Samuɛlə dɔlɔɔ 29 - Bible

Felesia-ŋai dí Deeƃé tɛ̀ɛ pôlu

¹ Felesia-ŋai dí pà a dí kɔ-kuluƃa-ŋai kélee Afɛ. Eezuɛ kɔ-kuluƃa-ŋai máŋ dí díƃûui pú Zariɛɛ ya-loŋ kɔlɛ.

² Felesia-ŋai mɛi-ƃelai da díkɔ-kuluƃa-ŋai díkɛ̀ tɛɛ̂i Felesia-ŋai díkɔ-kuluƃa kɛ́tɛi ŋɛ́i túɛ. Díkɛ̀ a díŋáa kɔlɛɛ a ŋuŋ tɔnɔ da wála tɔnɔ-tɔnɔ. Deeƃé da ŋɔkɔ-kûluƃaa-ŋai dí pà a gɛɛ da dîa-ni máŋ dí tɛɛ da Âke-ni.

³ Gɔ-kuluƃa kɛ́tɛi è mò dîa ǹyɛɛi, “Lé ƃé Eezuɛ-ƃela kpɛ́ni-kpɛni-ŋai ŋí da gɛ̂i ƃɛ́i?” Âke ǹyɛɛ dîai, “Deeƃé è wɔ́lɔ kɛ̀ a Sɔ̂ɔ ŋɔtíi kɛ́-nuu kɛ́tɛi dɔnɔ. Kɛ́lɛ a wɔ́lɔ sìɣe Sɔ̂ɔ pôlu é pá kúpɔ-naa a zu kôyaa. Kɛ́lɛ vé tá mɛni nyɔ́mɔɔ da kɛ́ ŋá naa káa ê síɣe bàa ma ƃɛ́ é tóo sâa ma.”

⁴ Felesia kɔ-kuluƃa kɛ́tɛi è ǹíi ŋwàna é láɣi kpɔ́ a zu kɛ́tɛ ǹyɛɛi, “Ye Deeƃé tɛ́ɛ pôlu daai su nyíi é dɛ̀ɛ bɔ́i. Va pɔri kɛ̂i kúpôlu a gɛ́ɛ kwa dîa-ni kú lí kɔ́ ma. A pɔ̂ri tɔɔ̂i kûa! Sɔ̂ɔ a pɔ̂ri Deeƃé siɣêi pôlu a ŋɔtíi kɛ́-nuu kɛ́tɛ à kɛ̀ Deeƃé a pà bɔ́ naa a kúkɔ-kûluƃa-ŋai ŋuŋ.

⁵ Eezuɛ-ŋai máŋ díkɛ̀ wule toôi díkɛ m̀ãla dîyɛɛi, ‘Sɔ̂ɔ a kúkpɔara-ƃelai wála tɔnɔ paa. Deeƃé a kúkpɔara-ƃelai wála puu páa!’ ”

⁶ Âke è Deeƃé tòli ǹyɛɛ m̀ai, “Yâwɛɛ, gɛ-ɣele-ma Ɣalai fé ḿɛi kàa, ya teniŋ ƃo tua támaa kɛ́ a ńyãa tãi su kôyaai kwa yá kúkaa la kúkîe mai. Ǹyaŋ ŋa ŋ̀wɛlii a gɛ́ɛ kwa yá kú kɔ́ gîe ma. Ḿve tá mɛni nyɔ́mɔɔ da kɛ́ a ńyãa é síɣe tãi ma ya wɔ́lɔ pá la kú pɔ́-naa é tóo lonii ma ma. Kɛ́lɛ Felesia-ŋai mɛi-ƃelai gbéli-ŋai dífe ŋ̀wɛlii a gɛ́ɛ í lɛ́ɛ kú pôlu.

⁷ Ye lí yɛ̂ pôlu í faa laâ dí líi wana mɛni kɛ̀ la.”

⁸ Deeƃé ǹyɛɛ m̀ai, “Kɛ́lɛ lé ƃé ŋá gɛ̀? Í mɛni da kɔ́lɔŋ nyíi ŋá gɛ̀ nyíi a pɔri gɛ̂i fé kɔ̀ ŋá kâloŋ ŋɔkpɔara-ƃelai pɔ́i?”

⁹ Âke è mò ǹyɛɛi, “Ŋa gɔ́lɔŋ kpɔ́ a gɛ́ɛ ísɔŋ lɛ̂lɛɛi yɛ̂ɛ ɣâla-taa kela, kɛ́lɛ kúkɔ-kuluƃa mɛi-nuui aâ gbɛ̀tɛ a gɛ́ɛ ífe kɔ̀ gɔ̂i ŋí su.

¹⁰ Fɛ̂ɛ nɔ́ ka íkɔ-kuluƃa-ŋai ká lí pôlu daai su nyíi ŋá dɛ̀ɛ kápɔi. Ímu siɣe a ɣele-wala pɛpɛ. Ńii lâai íyêe. M̀ɛni ma, m̀ɛnii ŋí fé ílii too pôlu.”

¹¹ Deeƃé da ŋɔkɔ-kuluƃa-ŋai dí dímu sìɣe kpɔ́ a ɣele-wala pɛpɛ dí lène pôlu Felesia pere. Kɛ́lɛ Felesia-ŋai dí lì Zariɛɛ.