Lûfi 4 - Ŋ̀âla Kɔlɔ Maa Waai

Boa è Lûfi kùla a nɛnî

¹ Boa è lì góraŋ la é sée naa. Ilimɛlɛ ŋɔkáayɔɔi, nyíi Boa è maa mɛni ƃôi, è pà naa. Nya ƃe Boa è mò mà ǹyɛɛi, “Ŋ̀wɛ̂lii, pá í ímaa yéŋ.” Nya ƃe è lì é sée.

² Boa è daa-ƃela kpaya-kpayai buu tòli a gɛ́ɛ dia máŋ dí pá dí m̀ɛnii ḿɛni a pâi m̀ôi. Dí pà dí sée naa.

³ Nya ƃe è mò Ilimɛlɛ ŋɔkáayɔɔi ma è dòlii ǹyɛɛ m̀ai, “Naomi nyíi kùla Môa lɔii su é pá pôlui, gáa ǹɔii kpuai kɔlɛ̂i nyíi gáa a kúkaayɔɔi Ilimɛlɛ pɔ́ɔi.

⁴ Mɛni ma, ŋá gbɛ̀tɛ ŋ́gili ŋá a gɛ́ɛ ŋá m̀ó yâ a gɛ́ɛ í ǹyá dîai ŋí seêni ƃɛ́ da ŋánûa pɔlɔ-ŋai ŋɛ́i à kɛ̀ ƃa pâi ǹyai, ǹya. Kɛ́lɛ à kɛ̀ ífe pâi ǹyai, m̀ó ḿâ a gɛ́ɛ ŋá gɔ́lɔŋ, kpɛni fêi, núu da kélee fé naa é kúla ípôlu ǹɔii ŋí yá mɛni ma fɛ̂ɛ nɔ́ ńyãa.” È mò ǹyɛɛ, “Ŋa pâi ǹyâi.”

⁵ Nya ƃe Boa è mò ǹyɛɛi, “À kɛ̀ ƃà yà Naomi yêei, gɛ̀ ní íkaa máŋ Môa nɛnii Lûfi yâi nyíi gáa a bɔɔ-nɛnii, a gɛ́ɛ zaa-nuui láa é lɛ́ɛ ǹɔii ma.”

⁶ Ǹalôŋ è mò ǹyɛɛ m̀ai, “À kɛ̀ a bere sîi ti, gɛ̀ ní fa pɔri ǹɔii yâi, kpɛni fêi, ŋá máŋ ǹyá, gɛ̀ ní ŋ́gaa ŋ́gbɔɔi nia-pɛlɛɛi filîi, kpɛ́ni fêi, dípɔɔ fé pâi kɛ̂i ma. M̀ɛni ma, fa pɔri ǹyâi. Ye ǹyá.”

⁷ Eezuɛ-ŋai tûa-perei wɔ́lɔ kɛ̀ lɔii yá mɛni ma da lɔii maa fáleŋ mɛnii, ƃé kɛ̀ a gɛ́ɛ ǹɔii kɔlɛ-nuui é ŋɔkpáŋ-kpalii kúla gɔ́ɔ ŋá é dɛɛ ǹɔii yá-nuui pɔ́. Bere sîi tí ƃé Eezuɛ-ŋai dí kâa dílɔii mɛni-ŋai kpɛ̀tɛ la.

⁸ Mɛni ma, tãi ǹalôŋ è mò la Boa ma a gɛ́ɛ é ǹɔii yái, é ŋɔkpâŋ-kpalii kùla gɔ́ɔ ŋá é dɛ̀ɛ Boa pɔ́.

⁹ Boa ǹyɛɛ ǹûai kélee kɛ̀ naai dîa, “Kákaa sâa a ŋásêre-ŋa a gɛ́ɛ zãai kélee kɛ̀ a Ilimɛlɛ da ǹônii-sinaai Kîliɔŋ da Malɔŋ pɔ́ɔi, ŋa ǹyá Naomi yêei.

¹⁰ Ŋa Môa nɛnii Lûfi yá máŋ nyíi gáa a Malɔŋ ŋɔpɔɔ-nɛnii, a gɛ́ɛ gɛ́ ƃò a ŋánɛnîi. Ŋá nyíŋi kɛ̀ a gɛ́ɛ zaa-nuui láa é lɛ́ɛ ŋɔpɔɔ-sɛŋ ma ŋɔnûai dífe nîa ǹáa ma. Kákaa a ŋásêre-ŋa sâa.”

¹¹ Nya ƃe diai kélee kɛ̀ góraŋ la da ǹúu pɔlɔ-ŋai dí mò dîyɛɛi, “Kúkaa a ísêre-ŋa. Ǹɛnîi pâi ípɛrɛi mui, tɔɔ Yâwɛɛ é gɛ́ yɛ̂ɛ Leesɛ da Liɛ nyíi-ŋai nîa-pɛlɛɛ támaa maa sɔlɔ ƃò Eezuɛ mi ŋɔpɛ́rɛi láa é fɛ́ɛi. Tɔɔ í Ƃûu ƃó Ɛfata kolii su ílaa é lɛ́ɛ Bɛpeleɣɛ̃ɛ.

¹² Ǹîa-pɛlɛɛi Yâwɛɛ a pâi gɛ̂i ka ǹɛnî-kpelai ŋí ka dímaa sɔlɔ ƃôi da pâi gɛ̂i ísuui maa mɛni kɛ́ ƃò yɛ̂ɛ Pɛrɛzi, nyii kɛ̀ a Tama da Zuda díloŋ-surɔŋ ŋɔsuui maa mɛni.”

Boa da ǹônii

¹³ Nya ƃe Boa è Lûfi siɣe a ŋɔnɛnî, lɔ́ la pɔ̂rɔŋ. Yâwɛɛ è lûwai làa ma é koo síɣe é lóŋ-surɔŋ maa sɔlɔ ƃó.

¹⁴ Ǹɛyâai dí mò Naomi ma dîyɛɛi, “Kwaa Yâwɛɛ sɛɣɛ̂i fé, kpɛni fêi, a ímɛi-kaa nuu tɛɛ. Tɔɔ ǹáa é sía Eezuɛ gwaa kélee.

¹⁵ A pâi íŋa nɛnɛ̂i é ípɔlɔ ŋá kɔ́ŋ, kpɛ́ni fêi, gáa a íloŋ-surɔŋ ŋɔnɛnîi. È íwɛlini, ǹyaŋ m̀aa mɛni kpanaŋɔɔ̂i yâ kpîŋ é tɛ́ɛ íkpɔɔi lonii-sinaa lɔ́ɔlu mɛi feerɛ dîa.”

¹⁶ Gɛ́ɛ tíi, Naomi è ǹôloŋ sìɣe é ǹáa gɔ́ɔ mɛi. Ǹyaa ƃé kɛ̀ ǹolôŋ ŋí m̀ɛi káa-nuu.

¹⁷ Naa kɔlɛ-ma nɛyãai dí ǹôloŋ láa sèe a Obɛɛ dîyɛɛi, “Naomi a lóŋ-surɔŋ maa sɔlɔ ƃó.” Obɛɛ è kɛ̀ a Zɛse nyíi kɛ̀ a Deeƃé ǹâŋ ŋɔnàŋ.

¹⁸ Pɛrɛzi ŋɔsuui pîlaŋ pere ká ŋí: Pɛrɛzi è kɛ̀ a Ɛzɔrɔŋ ǹâŋ,

¹⁹ Ɛzɔrɔŋ kɛ́ ƃò a Araŋ ǹâŋ. Araŋ è kɛ̀ a Aminɛda ǹâŋ,

²⁰ Aminɛda kɛ́ ƃò a Nâsuŋ ǹâŋ. Nasuŋ ǹóŋ ƃé kɛ́ ƃò a Samɔŋ ǹâŋ.

²¹ Samɔŋ kɛ̀ ƃò a Boa ǹâŋ, Boa kɛ́ ƃò a Obɛɛ ǹâŋ.

²² Obɛɛ ƃé kɛ̀ a Zɛse ǹâŋ, Zɛse kɛ́ ƃò a Deeƃé ǹâŋ.