Samuɛlə dɔlɔɔ 31 - Bible

Sɔ̂ɔ da ǹônii-sinaai dí sàa

¹ Felesia-ŋai da Eezuɛ-ŋai dí kɔ̀ Giboa Yeei ma. Eezuɛ kɔ-kuluƃa-ŋai dí pù Felesia-ŋai yêei. Dí Eezuɛ-ŋai dámaa pàa. Gâloŋ Sɔ̂ɔ, ŋɔkɔ-kuluƃa-ŋai da ǹúui gbeli-ŋai dí pù.

² Felesia-ŋai dí tìnaŋ Sɔ̂ɔ ma da ǹônii-sinaai, dí ǹônii-sinaai Zonetaŋ, Abinada da Maakisua pàa.

³ Gɔ́i ŋí è kɛ̀ kpɔ́ a gbɔluɔ́ɔ Sɔ̂ɔ lá. Ŋɔkpɔara-ƃelai dí ŋwàna kpɔ́ a ŋ̀ánaa a dísɔ̀la-ŋai.

⁴ Sɔ̂ɔ è mò ŋɔkɔ́ kɔ́-sãai siɣe-nuui ma ǹyɛɛi, “Ḿbaa a íƃoa-sɔkpɔi! Ḿve ŋ̀wɛ̂lii a gɛ́ɛ Felesia-ŋai ŋí dífe Ɣâla kɔ́lɔŋ dí ɣɛ́lɛ maa kúla ŋ́gbonôi dí ḿbaa.” Kɛ́lɛ gɔ-kuluƃai kpîŋ è kɛ̀ yaôi a gɛ́ɛ é baa. Nya ƃe Sɔ̂ɔ è gbîŋ ŋɔƃóa-sɔkpɔi siɣe é bìlaŋ goi é tóo mɛi.

⁵ Gɔ-kuluƃai è gàa nɔ́ a gɛ́ɛ Sɔ̂ɔ a saa, é gbîŋ pàa a bere sîi tɔnɔi tí.

⁶ Sɔ̂ɔ è sàa, ǹônii-sinaa saaƃai dí sáa, gɔ-kuluƃai kɛ̀ ŋɔkɔ́ kɔ́-sãai siɣei è sàa máŋ. Da ŋɔkɔ-kuluƃa-ŋai kélee dí sàa a vólo tɔnɔi tí.

⁷ Eezuɛ-ŋai kɛ̀ Zariɛɛ Gbotoloi m̀éla nyíti ma da diai kɛ̀ Zɔdiŋ Ya-leei m̀éla nyíti ma kɛ́ɛ da mɛ̀ni a gɛ́ɛ Sɔ̂ɔ da ǹônii dí sàai, dí kùla dítaa-lêe-ŋai su dí pú. Felesia-ŋai diaŋ dí tɛ̀ daa-ŋai kpîŋ su dí sée naa.

⁸ Gɔ́i kɔ́ɔ maa ɣele ƃɔ́ɔi, Felesia-ŋai dí lì pôlu gɔ́-ɣenei ŋá a gɛ́ɛ Eezuɛ-ŋai dí dípaai díkɔ kɔ́-sãai síɣe. Dí Sɔ̂ɔ da ǹônii-sinaai poma kàa lâani naa Giboa Yeei ma.

⁹ Dí Sɔ̂ɔ ŋuŋ tèe ma dí ŋɔkɔ́-kɔ́ yɛkɛi kúla gɔŋ ma. Gɛ́ɛ tíi, dí kéla tɛ̀ɛ kpɔ́ Felesia gwaa kélee ma díɣâla pɛrɛ-ŋai lá a gɛ́ɛ dí duŋ lɛ́lɛɛi ŋí ƃó naa dínûai dîa.

¹⁰ Dí ŋɔkɔ́ yɛkɛi pù díɣâla nɛnii Atarɔ ŋɔpɛ́rɛi mu. Dí Sɔ̂ɔ poma kpamo Bɛsaŋ taa-leei ŋɔgalai ma.

¹¹ Zabɛsi-gilia-ƃelai kɛ́ɛ da m̀ɛnii mɛ́ni Felesia-ŋai dí gɛ̀ a Sɔ̂ɔ pomai,

¹² Zinâa líi-kpeleɛɛ-ŋai kɛ̀ Zabɛɛi dí lì Bɛsaŋ a kpíni tɔnɔ dí Sɔ̂ɔ da ǹônii-sinaai poma kúla naa dí pá a dîa Zabɛsi dí díkereŋ.

¹³ Dí lì a díkao nòo tamare wúru-loŋ ta mu Zabɛsi. Dí fé mii-sɛŋ da mii ní fólo lɔ́ɔlu mɛi feerɛ yée mu, kpɛ́ni fêi, malôŋ è kɛ̀ toôi dîa.