Nɔŋba 8 - Ŋ̀âla Kɔlɔ Maa Waai

Laŋpo-ŋai see-mɛni

¹ Nya ƃe Yâwɛɛ è mò Mose ma ǹyɛɛi,

² “M̀ó Eelɔŋ ma à laŋpo-see-wuruii tɔ̀ɔ, fɛ̂ɛ laŋpo lɔ́ɔlu mɛi feerɛ léŋ é laŋpo see-wuruii túɛ pono.”

³ Eelɔŋ è gɛ̀ tí. È laŋpo-ŋai sèe a gɛɛ dí léŋ é laŋpo-see wuruii túɛ pòno yɛ̂ɛ berei Yâwɛɛ è mò la Mose mai.

⁴ Berei laŋpo-see wuruii è kɛ̀ a gbɛtɛɛ lai ǹya ká. È kɛ̀ a gbɛtɛɛ a gôo ɣaleɛɛ a kpɔ́kpɔ é síɣe gwára é tɛ́ M̀eɣêŋ-ŋai dîa. Dí ŋ̀ale nɔ́ a berei Yâwɛɛ è nɛ̀ la Mose mai.

Liiva-ŋai díwaa-mɛni da dítɛɛ mɛni Ɣâla pɔ́

⁵ Nya ƃe Yâwɛɛ è mò Mose mà ǹyɛɛi,

⁶ “Liiva-ŋai kúla Eezuɛ-ŋai sáma í dímaa wáa.

⁷ Berei ƃa pɔ̂ri dímaa waâi lai ǹyaa ká ŋí. Zɔnyɔ̂ŋ su-mɛni-lɛɛ-yai kpɛ́mɛŋ dîa, dí díkɔlɔ-leɣa pú, dí díseɣe-ŋai wáa, dí díkpîŋ maa waa.

⁸ Nàa pôlu ma dí niŋa naɣa kɛ́tɛɛ síɣe da kpólo-sala kula felaƃa wúlɔ púɔɔ mà. Niŋa naɣa sirɛi síɣe sɔnyɔ̂ŋ su-mɛni-lɛɛ sala mɛni ma.

⁹ Nyíŋi pôlu ma Eezuɛ-ŋai kélee ŋá tɛ́ díkîe ma í Liiva-ŋai kɛ́ dí tɔ́ɔ Zua kɔlɔ seɣe pɛrɛ maa waai ŋɛ́i-tuɛ.

¹⁰ Ƃa Liiva-ŋai tɔ̀ɔ Yâwɛɛ ŋɛ́i-tuɛ, fɛ̂ɛ Eezuɛ-ŋai dí díyee pɛ́lɛ dîa.

¹¹ Gɛ̀ ní Eelɔŋ a pɔ̂ri Liiva-ŋai tɛɛ̂i ḿbɔ yɛ̂ɛ soŋ-nyee-ŋa sama-sɛŋ nyii kula Eezuɛ-ŋai yêei a gɛɛ dí tíi kɛ́ mî.

¹² Liiva-ŋai dí díyee láa niŋa-sirɛ-ŋai ŋûa, í dɔnɔ kula a sɔnyɔ̂ŋ su-mɛni-lɛɛ sala í gbéli kúla a kéreŋ-sala Liiva-ŋai dísɔnyɔ̂ŋ-ŋai su-mɛni-lɛɛ mɛni ma.

¹³ “Liiva-ŋai kɛ́ dí tɔ́ɔ Eelɔŋ da ǹônii túɛ-pere í dítɛɛ ḿbɔ yɛ̂ɛ soŋ nyee-ŋa sama-sɛŋ.

¹⁴ Liiva-ŋai kúla Eezuɛ-ŋai sáma a bere sîi tí a gɛɛ Liiva-ŋai dí kɛ́ a ḿbɔɔ.

¹⁵ Tãi ƃa Liiva-ŋai maa wàa lai í dítɛɛ ḿbɔ yɛ̂ɛ soŋ-nyee-ŋa sama-sɛŋ, gɛ̀ ní da pɔ̂ri nâa tíi kɛ̂i Zua-kɔlɔ pere maa waai mu.

¹⁶ Ŋa dísiɣe Eezuɛ ǹônii-sinaai maa-ŋuŋ-ŋai pɔ́ɔ ŋá. Ǹyaŋ díkaa a ḿbɔɔ.

¹⁷ Kpɛni fêi, Eezuɛ ǹônii-sinaai maa-ŋuŋ-ŋai kélee díkaa a ḿbɔɔ. Vóloi ŋá Ize-ŋai dílônii-sinaai maa-ŋuŋ-ŋai kélee pàa la Ize lɔii sui, ŋá Eezuɛ-ŋai dílônii-sinaai maa-ŋuŋ-ŋai da dítaa-tulɛ-ŋai dílônii maa-ŋuŋ-ŋai sìɣe a ḿbɔɔ.

¹⁸ Ǹyaŋ ŋa Liiva-ŋai síɣe Eezuɛ-ŋai dílônii-sinaai maa-ŋuŋ-ŋai kélee pɔ́ɔ ŋá.

¹⁹ Ŋa Liiva-ŋai kúla Eezuɛ-ŋai sáma ŋa dítɛɛ Eelɔŋ pɔ́ da ǹônii a gɛɛ dí tíi kɛ́ Eezuɛ-ŋai dîɛ Zua kɔlɔ seɣe pɛrɛ maa waai mu, a gɛɛ ŋɔ́nɔ dí sâla kula Eezuɛ-ŋai dísɔnyɔ̂ŋ su-mɛni-lɛɛ mɛni ma, a gɛɛ da lɛ̀ɣɛ Zua kɔlɔ pɛrɛ maa waai kɔlɛ mɛni nyɔ́mɔɔ fé díkɛ̀.”

²⁰ Nya ƃe Mose da Eelɔŋ é pɛ́lɛ Eezuɛ-ŋai kélee dîa dí Liiva-ŋai tɛ̀ɛ Ɣâla pɔ́ yɛ̂ɛ berei Yâwɛɛ è mò la Mose mai.

²¹ Nya ƃe Liiva-ŋai dí díkpîŋ maa waa sɔnyɔ̂ŋ yêei dí díseɣe-ŋai wáa. Eelɔŋ è dítɛ̀ɛ Yâwɛɛ pɔ́ a soŋ-nyee-ŋa sama-sɛŋ é sâla kula dísɔnyɔ̂ŋ su-mɛni lɛɛ mɛni ma.

²² Nàa pôlu ma, Liiva-ŋai dí lì Zua kɔlɔ seɣe pɛrɛ maa waai mu a gɛɛ dí dítii-ŋai kɛ́ naa Eelɔŋ da ǹônii-sinaai yée mu. Eezuɛ-ŋai dí mɛnii kélee kɛ̀ Liiva-ŋai dîɛ yɛ̂ɛ berei Yâwɛɛ è mò la Mose mai.

²³ Nya ƃe Yâwɛɛ è mò Mose ma ǹyɛɛi,

²⁴ “Liiva-ŋai dítii kɛ́-pere ká ŋí. Liiva-nuu kélee nyii ŋɔpɔlɔ-pɔlɔ laa káa é síɣe kóraŋ buu feerɛ káo lɔ́ɔlu ma é lí tuɛ-pere, fɛ̂ɛ é tíi kɛ́ Ŋásua kɔlɔ seɣe pɛrɛ maa waai mu.

²⁵ Ŋɔpɔlɔ-pɔlɔ-laai à sèri kóraŋ buu lɔ́ɔlu ma, fɛ̂ɛ é kúla díi su é sée.

²⁶ Nàa pôlu ma a pɔ̂ri kpɔnîi m̀arâai dîa kɛ́lɛ vé a sɛŋ é tíi da kélee kɛ́ naa gbɔ́ɔi yee ma. Berei ká ŋí fɛ̂ɛ í Liiva-ŋai dítii lɛ́ la dîa.”