Lûu 21 - Ŋ̀âla Kɔlɔ Maa Waai

Bɔɔ-nɛ̂nii ŋɔsama-sɛŋ

¹ Zîsɛ e ŋɛi mu sìɣe e dɔɔ-ƃelai kaa, díkɛ dísama-sãai too zɛŋ-kao laai-kɛ-kwaai ma;

² nya ƃe e pɔɔ-nɛni kôloɔ tɔnɔ kàa nyii e sɛŋ-kao kpua-kpua feerɛ too zu.

³ Nya ƃe e mò, ǹyɛɛi, “Tɔ̃yâ ma, ŋá m̀ó kâa, bɔɔ-nɛni kôloɔi ŋi e dámaa tòo zu é tɛ́ɛ díkelee dîa;

⁴ kpɛ́ni fêi, díkelee dí dòo zu yɛ̂ɛ berei gɛ́tɛ̂i la díyêei, kɛ́lɛ, ŋɔkôlo-laai su a zɛŋ-kaoi kélee tɛ́ɛ kɛ̀ ǹyêei.”

Zîsɛ è Ŋ̀âla-pɛrɛ Kɛ́tɛi kara-mɛni ƃò ǹaa tuɛ

⁵ Tãi da-ni dí lòno la e pîlaŋ Ŋ̀âla-pɛrɛ Kɛ́tɛi ma berei dí dɔ̀ɔ la a ǹɛ́lɛɛ a kɔni lɛ́lɛ-lɛ́lɛɛ-ŋa da zama-sɛŋ-ŋai, e mò, ǹyɛɛi,

⁶ “É máŋ kɛ́ ti, zãâi ŋi ka díkaâi, ɣele-ŋa da a pâi pâi tãi kɔni tɔnɔ kpîŋ fé pâi lɛɛ̂i ƃɛ gîe mɛi. Da pâi díkelee toôi ǹɔii ma.”

Mɛni kpɔ̂lu da kpɔara káa pâi

⁷ Nya ƃe dí m̀arê kɛ̀, dîyɛɛi, “Kaamɔ̂ɔ, tãi nênɛ ƃe nyiŋi a pâi kɛ̂i lai? Lé ŋɛi-kɛ-maa ƃe pâi kɛ̂i tãi mɛni-ŋai ŋi da pâi kɛ̂i lai?”

⁸ E mò dîa, ǹyɛɛi, “Ka kámɛi káa a gɛɛ núu da fé kápɛlɛ. Kpɛ́ni fêi, núu támaa da pâi pâi ńaai su, dí kɛ́ mò dîyɛɛ, ‘Ńyãa ƃa ǹyaa!’ díkɛ mò ŋɔ́nɔ dîyɛɛ, ‘Tãi a seri!’ Káfe pìlaŋ dípôlu.

⁹ Tãi kà kɔ-kɔ-tuŋ mɛ̀ni la da mɛni kpɔ̂lui, káfe yào; fɛ̂ɛ mɛni-ŋai ŋi a pa fulɔi, kɛ́lɛ, gbɛɛ ŋá fé pâi pâi a naa maa felaa.”

Ŋ̀ɛi-kɛ-maa-ŋai pâi kɛ̂i ŋ̀éniɛi kɛ́ tela kpɛɛi

¹⁰ Nya ƃe e mò dîa, ǹyɛɛi, “Lɔii a pâi tɔɔ̂i lɔii ma, kâloŋ-laa kɛ́ tɔɔ kâloŋ-laa ma;

¹¹ lɔii-kpɛ̃liŋɔɔ kɛ́tɛ da puru kpaya-kpaya, bɛlɛɛ núu-paa kɔlɔ-fela-ŋa dîa da pâi kɛ̂i kwaa támaa ma; mɛni maa-pɔlɔ-pɔlɔ-ŋa da ŋɛi-kɛ-maa-ŋa da pâi kulâi Ɣâla-taa.

¹² Kɛ́lɛ, nyíŋi kélee é lɛ́ɛ pâi kɛ̂i, da pâi díyee pɛlɛ̂i kâa, dí káŋɛi maa nɔ̃́ɔ. Da pâi kátɛɛ̂i Ŋ̀âla-fɛli-kêre-ŋai mu da gbini-pɛrɛ-ŋai mu. Da pâi pâi a káa kâloŋ-ŋa da gɔmɛnɛ-ƃelai ŋɛ́i túɛ ńaai mɛni ma.

¹³ Nyíŋi ƃe pâi kɛ̂i a káwɔ̂ tãi a gɛɛ ka sêre-faa kɛ́.

¹⁴ Ka gbɛtɛ kálii su a gɛɛ káfe kákili ŋá sìa tuɛ-pere berei ka pâi zu toôi lai,

¹⁵ kpɛ́ni fêi, ŋa pâi lá-gbɔ da táre tɛɛ̂i kápɔ nyii kákpɔara-ƃelai kélee dífe pâi pɔrîi dítɔɔ kámɛni ma, kpaa máŋ dí kála sîa too.

¹⁶ Kánâŋ-ni máŋ da kálee-ni, kálee-kaa-surɔŋ, kánûa, da káƃarâai da pâi kátɛɛ̂i. Da pâi káta-ni ŋa paai.

¹⁷ A kɛ̀ ti, ǹûai kélee da pâi kákpɔarâi ńaai mɛni ma.

¹⁸ Kɛ́lɛ, káŋuŋ-leɣai gáa káŋuai dɔnɔ kpîŋ ŋuŋ-la fé pâi pilîi.

¹⁹ Kálii-kpele-pere ƃe ka pâi káfulu-laai sɔlɔ ƃôi la.

Zîsɛ è Zerusâlɛŋ su-kara mɛ̂ni ƃò

²⁰ “Kɛ́lɛ, tãi kà Zerusâlɛŋ kàa la maa tinaŋɔɔ a ǹɔii maa kpɛ́-ƃelai, gɛ̀ ní, ka gɔ́lɔŋ a gɛɛ ŋɔsu-karai a lɛɣɛ.

²¹ Gɛ̀ ní, diai díkaa Zuda, tɔɔ dí pu dí li ǹyée-ŋai su. Tɔɔ diai daai sui dí kúla naa. Tɔɔ diai díkaa kpâlaŋ ŋái dífe li naa;

²² kpɛ́ni fêi, nyii-ŋai ŋi káa a mɛni-pɔɔi-kula ɣele-ŋa a gɛɛ mɛni-ŋai kélee bɔ̃yɛɛ̂i ŋa-see é kɛ́.

²³ Kpalo ƃélaâi dîa diai díkoo káa diai, da diai ŋíni tɛɛ̂i díkwâtara-ŋai pɔ a ŋele-ŋai ti! Kpɛ́ni fêi, mɛni-kpɔ̂lu kɛ́tɛ a pâi pâi ŋ̀éniɛi su da lii-ŋwana ǹûai ŋi dîa;

²⁴ da pâi lɛɛ̂i m̀óa-sɔkpɔ-ŋai yée mu, dí li a dia a kɔ-soŋ ŋa lɔii-ŋuŋ ŋa su. À kɛ̀ tí, Zɛ̃tai-ŋai da pâi Zerusâlɛŋ tánîi díkɔɔ mu é lɛ́ɛ zu Zɛ̃tai-ŋai dítãi ŋa-see é kɛ́.

Núu-kpune Ǹóŋ pá-pere

²⁵ “Ŋɛi-kɛ-maa-ŋa da pâi kɛ̂i voloi su, da ŋ̀áloŋ, da bɛmɛlɛŋ-kaoi ma. À kɛ̀ ti, yao kɛ́tɛ a pâi kɛ̂i zîi-ŋai sama dípɛlɛ é pú a yúo too tiŋ kpaya-kpayai, bɛlɛɛ nya-ɣiliŋ-ŋai dîa.

²⁶ Núu a pâi foâi a yao da maa-kpɛ̃liŋ é pîlaŋ mɛni-ŋai dîa pâi kɛ̂i ŋ̀éniɛi sui. Kpɛ́ni fêi, ŋwála-wala-laa ŋai ŋelei sui da pâi kɛ̂i túmôi.

²⁷ Gɛ̀ ní, da pâi núu-kpune Ǹóŋ kâai gɛ pa ɣele-kɔlɔŋ kole su a wala-wala-laa da folo-laa kɛ́tɛ.

²⁸ Kɛ́lɛ, mɛni-ŋai ŋí dí pɛlɛ kɛ́ɛ ma, ka káŋɛi tɛ́ ɣelei, ka káŋuŋ mu siɣe. Kpɛ́ni fêi, káŋuŋ ma ƃó tãi a lɛɣɛ.”

Zɛŋ-lɛ́ɛi é pîlaŋ fîi-wuruii tɛ́nîŋɔɔi ma

²⁹ Nya ƃe e sã́ŋ sɔ̀ɔ dîɛ: “Ka fîi-wuruii da ŋ̀úru-ŋai kélee káa.

³⁰ Tãi nɔ́ kà gàa dítɛniŋɔɔ̂i, káa kpîŋ ka gàa a gɛɛ fólo-laa-ƃoɔɔ tãi a lɛɣɛ.

³¹ Gɛ̀ ní máŋ, tãi kà mɛni-ŋai ŋi kàa kɛ̂i, ka gɔlɔŋ a gɛɛ Ɣâla ŋɔkâloŋ-laai a lɛɣɛ.

³² Tɔ̃yâ ma, ŋá m̀ó kâa, ŋ̀éniɛi ŋí su-ƃelai dífe pâi kpɛɛ̂i é lɛ́ɛ la zu gélee ŋa-see é kɛ́.

³³ Ŋelei da ǹɔii da pâi kpɛɛ̂i. Kɛ́lɛ, ŋ́ooi fé pâi wɔ́lɔ kpɛɛ̂i.

Ka kámɛi káa

³⁴ “Ka kámɛi káa a gɛɛ kálii fé kɛ̀ nɔ́ a wuyɛɛ a mii-sɛŋ miɛɛ da lɔɔ-kpeleɛ é pɛlɛ vúlu-laai ŋí ŋɔlii-sɛlɛŋ-ŋai dîa a gɛɛ maa-ɣelei tí fé lâa pá la kâa a maa félaa yɛ̂ɛ ƃáre a bɔara.

³⁵ Kpɛ́ni fêi, a pâi pâi ǹúui kélee ma díkaa ǹɔii gwaa kélee mai.

³⁶ Kɛ́lɛ, ka kámɛi káa a tãi kélee. Ka Ɣâla fɛli a gɛɛ kákponôi e kpanaŋ, ka kula mɛni-ŋai ŋi kélee su pâi, a gɛɛ ka tɔɔ núu-kpune Ǹóŋ ŋɛi.”

Zîsɛ è mɛni lɛ̂ Ŋ̀âla-pɛrɛ Kɛ́tɛi mu

³⁷ Nya ƃe ɣele kélee è kɛ̀ Ɣâla-woo lɛ̂i Ŋ̀âla-pɛrɛ Kɛ́tɛi mu. À kɛ̀ tí, kpíni kélee gɛ́ lì, gɛ́ nyìi ǹyéei ma da kɛ̂ ma Ŋulɔ-wuru Yeei.

³⁸ Nya ƃe ɣele-wâla nɛ̃ɛ-nɛ̃ɛ ǹûai kélee dí pà bɔ́ Ŋ̀âla-pɛrɛ Kɛ́tɛi mu a gɛɛ dí ŋ̀óo mɛni.