Wule-woo-ŋa 144 - Ŋ̀âla Kɔlɔ Maa Waai

Kâloŋ da è Ɣâla sɛɣɛi-fe ŋɔkpɔara-ƃelai yée mɛi ɣále mɛ̂ni ma

Deeƃé ŋɔwulei

¹ Laa maa tɛ̂ é tɛ́ɛ Yâwɛɛ pɔ́ nyii gáa a ḿaa kɔ̃ɔ kɔnîi. È kɔ́ kɔ́-pere lɛ̀ ḿâ, é ńdɔɔ a kɔ́ kɔ́ɔ.

² Gáa a ḿaa kɔ̃ɔ-nuu gɛ́ ḿɛi kâa, gáa a ḿaa kɔ̃ɔ-nuu da ḿalo-nuu, zarâi ƃé ŋa ŋuŋ ma ƃô sɔlɔ ƃô naa. È ǹɔii ŋûŋ-ŋai yée mɛi ɣâle é ŋ́gɛ dí mɛi.

³ Óo Yâwɛɛ, lé ƃa núu-kpune íkpaaŋɔ̂ɔi kpɔ́ tí a m̀aa mɛ̂nii? Lé mɛni ƃé íkpaaŋɔ̂ɔi kpɔ́ ŋí la m̀ɛni mai?

⁴ Núu-kpune káa nɔ́ yɛ̂ɛ fãa lâɣi, ŋɔkɛ̀ ɣéniɛi káa nɔ́ yɛ̂ɛ ninîŋ ƃé tɛɛ̂i.

⁵ Óo Yâwɛɛ, ŋ̀ele-kɔlɔŋ lá ƃó íyeŋ ǹɔii ḿa. Lɛɣɛ ńyee kpaya-kpayai dîa díluru é kúla.

⁶ Ŋ̀elei su kɛ́ mãla-mãla, íkpɔara-ƃelai dí pú. Ísɔla-ŋai píli a gɛ́ɛ dí pú.

⁷ Íyee sã́a é kúla ŋ̀elei su, í ŋ́gula ǹyá-siŋɔɔi ŋí su, íŋuŋ ma ƃó. Ŋ́uŋ ma ƃó í ŋ́gula ŋɔ̃ya-ŋai yêei,

⁸ nyii-ŋai dífa tɔ̃yâ ƃò, díkɛ dífòo a lɛ́ɛ perei.

⁹ Óo Ɣâla, ŋa pâi wule nina toôi yâ. Ŋa pâi kɔnîŋ ɣalêi, ŋá wule tóo yâ.

¹⁰ Yà gɛ̀ kâloŋ-ŋa dí díkpɔara-ƃelai yée mɛi ɣále, íkɛ íyee-mu-nuui Deeƃé ŋuŋ ma ƃò.

¹¹ Ŋ́uŋ ma ƃó í ŋ́gula ŋ́gbɔara-ƃelai yêei. Ŋ́gula ŋɔ̃ya-ŋai díwala-wala-laai mu nyii-ŋai dífa tɔ̃yâ ƃò, fɛ̂ɛ lɛ́ɛ-sere fàa kɛɛi.

¹² Tɔ́ɔ kúlônii-sinaai da kɛ̀ a nyáŋkpa, díƃɔlɔ yɛ̂ɛ wuru kpanaŋɔɔ. Tɔ́ɔ kúlônii-nɛyaai díkɛ yɛ̂ɛ pɛ́rɛ-yee mu wuru nyii dízàa a ǹɛ́lɛɛi, dí dɔɔ gâloŋ pɛrɛi yée mui.

¹³ Tɔɔ kúkere-ŋai dí kɛ́ a dílaa fɛ́ɛ a mii-sɛŋ sii kélee. Tɔ́ɔ kúƃala-ŋai díkaa kúkpâlaŋ-ŋai ŋái, dí díkaa a wála púu (10,000).

¹⁴ Tɔ́ɔ kúniŋa-ŋai dí díkaa a dámaa, mɛni nyɔ́mɔɔ fé da kɛ̀, kpaa máŋ da é sáa. Tɔ́ɔ lii-too pôlu wɔ̀lɔ-woo da fé tɛ̀ kú taa lêe-ŋai da su.

¹⁵ Lûwa káa ǹɔii-ŋuŋ ma nyii m̀ɛnii ŋí kàa a tɔ̃yâi. Lûwa káa diai dîa Díɣâlai ƃa Yâwɛɛi.