Tɔɔɓɛlaa dɔlɔɔ 4 - Bible

Saloma ŋɔtíi kɛ́-ƃela kpaya-kpayai láa

¹ M̀ɛni ma Gâloŋ Saloma è kɛ̀ a kâloŋ Eezuɛ lɔii kélee mɛi.

² Ŋɔtíi kɛ́-ƃela kpaya-kpayai láa ká ŋí, zâla-laa soŋ-nuui ƃé kɛ̀ a Azaria, Zadɔ ǹóŋ,

³ Sisa ǹônii-sinaai, Iliorɛ da Aia dí kɛ̀ a kɔlɔ pɔ̃yɛ-ƃela. Ailu ǹóŋ Zeosafa ƃé kɛ̀ a ǹɔii ŋɔkɔlɔ-ŋai lâai kɛ̂i.

⁴ Zeoiada ǹóŋ Benaiya ƃé kɛ̀ a gɔ-kuluƃa-ŋai lláa túɛ-nuui. Zadɔ da Abiata ƃé kɛ̀ a zâla-laa soŋ-ƃelai.

⁵ Netaŋ ǹóŋ Azaria ƃé kɛ̀ ǹɔii-kpiniŋ-ŋai su kaloŋ-ŋai láa-tuɛ. Netaŋ ǹóŋ Zabɔ è kɛ̀ a sâla-laa soŋ-nuu, gɛ́ ƃò tela a gâloŋ ŋɔlia-woo ƃó-nuui.

⁶ Aisa è kɛ̀ gâloŋ ŋɔpɛ́rɛi mɛi. Ada ǹóŋ Adoniraŋ ƃé kɛ́ díi kpanaŋ kɛ́-ƃelai mɛi.

⁷ Saloma è kpakolo puu káo feerɛ sèe Eezuɛ lɔii kpiniŋ-ŋai mɛi. M̀aa nɛ̃ɛi kɛ̀ dí mii-sɛŋ kula dí kpiniŋ-ŋai su dí dɛ́ɛ a gâloŋ da ŋɔpɛ́rɛi mu-ƃelai kɔ́nɔ̃ŋ. Dítɛi-tɛi kélee da kâa ɣáloŋ tɔnɔ mii-sɛŋ tɛ̀ɛ kóraŋ tɔnɔ su.

⁸ Ǹúu kpaya-kpaya puu káo feerɛi kɛ̀ ǹɔii kpiniŋ puu káo feerɛi mɛi dí láa ká ŋí da ǹɔii kpiniŋ-ŋai dí kɛ̀ mɛi, Bɛŋɔɔ ƃé kɛ̀ ǹyée ǹɔii mɛi Ifiraŋ.

⁹ Bɛŋdɛkɛ ƃé kɛ̀ daa-ŋai ŋí mɛi: Makezi, Saabiŋ, Bɛ-Simɛɛ da Ilɔŋ da Bɛ-Anaŋ.

¹⁰ Bɛŋesɛ ƃé kɛ̀ daa-ŋai ŋí mɛi, Arubo, Soko da Ifɛ lɔii kpiniŋ kélee.

¹¹ Bɛnabinada ƃé kɛ̀ Dɔɔ lɔii kpiniŋ mɛi. È Saloma ǹóŋ nɛnii Tafa kùla a nɛnî.

¹² Ailu ǹóŋ Ba-ana ƃé kɛ̀ daa-ŋai ŋí mɛi: Taana, Mɛgido da ǹɔii kpiniŋ-ŋai kélee Bɛ-Saŋ kɔlɛ mai, Zaretaŋ taai kɛ̀ Zariɛɛ taai kwára-pere, é lɛ́ɛ liî é seri Ebɛɛ Meola taa-lêei ma da Zomeaŋ taa-lêe m̀éla kpéli ma pere.

¹³ Bɛŋgeƃɛ ƃé kɛ̀ Lemɔ Gilia taa leei-mɛi. È kɛ̀ Zaɛ da gbanâŋ-ŋai mɛi nyíi kɛ̀ a Manasɛ ŋɔsuui pɔɔi. È kɛ̀ máŋ Aago lɔii kpiniŋ mɛi Basãŋ. Taa buu lɔ́ɔlu mɛi da dí kɛ̀ naa siɣãŋ tinaŋɔɔ dîa, nyíi da kâa zóoŋ tòo a ƃara kpôŋ-ŋai.

¹⁴ Ido ǹóŋ Ainada ƃé kɛ̀ Ma-anaiŋ lɔii kpiniŋ mɛi.

¹⁵ Aimazi ƃé kɛ̀ Nɛfɛtɛli lɔii kpiniŋ mɛi. È Saloma ǹóŋ nɛnii Basimaa kùla a nɛnî.

¹⁶ Usâi ǹóŋ Ba-ana ƃé kɛ̀ Asɛ lɔii kpiniŋ mɛi da Bealo taai.

¹⁷ Parua ǹóŋ Zeosafa ƃé kɛ̀ Isaka lɔii kpiniŋ mɛi.

¹⁸ Ila ǹóŋ Simei ƃé kɛ̀ Bɛŋsima lɔii kpiniŋ mɛi.

¹⁹ Uri ǹóŋ Gebɛ ƃé kɛ̀ Gilia lɔii kpiniŋ mɛi a kâloŋ nyíi kɛ̀ Amoria-ŋai díkâloŋ Siɔŋ yée mui da Basãŋ lɔii kpiniŋ nyíi kɛ̀ Gâloŋ Oŋ yée mui. É kúla ǹúu láa túɛ-ƃela puu káo feerɛi ŋí pôlu, núu tɔnɔ è kɛ̀ a dímɛi nuu kɛ́tɛi ǹɔii-kpiniŋ-ŋai kélee mɛni ma Zuda lɔii su.

Saloma ŋɔtɔɔ-sãai

²⁰ Zuda da Eezuɛ-ƃelai dí kɛ̀ a dítamaa yɛ̂ɛ yúo ma ŋɛ̃ya. Dí dílaa mìi, dí díkpele dí lii-nɛ̃ɛ kùla.

²¹ Saloma ŋɔkâloŋ-laai è kɛ̀ ǹɔii ŋuŋ-ŋai kélee mɛi é síɣe Yufeletii Ya-leei ma é tóo Felesia-ŋai dílɔii ma, é seri Ize-ƃelai dígoyaŋ-perei ma. Nûa dí ŋuŋ-fela fei-ŋa kɔ̀lɛ ma díkɛ tíi kɛ̀ mì ŋɔfulu-laai su.

²² Mii-sãai da kâa gbɛ̀tɛ Saloma mɛni ma ŋɔpɛ́rɛi mu fólo tɔnɔ mɛni mai, è kɛ̀ a felaƃa fũa kpɔlɔ kuu ŋuŋ tɔnɔ pôlu buu lɔ́ɔlu da mii-sãa da kpɛ́ni fũa kpɔlɔ kuu ŋuŋ saaƃa.

²³ Niŋa sîrɛ kpaya-kpaya lɛ́lɛɛ puu, niŋa buu feerɛ nyíi vé kɛ́ ní a ǹiŋa puui maa-ŋuŋ dai, ƃála ŋuŋ tɔnɔ, pîlaŋ sua da kpɛ́ni-ŋa, tôa da ŋɔni kpaya-kpaya-ŋa.

²⁴ Saloma è kɛ̀ ǹɔii kpiniŋ kélee mɛi kɛ̀ Yufeletii Ya-leei ma vóloi liî-pere, é síɣe Tafisa é tóo Geza. È kɛ̀ gâloŋ-ŋai kélee mɛi kɛ̀ Yufeletii Ya-leei ŋɔfólo liî-pere. È kɛ̀ lii-see su da gɔlɛ ma lɔii ŋuŋ-ŋai kélee.

²⁵ Saloma kɛ́ɛ ɣele mai, Zuda da Eezuɛ lɔii dí kɛ̀ lii-see su, é síɣe kpîŋ Daŋ é tóo máŋ Bɛɛsiba. Ǹaa-ƃelai kélee dí kɛ̀ díkpɔɔi díkpɔmɔ kpâlaŋ-ŋai da dífîi kpalaŋ-ŋai ŋá lii-see su.

²⁶ Kwaa ma wála buu náaŋ dí kɛ̀ Saloma yêei ŋɔsoo-ŋai mɛni ma, ŋɔsoo sia-keleŋ-ŋai da soo sia-ƃela wála puu káo feerɛ.

²⁷ Ŋɔlɔii-kpiniŋ puu káo feerɛ mɛi-ƃela puu káo feerɛi, ɣáloŋ tɛi-tɛi è kɛ̀ díyêei a gɛ́ɛ dí pá a mii-sãa Gâloŋ Saloma da diai kélee da kâa mii-sɛŋ mìi Gâloŋ Saloma ŋɔpɛ́rɛi mui mɛni ma. Dífa ǹɛɛ naa zãai da é kpɛ́ɛ.

²⁸ Gâloŋ tɛi-tɛi tí da kâa pà máŋ a mii-sãa da kala-ŋa zoo-ŋai mɛni ma ƃɛ́i maa-nɛ̃ɛi kɛ̀ dí pá a dia naai. Da kâa lì a zoo sia-keleŋ-ŋai da díi kɛ̀ taa-tulɛ-ŋai.

²⁹ Ɣâla è táre támaa tɛ̀ɛ Saloma pɔ́ da mɛni ŋá-kaa. Ŋɔtárei è kɛ̀ a zu kɛ́tɛ é tɛ́ɛ sɛŋ da kélee ma nyíi núu a pɔri ǹônoi kɛ̂i.

³⁰ Saloma è kɛ̀ a dáreɛɛ é tɛ́ɛ vóloi kulâi-perei tare-ƃelai dîa, Ize tare-ƃelai da ǹúu da kpɛ́ni-ŋai kélee dîa kɛ̀ ŋ̀éniɛi sui.

³¹ Núu da fé kɛ́ ní ŋ̀éniɛi su ŋɔtárei seriɛ́ɛ bɔ́. È kɛ̀ a dáreɛɛ é tɛ́ɛ Ɛzura suui su-nuui Itaŋ ma da Imaŋ, Kakoo da Daada da Maao ǹônii-sinaai. M̀aa tuŋ è tàa-taa naa kɔlɛ ma lɔii ŋuŋ-ŋai su gwaa kélee.

³² È táre-woo wála saaƃa pɔ̃yɛ da wule wála tɔnɔ pôlu lɔ́ɔlu.

³³ A kâa lòno é pîlaŋ sí-sãa sii kélee dîa é síɣe wúru kpaya-kpaya-ŋa dîa é tóo kpɔlɔ-ŋa dîa, é síɣe Lɛƃanɔŋ sîda wuru ma é tóo galai ma a tɛ̂ a pɛ́rɛ-kâŋ, ǹyaŋ è sɛŋ lɛ̂ máŋ é pîlaŋ fɛnɛ-sãa dîa, ŋɔni-ŋa, ɣála-sãa da nyɛ̃ɛ.

³⁴ Ŋ̀éniɛi su lɔii-ŋuŋ-ŋai kélee su kaloŋ-ŋai dí Saloma ŋɔtárei maa tuŋ mɛ̀ni ǹyaŋ da kâa nûa tɛ̀ɛ a gɛ́ɛ dí díwoli tɔ́ɔ ŋɔsɛŋ lɛ́ɛi ma.