Tɔɔɓɛlaa veelɛ 14 - Bible

Amazia a kɛ́ a Kâloŋ Zuda

¹ Tãi Eezuɛ kaloŋ Zɛoasi è kɛ̀ la ŋɔkâloŋ-laai su a kóraŋ feerɛi, dí Amazia kɛ̀ a kâloŋ Zuda. Amazia ŋí è kɛ̀ a Zoasi ǹóŋ.

² Amazia è kɛ̀ a kóraŋ buu feerɛ káo lɔ́ɔlu tãi dí gɛ̀ la a Zuda kaloŋ, ǹyaŋ è kɛ̀ gâloŋ-laai su a kóraŋ buu feerɛ káo lɔ́ɔlu mɛi náaŋ. Zeɛ́ɛ è kɛ̀ Zerusâlɛŋ nyii kɛ̀ a ǹee Zɛoadiŋ pɔ́-taai.

³ Amazia è pìlaŋ ǹâŋ Zoasi kɔ́ɔ pɔɔ su a Yâwɛɛ wóo mɛniɛɛ tɔ̃yâ-tua kɛ́ɛ su. Kɛ́lɛ vé Yâwɛɛ líi-laa ní yɛ̂ɛ ǹâŋ pɔlɔi, Gâloŋ Deeƃé.

⁴ Amazia fé ǹûai díɣâla-pɔkɔŋ fɛli kwaa-ŋai ma su kara ní. Mɛni ma, ǹûai dí kɛ̀ nɔ́ liî gwaa-ŋai ŋí ma díkɛ sâla-ŋa kùla naa.

⁵ Tãi Amazia è nâa sèe la gâloŋ laai mɛi é zame pîlaŋ, è gɔmɛnɛ-ƃela kpaya-kpayai kélee sòŋ nyii-ŋai ǹâŋ pàai. È dí kélee dípaa.

⁶ Kɛ́lɛ Amazia fé gɔmɛnɛ-ƃela kpaya-kpayai tí dílônii paa ní. Yâwɛɛ è wɔ́lɔ mò Mose ma a gɛɛ é bɔ̃yɛ dɔ̂ŋ kɔlɔi su, dífe lóŋ-kaa-ƃela pàa dí lônii dísɔnyɔ̂ŋ mɛni ma kpaa máŋ dí nîa-pɛlɛɛi paa díkaa-ƃelai dí sɔnyɔ̂ŋ mɛni ma.

⁷ Amazia kɛ́ɛ a kâloŋ, è Idɔŋ-ŋai dí kɔ-kuluƃa-ŋai dí wála puu pàa gbolo liyeŋ tiŋ-tiŋ su. È Sila taai yée mɛi ɣâle é ǹaa láa maa fáleŋ a Zotɛa nyii gáa sâa a naa laai.

⁸ Ɣele tɔnɔ da, Gâloŋ Amazia è worɛ̂ tɛ̀ɛ Zɛoâi ǹóŋ pɔ́naa, Eezuɛ kaloŋ Zɛoasi ǹóŋ nyii kɛ̀ a Zewu ǹóŋ lóŋ ǹyɛɛi, “Ŋa ŋ̀wɛ̂lii í pá ḿbɔ naa a gɛɛ kwa ƃía kú kɔ́-kɔ.”

⁹ Zoai è Amazia ŋɔworɛ̂-wooi su tòo ǹyɛɛ ma, “Zɛŋ ƃé gɛ̀ naa, ɣele tɔnɔ da, Lɛƃanɔŋ wolai su ŋaleŋ-kpɔlɔ loŋ da è wɔ́lɔ ŋorɛ̂i ŋí tɛ̀ɛ sîda wuru kɛ́tɛ tɔnɔ da pɔ́ naa ŋ̀olâi tí su ǹyɛɛ ma, ‘Ŋa ŋ̀wɛ̂lii a gɛɛ ńoŋ-surɔŋ é íloŋ-nɛnii kúla a ŋɔnɛnî. Kɛ́lɛ naa pôlu ma, fɛnɛ-sɛŋ kɛ́tɛ tɔnɔ da è pà é sia ŋ̀alêŋ-kpɔlɔ-loŋ mɛi é naa pàa-pâa.’

¹⁰ Amazia, gáa íkili ŋá a gɛɛ íwala-wâlai nâa a ŋá ŋánaa kpɛ́ni fêi, í Idɔŋ lɔii yée-mɛi ɣâle kɔ́ su. Mɛnii ŋí a íŋɛi tɛ́. Kɛ́lɛ lɛ́ɛ í pɔ́-taai í maa yoŋka tɛɛ. À kɛ̀ ƃa mɛni kpɔ̂lu kɔ̀ri yâ, ka ílɔii-ŋuŋ su-ƃelai kélee ká ŋuŋ lá a pâi pilîi.”

¹¹ Kɛ́lɛ Amazia fé ŋ̀óli tɔ̀ɔ ní ma. Nya ƃe Eezuɛ kaloŋ Zɛoasi da ŋɔkɔ-kuluƃa-ŋai dí lì dí kɔ́ pɛ́lɛ ma da ŋɔnûai. Zɛoasi da Zuda kaloŋ Amazia dí kòyaŋ dí tɔ́ɔ díkîe-ni ŋɛ́i Bɛ-Simɛɛ daâi Zuda lɔii kpiniŋ su, ƃɛ́i dí díwala-wala-laai su-kɔɔŋ naai.

¹² Tãi dí kɛ̀ gɔ́i kɔ̂i lai, gâloŋ Zɛoasi da ŋɔnûai dí Zuda kaloŋ Amazia da ŋɔkɔ-kuluƃa-ŋai yée mɛi ɣâle pere sîi kélee su. Zuda kɔ-kuluƃa-ŋai lɛ̀ɛ a dífului, dí pù tɛi-tɛi a díkpɔɔi pere dí lí dípɔ-taai.

¹³ È kɛ̀ tí, Zɛoasi è gâloŋ Amazia sòŋ a vúlu. Naa pôlu ma, Zɛoasi da ŋɔkɔ́-kɔ-ƃelai dí lì dí tɛ́ Zerusâlɛŋ taa-leei su. Dí daa-leei tí ŋɔkóraŋ wòlo é síɣe Ifiraŋ galai la é tóo zôŋo su galai la nyii naa è kɛ̀ yɛ̂ɛ núu kɔ́ɔ ŋá ŋuŋ lɔ́ɔlu mɛi dai.

¹⁴ Zɛoasi è gôo da zɛŋ kâo kolei kélee sìɣe é pɛ́lɛ zãa lɛ́lɛɛ-ŋai kélee dîa kɛ̀ Yâwɛɛ ŋɔɣâla-pɛrɛ kɛ́tɛi mui da zɛŋ kâoi kélee kɛ̀ gâloŋ ŋɔsɛŋ kâo lâai kɛ́ kwaai mai. È ǹûai sòŋ a kɔ-soŋ-ŋa. Naa pôlu ma, è lène pôlu Sameria.

¹⁵ Mɛni da kpɛ́ni-ŋai kélee Zɛoasi è gɛ̀ tãi è kɛ̀ la a kâloŋ é pɛ́lɛ ŋɔlii-kpele tua-ŋai dîa da berei é Zuda kaloŋ Amazia yée mɛi ɣâle lai, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

¹⁶ Zɛoasi è sàa é lí ǹâŋ pɔlɔ-ŋai pɔ́ ǹyaŋ dí nòo Sameria taa-leei su Eezuɛ kaloŋ-ŋai kɔlɛ. Dí ǹóŋ Zɛroboaŋ kɛ̀ a kâloŋ bɔ́ɔ ŋá.

Zuda kaloŋ Amazia saa mɛni

¹⁷ Zoasi ǹóŋ Amazia nyii kɛ̀ a Zuda kaloŋ, è kɛ̀ ɣele ma a kóraŋ puu káo lɔ́ɔlu, Eezuɛ kaloŋ Zɛoasi saa pôlu ma.

¹⁸ Mɛni da kpɛ́ni-ŋai kélee Amazia è gɛ̀ tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dímɛni pɔ̂lɔ kɔlɔi su.

¹⁹ Nûa da-ni dí tɔ̀ɔ Amazia ma Zerusâlɛŋ dí gbɛtɛ a gɛɛ dí baa. Nya ƃe tãi è gɔ̀lɔŋ lai, è pu é lí Laki taa-leei su. Tãi è lì la naai, ŋɔkpɔara-ƃelai dí làaŋ ma naa, dí pɛ̀lɛ ma dí baa.

²⁰ Naa pôlu ma, dí boma sìɣe dí dɛ́ soo pôlu dí pá la Zerusâlɛŋ taa-leei su dí nòo ǹâŋ pɔlɔ-ŋai kɔlɛ Deeƃé ŋɔtaai su.

²¹ Nyíti pôlu ma, Zuda-ƃelai dí Amazia ǹóŋ Azaria sìɣe dí gɛ́ a kâloŋ ǹâŋ pɔ́ɔ ŋa. Ma tãi tí, è kɛ̀ a kóraŋ puu káo lɔ́ɔlu mɛi da.

²² Gâloŋ Azaria ƃé Ila taa-leei kula-yeei kɛ̀ é naa tɔɔ pôlu ǹâŋ saá pôlu ma.

Da Zɛroboaŋ veerɛi kɛ́ a kâloŋ Eezuɛ

²³ Tãi Zuda kaloŋ Amazia è kɛ̀ la ŋɔkâloŋ-laai su a kóraŋ puu káo lɔ́ɔlui, dí Zɛroboaŋ kɛ̀ a kâloŋ Eezuɛ. Zɛroboaŋ ŋí è kɛ̀ a Zɛoasi ǹóŋ. È gɛ̀ gâloŋ laai su a kóraŋ buu náaŋ káo tɔnɔɔ. Zeeɛ è kɛ̀ Sameria.

²⁴ È Yâwɛɛ wóo pìli a dua-pere nyɔ̂ŋ-ŋai kɛ́ɛ yɛ̂ɛ Neba ǹóŋ Zɛroboaŋ nyii-ŋai è gɛ̀ Eezuɛ-ŋai dí gɛ̀i.

²⁵ Gâloŋ Zɛroboaŋ II ƃé Eezuɛ lɔii ŋɔgoyaŋ-perei kɛ̀ é láa pôlu ǹâai pɔlɔi ma yɛ̂ɛ berei è wɔ́lɔ kɛ̀ la Gâloŋ Deeƃé da ǹóŋ Saloma dítãi mai. Nya ƃa é síɣe Libo Ama, ǹɔii ŋûa-pere, é tóo Araba Yuoi ma nyii gáa ǹɔii kwára-perei. È kɛ̀ kpɔ́ nɔ́ yɛ̂ɛ berei Yâwɛɛ, Eezuɛ ŋɔɣâlai è wɔ́lɔ mò la ŋɔtíi-kɛ-nuui, Amatai ǹóŋ Zona sârai nyii wɔ́lɔ kɛ̀ a Ɣâla ŋɔlóno-kɛ-nuui dɔnɔi. Zona è wɔ́lɔ kɛ̀ a Gâai-ifa taai su nuu.

²⁶ Yâwɛɛ è berei kàa Eezuɛ-ƃelai kélee díkɛ̀ la mɛni kpɔ̂lu su a zu kɛ́tɛ, diai kɛ̀ a luɛ-ŋai da diai kɛ̀ a díŋuŋ ma ƃóɔɔi. Núu da fé kɛ́ ní naa a gɛɛ é kpɔŋ-maa tɛɛ dípɔ.

²⁷ Nyíi nɔ́ Yâwɛɛ è wɔ́lɔ góno tèe a gɛɛ vé pâi Eezuɛ-ŋai kélee su karâi ŋ̀éniɛi sui, è kpɔŋ maa tɛ̀ɛ Zoai ǹóŋ Zɛroboaŋ pɔ́ é díŋuŋ ma ƃó.

²⁸ Mɛni da kpɛ́ni-ŋai kélee Gâloŋ Zɛroboaŋ è gɛ̀ tãi è kɛ̀ la a kâloŋ, é pɛ́lɛ ŋɔlii-kpele mɛni-ŋai dîa da berei è Dɛmɛika da Ama taa-ŋai kula-yeei kɛ̀ lai, gélee pɔ̃yɛ̂i Eezuɛ kaloŋ-ŋai dí mɛni pɔ̂lɔ kɔlɔi su.

²⁹ Gâloŋ Zɛroboaŋ è sàa dí nòo ǹâŋ pɔlɔ-ŋai Eezuɛ kaloŋ-ŋai kɔlɛ. Dí ǹóŋ Zɛkɛraya kɛ̀ a kâloŋ bɔ́ɔ ŋá.