Korɛntə dɔlɔɔ 8 - Bible

Mii-sãai da dɛ̀ɛ ɣâla-pɔɔkɔŋ-ŋa pɔi

¹ Mii-sãai da dɛ̀ɛ ɣâla-pɔɔkɔŋ-ŋa pɔi, ŋa pá nâa lônoi e pîlaŋ la dîa. Kú gɔ́lɔŋ a gɛ́ɛ “táre káa kúkelee kúyêei.” “Táre” a núu kɛ̀ a yoŋka-nuu, kɛ́lɛ, wɛli-kɛ-maa a núu su kpanaŋ.

² À kɛ̀ gáa núu da kíli ŋá a gɛ́ɛ e sɛŋ da kɔlɔŋ, ve niî gɔ́lɔnîi yɛ̂ɛ berei gáa a sɛŋ fɛ̂ɛ e gɔ́lɔŋ lai.

³ Kɛ́lɛ, à kɛ̀ núu à Ɣâla wɛ̀li, gɛ̀ ní Ɣâla e gɔ́lɔŋ.

⁴ Mɛni ma à kɛ̀ a mii-sɛŋ da dɛ̀ɛ ɣâla-pɔɔkɔŋ-ŋa pɔi miɛɛ, ku gɔ́lɔŋ a gɛ́ɛ “ɣâla-pɔɔkɔŋ fe ɣele ma, Ɣâla tɔnɔ nɔ́ ƃe naa.”

⁵ Kpɛ́ni fêi, tãi da, zãâi ɣâla láa káa diai, díkaa ŋ̀elei su kpaa ǹɔii ma-tɔ̃yâ ma “ɣâla” támaa káa naa da “nuu-namu” támaa

⁶ é máŋ kɛ́ ti, à kɛ̀ a kúa Ɣâla tɔnɔ nɔ́ ƃe gáa naa, Nàŋ-nuui nyíi sɛŋ kélee è kùla ǹyêei da nyíi kúkaa ɣele ma mɛni mai. Nuu-namu tɔnɔ nɔ́ ƃe gáa naa, Zîsɛ Kôrai, nyíi sɛŋ kélee káa ɣele ma zarâi da nyíi kúkaa ɣele ma zarâi.

⁷ Kɛ́lɛ, dárei ŋí fe núu kélee yêei. Kɛ́lɛ, ǹúui da-ni, nyíi-ŋai wɔ́lɔ kɛ̀ ɣâla-pɔɔkɔŋ fɛlîi, da mii-sɛŋ mîi nyíi gáa díkili ŋá a gɛ́ɛ gáa a ŋâla-pɔɔkɔŋ-ŋai díɣâla-mii-sɛŋ. Díkili-ŋa-siai fii kpɛɛ̂i.

⁸ Mii-sɛŋ fe pâi kúkɛ̂i a gɛ́ɛ Ɣâla e ǹyée see kúmu. Ve a mɛni nyɔ́mɔɔ à kɛ̀ kúfa mii-sɛŋ-sii da mii. Kɛ́lɛ, à kɛ̀ kwà maa-mii-sɛŋ ti mii, nyíti fe pâi káƃaloɔ̂i.

⁹ Mɛnii ka pɔ̂ri gɛ̂i nya ƃa ka kámɛi káa. À wàla kɛ́ ti, gɛ̀ ní káŋuŋ-ma-ƃoi a pâi kɛ̂i a vii-kpɛɛ-ƃelai perêi kpáaŋ-sɛŋ.

¹⁰ Kpɛ́ni fêi, à kɛ̀ núu da à íkàa ílaa mii teƃele ma ɣâla-pɔɔkɔŋ ŋɔpɛ́rɛi mu, yái íkaa a táre-nuui, à kɛ̀ maa-nuui ti ŋɔkili-ŋa-siai fii kpɛɛ̂i, gɛ̀ ní ǹíi fe pâi kpelêi a gɛ́ɛ e mii-sɛŋ mii nyíi da gula a sâla ŋâla-pɔɔkɔ̂ŋ-ŋai diai?

¹¹ À kɛ̀ ti, gɛ̀ ní vii-kpɛɛ-nuui ŋí, nyíi gáa a kúƃarâŋ-nuu nyíi Kôrai e sàa mɛni mai, zu a kara ítarêi sârai.

¹² Mɛni ma kà sɔnyɔ̂ŋ kɛ̀ a káƃarâa nyíi-ŋai díkili-ŋa-siai fii kpɛɛ̂i, ka díkili-ŋa-siai kara, gɛ̀ ní ka sɔnyɔ̂ŋ kɛ́ a Kôrai.

¹³ Mɛni ma à kɛ̀ mii-sɛŋ à gɛ̀ ḿarâŋ-nuui e tóo, gɛ̀ ní fe pâi sua miî, tãi da fa la ḿarâŋ-nuui kɛ́ la e tóo.