹¹ Zâla láa-soŋ-nuui Yuraya è ŋ̀âla-teƃelei kpɛ̀tɛ kpɔ́ nɔ́ yɛ̂ɛ berei Gâloŋ Eɣa è maa kîli-ŋa ponoi tɛ̀ɛ la bɔ́ é kúla Dɛmɛika. È kpɛ̀ɛ díi ma Gâloŋ Eɣa é lɛ́ɛ lenêi pôlu Zuda.

¹² Tãi Eɣa è kùla la Dɛmɛika é lí pôlu bɔ́ taai, è lì a gɛɛ é ŋ̀âla-teƃelei káa nyii Yuraya è gbɛ̀tɛi. È lì sâla kula mɛni ma. È sìa é lí ŋ̀âla-teƃelei ma.

¹³ Eɣa è ŋɔkéreŋ sâlai kùla, mii-sɛŋ salai, é ŋɔkpele-sɛŋ sala-sɛŋ pú ŋ̀âla-teƃelei ma, é ŋɔlii-see sala-sɛŋ ŋãa kpɛ́mɛŋ ŋ̀âla-teƃelei ma.

¹⁴ Nyíti pôlu ma, è mara Ɣâla-teƃelei kùla zeêi é ŋ̀âla-teƃelei ninai sée bɔ́ɔ ŋá. È mara Ɣâla-teƃele pɔlɔi sèe ŋ̀âla-teƃele ninai ŋɔyá-ŋua pere. È nyíŋi kɛ̀ kpɛ́ni fêi, è kɛ̀ ŋ̀wɛ̂lii a gɛɛ ŋɔɣâla-teƃelei ŋí é kɛ́ Yâwɛɛ ŋɔpɛrɛ kɛ́tɛi ŋɛ́i-tuɛ.

¹⁵ Gâloŋ Eɣa è mò Zâla láa-soŋ-nuui Yuraya ma ǹyɛɛi, “É kúla sâa ma é lí tuɛ-pere, ŋ̀ele-wala da ŋ̀ele-wulii sala-sãai é pɛ́lɛ mii-sɛŋ sama-sãai dîa, gélee kúla ŋ̀âla-teƃelei ŋí ma. Gâloŋ da ǹûai dísama-sãai kúla ma a sâla. Zâla-sãai ŋãa kpɛ́mɛŋ ma. Kɛ́lɛ mara Ɣâla-teƃelei lɛ́ɛ naa a gɛɛ ŋ́gɛ Ɣâla fɛ̀li ma, ŋ́gɛ marê kɛ̀ lé mɛni ƃé a wɛ̂lii ŋá gɛ́ mìi.”

¹⁶ Zâla láa-soŋ-nuui Yuraya è mɛnii kélee kɛ̀ yɛ̂ɛ berei Gâloŋ Eɣa è mò la mai.

¹⁷ Gâloŋ Eɣa è m̀ara-keleŋ-ŋa kɔ́ɔ kɛ́ɛ mu feerɛ-feerɛi fùluŋ nyii da kâa tíi kɛ̀ a dia ŋâla-pɛrɛ kɛ́tɛi mui. È ǹyá seêi-kɛ sɛŋ-folo pɛlɛ-pɛlɛɛi kùla díkîe ma. Ǹyá seêi-kɛ sɛŋ kɛ́tɛi kɛ̀ a gbɛ́tɛɛ a ƃarai, kùla m̀ara-niŋa-loŋ pɔkɔŋ puu káo feerɛi pôlu máŋ é zée kɔni ŋá nyii gɔ́ɔ è kɛ̀ a bîlaŋɔɔ a kɔnii.

¹⁸ A gɛɛ Gâloŋ Eɣa é marâŋ, Asiria kaloŋ líi láai, zɛŋ kɛ̀ gâloŋ see-sɛŋ kɔlɛ nyii ǹɔii kâloŋ a kâa tɔ̀ɔ ŋá ŋâla-pɛrɛ kɛ́tɛi mu gɛ́ lônoi, è gùla dɔɔ̂i. È berei pû nyii gâloŋ a kâa tɛ̀ɛ la gɛ̂ lì ŋâla-pɛrɛ kɛ́tɛi mui.

¹⁹ Mɛni da kpɛ́ni-ŋai kélee Gâloŋ Eɣa è gɛ̀ tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dí mɛni pɔ̂lɔ kɔlɔi su.

²⁰ Gâloŋ Eɣa è sàa dí nòo ǹâŋ pɔlɔ-ŋai kɔlɛ Gâloŋ Deeƃé ŋɔtaai su Zerusâlɛŋ. Dí ǹóŋ Ɛsekaya kɛ̀ a kâloŋ bɔ́ɔ ŋá.