Korɛntə dɔlɔɔ 13 - Bible

Wɛli kɛ́-maa

¹ À kɛ̀ máŋ ŋà lòno a núu-kpune da Ɣâla-taa-kela-ŋa lá-sii-woo-ŋa, ǹyaŋ wɛli-kɛ-maa fe ńyêei, gɛ̀ ní ŋ́gaa nɔ́ lônoi yɛ̂ɛ taya saa ɣale-woo, kpaa máŋ kóno ɣale-woo.

² À kɛ̀ máŋ wála-wala káa ńyêei a gɛ́ɛ ŋa Ɣâla-woo ƃó, ŋ́gɛ tàre kili-ŋa-tɛi mɛni kélee su, táre kélee kɛ́ ƃo ńyêei, à kɛ̀ máŋ laa-la kélee káa ńyêei a gɛ́ɛ ŋa pɔ̂ri yée-ŋa siɣêi dítɔɔ̂i, kɛ́lɛ, wɛli-kɛ-maa fe ńyêei, ŋ́gaa nɔ́ kpɛni-kpɛni.

³ A kɛ̀ máŋ ŋà ŋ́gɔ̃liŋ kélee kɔ̀lɛ gôlo-ƃelai dîa, ŋa ŋ́gbono tɛ́ɛ a gɛ́ɛ dí géreŋ, kɛ́lɛ, wɛli-kɛ-maa fe ńyêei, fa sɛŋ sɔlɔ ƃô zu.

⁴ Wɛli-kɛ-maa líi kpeleɛ̂i, zɔŋ lɛ́lɛɛ; wɛli-kɛ-maa fe tólo ni, wɛli-kɛ-maa fa yoŋka tee;

⁵ va zu-mɛ̂ni kɛ̀tɛ, va ŋumɛ-tûa kɛ̀. Wɛli-kɛ́-maa fa gbîŋ-pere kɔ̀ri, va ǹíi ŋwàna a maa félaa, va mɛni nyɔ́mɔɔ su too;

⁶ ǹíi fa nɛ̃ɛ lɛ́ɛ-mɛni su, kɛ́lɛ, ǹíi a nɛ̃ɛ tɔ̃yâ-mɛni su.

⁷ Wɛli-kɛ-maa a mɛni kélee sìɣe, gɛ laa a mɛni kélee, gíli kɛ́ ƃò mɛni kélee su, ǹíi kpeleɛ mɛni kélee su.

⁸ Wɛli-kɛ-maa kôyaŋ fe ma; kɛ́lɛ, Ɣâla-woo ƃóɔ a pâi tɛɛ̂i; sîi-woo-ŋa nyíi-ŋai núu fa târe dísui, da pâi tɛɛ̂i; táre a pâi tɛɛ̂i.

⁹ Kpɛ́ni fêi, kútarêi láa fe fɛ́ɛ ni, Kúɣâla-woo ƃóɔi láa fe fɛ́ɛ ni;

¹⁰ kɛ́lɛ, tãi mɛnii nyíi ǹáa fɛɛ̂i à pà lai, mɛni kpûra-ŋai ŋí da pâi tɛɛ̂i.

¹¹ Tãi ŋá kɛ̀ la a lôloŋ ŋá lòno yɛ̂ɛ lôloŋ, ŋá mɛni ŋá káa yɛ̂ɛ lôloŋ, ŋa ŋ́gili ŋa sía yɛ̂ɛ lôloŋ; kɛ́lɛ, tãi ŋa nâa kɛ̀ la a núu kɛ́tɛi ŋá kpèra lôloŋ mɛni ma.

¹² Tãi ŋí su kúfa kwaa kâa a zu ponoɔ. Gáa nɔ́ yɛ̂ɛ núu à kɛ̀ sɛŋ da kâai mɛlɛ-mɛlɛ su. Kɛ́lɛ, nâa pôlu ma, kwa pâi mɛni-ŋai kpîŋ kâai yɛ̂ɛ berei díkaa lai. Tãi ŋí su ŋámɛni-kɔlɔŋɔɔi káa nɔ́ a gbua; kɛ́lɛ, tãi ti su ŋa pâi gélee kɔ́lɔnîi yɛ̂ɛ berei máŋ Ɣâla e ŋ́gɔlɔŋ la a ǹɛ́lɛɛi.

¹³ Mɛni ma, zɛŋ saaƃa ŋí, laa-la, kili-kɛ-zu, da wɛli-kɛ-maa díkaa nɔ́ naa wɔlɔ-wɔlɔ, kɛ́lɛ, zɛŋ saaƃai ŋí nyíi dɛɛ̂i gélee mai, ǹyaa ƃa wɛli-kɛ-maa.