Korɛntə dɔlɔɔ 14 - Bible

Núu lónoɔ sîi-woo-ŋa su nyíi-ŋai núu fa târe dísui

¹ Ka wɛli-kɛ-maa kɔ́ri. Ka M̀ɔlêŋ ŋɔsama-sãai wɛ́li a dámaa. Ŋuŋ ƃa zama-sɛŋ nyíi gáa a Ɣâla-woo ƃóɔi.

² Kpɛ́ni fêi, ǹúui a lôno a sîi-wooi nyíi núu fa târe zui, gɛ̀ ní maa-nuui fe lóno ni núu-kpune pɔ, gáa lônoi Ɣâla pɔ, kpɛ́ni fêi, núu fa târe ŋ̀óo su, kɛ́lɛ, a loo-mɛni-ŋa ƃò ŋɔmɔ̂leŋ su.

³ Ǹyée kpeli mɛi, ǹúui a Ɣâla-woo ƃôi, a lôno núu-kpune pɔ dísu-kpanaŋ mɛni ma da fɔlɔ-fɔlɔ e pɛ́lɛ ŋa-nɛnɛ ma.

⁴ Ǹúui nyíi a lôno a sii-wooi nyíi núu fa târe zui, gɛ̀ ní maa-nuui a mɛni lɛ́lɛɛ kɛ̂i gbîŋ mɛni ma, kɛ́lɛ, ǹúui nyíi a Ɣâla-wooi ƃòi, a mɛni lɛ́lɛɛ kɛ̂i Kôrai-toli-kpɔŋ mɛni ma.

⁵ Ŋa ŋ̀wɛ̂lii a gɛ́ɛ kákelee ka lóno sii-woo-ŋa su nyíi-ŋai núu fa târe dísui, kɛ́lɛ, mɛnii kpanaŋɔɔi ƃa ká Ɣâla-woo ƃó. Ǹúui a Ɣâla-woo ƃòi gɛ́tɛi e tɛ́ɛ ǹúui ma a lôno sii-woo-ŋa su nyíi-ŋai núu fa târe dísui, fɛ̂ɛ núu da e dísu kula a gɛ́ɛ Kôrai-toli-kpɔŋ e mɛni lɛ́lɛɛ sɔlɔ ƃó dísu.

⁶ Ŋánûa, à kɛ̀ ŋà pà kápɔ ŋ́gɛ lono a sii-woo-ŋa nyíi-ŋai káfa târe dísui, le ƃe ka pɔ̂ri gulâi zu, fɛ̂ɛ ŋa pa kápɔ a mɛni-ŋai Ɣâla a ǹɛ́ mai, kpaa táre, kpaa Ɣâla-woo ƃóɔ, kpaa máŋ sɛŋ lɛ́ɛ?

⁷ A kɛ̀ máŋ ɣale-sãa nyíi-ŋai dífulu fe dísui, ƃɔɔ kpaa máŋ kɔnîŋ díwoo fe lɛlɛ ni, gɛ̀ ní núu a pɔ̂ri ŋulei kɔ́lɔnîi leŋ díkaa doôi?

⁸ À kɛ̀ potɛnɛ-fɛɛ-woo à kɛ̀ a nyɔ́mɔɔ, gbɛ̂ɛ ƃa gbîŋ kpɛ̀tɛ kɔ mɛni ma?

⁹ Bere nɔ́ ƃe gáa la a káa kpîŋ; à kɛ̀ kà lòno a sii-wooi nyíi núu fa târe zui, gɛ̀ ní núu a pâi mɛnii kɔ́lɔnîi leŋ kákaa m̀ôi? Gɛ̀ ní kákaa nɔ́ lônoi káwoo kɛ̀ li vãai su.

¹⁰ Tɔ̃yâ ma sii-woo támaa káa ŋ̀éniɛi su, ǹyaŋ gélee su-kulai káa ma;

¹¹ kɛ́lɛ, à kɛ̀ fe zîi-wooi ti su-kulai kɔ́lɔŋ, gɛ̀ ní kwa m̀ó-nuu kúkaa a kúkîe maa-ŋwôya.

¹² Bere nɔ́ ƃe gáa la a káa kpîŋ; tãi ka ŋ̀wɛ̂lii la kpɔ́ a gbanaŋɔɔ a gɛ́ɛ ka M̀ɔlêŋ ŋɔkili-ŋa-ponoɔi sɔlɔ ƃói, ka kɔ ka Kôrai-toli-kpɔŋ su kpanaŋ a ǹɛ́lɛɛ.

¹³ Mɛni ma ǹúui a lôno a sii-wooi nyíi núu fa târe zui, fɛ̂ɛ e Ɣâla fɛli wála-wala-laa mɛni ma a gɛ́ɛ e maa-sii-wooi ti su kula.

¹⁴ Kpɛ́ni fêi, à kɛ̀ ŋà Ɣâla fɛ̀li a sii-wooi nyíi núu fa târe zui, gɛ̀ ní ŋámɔ̂leŋ káa Ɣâla fɛlîi, kɛ́lɛ, ŋákili-ŋa-siai ƃá fe ŋá.

¹⁵ Le ƃe ŋa pɔ̂ri gɛ̂i? Ŋa pâi Ɣâla fɛlîi a ŋámɔ̂leŋ ŋa Ɣâla fɛli a ŋákili-ŋa-siai máŋ; ŋa pâi wule toôi a ŋámɔ̂leŋ ŋa wule tóo a ŋákili-ŋa-siai máŋ.

¹⁶ À wàla kɛ́ ti, à kɛ̀ kà sɛɣɛi-fei tɛ̀ɛ Ɣâla pɔ a kámɔ̂leŋ, gɛ̀ ní a pɔ̂ri kɛ̂i leŋ ǹúui nyíŋi táre fe ǹyêei é kɛ́ kâa, “É kɛ́ ti” kásɛɣɛ̂i-fei mɛni ma, à kɛ̀ à wàla mɛnii kɔ́lɔŋ kákaa m̀ôi?

¹⁷ Kpɛ́ni fêi, tãi da ka pɔ̂ri sɛɣɛi-fei tɛɛ̂i a ǹɛ́lɛɛ, kɛ́lɛ, káƃarâŋ-nuui fa mɛni lɛ́lɛɛ kùla zu.

¹⁸ Ŋa Ɣâla sɛɣɛ̂i fe a gɛ́ɛ pɔ̂ri káa mî ŋa sii-woo-ŋa ƃó e tɛ́ɛ káa nyíi-ŋai núu fa târe dísui;

¹⁹ kɛ́lɛ, à kɛ̀ a Ŋ̀âla-pɛrɛi mu, ǹɛ́lɛɛ̂i ŋa wóo lɔ́ɔlu ƃó a ŋákili-ŋa-siai a gɛ́ɛ ŋa sɛŋ lɛ́ ḿarâai dîa e tɛ́ɛ la ǹónoɔ ma sii-woo wála puu su nyíi-ŋai dífa târe dísui.

²⁰ Ŋánûa, káfè kɛ̀ a nîa-pɛlɛɛ kákili-ŋa-siai su; ka kɛ́ a kɔatara-ŋa mɛni nyɔ́mɔɔ kɛ́ɛ su, kɛ́lɛ, ka kɛ́ a núu kpaya-kpaya kákili-ŋa-siai su.

²¹ Bɔ̃yɛɛ̂i dɔ̂ŋ su, “Kúnuu-namui ǹyɛɛi, ŋa pâi lônoi ǹûai ŋí pɔ sii-woo da kpɛni ƃó-ƃela sârai da ŋɔ̃yâ-ŋa, é máŋ kɛ́ ti dífe pâi díwoli tɔɔ̂i mâ.”

²² Mɛni ma, sii-wooi nyíi-ŋai núu fa târe dísui, dífe a ŋɛi-kɛ-maa laa-la-ƃela mɛni ma, kɛ́lɛ, díkaa a ŋɛi-kɛ-maa diai mɛni ma laa-la fe díyêei. Ɣâla-woo ƃóɔ fe diai mɛni ma laa-la fe díyêei, kɛ́lɛ, gáa laa-la-ƃela mɛni ma.

²³ Mɛni ma, à kɛ̀ Ŋ̀âla-pɛrɛ mu-ƃelai kélee da díŋa tɛ̀ ma díkelee dí lóno a sii-woo-ŋa nyíi-ŋai núu fa târe dísui, diai dífa târe dísui da diai laa-la fe díyêei, da lɔ̀ dífe pâi m̀ôi a gɛ́ɛ káƃoɔɔ̂i?

²⁴ Kɛ́lɛ, à kɛ̀ kákelee ka Ɣâla-woo ƃò, gɛ̀ ní ǹúui laa-la fe ǹyêei, kpaa máŋ ǹúui táre fe ǹyêei, à lɔ̀, a pâi ŋɔsɔnyɔ̂ŋ kɔ́lɔnîi. Kákelee ka Ɣâla-woo ƃóɔi a pâi ŋɔmɛnii ŋá teêi.

²⁵ Gɛ̀ ní, ǹíi su-loo-mɛni-ŋai kélee da pâi kulâi. A kɛ̀ ti, gɛ̀ ní, a pâi pɛlɛ̂i ǹɔii ma e Ɣâla fɛli e m̀o a gɛ́ɛ Ɣâla káa kásama a tɔ̃yâ.

Ɣâla-pɛrɛi mu tua-perei

²⁶ Le ƃe ŋaŋ, ŋánûa? Kà pà kákîe ma, ǹúui da-ni wule káa díla, da-ni sɛŋ lɛ́ɛ kɛ́ ƃo díyêei, da-ni sii-woo da kpɛni ƃóɔ kɛ́ ƃo díyêei nyíi núu fa târe zui, da-ni la-woo su-kula kɛ́ ƃo díyêei. Tɔɔ mɛni kélee é kɛ́ mɛni lɛ́lɛɛ mɛni ma.

²⁷ À kɛ̀ nûa díkaa kásama nyíi-ŋai da sii-woo da kpɛni-ŋa ƃò nyíi-ŋai núu fa târe dísui, tɔɔ dí kɛ́ nɔ́ feerɛ, kpaa máŋ tãi da saaƃa, dí lóno tɛi-tɛi núu da e díla-woo su kula.

²⁸ Kɛ́lɛ, à kɛ̀ núu lá-woo su kula-nuu fe naa, tɔɔ dí dímɛi sáa Ŋ̀âla-pɛrɛi mu dí lóno nɔ́ dia kpîŋ pɔ da Ɣâla.

²⁹ Tɔɔ Ɣâla ŋɔlóno kɛ́-ƃela feerɛ, kpaa máŋ saaƃa dí lóno nɔ́, ǹúu kpeli-ŋai dí díkili ŋá sía mɛnii ma díkaa m̀ôi.

³⁰ À kɛ̀ Ɣâla à mɛni da lɛ̀ diai see-ni naa kɔlɛi da ma, à kɛ̀ maa-nuui a ŋ̀wɛ̂lii e ŋá lɛ, tɔɔ Ŋ̀âla-woo ƃó-nuui e mɛi saa.

³¹ Kpɛ́ni fêi, kákelee ka pɔ̂ri Ɣâla-woo ƃôi tɔnɔ́-tɔnɔ́ a gɛ́ɛ ǹúui kélee dí sɛŋ kɔ́lɔŋ, lii-kpele é kɛ́ ǹúui kélee yêei.

³² Ɣâla ŋɔlóno kɛ́-ƃelai dímɔ̂leŋ káa Ɣâla ŋɔlóno kɛ́-ƃelai mu.

³³ Kpɛ́ni fêi, Ɣâla fe a yóo-yoo-Ɣala, kɛ́lɛ, gáa a lii-sêe-Ɣala. Ŋ̀âla-ƃelai Díɣâla-pɛrɛ-ŋai kélee mu,

³⁴ fɛ́ɛ nɛnî-ŋai dí dímɛi sáa Ɣâla-pɔrɔŋ. Kpɛ́ni fêi, ve a sɛŋ a gɛ́ɛ dí lóno naa, kɛ́lɛ, fɛ́ɛ dí kɛ́ zinâai mu, yɛ̂ɛ berei máŋ dɔ̂ŋ a mò lai.

³⁵ À kɛ̀ mɛni da káa naa da ŋ̀wɛ̂lii dí gɔ́lɔŋ, tɔɔ dí dísinâai marê kɛ́ dípɔ-taai, kpɛ́ni fêi, gáa a ŋumɛ-mɛni a gɛ́ɛ nɛnî a lono Ɣâla-pɛrɛ mu.

³⁶ Le ƃe! Ɣâla ŋɔwóoi kɔ́ɔ pîlaŋɔɔ è kùla káyêei, kpaa káa tɔnɔ nɔ́ ƃe Ɣâla ŋɔwóoi a sèri kâa?

³⁷ À kɛ̀ gáa núu da kíli ŋá a gɛ́ɛ gáa a Ɣâla ŋɔlóno-kɛ-nuu, kpaa máŋ M̀ɔlêŋ ŋɔsama-sãai díkaa gbonôi, gɛ̀ ní, fɛ́ɛ e gɔ́lɔŋ a gɛ́ɛ mɛnii ŋ́gaa bɔ̃yɛ̂i kápɔ-naai, gáa a Kúnuu-namui ŋɔtɔ̂ŋ.

³⁸ À kɛ̀ núu à wàla ŋ̀óli tɔɔ nyíŋi ma, gɛ̀ ní, m̀arâai dífe pâi díwoli tɔɔ̂i ma.

³⁹ Mɛni ma, ŋánûa, ka Ɣâla-woo ƃóɔ wɛli kpɔ́ a dámaa. Ǹyaŋ, zîi-wooi nyíi-ŋai núu fa târe dísui, káfe díƃoɔɔ kpèra;

⁴⁰ kɛ́lɛ, fɛ̂ɛ m̀ɛnii kélee é kɛ́ a ǹɛ́lɛɛ é kɛ́ a zã́a.