Tɔɔɓɛlaa dɔlɔɔ 7 - Bible

Saloma è ŋɔkâloŋ-pɛrɛi tɔ̂ɔ

¹ Saloma è kóraŋ puu káo saaƃa sìɣe é kpɛ́ɛ ŋɔkâloŋ-pɛrɛ kɛ́tɛi tɔɔ ma.

² Ŋɔkâloŋ-pɛrɛ kɛ́tɛi dɔnɔ láa ƃé kɛ̀ a Lɛƃanɔŋ wolai. Ŋɔkôya è kɛ̀ a kɔ́ɔ pîlani ŋuŋ tɔnɔ pôlu buu lɔ́ɔlu, ŋɔsu-kɛ̂tɛ kɛ́ ƃò a kɔ́ɔ pîlanii buu lɔ́ɔlu mɛi feerɛ káo lɔ́ɔlu. Ŋɔmɛi kôya è kɛ̀ a kɔ́ɔ pîlanii buu náaŋ káo lɔ́ɔlu. È bɛ́rɛi yée mu nɔ̃ɔ-ŋai kpɛ̀yɛŋ ŋ̀ɛli ma gîe kɔlɛ náaŋ-naaŋ é sîda wuru-ŋa maa kɛ́ɛ nɛ̃ɛ-nɛ̃ɛ láa díŋa.

³ È bɛ́rɛi pìli ɣelêi a sîda wuru-ƃela kpɛyɛŋɔɔ ŋ̀úru ƃela-ŋai mɛi pere dí tíɣiŋɔɔ bɛ́rɛi yée mu nɔ̃ɔ-ŋai dîa a wúru-ƃela buu náaŋ káo lɔ́ɔlu, buu káo lɔ́ɔlu kpɛ̃yɛŋɔɔ ŋ̀ɛli ma.

⁴ Bɛ́rɛi ŋɔwêna-ŋai dí kɛ̀ ɣelêi pere dísee-seɛ̂ɛ gîe lá saaƃa-saaƃa, díŋɛi seɛ́ɛ díkîe ni dîa.

⁵ Gbôŋ-ŋai díkɛ̀ saaƃa-saaƃa, díŋɛi seɛ́ɛ gîe ma bɛ́rɛi lá-pere. Gbôŋ m̀éla è kɛ̀ náaŋ, veerɛ pɔriɛ́ɛ a gîe.

⁶ È bɛ́rɛi sâmai ŋɔkôya kɛ̀ a kɔ́ɔ pîlanii buu lɔ́ɔlu mɛi feerɛ káo lɔ́ɔlu. Ŋɔsu-kɛ̂tɛ è kɛ̀ ƃò a kɔ́ɔ pîlanii buu náaŋ káo lɔ́ɔlu. È piyasai kùla naa ŋɛ́i-tuɛ, ǹyaŋ è bɛ́rɛi yee-mu wuru-ŋa kpɛ̃yɛŋ naa, piyasai ŋɔfaâŋ sɛ̀lɛŋɔɔ naa mɛi.

⁷ È bɛ́rɛi sâmai da kùla ma ƃɛ́i gâloŋ see-sɛŋ è kɛ̀ naa m̀ɛni ŋáa tée kwaai ma, ƃɛ́i maa nɛ̃ɛi kɛ̀ é mɛni-saa ƃó naai, ǹyaŋ è nà mɛi pɛ̂lɛ a sîda ƃela-ŋa é síɣe bɛ́rɛ kaŋ kwára é tɛ́ ŋ̀elêi.

⁸ Ŋɔkâloŋ-pɛrɛ kɛ́tɛi nyíi è kɛ̀ pâi kɛ̂i mui, è dɔ̀ɔ naa pôlu-pere m̀óloŋɔɔ gîe ma. Saloma è kâloŋ-pɛrɛ kɛ́tɛ tɔ̀ɔ máŋ yɛ̂ɛ ŋ̀ɔi Ize kaloŋ ǹóŋ-nɛnii mɛni ma nyíi è gùla a ŋɔnɛnîi.

⁹ Bɛ́rɛ-ŋai ŋí kélee é síɣe ŋ̀enei ŋá-pere é tóo mɛni-sâa ƃó kwaa kɛ́tɛi ma kɔlɛ ma, ǹyaŋ é síɣe bɛ́rɛi kɔ́ɔ pîlanii é tɛ́ ŋelêi, è kɛ̀ a dɔ́ɔ a kɔni lɛ́lɛɛ-ŋa nyíi dí dítèe a sɔ̂ɔ-ŋa dí lóa kɛ́ dísu dí díkpɛtɛ nɛ̃ɛ-nɛ̃ɛ.

¹⁰ Dí bɛ́rɛ-ŋai tɔɔ kɔ́ɔ pìlaŋ a kɔni kpaya-kpaya lɛ́lɛɛ-ŋa, da-ni díkôya è kɛ̀ a kɔ́ɔ pîlanii puu káo lɔ́ɔlu, gbéli-ŋai dí kɛ́ ƃò a kɔ́ɔ pîlanii puu káo feerɛ.

¹¹ M̀ɛi-pere è kɛ̀ a kɔni lɛ́lɛɛ-ŋa, dísu tee-teɛɛ yɛ̂ɛ berei dítii kɛ́ perei è kɛ̀ lai da sîda wuru kpono-ŋa maa kɛ́ɛ nɛ̃ɛ-nɛ̃ɛ.

¹² Galai kɛ̂ a dínaŋɔɔ bɛ́rɛ-ŋai dîai è kɛ̀ yɛ̂ɛ nyíi kɛ̀ Ŋ̀âla-pɛrɛ Kɛ́tɛi mai. A kâa kɔni saaƃa làa é wúru kpono láa mɛi.

Uraŋ ŋɔtíi

¹³ Gâloŋ Saloma è nûa tɛ̀ɛ Taya dí pá a Uraŋ.

¹⁴ Uraŋ ŋí ǹee è kɛ̀ a pɔɔ-nɛni nyíi kùla Nɛfɛtɛli ŋɔsîi su, ǹâŋ é kúla Taya lɔii su. È kɛ̀ a ƃara ɣale-nuu. È kɛ̀ a yɛrɛ kɛ́-nuu táreɛɛ lɛ́lɛɛ ƃara ɣale tii sii támaa su. È pà Gâloŋ Saloma pɔ́ è díi-ŋai kélee kɛ̀ gâloŋ è dɛ̀ɛ bɔ́i.

Ƃara-nɔ̃ɔ feerɛ

¹⁵ Uraŋ è pɛ́rɛ yée-mu-nɔ̃ɔ feerɛ kpɛ̀tɛ a ƃara. Dɔnɔ ŋɔkôya è kɛ̀ a kɔ́ɔ pîlanii buu feerɛ káo lɔ́ɔlu mɛi feerɛ, díkpono ŋɔkɛ́tɛ kɛ́ ƃò a kɔ́ɔ pîlanii puu káo lɔ́ɔlu mɛi saaƃa.

¹⁶ È ƃara ƃɔ̂rɔ feerɛ kpɛ̀tɛ é bɛlɛ m̀ara nɔ̃ɔ feerɛi ŋûa. M̀ɔrɔi dɔnɔ ŋɔkôya è kɛ̀ a kɔ́ɔ ƃɔ̂rɔnii lɔ́ɔlu mɛi feerɛ da gbûra.

¹⁷ M̀ara ƃɔ̂rɔ feerɛi è díkpɛ̀tɛi, è póniŋ lɔ́ɔlu mɛi feerɛ làa dîa tɛi-tɛi dímɛi-pere nyíi kɛ̀ a yɔlɛ kpɛ̃yaŋɔɔ gîe-ni mɛi.

¹⁸ È pɔmegurane pɔkɔɔŋ-ŋa kpɛ̀tɛ a ƃara é gbíniŋ m̀ara wuru-ŋai dîa tɛi-tɛi é dínaŋ a dîa a ŋ̀ɛli feerɛ nyii-ŋai è bɛ̀lɛ m̀ara nɔ̃ɔ-ŋai ŋûa, dí kɛ́ ƃò a dítínaŋɔɔ ŋ̀ɛli-ŋai dîa nyíi gɛ̀ dípɔ̃yɛ-ŋɛ̂i é lɛ́lɛɛi.

¹⁹ M̀ara ƃɔ̂rɔ-ŋai kɛ̀ ŋ̀úru-ŋai ŋûa piyasai ŋái, dí kɛ̀ yɛ̂ɛ wúru-poa lɛ́lɛɛ-ŋa, dímɛi kôya kɛ́ ƃò a kɔ́ɔ pîlanii lɔ́ɔlu mɛi da.

²⁰ M̀ara ƃɔ̂rɔ feerɛi kɔŋ ŋá, nyii-ŋai kɛ̀ yɛ̂ɛ kawúlu-ŋai dímɛi-pere bɔkɔɔ̂ŋ-ŋai mɛi, pɔmegurane pɔkɔɔŋ ŋuŋ feerɛ a dínaŋɔɔ dîa gwaa kélee ŋ̀ɛli ma.

²¹ È m̀ara wuru-ŋai tɔ̀ɔ Ŋ̀âla-pɛrɛ Kɛ́tɛi ŋɔpiasai ŋá. M̀ara wurui kɛ̀ naa kwára perei è ǹáa sèe a Zakiŋ nyíi kɛ̀ naa ŋûa perei é ǹáa sée a Bôa.

²² M̀ara wuru-ŋai kɔŋ è kɛ̀ yɛ̂ɛ wúru-poa-ŋa. Díi kɛ̀ m̀ara wuru-ŋai dîai, è nâa kpɛ̀ɛ.

Dí yá seêi kɛ́ kwaa ma kpɛ̀tɛ a ƃara

²³ Uraŋ è yá seêi kɛ́-sɛŋ kɛ́rɛ-kɛrɛ kɛ́tɛ kpɛ̀tɛ a ƃara. Ziŋɔɔ è kɛ̀ a kɔ́ɔ pîlanii lɔ́ɔlu mɛi feerɛ da gbôra, ŋɔsu kɛ́tɛ kɛ́ ƃò a kɔ́ɔ pîlanii puu káo lɔ́ɔlu. Ŋɔkpono kɛ̂tɛ è kɛ̀ a kɔ́ɔ pîlanii buu náaŋ káo lɔ́ɔlu.

²⁴ Ǹyá seêi kɛ́-sɛŋ lá mu-pere, konoŋ-ŋa dí kɛ̀ a dí tínaŋɔɔ mà. È gonoŋ-ŋai pù ŋ̀ɛli ma feerɛ é tínaŋ ma. È gonoŋ pɔkɔɔŋ da ǹyá seêi kɛ́-sɛŋ kpɛ̀tɛ a tãi tɔnɔ.

²⁵ Ǹyá seêi kɛ́-sɛŋ è kɛ̀ a dɔ́ɔ niŋa sîrɛ pɔkɔɔŋ puu káo feerɛ mɛi nyii-ŋai kɛ̀ a gbɛ̀tɛɛ a ƃarai. Zaaƃa ŋɛ́i è kɛ̀ a niɛ́ɛ ǹɔii ŋûa-pere, zaaƃa ŋɛ́i liɛ́ɛ vóloi liî-pere, zaaƃa ŋɛ́i liɛ́ɛ ǹɔii kwára-pere, zaaƃa ŋɛ́i liɛ́ɛ vóloi kulâi-pere.

²⁶ Ǹyái seêi kɛ́-sɛŋ ŋɔkpi-kpitili è kɛ̀ yɛ̂ɛ yée-gbua saaƃa, ŋ̀óli lá è kɛ̀ ƃò yɛ̂ɛ kɔ̂pu, gɛ́ɛ nɔ́ yɛ̂ɛ wúru-poa lɛ́lɛɛ. A kâa yá wála feerɛ sîɣe.

M̀ara keleŋ-ŋai

²⁷ Uraŋ è yá tĩɛ keleŋ puu kpɛ̀tɛ a ƃara. Dɔnɔ ŋɔkôya è kɛ̀ a kɔ́ɔ pîlanii lɔ́ɔlu mɛi da, ŋɔŋa kɛ̂tɛ kɛ́ ƃò a kɔ́ɔ pîlanii lɔ́ɔlu mɛi da, ŋɔmɛi kôya kɛ́ ƃò a kɔ́ɔ pîlanii náaŋ da gbûra.

²⁸ Berei ká ŋí è ǹyá tĩɛ sãai kpɛ̀tɛ lai. È díkpɛ̀tɛ a m̀éla kélee pɔriɛɛ a gîe ƃara kɔli kpĩyâŋɔɔ díkpono ma.

²⁹ È yala-sulu, niŋa sîrɛ da ɣâla-taa kooŋ-sɛŋ pɔkɔɔŋ-ŋa kpɛ̀tɛ ǹyá tĩɛ sãai kpono ma é dínaŋ dîa. È wuru-poa pɔkɔɔŋ-ŋa kpɛ̀tɛ bɔkɔɔŋ-ŋai mɛi-pere da mu-pere.

³⁰ Gɔ́ɔ è kɛ̀ mu náaŋ gbɛ́tɛɛ a ƃara kâraŋ ƃara kɔli tɔnɔ kɛ́ ƃò veerɛ ma. Wúru-ŋa díkɛ̀ a dítɔɔ zonoŋ-ŋai su nyíi gɛ̀ a gɛ́ɛ dí kɛ́ ƃò a díkpanaŋɔɔi. Wúru-poa pɔkɔɔŋ-ŋa dí kɛ̀ ŋ̀úru-ŋai ŋí dîa.

³¹ Ǹyá tĩɛ sãai ŋí lá ƃôi è kɛ̀ mɛi pere, ǹá-kalaŋ kɛ́ ƃò kɛ́rɛ-kɛrɛ wúru-poa pɔkɔɔŋ-ŋa kɛ́ ƃò dîa. Ǹá ƃôi ŋɔkɛ́tɛ è kɛ̀ a kɔ́ɔ pîlanii feerɛ da gbura. M̀ara kɔli-kalaŋ kɛ̀ ǹyá tĩɛ sɛŋ mɛi, ŋɔmɛi kôya è kɛ̀ a kɔ́ɔ pîlanii tɔnɔ da gbura. Ǹyá tĩɛ sɛŋ kpóŋ-ŋa è kɛ̀ a bɔriɛɛ a gîe. Vé kɛ́ ní kɛ́rɛ-kɛrɛ.

³² M̀ara kɔli karaŋ náaŋ nyíi ǹyá tĩɛ sɛŋ kɔ́ɔ è kɛ̀ mai, è kɛ̀ a gánaŋɔɔ ǹyá tĩɛ sɛŋ kpono ma. Gáraŋ-ŋai díkpi-kpitili è kɛ̀ a kɔ́ɔ pîlanii feerɛ da gbûra.

³³ Ǹyá tĩɛ sãai dí kɛ̀ a díkpɛtɛɛ yɛ̂ɛ kɔ́ kɔ́-keleŋ kɔ́ɔ ŋá M̀ara kɔli-ŋai gɔ́ɔ ŋái da kɛ̂ tinânii mai, gɔ́ɔ soŋ kɔli-ŋai, gɔ́ɔ soŋ kɔli pɛlɛ-pɛlɛɛi da ƃɛ́i gɔ́ɔ-ŋai da kâa tìnaŋ naai gélee è kɛ̀ a ƃara.

³⁴ Ǹyá tĩɛ sɛŋ kpáu è kɛ̀ ma tɛi-tɛi zôŋo náaŋɔɔ su. Gbáu-ŋai da ǹyá tĩɛ sɛŋ díkɛ̀ a díkpɛtɛɛ nɔ́ tɔnɔɔ.

³⁵ Zoŋ sɛŋ ŋûa-pere bɛ̂ti palaa kɛ́rɛ-kɛrɛ lɛ́lɛɛ è kɛ̀ a ŋ̀íriɛɛ ma nyíi naa è lɛ̀ɛ a guro ŋɔsiŋ é kɛ́ a kɔ́ɔ pîlanii tɔnɔi. Zóŋ sãai kélee da ǹyá tĩɛ sɛŋ kpîŋ díkɛ̀ a díkpɛtɛɛ nɔ́ tɔnɔɔ.

³⁶ È ɣâla-taa kooŋ-sɛŋ pɔkɔɔŋ kpɛ̀tɛ, yala-sulu pɔkɔɔŋ da pãai wuru-ŋa pɔkɔɔŋ ǹyá tĩɛ sɛŋ soŋ sãai kpono ma gwaa kélee da zãai kɛ̀ gbôŋ-ŋai kpono sonîi. Ƃɛ́i ma kélee sɛŋ da fé kɛ́ ní a bɔ̃yɛ naai, è naa pɔ̃yɛ a wúru-poa pɔkɔɔŋ-ŋa.

³⁷ Berei ká ŋí è ǹyá tĩɛ sɛŋ puui kpɛ̀tɛ lai. È díkelee kpɛ̀tɛ a bere sîi tɔnɔi ǹyaŋ dí kpɛtɛ-pêre da dí kɛ́-pere è kɛ̀ nɔ́ tɔnɔɔ dípɔriɛɛ a dí kîe-ni.

³⁸ Uraŋ è yá pú sɛŋ-folo kpaya-kpaya puu kpɛ̀tɛ a ƃara. Dɔnɔ è kɛ̀ ya tiŋ buu náaŋ siɣêi. Dɔnɔ ŋɔkpono kɛ̂tɛ è kɛ̀ a kɔ́ɔ pîlanii lɔ́ɔlu mɛi da. Zɛŋ-folo-ŋai ŋí dɔnɔ è kɛ̀ ǹyá seêi kɛ́-sɛŋ soŋ sãa puui dɔnɔ ŋá mɛni ma.

³⁹ È ǹyá tĩɛ sãai ǹɔ́ɔlu tɔ̀ɔ Ŋ̀âla-pɛrɛ Kɛ́tɛi kwára-pere, ǹɔ́ɔlui kpéli kɛ́ ƃò naa ŋûa-pere. È ǹyá seêi kɛ́-sɛŋ kɛ́tɛi nyíi kɛ̀ niŋa-sirɛ pɔkɔɔŋ-ŋai mɛi see Ŋ̀âla-pɛrɛ Kɛ́tɛi vóloi liî-pere.

Ŋ̀âla-pɛrɛ Kɛ́tɛi mu-sãai kélee

⁴⁰ Uraŋ è leɣi-ŋa, sɔ̂ƃele-ŋa da kawúlu-ŋa kpɛ̀tɛ. È kpɛ̀ɛ a díi-ŋai kélee kɛ́ɛ Gâloŋ Saloma è dɛ̀ɛ bɔ́ gɛ́ mɛni ma Yâwɛɛ ŋɔpɛ́rɛ kɛ́tɛi tɔɔ mɛni ma.

⁴¹ M̀ara nɔ̃ɔ feerɛi, m̀ara nɔ̃ɔ-ŋai kɔŋ feerɛ ŋûa-ƃɔrɔ kpɛtɛ pere kɛ́ɛ yɛ̂ɛ kawúlu-ŋai, m̀ara yɔlɔ feerɛi kɛ̀ m̀ɔrɔi kɔŋ ŋá mɛni ma nyíi kɛ̀ a bɔ̃yɛ ŋɛ́i lɛ́lɛɛ kpiyɛŋ-kpiyɛŋɔɔ gîe mɛi.

⁴² È pɔmegurane pɔkɔɔŋ ŋuŋ náaŋ kpɛ̀tɛ m̀ara nɔ̃ɔ-ŋai kɔŋ veerɛ maa pɔ̃yɛ mɛni ma. È pɔmegurane pɔkɔɔŋ ɣɛli feerɛ kpɛ̀tɛ m̀ara nɔ̃ɔ-ŋai kɔŋ-ŋai maa pɔ̃yɛ mɛni ma a bɔ̃yɛ lɛ́lɛɛ kpiyɛŋ-kpiyɛŋɔɔ gîe mɛi,

⁴³ ǹyá tĩɛ sãa puui da díya pûi kɛ́-sãa puui,

⁴⁴ ǹyái da niŋa sîrɛ pɔkɔɔŋ puu káo feerɛ kɛ̀ mui.

⁴⁵ Ǹeɣi-ŋai, sɔ̂ƃele-ŋai da gawúlu-ŋai kɛ̀ yá kpɛ́mɛŋ mɛni mai díkɛ̀ a ƃara. Zãai kélee Uraŋ è díkpɛ̀tɛ Gâloŋ Saloma mì Yâwɛɛ ŋɔɣâla-pɛrɛ kɛ́tɛi mɛni mai, dí kɛ̀ a ƃara fóloɔɔ lɛ́lɛɛ.

⁴⁶ Gâloŋ è gɛ̀ dí m̀arai séɣeŋ dí bú ƃóo pɔ̂rɔ su zãai kélee kpɛtɛ mɛni ma Zɔdiŋ Ya-leei diŋ-tiŋ su Sukɔ da Zaretaŋ loai.

⁴⁷ Saloma fé zãai dí wiɛ kɔ̂ɔŋ ní, kpɛ́ni fêi, dí kɛ̀ a dítamaa. Núu da fé kɛ́ ní a m̀arai ŋɔwuyɛ kɔ́lɔŋɔɔ.

⁴⁸ Saloma è Yâwɛɛ ŋɔɣâla-pɛrɛ kɛ́tɛi mu tii-kɛ sɛŋ-folo-ŋai kélee kpɛ̀tɛ máŋ. Gôo ɣala-teƃelei da Yâwɛɛ ŋɛ́i-tuɛ kpoloi see teƃelei.

⁴⁹ Gôo kpɔ́ɔi laŋpo see-wurui ǹɔ́ɔlu è kɛ̀ laa-mii-yee mɛi-pere, ǹɔ́ɔlu kɛ́ ƃò kɔ́ɔ-yee mɛi-pere. Loŋpoi zu-pere ŋɔi ŋɛ́i-tuɛ, gôo wuru-poa-ŋai, laŋpo-ŋai da gôo laŋpo maa tii kɛ́-sãai,

⁵⁰ gôo kɔɛ-ŋa, laŋpo su seɣei maa kpɛtɛ sãai, gôo sɛŋ folo-ŋa, kawúlu-ŋa yá kpɛ́mɛŋ mɛni ma, sɛŋ-fôlo-ŋa géreŋ-sɛŋ kúŋ-nɛ̃ɛ kéreŋ mɛni ma, Gwaa Maa waai ŋɔkwaa maa waai mɛni ma, gwaa maa waai ŋɔkwa ma Waai lá kpoŋ-ŋai da Ŋ̀âla-pɛrɛ Kɛ́tɛi lá kpoŋ-ŋai.

⁵¹ Díi-ŋai kélee Gâloŋ Saloma è kɛ̀ gɛ̂i Yâwɛɛ ŋɔɣâla-pɛrɛ kɛ́tɛi tɔɔ mɛni mai dí kpɛ̀ɛi, è pà naa a zãai kélee ǹâŋ Deeƃé è wɔ́lɔ dítɛ̀ɛ Ɣâla pɔ́i, káne da gôo da maa sɛŋ-folo-ŋai é dípu Yâwɛɛ ŋɔɣâla-pɛrɛ kɛ́tɛi ŋɔtɔɔ-sãai lâai kɛ́ kwaa-ŋai ma.