Zooɛ 3 - Ŋ̀âla Kɔlɔ Maa Waai

Ɣâla a pâi ǹɔii-ŋûŋ-ŋai dímɛnii ŋá têei

¹ Yâwɛɛ ǹyɛɛ, “M̀aa ɣêle-ŋai tí su, ŋa pâi Zuda da Zerusâlɛŋ dítɔɔ-sãai da tɛɛ̂i pôlu.

² Ŋa pâi ǹɔii-ŋûŋ-ŋai kélee ŋáa tɛ̂i ma ŋa pá a dîa M̀ɛni-ŋá tée tiŋ-tiŋ su, naa ƃé ŋa pâi dímɛnii ŋá têei naa ŋánûai mɛni ma da Eezuɛ nyii gáa a ŋápɔɔ-sɛŋ kpɛ́ni fêi, da ŋánûai táa-tâa ǹɔii-ŋûŋ-ŋai su, da ŋálɔii ŋáa kɔ́lɛ.

³ Ǹyaŋ ká kpɛɛŋ tôo ŋánûai mɛ̂ni ma, ká zina-nɛyãai kɔ́lɛ wulu-wulu kɛ́ nɛni-ŋa pôlu, ka nɛyâa-nɛyãai kɔ́lɛ ŋwã̂ai pôlu ká gbele.

⁴ “Óo Taya da Sidɔŋ, é pɛ́lɛ Felesia lɔii-kpiniŋ-ŋai dîa kákaa a lé ḿɛni ma? Ká káa ŋɔ́nɔ ḿvela-fêi sɛŋ da mɛni ma. Gɛ̀ ní ŋa pâi kásɔnyɔ̂ŋ kélee pûi káŋûa a maa-felaa.

⁵ Ká ŋákanei sìɣe, ŋágôoi, é pɛ́lɛ ŋátɔɔ-sãai dîa ká lí a dia káɣâla fɛli-pɛrɛ-ŋai mu.

⁶ Ka Zuda da Zerusâlɛŋ-ƃelai kɔ́lɛ Gurii-ŋai dîa lɔii su kôyaa-ŋa su.

⁷ Kɛ́lɛ ŋa pâi díkulâi ƃɛ́i ká díkɔ̀lɛ naai, ǹyaŋ ŋa pâi kásɔnyɔ̂ŋ-ŋai pûi káŋûa.

⁸ Ŋa pâi kálônii-sinaai da kálônii-nɛyãai kɔlɛ̂i Zuda-ƃelai dîa, ǹyaŋ da pâi dí kɔlɛ̂i Saƃa-ƃelai dîa lɔii su kôyaa su.”

⁹ “M̀ɛnii ŋí ƃó ǹɔii-ŋûŋ-ŋai su: ‘Ka kákpîŋ kpɛ̀tɛ kɔ́kɔ mɛni ma. Ka gɔ́-kuluƃa-ŋai líi kpéle. Gɔ́kɔ-ƃelai kélee tóli díkîe ma dí pá.

¹⁰ Ka ká kâli-ŋai ɣále a ƃóa-sɔkpɔ-ŋa, ka kási-sãai kula kpawɔ-ŋai kélee kpɛ̀tɛ a sɔla-ŋa. Tɔɔ vii-kpɛ̂ɛ nuui é mo ǹyɛɛ, “Ŋ́gaa a kɔkuluƃa.”

¹¹ Ka pá a maa-felaa káai a ǹɔii-ŋûŋ-ŋai ƃɛ́i, ká káŋaa tɛ́ ma diŋ-tiŋ su.’ ” Pá a íkɔ-kuluƃa-ŋai óo Yâwɛɛ!

¹² “Tɔɔ ǹɔii ŋûŋ-ŋai kélee dí díkpîŋ kpɛ̀tɛ, dí pá M̀ɛni-ŋa tée Tiŋ-tiŋ su. Kpɛni fêi, ǹaa ƃé ŋa pâi seêi naa ŋá ǹɔii ŋuŋ-ŋai kélee ƃɛ́i dímɛnii ŋá-tee.

¹³ Dí ŋwana-lɔ̂ɔi a ŋ̀ánaa. Ka dí tée yɛ̂ɛ berei da mɔlɔŋ tèe lai. Ŋa díluaŋ yɛ̂ɛ berei da m̀á kpɔmɔ ƃa luaŋ la é lɛ́ɛ la zu é bú-sɛŋ-foloi láa fɛ́ɛ gɛ́ yèŋ lai.”

¹⁴ Núu wála támaa káa M̀ɛni ŋá-tee Tiŋ-tiŋ su. Yâwɛɛ ŋɔɣelei a lɛ̀ɣɛ mɛni ŋá-tee mɛni ma diŋ-tiŋ su.

¹⁵ Vóloi fé pâi toôi, ŋ̀áloŋ fé pâi fôloi ǹyaŋ ƃɛmɛlɛŋ-kao-ŋai dífe pâi fôloi.

Ɣâla a pâi lûwa toôi ŋɔnûai dîa

¹⁶ Yâwɛɛ wóo káa tɛ̂i Zãiyɔŋ Yeei ma. Ŋ̀óo kɛ́ kùla Zerusâlɛŋ, ŋ̀ele-kɔlɔŋ da ǹɔii díkɛ kpɛ̃lîŋ. Kɛ́lɛ Yâwɛɛ káa a ŋɔnûai mɛi káa-nuu, dɔɔ̂i kpanaŋɔɔ ŋɔnûai Eezuɛ-ŋai mɛni ma.

¹⁷ “Ka pâi ŋ́gɔlɔnîi a Yâwɛɛ Káɣâlai, nyii gáa Zãiyɔŋ Yeei mai, ŋáyee maa-waai. Zerusâlɛŋ a pâi kɛ̂i a maa-waa. Ŋɔ̃́ya da kélee yée fé ŋɔ́nɔ pâi tɛɛ̂i m̀a.

¹⁸ Maa ɣêlei tí ŋwã̂ai nɛ̃ɛ a pâi kulâi ǹyée kpaya-kpayai su, niŋa-ŋini-ya kɛ́ kula ǹyée pɛlɛ-pɛlɛi su, ǹyaŋ Zuda ya-pɛlɛɛi kélee láa a pâi fɛ̂ɛi a yá. Ya-lêe a pâi kulâi Yâwɛɛ ŋɔpɛ́rɛi mu é Akasia Tiŋ-tiŋ láa fɛ́ɛ.

¹⁹ “Ize lɔii a pâi lɛɛ̂i kpɛ́ni-kpɛni. Idɔŋ lɔii é lɛ́ɛ a fɛ̃ɛ-kpâlaŋ, dí mɛni nyɔ́mɔɔi mɛni ma nyii dí gɛ̀ a Zudai. Kpɛ́ni fêi, dí kɔ́ pɛ̀lɛ Zuda-lɔii ma, dí zu-ƃelai páa nyii-ŋai dífe mɛni nyɔ́mɔɔ kɛ́ níi.

²⁰ É máŋ kɛ́ tí, núu a pâi kɛ̂i nɔ́ Zuda da Zerusâlɛŋ lɔii su wɔ́lɔ-wɔlɔ da wɔ́lɔ-wɔlɔ.

²¹ Ŋa pâi ŋánûai díkpâi kulâi. Fé pâi mɛni nyɔ́mɔɔ kɛ́-ƃelai su mɛni lɛɛ̂i, kpɛ́ni fêi, ńyãa Yâwɛɛ káa Zãiyɔŋ Yeei ma.”