Zôo 17 - Ŋ̀âla Kɔlɔ Maa Waai

¹ “Ńɛ̂wo aâ kɛ́ kpɛɛ̂i. Ŋ́âa nâa kɛ́ pâi saâi. Daâ nâa ḿolôŋ tée.

² Ǹûai kélee díkaa ɣɛ̂lɛi ḿa, ǹyaŋ ŋa gâai berei da ɣɛlɛ̂i la ḿâ a ŋwana-lɔ̂ɔ perei.

³ Ɣâla, ye ḿaa tée mî. Núu da fé naa nyii a pɔ̂ri gɛ̂i tí mî.

⁴ Ya ḿbarâai kɛ́ dífa ŋɔ́nɔ pɔ̀ri díkili-ŋa siâi, díkpera, díyee fé tɛ̀ɛ ḿâ.

⁵ Yɛ̂ɛ berei dí wɔlɔ mò lai, í mii-sɛŋ ŋáa kɔ̀lɛ í ǹɛɛ naa ínîa-pɛlɛɛi dí saa a puru.

⁶ A gɛ́ ǹûai díkɛ ɣɛ́lɛ-maa wule tòo ḿâ, díkɛ díla-ya pù ḿâ a ŋume-pere.

⁷ Ŋá maloŋ too-maai a ŋ́ɛi pú. Ńzua-ŋai da kpála ḿâ da kɛ́ yɛ̂ɛ ninîŋ.

⁸ Gúlaai a diai dîyɛɛ díkaa a ƃaa kɛ́-maa-ƃelai. Dí dílii ŋ̀wana díkɛ mò dîyɛɛ ḿve láa ní a Ɣâla.

⁹ É máŋ kɛ́ tí, ǹúui nyii ǹâai a Ɣâlai a pâi kɛ̂i nɔ́ Ɣâla pôlu. Ǹyaŋ ǹúui nyii ǹyée ma waâi dɔɔ̂i a pâi kɛ̂i nɔ́ a gbanaŋɔɔ a ɣele kélee.

¹⁰ Ka pá ŋɔ́nɔ ká m̀ɛni-ŋai ƃó nyii-ŋai ká kɛ̀ môi a maa-ŋuŋ. Ŋá gɔ́lɔŋ a gɛɛ ḿve pâi táre-nuu tɔnɔ kpîŋ kâai kásama.

¹¹ “Ŋá kɛ̀-ɣeniɛi aâ kpɛɛ, ŋá kili-ŋa-siai máŋ aâ kpɛɛ ǹyaŋ kili kɛ-zu fé ŋɔ́nɔ ńyêei.

¹² Ḿarâai dífe kpíni da ɣele-ƃɔɔ loai kɔ́lɔŋ. Tãi gbínii a kɛ̂ pɛlɛ̂i lai, da mò dîyɛɛ kwaa ponoɔɔ aâ kɛ́ pâi.

¹³ Zɛŋ nɔ́ ŋ́ɛi káa berei nya ƃa saa. Ǹyaŋ ŋa pâi nɔ́ nâa kɛ̂i nɔ́ gbínii su.

¹⁴ Ŋa pâi môi m̀olôŋ ma ńyɛɛi, ‘Ƃolôŋ, íkaa nɔ́ yɛ̂ɛ ńâŋ.’ Ŋá mó gbeli-ŋai dîa ńyɛɛ, ‘Kpeli-ŋa, kákaa nɔ́ yɛ̂ɛ ńee da ńzaaƃɔlɔ-nɛyaa.’

¹⁵ Lé ƃa ŋá kili-kɛ-zui? Núu da a pɔ̂ri ŋá kɛ-ɣeniɛi ŋɔtínaa tuɛ-pere kâai?

¹⁶ Kwa kili kɛ-zu ƃé pâi liî molôŋ su a tãi tɔnɔi? Ǹyaŋ gili kɛ-zui gáa ńyêei kwa ǹyaa ƃé pâi saâi?”