Tɔɔɓɛlaa dɔlɔɔ 9 - Bible

Yâwɛɛ è ŋɔ́nɔ kùla Saloma ŋɛ́i

¹ Saloma kɛ́ɛ a kpɛ̀ɛ Yâwɛɛ ŋɔpɛ́rɛ kɛ́tɛi tɔɔ ma da gâloŋ ŋɔpɛ́rɛ kɛ́tɛi a m̀ɛni-ŋai kélee kɛ́ è gbɛ̀tɛ gíli ŋá a gɛ́ɛ é gɛ́i,

² Yâwɛɛ è kùla ŋ̀ɛ́i a veerɛ ɣelei yɛ̂ɛ berei è kùla la ŋ̀ɛ́i a maa-ŋuŋ Gibiyɔŋ.

³ È mò ma ǹyɛɛi, “Ŋaâ íɣâla-fɛli-wooi da íkpera-fei wooi mɛ́ni nyíi í gɛ̀ ŋɛ́i-tuɛi. Ŋa nâa ńyee sée Ŋ̀âla-pɛrɛ Kɛ́tɛi ŋí mu í dɔ̀ɔi. Náa puɔɔ̂i ma wɔ́lɔ-wɔlɔ da wɔ́lɔ-wɔlɔ. Ŋ́ɛi da níi-gbɛ̃ŋa da pâi kɛ̂i nɔ́ naa a tãi kélee.

⁴ À kɛ̀ yá Saloma, yà pâi siâi ŋɛ́i-tuɛ a teniŋ ƃo-pere da lii-lɛlɛ-goi maa tua-kɛɛ yɛ̂ɛ berei ínâŋ Deeƃé è gɛ̀ lai, í m̀ɛni-ŋai kélee kɛ́ yɛ̂ɛ berei ŋá mò la yâi, í ŋátɔ̂ŋ-ŋai kélee mɛi káa a ǹɛ́lɛɛ,

⁵ ŋa pâi íkâloŋ-laa see-sɛŋ kɛ̂i Eezuɛ lɔii mɛi wɔ́lɔ-wɔlɔ da wɔ́lɔ-wɔlɔ, yɛ̂ɛ berei ŋá ŋ́gono tèe la ínâŋ Deeƃé yêei. Ŋá mò ma ńyɛ̂ɛi, ‘Ísuu su nuu da ƃé pâi seêi gâloŋ-laa see-sɛŋ ŋá Eezuɛ.’

⁶ Kɛ́lɛ à kɛ̀ ƃía kpaa máŋ ílônii-sinaai ka kápôlu tɔ̀ɔ ḿâ ká káyee kúla ŋátɔ̂ŋ-ŋai kélee mu ŋá dɛ̀ɛ kápɔ, ká lí a kákpɔɔi pere a tíi kɛ́ɛ Ɣâla da kpɛ́ni-ŋa dîɛ, ká kɛ́ dí fɛ̀li,

⁷ gɛ̀ ní, ŋa pâi Eezuɛ-ŋai kulâi ǹɔii ma nyíi ŋá dɛ̀ɛ dípɔi. Ŋa pâi ńyee kulâi Ŋ̀âla-pɛrɛ Kɛ́tɛi ŋí mu nyíi ŋá ńyee sèe mu ńaai mɛni mai. Da pâi Eezuɛ maa mɛni sɔɔ̂i a sáŋ díkɛ ɣɛ́lɛ-maa kùla gbonôi ŋ̀éniɛi su-ƃelai kélee sáma.

⁸ Berei máŋ Ŋ̀âla-pɛrɛ Kɛ́tɛi maa mɛni a ǹûai líi sóŋ lai, zu a pâi karâi. Diai kélee pâi tɛɛ̂i ƃɛ́i, a pâi kɛ̂i a guláa a dia a laa-kpâla-maa pere, da pâi kɛ̂i díŋuŋ kpɛ́mɛnîi dí kɛ́ mare kɛ̂ɛ kɛ̀ dîyɛɛi, ‘Lé ƃé gɛ̀ Yâwɛɛ kɛ́ m̀ɛni sîi ŋí kɛ̀ a ǹɔii ŋí da Ŋ̀âla-pɛrɛ Kɛ́tɛi ŋí.’ ”

⁹ Ǹûai da pâi zu toôidîyɛɛi, “È kɛ̀ tí, kpɛ́ni fêi, da dípôlu tɔ̀ɔ Yâwɛɛ, Díɣâlai ma, nyíi dí ǹâŋ-ni kùla Ize, da díyee píli Ɣâla da kpɛ́ni-ŋa mɛni su, díkɛ dí fɛ̀li, díkɛ tíi kɛ̀ dîɛ. Nya ƃe gɛ̀ Yâwɛɛ kɛ́ pà a mɛni-sôli-ŋai ŋí kélee dípɔ.”

Saloma ŋɔkono teêi è gɛ̀ Iraŋ yêei

¹⁰ Kóraŋ buu feerɛ tɛ̀ɛ pôlu ma, tãi Saloma è zìɣe a gɛ́ɛ é bɛ́rɛ feerɛi ŋí tɔ́ɔ lai, Ŋ̀âla-pɛrɛ Kɛ́tɛi da gâloŋ ŋɔpɛ́rɛ kɛ́tɛi,

¹¹ Gâloŋ Saloma è taa buu feerɛ tɛ̀ɛ Taya kaloŋ Iraŋ pɔ́ Galalii kpiniŋ su, kpɛ́ni fêi, è sîda wuru-ŋa, pãi kpono-ŋa da gôoi kélee tɛ̀ɛ nyíi Saloma è kɛ̀ díwɛ̂lii.

¹² Kɛ́lɛ Iraŋ kɛ́ɛ a kùla Taya a lí a gɛ́ɛ é daa-lee-ŋai káa Saloma è dɛ̀ɛ bɔ́i, dífe ǹíi láa ní.

¹³ È gâloŋ marê kɛ̀, “Lé taa-ŋa ƃé ya dítɛɛ ŋí ḿbɔ́i, nâoi?” Nya ƃe daa-leee-ŋai kpîŋ láa sèe a Kabɔ lɔii. Ǹáai ŋí ƃé gáa dîa sâa.

¹⁴ Iraŋ è gôo pãŋ ŋuŋ tɔnɔ pôlu buu feerɛ tɛ̀ɛ kɛ̀ gâloŋ pɔ́.

M̀ɛni da kpɛ́ni-ŋai Saloma è gɛ̀i

¹⁵ Gâloŋ Saloma è pɔ́lɔtɔ-ŋa kùla Yâwɛɛ ŋɔɣâla-pɛrɛ kɛ́tɛi da gâloŋ-pɛrɛ kɛ́tɛi tɔɔ mɛni ma. È gɛ̀ dí daai vóloi kulai-pere yee-ƃelai láa fɛ́ɛ a pɔ̂rɔ da Zerusâlɛŋ galai. È gɛ̀ dí Azɔ, Mɛgido da Gezɛ taa-lêe-ŋai tɔ́ɔ pôlu.

¹⁶ Saloma é lɛ́ɛ pâi Gezɛ tɔɔ̂i pôlu, Ize kaloŋ è wɔ́lɔ kɔ́ pɛ̀lɛ daai ŋí ma é naa yée mɛi ɣále. È ŋɔŋ pɔ̂ŋ daai ma é géreŋ. È daa-ƃelai da Keena-ŋai kélee pàa kɛ̀ naai. Tãi Saloma è wɔ́lɔ Ize kaloŋ ŋí ǹóŋ-nɛnii kùla la a nɛnîi, Gâloŋ è wɔ́lɔ daai ŋí tɛ̀ɛ ǹóŋ-nɛnii pɔ́ a ŋɔmaa pû ŋɔsurɔ̂ŋ kula kûui mɛni ma.

¹⁷ Nya ƃe Saloma è Gezɛ tɔ̀ɔ pôlu. È ŋɔpɔlɔtɔ-ŋai kɛ̀ dí Bɛorɔŋ taai kwára-pere tɔ̀ɔ máŋ.

¹⁸ È Baala da Tamɔ taa-ŋai tɔ̀ɔ máŋ Vɛ̃ɛ-kpâlaŋ su Zuda lɔii-kpiniŋ su

¹⁹ ŋɔsãâ mɛi káa taa-ŋai da daa-ŋai è kɛ̀ ŋɔsoo sia-keleŋ-ŋai seêi kɛ̂i naa da ŋɔsoo sia-ƃela. Zɛŋ kélee è kɛ̀ ŋ̀wɛ̂lii è dɔ̀ɔ Zerusâlɛŋ, Lɛƃanɔŋ da ǹɔii kpiniŋ-ŋai kélee su kɛ̀ ǹyée mui.

²⁰ Amɔra-ŋai, Ita-ŋai, Periza-ŋai, Iva-ŋai da Zɛbusa-ŋai dí kɛ̀ Eezuɛ-ŋai sáma kɛ́lɛ dífe kɛ́ ní a Eezuɛ-ŋa.

²¹ Dísuu-ŋai su-ƃelai lɛ̀ɛ ǹɔii sui, nyii-ŋai Eezuɛ-ŋai dífe pɔri ní díkelee dípaa, dîa ƃé Saloma è díkɛ̀ a ŋɔpɔlɔtɔ-ŋa díkɛ luɛ tii kɛ̀ mì. Dílônii díkaa sâa a luɛ-ŋa ǹɔii tí su.

²² Kɛ́lɛ Saloma fé Eezuɛ-ŋai da kɛ́ ní a luɛ. È díkɛ̀ a ŋɔkɔ-kuluƃa-ŋa, ŋɔtíi kɛ́-ƃela kpaya-kpaya-ŋa, nûa láa túɛ-ƃelai, lɔii maa kpɛ́-ƃela láa túɛ-ƃela kpaya-kpaya, kɔ́-keleŋ sia-ƃela mɛi-ƃela, da zoo sia-ƃelai mɛi-ƃela.

²³ Dí kɛ̀ máŋ a Saloma ŋɔtíi da kpɛ́ni-ŋai mɛi-ƃela. Ŋ̀uŋ lɔ́ɔlu pôlu buu lɔ́ɔlu dí kɛ̀ gbakolo-ŋai mɛi kɛ̀ díi-ŋai kɛ̂i.

²⁴ Ize kaloŋ ǹóŋ-nɛnii è kùla Deeƃé ŋɔtaa-lêei su é pá gâloŋ-pɛrɛ kɛ́tɛi mu Saloma è dɔ̀ɔ mɛni mai. Nya ƃe Saloma è daai vóloi kulai-pere yee-ƃelai láa fɛ̀ɛ a pɔ̂rɔ.

²⁵ A kâa kéreŋ sala da lii-see sala kùla gîei saaƃa kóraŋ tɔnɔ yée-mu ŋ̀âla-tebelei ŋá è dɔ̀ɔ Yâwɛɛ mɛni mai, dí kɛ́ kéreŋ-sɛŋ kúŋ-nɛ̃ɛ kèreŋ da dîa-ni. Bere ƃé da kâa Ŋ̀âla-pɛrɛ Kɛ́tɛi lá mɛni-ŋai ŋ̀aa-see kɛ̀ la.

²⁶ Gâloŋ Saloma è yá ŋá tîma-ŋa kpɛ̀tɛ máŋ Eziɔŋ Gebe Ila kɔlɛ ma Idɔŋ lɔii su Ǹyúo Kpɔ̂lui kɔlɛ ma.

²⁷ Iraŋ è ŋɔkpakolo-ŋai tɛ̀ɛ nyîi-ŋai kɛ̀ a yá ŋá-keleŋ sia-ƃelai. Ǹûai ŋí dí kɛ̀ a yúo kɔ́lɔŋɔɔ kpɔ́ a ǹɛ́lɛɛ. Da Saloma ŋɔkpakolo-ŋai dí kɛ́ tíi kɛ̂i tîma-ŋai su.

²⁸ Dí lì Ofi dí pá pôlu a gôo pãŋ wála buu saaƃa káo feerɛ dí dɛ̀ɛ Gâloŋ Saloma pɔ́.