Tɔɔɓɛlaa veelɛ 12 - Bible

Gâloŋ Zoasi è Ŋ̀âla-pɛrɛ Kɛ́tɛi kpɛ̀tɛ

¹ Dí Zoasi kɛ̀ a Zuda kaloŋ a Eezuɛ kaloŋ Zewu ŋɔkâloŋ-laa koraŋ ǹɔ́ɔlu mɛi feerɛ ɣelei. Zoasi è kɛ̀ gâloŋ-laai su a kóraŋ buu náaŋ ǹyaŋ zeɛɛ è kɛ̀ Zerusâlɛŋ. Zoasi ŋí ǹee láa ƃé kɛ̀ a Zibia ǹyaŋ è kùla Bɛɛsiba daai.

² Zâla láa-soŋ-nuui Zɛoiada è sɛŋ lɛ̂ Zoasi ma berei a pɔ̂ri Yâwɛɛ nîa-mɛni kɛ̂i lai. Mɛni ma, Zoasi è Yâwɛɛ líi láa mɛ̀ni kɛ̀ ŋɔfúlu-laai su.

³ Kɛ́lɛ Zoasi kpîŋ fé ǹûai díɣâla-pɔkɔŋ-ŋai fɛli kwaa-ŋai ma su kara. Ǹûai dí kɛ̀ nɔ́ niî sâla-ŋa kulâi gwaa-ŋai ŋí ma díɣâla-pɔkɔŋ-ŋai dîa.

⁴ Ɣele tɔ̂nɔ da, Zoasi è Zâla láa-soŋ-ƃelai tòli é mó dîa ǹyɛɛi, “Ka zɛŋ-kaoi kélee ŋáa tɛ́ gîe ma nyii nûa da pâ la Yâwɛɛ ŋɔɣâla-pɛrɛ kɛ́tɛi mui, é máŋ kɛ́ a ŋuŋ-fela-fe-ŋa kpaa máŋ sama sãa.

⁵ Káai a zâla-laa soŋ-ƃelai, ka zɛŋ-kaoi ŋí síɣe a gɛɛ ŋâla-pɛrɛ kɛ́tɛi m̀ɛ́i-ŋai garâi mai, ká naa kpɛtɛ la.”

⁶ Kɛ́lɛ é síɣe tãi tí ma é tóo Zoasi ŋɔkâloŋ-laa koraŋ buu feerɛ káo saaƃai ma, zâla láa-soŋ-ƃelai dífe pɛlɛ ní ŋâla-pɛrɛ kɛ́tɛi kpɛtɛ tîi ma.

⁷ È zâla láa-soŋ-nuui Zɛoiada tòli da zâla láa-soŋ-ƃelai kpéli-ŋai é mó dîa ǹyɛɛi, “Káfe zɛŋ kaoi siɣêi a gɛɛ ká Ŋ̀âla-pɛrɛi Kɛ́rɛi kpɛtɛ la lé mɛni ma? Káfe ŋɔ́nɔ sɛŋ kao da kélee sìɣe kákpîŋ mɛni ma. Nyii kélee ka pâi nâa kɛ̂i zɔlɔ ƃôi, gáa nɔ́ díi-ŋai kɛ́ mɛni ma.”

⁸ Zâla láa-soŋ-ƃelai dí fàa ma a gɛɛ dífe pâi ŋɔ́nɔ sɛŋ kâo kulâi ǹûai dîa kpaa máŋ díkɛ ŋ̀âla-pɛrɛ kɛ́tɛi kpɛtɛ mɛni-ŋai láa túɛ.

⁹ Zâla láa-soŋ-nuui Zɛoiada è wúru-ƃela gãla tɔnɔ kpɛ̀tɛ. È lóa tèe mɛi-pere é zee ŋ̀âla-teƃelei láa-mii yêe mɛi-pere ŋâla-pɛrɛ kɛ́tɛi mu ƃɛ́i nûa da lɔ̀ da kâa tɛ̀ɛ naai. Tãi kélee núu da a kâa sɛŋ kâo tɛ̀ɛ la ŋâla-pɛrɛ kɛ́tɛi pɔ́i, zâla láa-soŋ-ƃelai da kâa kɛ̀ gbôŋ lá díkɛ naa mɛi kâai, da kâa maa sɛŋ kaoi sîɣe dí bú gãlai su.

¹⁰ Tãi gãlai láa a kâa fɛ̀ɛ la a sɛŋ kâoi, gâloŋ ŋɔkɔlɔ pɔ̃yɛ-nuui da zâla láa-soŋ-nuu kɛ́tɛi da kâa pà dí gãlai láa ƃó dí zɛŋ kâoi lóno dí bú ƃɔrɔ-ŋa su.

¹¹ Naa pôlu ma, da kâa zɛŋ kâoi tɛ̀ɛ ŋâla-pɛrɛ kɛ́tɛi kpɛtɛ tîi mɛi-ƃelai pɔ́. Ǹûai tí diaŋ da kâa bɛ́rɛ-kpɛtɛ-ƃelai, ŋ̀úru-yɛrɛ kɛ́-ƃelai fela fè,

¹² gɔni tée-ƃelai da bɛ́rɛi kaŋ sia-ƃelai. Ǹyaŋ dí zɛŋ kâoi da siɣe dí wúru-ƃela-ŋa yá da kɔni sɔ̃ɔ kpanaŋɔɔ. Dí da siɣe dí ŋâla-pɛrɛ kɛ́tɛi kpɛtɛ tîi maa sɛŋ kɔlɛɛi da kpɛ́ni-ŋa kɛ́ la.

¹³ Tãi dí kɛ̀ ŋâla-pɛrɛ kɛ́tɛi kpɛtɛ-tii-ŋai kɛ̂i lai, zɛŋ kâoi dí dɛ̀ɛ gbɛtɛ mɛni mai, dífe tíi kɛ́ ní a da a gɛɛ dí zãai ŋí da kpɛtɛ la yɛ̂ɛ sɛŋ-kao-kole kpele kwɛɛ, sɛŋ-folo-ŋa, laŋpo da maa tîi-kɛ-sãai, zɛŋ-folo-ŋai da sua ŋãa pù zu gbɛ́mɛŋ mɛni mai, túru-ŋa kpaa sɛŋ nyii kélee gbɛtɛɛ̂i a gôo kpaa máŋ sɛŋ-kao-kole ŋâla-pɛrɛ kɛ́tɛi mu tii kɛ́ mɛni ma.

¹⁴ Dí zɛŋ kâoi tí kélee tɛ̀ɛ díi-kɛ-ƃelai pɔ́ díi-kɛ-sãai yá mɛni ma da dí féla fé mɛni.

¹⁵ Gbakolo-ŋai kɛ̀ díi ŋí mɛi díkɛ a dí teniŋ ƃôɔɔ. Maa mɛni ma, núu da kélee fé dí marê kɛ́ ní koraŋ ƃô mɛni ma.

¹⁶ Zɛŋ kâoi da kâa dɛ̀ɛ a kpa kpɛɛ sama-sɛŋ da sɔnyɔ̂ŋ su-mɛni lɛɛ sama-sɛŋ, dífa kâa bù ŋâla-pɛrɛ kɛ́tɛi mu. Kɛ́lɛ zɛŋ kâoi ŋí a kâa kɛ̀ nɔ́ zâla láa-soŋ-ƃelai mɛni ma.

¹⁷ Maa tãi tɔnɔi tí yée mu, Siria kaloŋ Azae è lì é kɔ́ pɛ́lɛ Gâa taa-leei ma é naa yée mɛi ɣále. Naa pôlu ma, è gbɛ̀tɛ a gɛɛ é lí é kɔ́ pɛ́lɛ Zerusâlɛŋ taa-leei ma.

¹⁸ Nya ƃe Zuda kaloŋ Zoasi è zama-sãai kélee sìɣe nyii gâloŋ-ŋai kɛ̀ kâloŋ-laa su é lɛ́ɛ pâi kɛ̂i a kâloŋ, Gâloŋ Zɛosafa, Gâloŋ Zɛoraŋ da Gâloŋ Aɣazia-ni dí dɛ̀ɛ Yâwɛɛ pɔ́i, é pɛ́lɛ gôoi kélee ma kɛ̀ ŋâla-pɛrɛ kɛ́tɛi ŋɔsɛŋ-kao lâai kɛ́ kwaai ma da gâloŋ-pɛrɛ kɛ́tɛi mu é pɛ́lɛ ǹyaa kpîŋ sama-sãai ma. È zãai ŋí kélee tɛ̀ɛ a sama-sɛŋ gâloŋ ɣazia pɔ́ naa. Tãi Gâloŋ Azae è ŋɔsama-sɛŋ ŋí sɔlɔ ƃô lai, è ŋɔkɔ-kuluƃa-ŋai kpèra a gɛɛ dífe tɛ̀ Zerusâlɛŋ.

¹⁹ Mɛni da kpɛ́ni-ŋai kélee Zoasi è gɛ̀ tãi è kɛ̀ la a kâloŋ, gélee pɔ̃yɛ̂i Zuda kaloŋ-ŋai dí mɛni pɔ̂lɔ kɔlɔi su.

²⁰ Zoasi ŋɔkâloŋ-laai kpɛɛ ŋá tãi, ŋɔgɔmɛnɛ-ƃela kpaya-kpayai da-ni dí díwoo sèe a gɛɛ dí baa. Nya ƃe dí bàa Mɛlo ŋɔpɛ́rɛi mu nyii gáa berei ma ƃa kɛ̀ liî Sɛla.

²¹ Zoasi yée mu-ƃelai, Simiai ǹóŋ Zozaka da Somɛ ǹóŋ Zozaba ƃé bàa. Dí Zoasi lòo ǹâŋ pɔlɔ-ŋai kɔlɛ Zerusâlɛŋ taa-leei su. Dí ǹóŋ Amazia kɛ̀ a kâloŋ bɔ́ɔ ŋá.