Tɔɔɓɛlaa dɔlɔɔ 18 - Bible

Ilaiza è Bêe ɣalai ŋɔlóno kɛ́-ƃelai pâa

¹ Ɣele kûu támaa tɛɛ pôlu ma, buru koraŋ zaaƃai su, Yâwɛɛ è mò Ilaiza ma ǹyɛɛi, “Lí Gâloŋ Eɣa pɔ́-naa. Ŋa pâi tuna tɛɛ̂i é pú ǹɔii ma.”

² Nya ƃe Ilaiza è lì Eɣa pɔ́-naa. Burui è nâa tòo kpɔ́ a zu kɛ́tɛ Sameria,

³ Eɣa è gɛ̀ dí Obadia tóli é pá bɔ́-naa. Obadia ƃé kɛ̀ ŋɔkâloŋ pɛrɛ kɛ́tɛi mɛi. (È kɛ̀ a laa-la nuu kpanaŋɔɔ Yâwɛɛ mɛni ma.

⁴ Zɛsebɛɛ kɛ́ɛ Yâwɛɛ ŋɔlóno kɛ́-ƃelai paâi, Obadia è Ɣâla ŋɔlóno kɛ́-ƃelai ŋuŋ tɔnɔ sìɣe é díloo kɔni wolo feerɛ su, dɔnɔ núu buu lɔ́ɔlu, gɛ́ mii-sɛŋ tɛ̀ɛ dípɔ da yá naa.)

⁵ Eɣa è mò Obadia ma ǹyɛɛi, “Lí í sía ǹɔii su gwaa kélee ǹyá pɛlɛ-pɛlɛɛi ma da ǹyá ƃolo-ƃoloŋ-ŋai su. Ɣele da kwa pɔri kala-ŋunu kâai naa nyíi zoo-ŋai da ŋ̀wɛlɛ-sôo-ŋai da pɔri da miî dílɛɛ a dífulu.”

⁶ Nya ƃe dí ǹɔii ŋáa kɔ̀lɛ dí kɛ̀ pâi siâi zui. Eɣa è kɛ̀ liî m̀éla tɔnɔ ma pere, Obadia ǹyaŋ kɛ́ lì m̀éla kpéli ma pere.

⁷ Obadia kɛ́ɛ siâi gɛ́ lii, da Ilaiza dí kòyaŋ. Obadia è gɔ̀lɔŋ, é pìlaŋ ŋ̀úme ŋá ǹɔii ma. Ǹyɛɛ m̀ai, “Ŋánuu-namui Ilaiza, ƃía ƃé tí a tɔ̃yâ?”

⁸ È zu tòo ǹyɛɛ m̀ai, “Óowei, lí í mò ímɛi-nuui ma yɛ̂ m̀ai, ‘Ilaiza káa ƃɛ́.’ ”

⁹ Obadia ǹyɛɛ m̀ai, “Lé ƃé ŋa gɛ́ a nyɔ́mɔɔ nyíi a gɛ́ ńyãai a íyee mu-nuui ƃa ńdɛɛ̂i Eɣa pɔ́ a gɛ́ɛ é ḿbaai?

¹⁰ Tɔ̃yâ ma, yɛ̂ɛ berei Íɣâlai Yâwɛɛ káa la ɣele mai, lɔii-ŋûŋ da fé naa nyíi ḿɛi-nuui fé tá kpera ní nûa tɛɛ̂i naa a gɛ́ɛ dí íkɔrii. Lɔii-ŋuŋ ta a mò a gɛ́ɛ ífe naai, a gɛ̀ dí dífoo a gɛ́ɛ dífe íkɛ̂i kɔ́lɔŋ.

¹¹ Kɛ́lɛ íkaa nâa m̀ôi ḿâ a gɛ́ɛ ŋá lí ḿɛi-nuui pɔ́-naa ńyɛ̂ɛ ma a gɛɛ Ilaiza káa ƃɛ́.

¹² Ŋà kùla íkɔlɛ fé ƃɛ́i kɔ́lɔŋ Yâwɛɛ ŋɔmɔ̂leŋ a pâi liî naa a ƃíai. À kɛ̀ ŋà lì ŋà mò Eɣa ma à pà a wàla íkaa, a pâi ḿbaâi. Ŋa ŋ̀wɛ̂lii í gɔ́lɔŋ a gɛ́ɛ, ńyãai a íyee mu-nuui ŋa Yâwɛɛ fɛ̀li é síɣe ŋá núu tɔɔ tãi ma.

¹³ Ŋánuu-namui, ífe niî mɛ̀ni ní a gɛ́ɛ Zɛsebɛɛ kɛ́ɛ kɛ̀ Yâwɛɛ ŋɔlóno kɛ́-ƃelai paâi ŋá núu ŋuŋ tɔnɔ lòo kɔni-wolo feerɛ su, ǹúui buu lɔ́ɔlu kɔni-wolo tɔnɔ su, buu lɔ́ɔlu kɔni wolo tɔnɔ su ŋá mii-sãa tɛ̀ɛ dípɔ naa da yá.

¹⁴ Ǹyaŋ íkaa nâa m̀ôi ḿâ a gɛ́ɛ ŋá lí ŋá ḿɛi-nuui pɔ́-naa ŋá mò mà ńyɛ̂ɛ mà, Ilaiza káa ƃɛ́. Ŋà gɛ̀ tí a pâi ḿbaâi.”

¹⁵ Ilaiza è mò ǹyɛɛi, “Yɛ̂ɛ berei ŋ̀wála-wala kélee Yâwɛɛ káa la ɣele mai, nyíi ŋa tíi kɛ̂i m̀ii, tɔ̃yâ ma, ŋa pâi sâa ŋ́gbîŋ lɛ̂i Eɣa ma.”

¹⁶ Nya ƃe Obadia è lì é mò Eɣa mà. Eɣa è lì a gɛ́ɛ é Ilaiza káa.

¹⁷ Ilaiza káa m̀ii è mò ma ǹyɛɛi, “Ƃía ƃé tí, ƃíai ƃa gɛ́ m̀ɛni nyɔ́mɔɔi kélee kɛ́ kɛ̀ Eezuɛi?”

¹⁸ Ilaiza ǹyɛɛ m̀ai, “Fé a ǹúui nyíi pâi Eezuɛ pɔ́ a mɛni nyɔ́mɔɔ, kɛ́lɛ ka ínâŋ ŋɔkáa-laai su-ƃelai ƃe. Ká káyee kùla Yâwɛɛ ŋɔtɔ̂ŋ-ŋai mu ká kɛ́ Bêe Ɣalai fɛli.

¹⁹ Ǹûai tóli dí kúla Eezuɛ gwaa kélee kwa dîa-ni kú koyâŋ Kamɛ Yeei ma. Pá a Bêe ŋɔlóno kɛ́-ƃela ŋuŋ náaŋ pôlu buu lɔ́ɔlui da Asira ŋɔlóno kɛ́-ƃela ŋuŋ náaŋ nyii-ŋai da dílaa mìi Zɛsebɛɛ ŋɔteƃelei mai.”

²⁰ Eɣa è ŋ̀óo tɛ̀ɛ Eezuɛ gwaa kélee é ŋ̀âla-ŋai dílono kɛ́-ƃelai ŋáa tɛ́ díkîe ma Kamɛ Yeei ma.

²¹ Ilaiza è lì ǹûai ŋɛ́i-tuɛ ǹyɛɛ dîai, “Tãi ɣɛɛlu ƃé ka pâi kɛ̂i la Ɣâla feerɛ loai? À kɛ̀ Yâwɛɛ káa a Ɣâla, ka vɛli. Kɛ́lɛ à kɛ̀ Bêe káa a Ɣâla, ka vɛli.” Kɛ́lɛ ǹûai dífe mɛni da mò ní.

²² Nya ƃe Ilaiza è mò dîa, “Ńyãa tɔnɔ nɔ́ ƃa Yâwɛɛ ŋɔlóno kɛ́-nuui è ńdɛɛi kɛ́lɛ Bêe ŋɔlóno kɛ́-ƃelai díkaa a núu ŋuŋ náaŋ pôlu buu lɔ́ɔlu.

²³ Pá kûɛ a niŋa sîrɛ feerɛ. Tɔɔ dí dɔnɔ siɣe díkpîŋ mɛni ma, dí zu tée-tee a gbua-kpua, dí dípu gɔi mɛi ŋ̀âla-teƃelei ŋá kɛ́lɛ dífe ŋɔŋ tòo ma. Ŋa pâi niŋa sîrɛi kpéli kpɛtɛ̂i ŋá pâi bú gɔi mɛi ŋ̀âla-teƃelei ŋá kɛ́lɛ fé pâi ŋɔŋ toôi ma.

²⁴ Gɛ̀ ní ka pâi káɣâlai fɛlîi, ńyãŋ ŋá Yâwɛɛ fɛli. Ŋ̀âlai nyíi pâi zu toôi a ŋɔŋ, ǹyaa ƃé gáa a Ɣâla.” Nya ƃe ǹûai kélee dí mò dîyɛɛi, “M̀ɛnii í mòi, ǹɛ̂lɛɛi.”

²⁵ Ilaiza è mò Bêe ŋɔlóno kɛ́-ƃelai dîa ǹyɛɛi, “Ká niŋa sîrɛ-ŋai dɔnɔ siɣe ká gbɛtɛ a maa-ŋuŋ nyíi nɔ́ ká támaai, ká káɣâlai fɛ́li, kɛ́lɛ káfe ŋɔŋ tòo ma.”

²⁶ Dí niŋa sîrɛi sìɣe dí dɛɛ dípɔ dí gbɛtɛ. Dí Bêe fɛ̀li é síɣe ɣele-wala ma é tóo ɣele-wulii ma. Dí làɣi a ɣelei pere dîɛ mài, “Óo Bêe, kúwoo su too!” Kɛ́lɛ dífe wóo da mɛni ní núu da fé tela díwoo su too ní. Díkɛ̀ mãlai dí kɛ́ tìnaŋ ŋ̀âla-teƃelei ma dí gbɛ̀tɛi.

²⁷ Vóloi tɛ́ɛ ŋuŋ mai, Ilaiza è pɛ̀lɛ ɣɛ́lɛ-maa kulâi díkponôi ǹyɛɛ dîai, “Ka láɣi a zu kɛ́tɛ! Tɔ̃yâ ma gáa a Ɣâla! Tãi da gáa kili ŋa sia su kɛ́tɛ su, kpaa máŋ gɛ́ lì lɔɔ̂i kɛ̀, kpaa a lí sia ma. Tãi da gáa nyiî ǹyaŋ fɛ̂ɛ ká ŋ̀ɛi lá ƃó.”

²⁸ Nya ƃe dí làɣi kpɔ́ a zu kɛ́tɛ dí díkpîŋ kɔlɔ ma tèe-tee a ƃóa-sɔkpɔ-ŋa da kpála-ŋa, yɛ̂ɛ berei è kɛ̀ la a dí tûa-pere pɔlɔi. Dí lɛ̀ɛ gɛ̂i tí díŋãa kpôloŋ kɛ́ tɛ̀ɛ.

²⁹ Dí lɛ̀ɛ m̀ɛnii ŋí ma ŋ̀ele-wulii salai kula tãi é seri. Kɛ́lɛ dífe sɛŋ da kélee wóo mɛni ní naa. Núu da fé díwoo su too ní. Núu da fé tela ŋ̀óli tɔɔ ní dîa.

³⁰ Nya ƃe Ilaiza è mò díkelee dîa ǹyɛɛi, “Ka pá ƃɛ́ ḿbɔ-naa.” Dí pà bɔ́ naa, ǹyaŋ è Yâwɛɛ ŋɔɣâla teƃelei kpɛ̀tɛ nyíi kɛ̀ a zu kàraai.

³¹ Ilaiza è kɔni puu káo feerɛ sìɣe, dɛi-tɛi kɛ́ ƃò Eezuɛ nuu-suu puu káo feerɛi mɛni ma nyíi kùla Zeeka kponôi, nyíi Yâwɛɛ wóo è wɔ́lɔ pà bɔ́ ǹyɛɛi, “Ílaa a pâi kɛ̂i a Eezuɛ.”

³² È Ɣâla-teƃele kpɛ̀tɛ a gɔni puu káo feerɛi Yâwɛɛ mɛni ma, é lóa tée é dínaŋ ma nyíi a pɔri kɛ̀ yá sane buu feerɛ siɣêi.

³³ È gɔi ŋáa tɛ̀ gîe ma é niŋa sîrɛi zua tèe-tee é bú gɔi mɛi. Nya ƃe è mò dîa ǹyɛɛi, “Ka sane kpaya-kpaya náaŋ láa fɛ́ɛ a yá, ká ǹyái pú zâla-sɛŋ ma da gɔi.”

³⁴ È mò ǹyɛɛi, “Ka gɛ́ ŋɔ́nɔ.” Ǹyaŋ dí ŋɔ́nɔ gɛ̀ tí. È mò dîa ǹyɛɛi, “Ka gɛ́ a zaaƃa ɣelei.” Dí gɛ̀ a zaaƃa ɣelei.

³⁵ Ǹyái è yèŋ é tínaŋ ŋ̀âla teƃelei ma. È ǹóai kpîŋ láa fɛ̀ɛ gbolôŋ kɛ́ tɛ̀ɛ.

³⁶ Zâlai kula tãi è seriɛɛi, Ɣâla ŋɔlóno kɛ́-nuui Ilaiza è lì tuɛ-pere é Ɣâla fɛ̀li ǹyɛɛi, “Óo Yâwɛɛ, Eberaɣɛ̃ɛ Ŋɔɣâlai, Aise Ŋɔɣâlai da Eezuɛ Ŋɔɣâlai, nɛ̀ɛ naa ǹûai dí gɔ́lɔŋ sâa a gɛ́ɛ íkaa a Ɣâla Eezuɛ, ǹyaŋ ŋ́gaa a íyee mu-nuu. Ŋá mɛni-ŋai ŋí kélee kɛ̂i a íwoo.

³⁷ Ŋóo su too, óo Yâwɛɛ, ŋóo su too, a gɛ́ɛ ǹûai ŋí dí gɔ́lɔŋ, óo Yâwɛɛ a gɛ́ɛ íkaa a Ɣâla, ǹyaŋ íkaa ŋɔ́nɔ dílii-ŋai tînanii pôlu ípɔ naa pere.”

³⁸ Nya ƃe Yâwɛɛ ŋɔŋɔŋ è kùla ŋ̀elei su é tóo, é zâla-sɛŋ kéreŋ gɔi da gɔni-ŋai é tóo ǹɔii ma è ǹyái kpála nyíi kɛ̀ a dínaŋɔɔ ŋ̀âla-teƃelei mai.

³⁹ Ǹûai kélee kɛ́ɛ da nyíŋi káai, dí tòo ǹɔii ma dí wɔ̀lɔ dîyɛɛi, “Yâwɛɛ káa a Ɣâla! Yâwɛɛ káa a Ɣâla!”

⁴⁰ Ilaiza ǹyɛɛ dîai, “Ka Bêe ŋɔlóno kɛ́-ƃelai sóŋ. Káfe ǹɛɛ naa díta é pú!” Ǹûai dí dísòŋ, ǹyaŋ Ilaiza ǹyɛɛ dîa ka yèŋ a dia Kisɔ̃ŋ potoi su ká dípàa naa.

Ilaiza è Ɣâla fɛ̀li a gɛ́ɛ tuna é pú

⁴¹ Ilaiza è mò Eɣa ma ǹyɛɛi, “Lí í ílaa míi, í íkpele, kpɛ́ni fêi, tuna kɛ́tɛ tíŋ káa pâi.”

⁴² Nya ƃe Eɣa è lì a gɛ́ɛ é ǹáa míi é gbele, kɛ́lɛ Ilaiza è lɛ̀ɛ Kamɛɛ Yeei tôŋ su é maa pɛ́lɛ ǹɔii ma é ŋuŋ lɔ̀ gbêleŋ veerɛŋɔɔ loai.

⁴³ È mò ŋɔyée mu-nuui ma ǹyɛɛi, “Lí í Yúo naa-pere káa.” È lì é naa pere káa é mò ǹyɛɛi, “Sɛŋ da fé naa.” Ilaiza ǹyɛɛ mài, “Lí naa ŋɔ́nɔ gîei lɔ́ɔlu mɛi feerɛ.”

⁴⁴ Ǹyée mu-nuui páa pôlu a ǹɔ́ɔlu mɛi feerɛ ɣelei é góraŋ ƃó ǹyɛɛi, “Tuna kpini ƃóloŋɔɔ núu yée ma a kulâi yúo su gɛ́ tɛ̀.” Ilaiza ǹyɛɛ m̀ai, “Lí í mò Eɣa ma é ŋɔkɔ́ kɔ́-keleŋ síɣe é lí a maa félaa dunai fa lâa gbera la.”

⁴⁵ Gɛ́ɛ tí, ŋ̀elei su è tɛ̀i a tuna kpini kɛ́tɛ vãai kɛ́ tɛ̀ɛ. Tuna kɛ́tɛ è pɛ̀lɛ púɔɔ ma, Eɣa è lì tuɛ Zariɛɛ.

⁴⁶ Yâwɛɛ è gɛ̀ Ilaiza kponôi é kpanaŋ. Gɛ́ɛ ŋɔyokpoi lɔ̂i ŋɔseɣe mu ɣiri ɣɛli sui, è kîrɛ sìɣe Eɣa túɛ pere é lɛ́ɛ la zu é seri Zariɛɛ.