Nɔŋba 33 - Ŋ̀âla Kɔlɔ Maa Waai

Eezuɛi-ŋai dísia é síɣe Ize é lí Môa lɔii su

¹ Eezuɛ-ŋai díƃûu-ŋai láa ká ŋí é síɣe tãi ma dí kùla la Ize lɔii su. Mose da Eelɔŋ ƃé kɛ̀ dítuɛ.

² Mose è gwaa-ŋai ma láa pɔ̃yɛ tɛi-tɛi ƃɛ́i dí díƃûu-ŋai pù naai yɛ̂ɛ berei Yâwɛɛ è mò la mai.

³ Dí kùla Ize lɔii su a góraŋ ŋɔɣáloŋ maa-ŋuŋ ŋɔfólo puu káo lɔ́ɔlu ɣele nyii kɛ̀ a dɛɛ-mɛi-kuui pôlu ma ɣelei. Yâwɛɛ ŋɔkpɔŋ-maai su Eezuɛ-ŋai dí kùla Laŋse-taa-leei su Ize-ŋai kélee ŋɛ́i.

⁴ Maa tãi tí ƃé Ize-ŋai dí kɛ̀ dílônii-sinaai maa-ŋuŋ-ŋai saa loôi la nyii-ŋai Yâwɛɛ è dípàai. Bere sii ŋí ƃé Yâwɛɛ è díɣâla-ŋai maa-mɛni ŋá tee la.

⁵ Eezuɛ-ŋai dí kùla Laŋse dí díƃûui pú Sukɔ.

⁶ Nya ƃe dí kùla Sukɔ dí díƃûui pú Itaŋ nyii gáa vɛ̃ɛ-kpâlaŋ kóyaŋ mai.

⁷ Nya ƃe dí kùla Itaŋ dí lí pôlu Pi-ɣaɣilo, nyii gáa Bêe-zefɔŋ vóloi kulai-perei, dí díƃûui pú Midɔ ŋɛ́i-tuɛ.

⁸ Dí kùla Pi-ɣaɣilo dí tɛ́ɛ yúo sámai dí lí vɛ̃ɛ-kpâlaŋ su. Dí fólo saaƃa sia kɛ̀ Itaŋ fɛ̃ɛ-kpalaŋ su dí díƃûui pú M̀âla.

⁹ Nya ƃe dí kùla M̀âra dí pá Iliŋ ƃɛ́i ya-tôŋ-ma puu káo feerɛ da tóu nɛ̃ɛ wuru buu lɔ́ɔlu mɛi feerɛ dí kɛ̀ naai, dí díƃûui pú naa.

¹⁰ Dí kùla Iliŋ dí díƃûui pú Ǹyúo Kpɔ̂lui kɔlɛ.

¹¹ Dí kùla Ǹyúo Kpɔ̂lui kɔlɛ dí díƃûui pú Siŋ fɛ̃ɛ-kpalaŋ su.

¹² Nya ƃe dí kùla Siŋ fɛ̃ɛ-kpalaŋ su dí díƃûui pú Dofa.

¹³ Nya ƃe dí kùla Dofa dí díƃûui pú Alu.

¹⁴ Dí kùla Alu dí díƃûui pú Lɛfidiŋ ƃɛ́i yá fé kɛ́ ní naa a gɛɛ dí díkpele lai.

¹⁵ Nya ƃe dí kùla Lɛfidiŋ dí díƃûui pú Sana Fɛ̃ɛ-kpalaŋ su.

¹⁶ Dí kùla Sana Fɛ̃ɛ-kpalaŋ su dí díƃûui pú Kibolo Atava.

¹⁷ Nya ƃe dí kùla Kibolo Atava dí díƃûui pú Azɛrɔ.

¹⁸ Nya ƃe dí kùla Azɛrɔ dí díƃûui pú Litima.

¹⁹ Dí kùla Lima dí díƃûui pú Limɔŋ Pɛrɛzi.

²⁰ Nya ƃe dí kùla Limɔŋ Pɛrɛzi dí díƃûui pú Lebina.

²¹ Dí kùla Lebina dí díƃûui pú Lisa.

²² Dí kùla Lisa dí díƃûui pú Keelata.

²³ Dí kùla Keelata dí díƃûui pú Sifɛ yeei ma.

²⁴ Nya ƃe dí kùla Sifɛ yeei ma dí díƃûui pú Arada.

²⁵ Nya ƃe dí kùla Arada dí díƃûui pú Makelɔ.

²⁶ Nya ƃe dí kùla Makelɔ dí díƃûui pú Taya.

²⁷ Dí kùla Tâɣa dí díƃûui pú Tela.

²⁸ Dí kùla Tela dí díƃûui pú Mika.

²⁹ Nya ƃe dí kùla Mika dí díƃûui pú Asimona.

³⁰ Dí kùla Asimona dí díƃûui pú Moselo.

³¹ Dí kùla Moselo dí díƃûui pú Bene-zaakaŋ.

³² Dí kùla Bene-zaakaŋ dí díƃûui pú Ɔ̂ɔ-agigaa.

³³ Nya ƃe dí kùla Ɔ̂ɔ-agigaa dí díƃûui pú Zobata.

³⁴ Nya ƃe dí kùla Zobata dí díƃûui pú Abona.

³⁵ Dí kùla Abona dí díƃûui pú Iziɔŋ-gibɛ.

³⁶ Dí kùla Iziɔŋ-giƃa dí díƃûui pú Ziŋ fɛ̃ɛ-kpalaŋ su (nyii da dòli máŋ a Kedɛ).

³⁷ Nya ƃe dí kùla Kedɛ dí díƃûui pú Ɔ̂ɔ yeei ma, Idɔŋ lɔii kɔ́yaŋ ma.

³⁸ Nya ƃe Eelɔŋ è tɛ̀ Ɔ̂ɔ yeei su yɛ̂ɛ berei Yâwɛɛ è mò la mai é sáa naa a góraŋ buu náaŋ ŋɔɣáloŋ ǹɔ́ɔlu ŋɔfólo maa-ŋuŋ ɣele Eezuɛ-ŋai kuláa Ize lɔii su pôlu ma.

³⁹ Eelɔŋ è kɛ̀ a kóraŋ ŋuŋ tɔnɔ pôlu buu feerɛ káo saaƃa (123) tãi è saa la Ɔ̂ɔ yeei mai.

⁴⁰ Nya ƃe Keena kaloŋ Aradi nyii bɔtaai è kɛ̀ Keena lɔii kwára-perei, è mɛ̀ni a gɛɛ Eezuɛ-ŋai dí kɛ̀ pâi.

⁴¹ Nya ƃe Eezuɛ-ŋai dí ŋɔ́nɔ kùla Ɔ̂ɔ yeei ma dí díƃûui pú Zamona.

⁴² Dí kùla Zamona dí díƃûui pú Punɔŋ.

⁴³ Nya ƃe dí kùla Punɔŋ dí díƃûui pú Obo.

⁴⁴ Dí kùla Obo dí díƃûui pú Abariŋ, Môa lɔii su.

⁴⁵ Nya ƃe dí kùla Abariŋ dí díƃûui pú Dibɔŋ Gâa.

⁴⁶ Dí kùla Dibɔŋ Gâa dí díƃûui pú Dibilataiŋ.

⁴⁷ Nya ƃe dí kùla Amoŋ-dibilataiŋ dí díƃûui pú Abariŋ Yeei ma Nibo ŋɛ́i-tuɛ.

⁴⁸ Nya ƃe dí kùla Abariŋ Yeei ma dí díƃûui pú Môa fɛ̃ɛ-kpalaŋ su Zɔdiŋ Ya-leei pôlu Zɛleko téniŋ ma.

⁴⁹ Dí díƃûui pù Zɔdiŋ Ya-leei pôlu é síɣe Bɛɛ-zɛsimɔ é lí Akasia tiŋ-tiŋ su.

Zɔdiŋ tiyeŋ-pere maa kili-ŋa ponoi

⁵⁰ Nya ƃe Yâwɛɛ è lòno Mose pɔ́ Môa fɛ̃ɛ-kpalaŋ su Zɔdiŋ Ya-leei pôlu Zɛleko kɔlɛ ma ǹyɛɛi,

⁵¹ “Mó Eezuɛ-ŋai dîa, tãi ka Zɔdiŋ Ya-leei tiyeŋ la ká píli Keena lɔii sui,

⁵² fɛ̂ɛ ká ǹɔii-ƃelai kélee kpɛ́ kátuɛ, ká díkɔni siɣɛɛ-ŋai kélee su kara da díɣâla pɔkɔɔŋ-ŋai é pɛ́lɛ díɣâla fɛli kwaa-ŋai kélee ma.

⁵³ Ka ǹɔii síɣe ká sée ma. Kpɛni fêi, ŋa dɛ̀ɛ kápɔ a kápɔɔ.

⁵⁴ Ka ǹɔii ŋa kɔ́lɛ a kpɛyɛŋ toɔɔ yɛ̂ɛ berei kásuu-ŋai láa káa la tɛi-tɛi. Ǹûai nyii-ŋai dísuu kɛ̂tɛi, ka lɔii kɛ́tɛ tɛ́ɛ dípɔ. Ǹûai nyii-ŋai dísuu fé kɛ́tɛ ní, ka lɔii kpua-loŋ tɛɛ dípɔ. Berei gbɛyɛŋ a pâi toôi lai bere nɔ́ ƃé ǹúui a pâi ŋɔ̀i sɔlɔ ƃôi la.

⁵⁵ Kɛ́lɛ kà wàla ǹɔii-ƃelai kpɛ́, diai da lɛ̂ɛ naai da pâi kɛ̂i yɛ̂ɛ wúru-kalaŋ káŋɛi kpaa máŋ yɛ̂ɛ ŋalêŋ kápɛ̂rɛ ma, ǹyaŋ da pâi kɔ̂i kápɔ.

⁵⁶ Kà wàla díkpɛ, ŋa pâi kásu karai, yɛ̂ɛ berei ŋá gbɛ̀tɛ la ŋ́gili ŋá a gɛɛ ŋá dísu karai.”