Tɔɔɓɛlaa veelɛ 13 - Bible

Eezuɛ kaloŋ Zɛoazi

¹ Tãi Eezuɛ kaloŋ Zoasi è kɛ̀ la ŋɔkâloŋ-laai su a kóraŋ buu-feerɛi, dí Zɛoazi kɛ̀ a kâloŋ Zuda. Zɛoazi ŋí ǹâŋ láa ƃé kɛ̀ a Zewu. Zɛoazi è kɛ̀ gâloŋ laai su a kóraŋ puu káo lɔ́ɔlu mɛi feerɛ, zeeɛɛ è kɛ̀ Sameria taa-leei su.

² È Yâwɛɛ wóo pìli a sɔnyɔ̂ŋ kɛ́ɛ. Vé kpera ní sɔnyɔ̂ŋ kɛ̂i yɛ̂ɛ Zɛroboaŋ nyii Eezuɛ-ŋai kɛ̀ dí sɔnyɔ̂ŋ kɛi.

³ Yâwɛɛ líi è ŋwàna Eezuɛ-ŋai dîa. Nya ƃe è nɛ̀ɛ naa a gɛɛ Siria Kaloŋ Azae da ǹóŋ Bɛŋada dí Eezuɛ yée mɛi ɣále a tãi támaa.

⁴ Zɛoazi è Yâwɛɛ fɛ̀li kpɔŋ-maa mɛni ma, ǹyaŋ Yâwɛɛ è berei kâa Gâloŋ Azae è kɛ̀ Eezuɛ-ŋai sonîi la a nyɔ́mɔɔi. È Zɛoazi ŋɔfɛli-wooi mɛ̀ni é zu tòo

⁵ a kâloŋ da tɛɛ́ Eezuɛ pɔ́ nyii dí ŋuŋ maa ƃò Siria-ŋai yêei. Ǹyaŋ Eezuɛ-ŋai díkɛ̀ ŋɔ́nɔ lii-see su yɛ̂ɛ berei ì wɔ́lɔ kɛ̀ la a bɔlɔi.

⁶ Kɛ́lɛ Eezuɛ-ŋai díkɛ̀ nɔ́ niî sɔnyɔ̂ŋ kɛ̂i yɛ̂ɛ Zɛroboaŋ ŋɔkáa-laai su-ƃelai. Dífe ŋâla-pɔkɔŋ Asira fɛli kwaai ma su kara ní. Dí ŋ̀úru kôyai lɛ̂ɛ tɔɔ ní nyii kɛ̀ Asira laai mɛni ma Sameriai.

⁷ Naa è lɛ̀ɛ a guro dí Gâloŋ Zɛoazi ŋɔkɔ-kuluƃa-ŋai kélee páa, dí ŋɔkɔ́-kɔ-sãai kélee su kara. Nyii-ŋai nɔ́ lɛ̀ɛ ǹyêei díkɛ a soo-sia-kpakolo buu lɔ́ɔlu, kɔ́-kɔ-keleŋ puu da kɔ́-kɔ-ƃela wála puu. Kpɛ́ni fêi, Siria kaloŋ è gbéli-ŋai kélee su kàra, é dí kɛ́ yɛ̂ɛ muluŋ à kɛ̀ sí-sãa táŋ lɔii ma.

⁸ Mɛni da kpɛ́ni-ŋai Gâloŋ Zɛoazi è dí kɛ̀ a tãi è kɛ̀ la a kâloŋ da ŋɔlii-kpele tua-ŋai, gélee pɔ̃yɛ̂i Eezuɛ kaloŋ-ŋai dímɛni pɔ̂lɔ kɔlɔi su.

⁹ Gâloŋ Zɛoazi è sàa é lí ǹâŋ pɔlɔ-ŋai pɔ́. Dí nòo Sameria taa-leei su. Dí ǹóŋ Zɛoasi kɛ̀ a kâloŋ bɔ́ɔ ŋá.

Da Zɛoasi kɛ́ a Kâloŋ Eezuɛ

¹⁰ Tãi Zuda kaloŋ Zoasi è kɛ̀ la ŋɔkâloŋ-laai su a kóraŋ buu-saaƃai, dí Zɛoasi kɛ̀ a kâloŋ Eezuɛ. Zeeɛɛ è kɛ̀ Sameria taa-leei su. È kɛ̀ gâloŋ laai su a kóraŋ puu káo lɔ́ɔlu mɛi da.

¹¹ È Yâwɛɛ wóo pìli a sɔnyɔ̂ŋ kɛ́ɛ kpɔ́ nɔ́ yɛ̂ɛ berei Neba ǹóŋ Gâloŋ Zɛroboaŋ è gɛ̀ lai, nyii è gɛ̀ Eezuɛ-ŋai dí gɛ́i. Vé bôlu tɔ̀ɔ ní zɔnyɔ̂ŋ-ŋai dɔnɔ kpîŋ ma.

¹² Mɛni da kpɛ́ni-ŋai Zɛoasi è gɛ̀ tãi è kɛ̀ la a kâloŋ, é pɛ́lɛ gɔ́i è gɔ̀ Zuda kaloŋ Amazia pɔ́i, gélee pɔ̃yɛ̂i Eezuɛ kaloŋ-ŋai dímɛni pɔ̂lɔ kɔlɔi su.

¹³ Gâloŋ Zɛoasi è sàa é lí ǹâŋ pɔlɔ-ŋai pɔ́. Dí nòo Eezuɛ kaloŋ pɔlɔ-ŋai ƃolôŋ-ŋai kɔlɛ. Naa pôlu ma dí ǹóŋ Zɛroboaŋ kɛ̀ a kâloŋ bɔ́ɔ ŋá.

Ɣâla ŋɔlóno kɛ́-nuui Ilasa saa mɛni

¹⁴ Ɣâla ŋɔlóno-kɛ-nuui Ilasa è naa kɛ̀ kɔlɛ̂i kpɔ́ a gbanaŋɔɔ. Ǹyaŋ gɔlɔ-felai ŋí ƃé è lɛ̀ɛ zu. Eezuɛ kaloŋ Zɛoasi è lì bɔ́ naa a gɛɛ é naa káa. Gâloŋ è wɔ̀lɔ ma ǹyɛɛi, “Ńâŋ! Ńâŋ! Í kɛ̀ a Eezuɛ maa-kɔ̃ɔ-nuu kpanaŋɔɔ!”

¹⁵ Ilasa è mò ma ǹyɛɛi, “Kerâŋ siɣe da sɔ̀la-ŋa.” Zɛoasi è kerâŋ sìɣe da sɔ̀la-ŋa.

¹⁶ Nya ƃe Ilasa ì mò Eezuɛ kaloŋ ma ǹyɛɛi, “Gerâŋ ŋá tɛ́.” Ǹyaŋ gâloŋ è gerâŋ ŋá tɛ̀. Ilasa è ǹyée pɛ̀lɛ gâloŋ yée veerɛŋɔɔ ma.

¹⁷ Ilasa è mò gâloŋ ma ǹyɛɛi, “Vãa-laɣi soŋ-kpoŋ lá ƃó nyii gáa vóloi ƃêlai perei.” Tãi gâloŋ è ǹá ƃò lai, Ilasa è làɣi ǹyɛɛi, “Zɔ̀lai píli!” Zɛoasi è zɔ̀lai pîli. Ilasa è mò ma ǹyɛɛ, “Zɔ̀lai tí káa a ŋɛi-kɛ-maa é nɛ́ yâ a gɛɛ a pâi kpɔŋ maa tɛɛ̂i ípɔ í Siria-ŋai dí kɔ-kuluƃa-ŋai yée mɛi ɣále Afɛ.”

¹⁸ Ilasa è mò ǹyɛɛi, “Zɔ̀la-ŋai kpéli-ŋai síɣe í ǹɔii lókwa a dia.” Zɛoasi è zɔ̀la-ŋai sîɣe é ǹɔii lókwa la gîei saaƃa, é kpéra.

¹⁹ Ilasa líi è ŋwàna gâloŋ ma nyíŋi mɛni ma é mó ma ǹyɛɛi, “Eêi kɛ̀ îi ǹɔii lôkwa gîei lɔ́ɔlu kpaa máŋ lɔ́ɔlu mɛi da, í kɛ̀ pâi Siria-ŋai yée mɛi ɣâlei í dísuu kpɛ́ɛ. Kɛ́lɛ íkaa pâi nâa díyee mɛi ɣâlei nɔ́ gîei saaƃa.”

²⁰ Nyíti pôlu ma, Ilasa è sàa dí nòo. Mɛni-ŋai ŋí kɛ́ɛ pôlu ma, Môa-ƃelai da kâa dí kɔ-kuluƃa sɔŋ nyɔ́mɔɔ-ŋai da-ni tɛ̀ɛ a gɛɛ dí Eezuɛ-ŋai dí-sãai kula yêei kɛ́ a tãi da kâa kɛ̀ díkpîŋ kpɛtɛ̂i la dí sí-sãai sí mɛni mai.

²¹ Tãi tɔnɔ da, Eezuɛ-ŋai da-ni dí kɛ̀ ƃolôŋ lá nalôŋ tɔnɔ poma loo mɛni ma. Dí kɛ́ɛ molôŋ lai, dí Môa-ƃelai dí kɔ-kuluƃa sɔŋ nyɔ́mɔɔ-ŋai da-ŋa kàa ŋɔ́nɔ pâi. Dí nalôŋ poma tôo gɔni ƃôloŋ su a maa félaa ƃɛ́i dí wɔ́lɔ Ilasa lòo naai dí pú. Tãi nalôŋ poma è tòo la m̀olôŋ su é lɛ́ɛ Ilasa káo mai, nalôŋ è kɛ̀ pôlu a vúlu, é mu siɣe é tɔ́ɔ.

Kɔ́ è kɛ̀ Eezuɛ lɔii loai da Siria lɔii

²² Maa ɣêle-ŋai tí su, Siria Kaloŋ Azae è kɛ̀ kpɔ́ nɔ́ a dɔ́ɔ Eezuɛ lɔii ma a tãi Zɛoazi è kɛ̀ la a kâloŋ ǹɔii tí mɛi.

²³ Kɛ́lɛ Yâwɛɛ ŋɔsɔŋ-lɛlɛ-laai é kɛ̀ nɔ́ naa Eezuɛ-ŋai mɛni ma. Ǹyaŋ è dí malôŋ kàa kpɛ́ni fêi, è Kpanaŋ-woo kɛ̀ dínâŋ pɔlɔ-ŋai yêei, Eberaɣɛ̃ɛ, Aise da Zeeka. É síɣe tãi tí ma é tóo sâa ma vé wɔ́lɔ ŋ̀wɛ̂lii é dísu kara kpaa máŋ é dí kpɛ́ ŋɛ́i-tuɛ.

²⁴ Tãi da tɛɛ pôlu ma, Siria Kaloŋ Azae è sàa. Dí ǹóŋ Bɛŋada kɛ̀ a kâloŋ bɔ́ɔ-ŋa.

²⁵ Eezuɛ kaloŋ Zɛoai ǹóŋ Zɛoasi è kɔ́ pɛ̀lɛ Siria Kaloŋ Bɛŋada ma gîei saaƃa gɛ́ ǹyée mɛi ɣâle. Zɛoasi è daa-ŋai kula-yeei kɛ̀ nyii-ŋai Bɛŋada ǹâŋ Azae è dí kùla-yeei kɛ̀ kɔ́ su ǹâŋ Zɛoazi yêei.