Tɔɔɓɛlaa dɔlɔɔ 5 - Bible

Saloma è gbîŋ kpɛ̀tɛ Ŋ̀âla-pɛrɛ Kɛ́tɛi tɔ́ɔ mɛni ma

¹ Saloma kɛ́ɛ a lɛɛ ǹâŋ pɔ́ɔ ŋá a kâloŋ, Taya Kaloŋ Iraŋ nyíi kɛ̀ a Deeƃé m̀arâŋ-nuu lɛ́lɛɛ a zu kôyaai, è ǹyée mu-ƃela tɛ̀ɛ Saloma pɔ́-naa.

² Saloma è ŋ̀óo tɛ̀ɛ Iraŋ pɔ́-naa ǹyɛɛi,

³ “Í gɔ́lɔŋ a gɛ́ɛ ńâŋ Deeƃé fé pɔri ní kɛ̀ pɛ́rɛ tɔɔ̂i Ŋɔɣâlai Yâwɛɛ láai su vɛli mɛni ma, kpɛ́ni fêi, ŋɔkpɔara-ƃelai dí kɛ̀ a dítinaŋɔɔ ma a kɔ́ é lɛ́ɛ la zu Yâwɛɛ é ŋɔkpɔara-ƃelai kélee pú gɔ́ɔ mu.

⁴ Kɛ́lɛ Yâwɛɛ ŋáɣâlai a nâa lii-see tɛ̀ɛ ḿbɔ ŋágoyaŋ pere-ŋai kélee ma. Núu da fé ŋɔ́nɔ tɔɔ ní ḿâ mɛni kpɔ̂lu da fé tela lâai ŋɔ́nɔ ḿâ.

⁵ Yâwɛɛ è gòno tèe ńâŋ Deeƃé yêei ǹyɛɛ m̀ai, ‘Íloŋ-surɔŋ nyíi ŋa pâi gɛ̂i a kâloŋ ípɔɔ ŋái, a pâi Ɣâla-pɛrɛ kɛ́tɛ tɔɔ̂i ḿî.’ M̀ɛni ma, ŋa nâa gbɛ̀tɛ ŋ́gili ŋá a gɛ́ɛ ŋá Ŋ̀âla-pɛrɛ Kɛ́tɛi tí tɔ́ɔ Yâwɛɛ Ŋáɣâlai fɛli mɛni ma.

⁶ M̀aa mɛni ma, íwoo tɛ́ɛ a gɛ́ɛ dí Lɛƃanɔŋ lɔii su sîda wuru-ŋa tée ḿî. Ńyee mu-ƃelai da pâi toôi íyee mu-ƃelai dîa ǹyaŋ zɛŋ ya pâi m̀ôi a gɛ́ɛ ŋá íyee mu-ƃelai féla fé lai, ŋa pâi dɛɛ̂i, kpɛ́ni fêi, í gɔ́lɔŋ a gɛ́ɛ núu da fé kúsama nyíi a pɔri wúru ƃêlai yɛ̂ɛ Sidɔŋ-ŋai.”

⁷ Iraŋ kɛ́ɛ a Saloma ŋɔworɛ̂-wooi mɛnii, ǹíi è ǹɛ̃ɛ kpɔ́ a zu kɛ́tɛ, ǹyaŋ è mò ǹyɛɛi, “Lûwa é kɛ́ Yâwɛɛ ma sâa, nyíi è lóŋ surɔŋ táreɛɛ tɛ̀ɛ Deeƃé pɔ́ a gɛ́ɛ é kɛ́ ǹûa kpɔŋ ŋí mɛi.”

⁸ Nya ƃe Iraŋ è ŋ̀óo tɛ̀ɛ Saloma pɔ́-naa, “Ŋá ŋ̀orɛ̂-wooi mɛ̀ni nyíi í dɛ̀ɛ ḿbɔ naai. Ŋa pâi m̀ɛni-ŋai kélee kɛ̂i íkaa ŋ̀wɛ̂lii ŋá gɛ́i. Ŋa pâi sîda da pãai wuru kpono-ŋa tɛɛ̂i ípɔ.

⁹ Ŋátii kɛ́-ƃelai da pâi ŋ̀úru kpono-ŋai kulâi Lɛƃanɔŋ dí pá a dia yúo kpono ma. Da pâi ŋ̀úru kpono-ŋai ɣirîi gîe ma yɛ̂ɛ kwéŋ-ŋa dí yéŋ a dîa ƃɛ́i ma ya pâi naa lɛ̂i a gɛ́ɛ dí dípîlaŋ naai. Ŋátii kɛ́-ƃelai da pâi dí fûlonii naa, ǹyaŋ ítii kɛ́-ƃelai da pâi ziɣêi naa. Íwɔ̂i ƃa, í mii-sãa tɛɛ ŋátii kɛ́-ƃelai pɔ́.”

¹⁰ Nya ƃe Iraŋ è sîda da pãai wuru kpono-ŋai kélee tɛ̀ɛ nyíi Saloma è kɛ̀ wɛ̂lii a diai.

¹¹ Saloma ǹyaŋ a kâa wîi kpɔlɔ kuu wála ŋuŋ tɔnɔ da ɔ̂le wulɔ lɛ́lɛɛ tiŋ wála feerɛ sane puu tɛ̀ɛ Iraŋ pɔ́ ŋɔtíi kɛ́-ƃelai mɛni ma a kóraŋ kélee.

¹² Yâwɛɛ è táre tɛ̀ɛ Saloma pɔ́ a ŋɔkóno-teei ŋa-see kɛ́ɛ. Lii-see è kɛ̀ Saloma loai da Iraŋ. Nya ƃe da ǹyaa dí kono-tee kɛ̀ dîkîe-ni loai a gɛ́ɛ dífe pâi kɔ́ pɛlɛ̂i dí kîe-ni dîa.

¹³ Saloma è kpakolo wála buu saaƃa (30,000) kùla Eezuɛ lɔii su gwaa kélee díi kɛ́ mɛni ma.

¹⁴ È dítɛ̀ɛ Lɛƃanɔŋ. A kâa núu wála puu tɛ̀ɛ Lɛƃanɔŋ a ɣáloŋ kélee tíi kɛ̂i naa. Da kâa lène pôlu dípɔ-taai dí ɣáloŋ feerɛ kɛ́ naa. Adoniraŋ ƃé kɛ̀ díi kɛ́ mɛnii láa-tuɛ.

¹⁵ Núu wála buu lɔ́ɔlu mɛi saaƃa dí kɛ̀ máŋ Saloma yêei ǹyée lɔii su díkɛ kɔni wôlo núu wála buu lɔ́ɔlu mɛi feerɛ dí kɛ́ maa kɔni-ƃela-ŋai tĩɛ.

¹⁶ È núu wála saaƃa pôlu ŋuŋ saaƃa pù díi kɛ́-ƃelai mɛi a gɛ́ɛ díkɛ tíi kɛ̀ a dia.

¹⁷ Dí kɔni kpaya-kpaya lɛ́lɛɛ-ŋa wòlo dí lóa tée Ŋ̀âla-pɛrɛ Kɛ́tɛi tɔɔ̂i, dí gɔnii pú zu dí bɛ́rɛi tɔ́ɔ mɛi yɛ̂ɛ berei gâloŋ Saloma è mò lai.

¹⁸ Saloma ŋɔtíi kɛ́-ƃelai da Iraŋ ŋɔtíi-kɛ-ƃelai, Giba-ƃelai dípù díkîei dí ŋ̀úru kpono-ŋai da gɔni-ŋai kpɛtɛ Ŋ̀âla-pɛrɛ Kɛ́tɛi tɔɔ mɛni ma.