Kɔlɔnikɔ Veerɛi 3 - Bible

¹ Saloma è nâa pɛ̀lɛ Ŋ̀âla-pɛrɛ Kɛ́tɛi tɔɔ́ ma Yâwɛɛ mɛni ma Zerusâlɛŋ Moriya Yeei ma ƃɛ́i Yâwɛɛ è wɔ́lɔ kùla naa ǹâŋ Deeƃé ŋɛ́i. Gwaai ŋí ma è kɛ̀ a Zɛbu-nuui Alauna ŋɔmii-sɛŋ tânii. Gwaai ŋí ma ƃé Deeƃé è wɔ́lɔ ǹaa lɛ̀.

² Saloma è pɛ̀lɛ bɛ́rɛi ŋí tɔɔ ma gɛ́ɛ a kâloŋ ŋɔkóraŋ ǹáaŋ ŋɔɣáloŋ veerɛi, ŋɔfóloi veerɛ ɣele.

³ Ŋ̀âla-pɛrɛ Kɛ́tɛi Saloma è wɔ́lɔ dɔ̀ɔ Ɣâla mì, ŋɔkôyaa è kɛ̀ a kɔ́ɔ ƃɔ̂rɔnii buu lɔ́ɔlu mɛi náaŋ. Ŋɔmu kɛ̂tɛ è kɛ̀ a kɔ́ɔ ƃɔ̂rɔnii buu saaƃa (dí zɛŋ kɔ̂ɔŋ maai ŋí sìɣe bɔlɔi ma).

⁴ Bɛ́rɛi ŋí ŋɔpîya-sai kɛ́ dúɛ-perei, ŋɔŋa kɛ̂tɛ è kɛ̀ a kɔ́ɔ ƃɔ̂rɔnii buu saaƃa, é síɣe m̀élai nyíŋi ma é seri gbéli ma. Bɛ́rɛi ŋí ŋɔmu-kɛ̂tɛ è kɛ̀ a kɔ́ɔ ƃɔ̂rɔnii buu saaƃa. È gôo-káo làa bɛ́rɛ-kaŋ ŋá bɛ́rɛi mu-pere.

⁵ È sapɔlɔ-wuru-ƃela pɛ̀lɛ bɛ́rɛ-kaŋ ma ƃɛ́rɛi mu-pere é m̀ɛi pɛ́lɛ a gôo lɛ́lɛɛ. È mà pɔ̃yɛ a tóu-laa pɔkɔɔŋ da yɔlɛ.

⁶ È Ŋ̀âla-pɛrɛ Kɛ́tɛi pɔ̃yɛɛ tòo a kɔni lɛ́lɛɛ sɔ̃ɔ kpanaŋɔɔ-ŋa. Gôoi è díi-ŋai ŋí kɛ̀ lai è dí kùla Pavaiŋ.

⁷ È bɛ́rɛi ŋɔziɛi mɛi wurui, gbôŋ-soŋ wurii, bɛ́rɛ-kaŋ-ŋai da gbôŋ-ŋai kélee mɛi pɛ̂lɛ a gôo. É ŋâla-taa koo-sãai pɔkɔɔŋ kpɛ̀tɛ bɛ́rɛ-kaŋ-ŋai dîa.

⁸ È Gwaa ma-waai ŋánaai naa kpɛtɛ. Ŋɔmu kɛ̂tɛ da ŋɔmu-koya díkɛ̀ a dípɔriɛɛ. M̀éla kélee è kɛ̀ a kɔ́ɔ ƃɔ̂rɔnii buu saaƃa. Gôoi nyíi è ǹáa bɛ́rɛ-kaŋ mɛi bɛ́rɛi mu-perei ŋɔwuɛ è kɛ̀ a pãŋ wála buu lɔ́ɔlu (50,000).

⁹ Gôo ǹerei nyíi è tíi kɛ̀ lai ŋɔwuɛ è kɛ̀ a dɛ̀ɛ pãŋ tɔnɔ ma. È pɛ̀rɛi ŋ̀ele-su pere loŋpo-ŋai mɛi pɛlɛ a gôo máŋ.

¹⁰ È ŋâla-taa kooŋ-sɛŋ veerɛ pɔkɔɔŋ kpɛ̀tɛ a wúru é gôo sia dîa.

¹¹ Zãai ŋí veerɛŋɔɔ kôoŋ ŋɔkoyaa è kɛ̀ a kɔ́ɔ ƃɔ̂rɔnii buu saaƃa. Maa-ŋuŋ kôoŋ dɔnɔ ŋɔkôya è kɛ̀ a kɔ́ɔ ƃɔ̂rɔnii lɔ́ɔu mɛi feerɛ da gbûra bilaŋɔɔ bɛ́rɛ-kaŋ ma. Goôŋ gbéli ŋɔkôya è kɛ̀ a kɔ́ɔ ƃɔ̂rɔnii lɔ́ɔlu mɛi feerɛ da gbûra bilaŋɔɔ m̀áraŋ-nuui ŋɔi ma.

¹² Goôŋ-sɛŋ ŋí veerɛ ɣelei koôŋ dɔnɔ è kɛ̀ a kɔ́ɔ ƃɔ̂rɔnii lɔ́ɔlu mɛi feerɛ da gbûra bîlaŋɔɔ bɛ́rɛ-kaŋ ma. Goôŋ gbéli ŋɔkôya è kɛ̀ a kɔ́ɔ ƃɔ̂rɔnii lɔ́ɔlu mɛi feerɛ da gbûra bîlaŋɔɔ m̀araŋ-nuui koôŋ ma.

¹³ Zãai ŋí veerɛŋɔɔ koôŋ ŋɔfúloŋɔɔ ŋɔkoya è kɛ̀ a kɔ́ɔ ƃɔ́rɔni buu saaƃa. Díkɛ̀ tɔɔ̂ni dífeerɛ díŋɛi páa bɛ́rɛi mu pere.

¹⁴ È seɣe kpɛ̂tɛ a yee bûluŋ-kɛɛ da gbɔluɔɔ é bala kpɔ́ nɛnɛ-fɛfɛ é bɔyɛ̃ too yɛ̂ɛ ŋâla-taa kooŋ-sãai. Dí zeɣei ŋí sɛ̀lɛŋ Ŋ̀âla-pɛrɛ Kɛ́tɛi mu.

Saloma è pɛ́rɛ-yée-mu wuruii feerɛi kpɛtɛ

¹⁵ Nya ƃe è bɛ́rɛ-yée mu wuru feerɛi kpɛ̀tɛ é dítɔɔ Ŋ̀âla-pɛrɛ Kɛ́tɛi lá-ƃerei. Bɛrɛ-yée mu wurii ŋí veerɛŋɔɔ ŋɔmɛi kôyaa è kɛ̀ a kɔ́ɔ ƃɔ̂rɔnii buu lɔ́ɔlu káo feerɛ da gbûra. Dímɛi pere ŋɔŋa kɛ̂tɛ è kɛ̀ a kɔ́ɔ ƃɔ̂rɔnii lɔ́ɔlu mɛi feerɛ da gbûra.

¹⁶ È yɔlɛ-ŋa pìli-pili gîei é bɛlɛ bɛ́rɛ-yée wuru-ŋai ŋá. È sɛŋ-da kpɛ̀tɛ gɛ́ɛ yɛ̂ɛ pɔmegurane wuru-ƃa é dísɛ̂lɛŋ ǹyɔlɛ-ŋai ma. Ŋ̀úru-ƃa sii ŋí è kɛ̀ a ŋuŋ tɔnɔ.

¹⁷ È bɛ́rɛ-yée mu wuru feerɛi ŋí tɔ̀ɔ Ŋ̀âla-pɛrɛ Kɛ́tɛi ŋɛ́i-tuɛ. Dɔnɔ è kɛ̀ séɣai pere. É ǹáa sée a Zakiŋ é yá-ŋûa pere ŋ̀ɔi láa sée a Bôa.