Lûu 22 - Ŋ̀âla Kɔlɔ Maa Waai

Berei dí Zîsɛ kìri lai

¹ Dɛ́-sɛŋ fé zu kpoloi maa-kuui, nyii da dòli a Dɛɛ-mɛi Kûui, è kɛ̀ nâa lɛɣɛ̂i.

² Nya ƃe zâla láa soŋ-ƃela kpaya-kpayai da gɔlɔ-pɔ̃yɛ-ƃelai dí kɛ̀ pere kɔ́rîi a gɛɛ dí bàa. Kɛ́lɛ, dí kɛ̀ yáôi ǹûai dîa.

Zudasi Sekaria è fàa a gɛɛ é kúla Zîsɛ pôlu

³ È kɛ̀ tí, Sêtɔŋ è lɔ̀ Zudasi Sekaria kponôi, nyii kɛ̀ a núu puu kao feerɛi dɔnɔi;

⁴ e lì e ŋuŋ pílaŋ a zâla láa soŋ-ƃela kpaya-kpayai da kɔkuluƃa-mɛi-ƃelai berei a pâi kulâi la bôlu e dɛɛ dípɔi.

⁵ Dílii e kɛ̀ a nɛ̃ɛ, dí díkono tee a gɛɛ dí sɛŋ-kao tɛɛ bɔ.

⁶ Nya ƃe e fàa ma, gɛ pɛlɛ pere kɔriɛ ma a gɛɛ, gbɔŋ à wàla kɛ́ naa, é kúla bôlu e dɛɛ dípɔ.

Dɛɛ-mɛi Kûui maa-mii-sɛŋ kpɛtɛɛi

⁷ Dɛ́-sɛŋ fé zu kpoloi maa-kûu ɣelei è nâa sèri, ǹyaŋ fɛ̂ɛ dí sâla kula a dɛɛ-mɛi kûui maa ƃála-loŋ.

⁸ Zîsɛ e Pitɛ da Zɔ̂ŋ tɛ̀ɛ, ǹyɛɛi, “Ka lí, ka dɛɛ-mɛi-kuui ŋɔmii-sɛŋ kpɛtɛ kúmɛni ma a gɛɛ ku m̀ii.”

⁹ Dí mò ma, dîyɛɛi, “Mí ƃe kwa pâi nâa kpɛtɛ̂i?”

¹⁰ E mò dîa, ǹyɛɛi, “Ka gáa ka gbaa kpɔ́ nɔ seri daai su, nalôŋ tɔnɔ a pâi kulâi kâa, gɛ li a ya-pɔrɔ-leɣi; ka lɛɛ bôlu ka lɔ bɛ́rɛi mu a liî lɔ̂i mui,

¹¹ ka mó bɛ́rɛ-namui ma kâa, ‘Kaamɔ̂ɔ ǹyɛɛ, Ŋɔ̃yâ-loŋpoi kɔɔ, ƃɛi kwa ŋápôlu-ƃelai kwa pâi dɛɛ-mɛi-kuu mii-sɛŋ miî naai?’

¹² À kɛ̀ ti, a pâi loŋpo kɛ́tɛ lɛ̂i kâa ŋɔpɛ́rɛi ɣelei-pere, zãâi kélee káa naa; ka naa kpɛtɛ.”

¹³ Nya ƃe dí lì, dí kula ma yɛ̂ɛ berei e mò lai; dí dɛɛ-mɛi-kuui kpɛ̀tɛ naa.

Ǹúu-namui Ŋɔmii-sɛŋ Maa-waai

¹⁴ Nya ƃe tãi aƃai è sèri lai, è sèe teƃelei ma da ŋɔpôlu-ƃelai.

¹⁵ È mò dîa, ǹyɛɛi, “Ŋá kɛ̀ ŋ̀wɛ̂lii a ŋánaa a gɛɛ kwa kâa-ni ku dɛɛ-mɛi-kuui ŋɔmii-sɛŋ ŋi mii ŋa lɛɛ pâi mɔ̃lɛ̂i;

¹⁶ kpɛ́ni fêi, ŋá m̀ó kâa, ḿve pâi wɔ́lɔ ŋɔ́nɔ m̀iî e lɛɛ zu ŋa-see é kɛ́ Ɣâla ŋɔkâloŋ-laai su.”

¹⁷ Nya ƃe e kpele-kɔ̂ɛɛ sìɣe, e sɛɣɛi-fei tɛɛ, ǹyɛɛ, “Ka nyiŋi sìɣe, ka ŋ̀á kɔlɛ kákîe-ni loai;

¹⁸ kpɛ́ni fêi, ŋá m̀ó kâa, é kúla tãi ŋi ma fé pâi gbɔmɔ-ƃa-yai da kpelêi e lɛɛ zu Ɣâla ŋɔkâloŋ-laai e pa.”

¹⁹ Nya ƃe e kpólo sìɣe, tãi e sɛɣɛi-fei tɛ̀ɛ lai e zu ɣale, e dɛɛ dípɔ, ǹyɛɛi, “Ŋ́gbonôi ká ŋi [nyii a tɛɛ kámɛni mai. Ka nyiŋi kɛ́ ŋ́gili e lɛɛ káŋa.”

²⁰ Nya ƃe maa-pere tɔnɔi ti su dí kpɛɛ dílaa miî, e kpele-kɔ̂ɛɛ siɣe, ǹyɛɛi, “Gbele-kɔɛi ŋi káa a Gbanaŋ-woo Kɛɛ Ninai ŋ́ãai su nyii a pú ká mɛni ma.]

²¹ Kɛ́lɛ, ka gáa, ǹúui pâi bôlu tɔɔ̂i ḿâi, kwa ǹyaa kúyee káa teƃelei ma.

²² Kpɛ́ni fêi, núu-kpune Ǹóŋ a liî yɛ̂ɛ berei Ɣâla e gbɛ̀tɛ la gíli ŋái. Kɛ́lɛ, kpalo ƃélaâi ǹúui ti ma nyii kùla bôlui!”

²³ Nya ƃe dí pɛ̀lɛ díkîe-ni marê kɛ́ɛ ma a gɛɛ diai ti nênɛ ƃe pâi mɛnii ŋi kɛ̂i.

Zîa-tooi bîlaŋɔɔi ǹúu-kɛ́tɛ-laai mai

²⁴ Sîa è tòo díkîe-ni loai é pîlaŋ ǹúui ma pâi kɛ̂i a núu kɛ́tɛ dísamai.

²⁵ Kɛ́lɛ, e mò dîa, ǹyɛɛi, “Zɛ̃tai kaloŋ-ŋai díkaa a dímɛi-ƃela. Kɛ́lɛ, diai wála-wâla-laa sui da díkpîŋ dílaa tòli a mɛni lɛ́lɛɛ kɛ́-ƃela.

²⁶ Ve ti a káa; kɛ́lɛ, ka ǹɛɛ naa ǹúui gɛ́tɛ̂i kásamâi é kɛ́ yɛ̂ɛ surɔŋ-loo, naa-tuɛ-nuui é kɛ́ yɛ̂ɛ mii-sɛŋ láa-lɛ-nuu.

²⁷ À kɛ̀ tí, gbɛ̂ɛ ƃa ǹúui gɛ́tɛi, ǹúui a sêe teƃelei mai, kpaa mii-sɛŋ láa-lɛ-nuui? Ǹyaa ƃa ǹúui a sêe teƃelei mai, vé tí? Kɛ́lɛ, ŋ́gaa kásama yɛ̂ɛ mii-sɛŋ láa-lɛ́-nuu.

²⁸ “Káa ƃa ǹûai kɛ̀ ḿbôlu ŋásu-kɔɔŋ-ŋai sui.

²⁹ Yɛ̂ɛ berei Ńâŋ è góno tèe la ńyêei a gâloŋ-laai, bere nɔ́ ƃe ŋa ŋ́gono tèe la káyêei.

³⁰ A gɛɛ ka kálaa miî, ka kápele ŋáteƃelei ma ŋákâloŋ-laai su. Ká see kâloŋ-see-sɛŋ-ŋa ŋá. Ká Eezuɛ-sii puu kao feerɛ-ŋai dímɛni ŋá tee.

Zîsɛ è Pitɛ ŋɔlaa-sia-tooi maa-mɛni ƃò ǹaa-túɛ

³¹ “Samaŋ, Samaŋ, gáa, Sêtɔŋ a mare-kɛɛ kɛ́ a gɛɛ e kásoŋ, a gɛɛ e káfɛɛ yɛ̂ɛ mɔlɔŋ,

³² kɛ́lɛ, ŋa Ɣâla fɛli ímɛni ma a gɛɛ ílaa-lai fé fɛɣɛ; tãi ya pène la pôlu ŋɔnɔi, ye ínûai kɛ́ díkponôi é kpanaŋ.”

³³ Nya ƃe e mò ma, ǹyɛɛi, “Kúnuu-namui ŋ́gbɛtɛɛ̂i a gɛɛ kwa yá ku li kpini-pɛrɛ mu da saa su.”

³⁴ E mo, ǹyɛɛi, “Ŋa m̀ó yâ, Pitɛ, dɛ́ɛ-sîrɛi fé pâi ŋ̀óo pilîi sâai ŋi su e lɛɛ zu í ḿaa-sia too saaƃa a gɛɛ ífe ŋ́gɔlɔŋ.”

Bɛ̂bɛ, kolâ, da ƃóa-sɔ̂kpɔ

³⁵ Nya ƃe e mò dîa, ǹyɛɛi, “Tãi ŋá kátɛ̀ɛ la, bɛ̂bɛ, da kolâ, bɛlɛɛ kpaŋ-kpali ma dífe kɛ́ ni káyêei, sɛŋ da kôlo e tòo kâa?” Dí mò ma, “Kpaa, ve kɛ́ ni ti.”

³⁶ È mò dîa, ǹyɛɛi, “Kɛ́lɛ, tãi ŋi su ǹúui bɛ̂bɛ káa ǹyêei, tɔɔ é lí la, kpaa máŋ kolâ. Tɔɔ ǹúui ƃóa-sɔkpɔ fé ǹyêei e ŋɔyokpoi kɔlɛ e dɔnɔ ya.

³⁷ Kpɛ́ni fêi, ŋá mó kâa, fɛ̂ɛ Ŋ̀âla-wooi ŋi ŋa-see e kɛ́ ŋ́gbonôi, ǹyɛɛi, ‘E kɛ̀ a nonoɔ bɛlɛɛ dɔ̂ŋ-kara-ƃelai dîa’; kpɛ́ni fêi, nyii bɔ̃yɛɛ̂i e pîlaŋ ḿâi, ŋa-see-kɛi káa ma.”

³⁸ Nya ƃe dí mò, dîyɛɛi, “Kúnuu-namui, gáa. Ƃoa-sɔkpɔ feerɛ káa ƃɛ.” E mò dîa, ǹyɛɛi, “É lɛ́ɛ nâa ti.”

Zîsɛ è Ɣâla fɛ̀li Ŋulɔ-wuru Yeei ma

³⁹ Nya ƃe è kùla é lí yɛ̂ɛ berei e káa gɛ la Ŋulɔ-wuru Yeei mai. Ŋɔpôlu-ƃelai dí pîlaŋ bôlu.

⁴⁰ Tãi e sèri la gwaai mai, e mò dîa, ǹyɛɛi, “Ka Ɣâla fɛli a gɛɛ káfe too su-kɔɔŋ su.”

⁴¹ Nya ƃe e kùla dísama, e li yɛ̂ɛ yêei-kɔni-pilii tɔnɔ. Nya ƃe e pîlaŋ gbelêŋ ŋá gɛ Ɣâla fɛli,

⁴² ǹyɛɛi, “Ńâŋ, à kɛ̀ ífaâi ma, gbele-kɔɛi ŋi kúla ńyêei; é máŋ kɛ́ tí, ńîa-mɛni fei, kɛ́lɛ, ínîa-mɛni é kɛ́.” [

⁴³ Nya ƃe kéla tɔnɔ è kùla Ɣâla-taa é pá bɔ̂ a gɛɛ é gbonôi kpanaŋ.

⁴⁴ Nya ƃe è kɛ̀ mɔ̃lɛ̂i a ŋ̀ánaa, è Ɣâla fɛ̀li kpɔ́ nâa a gbanaŋɔɔ. Vɔ́nɔi kɛ̀ kulâi m̀ai è kɛ̀ yɛ̂ɛ ŋãa gɛ pîlaŋ tɛi-tɛi ǹɔii ma.]

⁴⁵ Tãi è mu sìɣe la é kúla Ɣâla fɛlîi é pá ŋɔpôlu-ƃelai pɔ́ naai, è díkaa díkɛ nyii malôŋ su.

⁴⁶ Nya ƃe è mò dîa, ǹyɛɛi, “Lé ƃe ka nyiî? Ka kámu siɣe, ka Ɣâla fɛli a gɛɛ káfe too su-kɔɔŋ su.”

Zîsɛ kɔlɛ-pere da zoŋ-pere

⁴⁷ Tãi è kɛ̀ niî lônoi lai, kpɔŋ kɛ́tɛ è pà bɔ. Nya ƃe ŋɔpôlu-ƃela puu kao feerɛi dɔnɔ, ǹáa ƃe kɛ̀ a Zudasi, è kɛ̀ dítuɛ gɛ pa a dia. È lɛ̀ɣɛ a Zîsɛ a gɛɛ é ǹá-gbɔ see ma;

⁴⁸ kɛ́lɛ, Zîsɛ è mò ma, ǹyɛɛi, “Zudasi, yá ƃe kulâi núu-kpune Ǹóŋ pôlu a íla-gbɔ-seɛɛ mai?”

⁴⁹ Diai kɛ̀ tɔɔ̂ni gɔlɛi díkɛɛ mɛnii kâai nyii kɛ̀ pâi kɛ̂i, dí mò, dîyɛɛi, “Kúnuu-namui, ǹɛ́lɛɛ̂i a gɛɛ kúkɔ a m̀óa-sɔkpɔ-ŋai?”

⁵⁰ Nya ƃe dítɔnɔ è ŋɔƃóa-sɔkpɔ̂i pîli zâla láa soŋ-nuu kɛ́tɛi yée-mu-nuui ma, é ǹáa-mii-yee mɛi-wolii tée.

⁵¹ Zîsɛ è zu tòo, ǹyɛɛi, “É lɛ́ɛ tí!” Nya ƃe è ǹyée pɛ̀lɛ ŋ̀óli ma, é m̀alo.

⁵² Gɛɛ tíi, Zîsɛ è mò zâla láa soŋ-ƃela kpaya-kpayai, da Ŋ̀âla-pɛrɛ Kɛ́tɛi ŋɔkɔkuluƃa-ŋai, da ǹúu-pɔlɔ-ŋai dîa nyii-ŋai pà kɛ̀ a gɛɛ dí wolo mai, ǹyɛɛ, “Ka pá a gɛɛ ka wólo mâ a ƃóa-sɔkpɔ-ŋa da wúru gbua-ŋa yɛ̂ɛ ŋuma-nuu?

⁵³ Ɣele-ƃɔ́ɔ kélee kwa kâa-ni ku kɛ̀ Ŋ̀âla-pɛrɛ Kɛ́tɛi mu, káfe káyee pɛlɛ ní mâ. Kɛ́lɛ, ka tãi ká ŋí da gbínii ŋɔwala-walai.”

Pitɛ è Zîsɛ maa sîa tòo

⁵⁴ Nya ƃe dí wòlo ma, dí li la zâla láa soŋ-nuu kɛ́tɛi ŋɔpɛ́rɛi lá. Kɛ́lɛ, Pitɛ e pìlaŋ bôlu zu kúlaa ma;

⁵⁵ tãi dí ŋɔŋ tôo la galai samai, dí sèe naa gîe ma, Pitɛ e pà e see naa dísama.

⁵⁶ Yée-mu nɛni tɔnɔ è gàa seêni ŋɔŋ-leŋ ma, è ŋ̀ɛ́i pìlaŋ kpɔ́ ma a gbanaŋɔɔ, ǹyɛɛi, “Nalôŋ ŋí máŋ è kɛ̀ bôlu.”

⁵⁷ Kɛ́lɛ, è zia ma, ǹyɛɛi, “Nɛnîi, fé gɔlɔŋ.”

⁵⁸ Nàa loŋ kɛ́ɛ tíi, núu da kpɛ́ni è gàa, ǹyɛɛ, “Íkaa máŋ a dítɔnɔ da.” Kɛ́lɛ, Pitɛ è mò, ǹyɛɛi, “Nalôŋ, ńyãa fei.”

⁵⁹ Aƃa tɔnɔ tɛɛ, núu da kpɛ́ni è lòno a gbanaŋɔɔ, ǹyɛɛi, “Tɔ̃yâ ma, nalôŋ ŋí máŋ è kɛ̀ bôlu. Kpɛ́ni fêi, gáa a Galalii-nuu.”

⁶⁰ Kɛ́lɛ, Pitɛ è mò, ǹyɛɛi, “Nalôŋ, ḿve m̀ɛnii kɔlɔŋ ya m̀ôi mai.” A nàa maa felaa, gɛɛ kɛ̀ lônoi, dɛ́ɛ-sîrɛi è ŋ̀óo píli.

⁶¹ Nya ƃe Kúnuu-namui è tìnaŋ ŋ̀ɛ́i é pîlaŋ Pitɛ ma. M̀ɛnii Kúnuu-namui è mòi, è nàa tòo Pitɛ kíli ŋá, yɛ̂ɛ berei è mò la ma, ǹyɛɛi, “Dɛ́ɛ-sirɛi é lɛ́ɛ pâi ŋ̀óo pilîi sâa, ya pâi ḿaa-sia too la kɛ̂i gîe saaƃa.”

⁶² Nya ƃe Pitɛ è kùla ŋini ŋá é wɔ́lɔ kpɔ́ a ŋ̀ánaa.

Dí ɣɛ́lɛ Zîsɛ ma, díkɛ ǹokwa

⁶³ Zinâai kɛ̀ Zîsɛ mɛi kâai, dí ɣɛ́lɛ-maa kùla gbonôi, dí ńokwa.

⁶⁴ Dí ŋ̀ɛ́i ɣìri, dí m̀arê kɛ̀, dîyɛɛi, “M̀ó kûa! Gbɛ̂ɛ ƃe tí ílokwâi?”

⁶⁵ Nya ƃe dí ǹáa kàra, dí wóo nyɔ́mɔɔ támaa ƃó é pîlaŋ ma.

Zîsɛ káa gɔyâŋ-su-ƃelai ŋɛ́i túɛ

⁶⁶ Tãi ɣele-ƃɔɔ̂i è sèri lai, ǹúu-pɔlɔ-ŋai kélee bɛlɛɛ zâla láa soŋ-ƃela kpaya-kpayai da gɔlɔ-pɔ̃yɛ-ƃelai dîa, dí díŋa tɛ gîe ma, dí pá la gɔyâŋ-su-ƃelai ŋ́ɛi tuɛ, dîyɛɛi,

⁶⁷ “À kɛ̀ yá ƃa Kôraii, m̀ó kûa.” Kɛ́lɛ, è mò dîa, ǹyɛɛi, “Ŋa máŋ m̀ó kâa, káfe pâi lâai la.

⁶⁸ À kɛ̀ ŋà kámarê kɛ̀, káfe pâi zu toôi.

⁶⁹ Kɛ́lɛ, é kúla tãi ŋi ma, núu-kpune Ǹóŋ a pâi kɛ̂i seêni Ɣâla ŋɔwala-walai láa-mii-yee mɛi-pere.”

⁷⁰ Nya ƃe díkelee dí mò, dîyɛɛi, “Gɛ̀ ní, íkaa a Ɣâla Ǹóŋ?” È mò dîa, ǹyɛɛi, “Ka môi a gɛɛ ŋ́gaa la.”

⁷¹ Dí mò, dîyɛɛi, “Kwa sêre-ŋa wɛli kɛ̂i ŋɔnɔ lé mɛni ma? Kúa kpîŋ kwâa m̀ɛni a kùla gbɔɔ̂i lá.”