Tɔɔɓɛlaa dɔlɔɔ 19 - Bible

Ilaiza è pù Eɣa yêei da Zɛsebɛɛ

¹ Eɣa è m̀ɛnii kélee ƃò Zɛsebɛɛ ma Ilaiza è gɛ̀ da berei è Bêe ŋɔlóno kɛ́-ƃelai kélee pàa la a ƃóa-sɔkpɔi.

² Nya ƃe Zɛsebɛɛ è kéla tɛ̀ɛ Ilaiza pɔ́-naa a gɛ́ɛ é mò ma ǹyɛɛ, “Ŋ̀âla-ŋai dí ńdoo dí ḿbaa à kɛ̀ m̀ɛnii í gɛ̀ a Bêe ŋɔlóno kɛ́-ƃelai ŋà wàla da kɛ́ a ƃía tínaa ƃɛ́ tãi ŋí.”

³ Ilaiza è kɛ̀ yaôi é pú a gɛ́ɛ ŋɔfúlu-laai maa kɔ̃ɔ. Báa Bɛɛsiba daai Zuda lɔii sui, è ǹyée mu-nuui lɛ̀ɛ naa.

⁴ Ǹyaa kpîŋ è lì vɛ̃ɛ-kpâlaŋ su a ɣele tɔnɔ sia. È pà wúru kɛ́tɛ tɔnɔ mu, è sèe naa gɛ́ víi tɔ̀ɔ. È Ɣâla fɛ̀li a gɛ́ɛ é sáa. È mò ǹyɛɛ, “Yâwɛɛ, ŋa mɛni kpɔ̂lu támaa sɔlɔ ƃó. Nɛ̂wo siɣe kpɛ́ni fêi, ŋ́gaa nɔ́ yɛ̂ɛ ńâŋ pɔlɔ-ŋai.”

⁵ Nya ƃe è làa ŋ̀úrui mu é pɛ́lɛ nyiiɛɛ ma. Naa kɛ́ɛ tí Ɣâla-taa kela tɔnɔ è lɛ̀ɣɛ ma ǹyɛɛ mai, “Í mu siɣe í ílaa míi.”

⁶ È gɔlɛ ma kàa é kpólo fãa káa lâani ŋuŋ kɔlɛ ma nyíi kɛ̀ a gbɛ́tɛɛ tiɣi ŋɔŋ mai da yá sane tɔnɔ. È ǹáa mìi, é gbele é ŋɔ́nɔ làa pôlu.

⁷ Yâwɛɛ ŋɔkélai è pà pôlu a tãi veerɛ ɣelei, é lɛ́ɣɛ ma ǹyɛɛ mai, “Í mu siɣe í ílaa míi, kpɛ́ni fêi, berei kôyai a ŋánaa í mɛni ma.”

⁸ Nya ƃe è mù sìɣe é ǹáa míi. Gɛ́ɛ mii-sɛŋ a gbonôi kpànaŋ, è sìa a fólo kûu buu náaŋ da kpíni kûu buu náaŋ é lɛ́ɛ la zu é seri Sânai, Ɣâla ŋɔyéei ma.

⁹ Nya ƃe è lɔ̀ naa kɔni wôlo tɔnɔ su é nyíi naa. Nya ƃe Yâwɛɛ è mò mà ǹyɛɛi, “Ilaiza, lé ƃé ya gɛ̂i ƃɛ́i?”

¹⁰ È zu tòo, “Ŋá Yâwɛɛ, ŋ̀wála-wala kélee Ɣalai maa mɛni sòŋ a gbanaŋɔɔ. Eezuɛ-ŋai da díyee kúla í kpanaŋ-wooi mu, da íɣâla-teƃele-ŋai wólo da ílono kɛ́-ƃelai páa a ƃóa-sɔ̂kpɔ. Ńyãa tɔnɔ ƃé lɛ̀ɛ ǹyaŋ da kɔ̂i a gɛ́ɛ dí ḿbaa máŋ.”

¹¹ Yâwɛɛ ǹyɛɛ m̀ai, “Lí í tɔ́ɔ ŋɛ́i-tuɛ ŋáyee maa-waai ma, kpɛ́ni fêi, ŋaâ pá tɛɛ̂i naa.” Nya ƃe fãa wála-walaa su kɛ́tɛ è pɛ̀lɛ tɛɛ ma nyíi ǹyée-ŋai su ƃèla zâmai, é gɔni-ŋai su ƃéla-ƃela ǹyaa Yâwɛɛ ŋɛ́i-tuɛ. Kɛ́lɛ Yâwɛɛ fé kɛ́ ní vãai su. Vãai tɛ̀ɛ pôlu ma ǹɔii è kpɛ̃liŋ a zu kɛ́tɛ, kɛ́lɛ Yâwɛɛ fé kɛ́ ní ǹɔii kpɛ̃liŋɔɔ̂i su.

¹² Ǹɔii kpɛ̃liŋɔɔ̂i pôlu ma, ŋɔŋ è pà kɛ́lɛ Yâwɛɛ fé kɛ́ ní ŋɔŋ su. Ŋɔŋ tɛ̀ɛ pôlu ma, ninîŋ su-woo lɛ́lɛɛ kɔlɔ-saa ma è tɛ̀.

¹³ Ilaiza kɛ́ɛ a ninîŋ su-wooi mɛ́nii, è ŋɔyokpoi pɛ̀lɛ ŋ̀ɛ́i é kúla ŋ̀énei ŋá é tɔ́ɔ gɔni-woloi lá. Gɛ́ɛ ti, è wóo da mɛ̀ni ǹyɛɛ mai, “Ilaiza, lé ƃé íkaa gɛ̂i ƃɛ́?”

¹⁴ È zu tòo ǹyɛɛi, “Ŋá Yâwɛɛ ŋ̀wála-wala kélee ɣalai maa mɛni sòŋ a gbanaŋɔɔ. Eezuɛ-ŋai da díyee kúla í kpanaŋ-wooi mu, da ŋâla-teƃele-ŋai wólo, ǹyaŋ da ílono kɛ́-ƃelai páa a ƃóa-sɔ̂kpɔ. Ńyãa tɔnɔ nɔ́ ƃé lɛ̀ɛ ǹyaŋ díkaa nâa kɔ̂i a gɛ́ɛ dí ḿbaa máŋ.”

¹⁵ Yâwɛɛ è mò ma ǹyɛɛi, “Lí pôlu a berei í pà lai Dɛmɛika fɛ̃ɛ-kpalaŋ su. Ƃa sèri naa, wúlɔ pú Azae ŋûa í zee a kâloŋ Siria.

¹⁶ Wúlɔ pú máŋ Niŋsi ǹóŋ Zewu ŋûa í zee a kâloŋ Eezuɛ mɛi í wúlɔ pú Safa ǹóŋ Ilaisa ŋûa nyíi kùla Ebɛɛ Meolai í zee ípɔɔ ŋá a Ɣâla ŋɔlóno kɛ́-nuu.

¹⁷ Ǹúui nyíi kélee pâi pûi Azae ŋɔƃóa-sɔkpɔi yêei, Zewu a pâi baâi, nyíi kélee pâi pûi Zewu ŋɔƃóa-sɔkpɔi yêei, Ilaisa a pâi baâi.

¹⁸ É máŋ kɛ́ tí, ŋa pâi núu wála lɔ́ɔlu mɛi feerɛ lɛɛ̂i a dífulu Eezuɛ diai nyíi dífe pîlaŋ ní díŋume ŋá tɛi-tɛi Bêe ŋɛ́i-tuɛi da diai kélee dífe díla-gbɔ-ŋai see ní mai.”

Ɣâla è Ilaisa tòli a gɛ́ɛ é kɛ́ a ŋɔlóno kɛ́-nuu

¹⁹ Ilaiza è kùla naa é lí é Safa ǹóŋ Ilaisa káa. È kɛ̀ ŋɔsí-sãai sîi wɔ̂rɔi a niŋa sîrɛ kpulu puu káo feerɛ. Ǹyaa kpîŋ è kɛ̀ tíi kɛ̂i a gbulu buu káo feerɛ ɣelei. Ilaiza è lì bɔ́ é ŋɔyokpoi tóo Ilaisa kɔŋ ma é kpíniŋ la.

²⁰ Ilaisa è ŋɔniŋa sîrɛ-ŋai lɛ̀ɛ naa é pîlaŋ Ilaiza pôlu a kîrɛ. È mò ma ǹyɛɛ, “Tɔɔ ŋá lí ŋá ḿbama ńâŋ da ńee dîa, gɛ̀ ní ŋa pâi pâi kwa yá kú lí.” Ilaiza ǹyɛɛ m̀ai, “Lí pôlu, fé pâi íkperâi. Kɛ́lɛ m̀ɛnii ŋá gɛ̀ a yɛ̂i é lɛ́ɛ íkili ŋá.”

²¹ Ilaisa è pène pôlu. È ŋɔniŋa sîrɛ kpului sîɣe é gélee páa. È ŋɔtíi kɛ́-sãai kɛ̀ a kɔi a gɛ́ɛ é zuai ɣíli ma é dɛɛ ǹûai pɔ́ dí mii. Nya ƃe è nâa lɛ̀ɛ Ilaiza pôlu a gɛ́ɛ é kɛ́ a ŋɔtíi kɛ́-nuu.