Zɔ̂ŋ 18 - Ŋ̀âla Kɔlɔ Maa Waai

Tãi dí Zîsɛ kɔ̀lɛ la, da tãi dí zòŋ lai

¹ Tãi Zîsɛ è ŋ̀óo-ŋai ŋí ƃò lai, da ŋɔpôlu-ƃelai dí tɛ̀ɛ Kidɔŋ gboto-woloi su, ƃɛi kɛ̀ a sûa, nyii da ŋɔpôlu-ƃelai dí lì zu.

² Ǹyaŋ Zudasi nyii kùla bôlui è kɛ̀ máŋ a nàa kɔ́lɔŋɔɔ. Kpɛ́ni fêi, nàa ƃe Zîsɛ da ŋɔpôlu-ƃelai da kâa kɔ̀yaŋ naa.

³ Nya ƃe Zudasi è kɔkuluƃa-ŋa sìɣe, bɛlɛɛ kɔkuluƃa-ŋa da-ni dîa dí kùla zâla láa soŋ-ƃela kpaya-kpayai da Faresii-ŋai yée ŋá. Dí lì zûai su a laŋpo-ŋa da kpáleŋ-leŋ-ŋa, da kɔ́-kɔ-sãa.

⁴ Nya ƃe Zîsɛ è gɔ́lɔŋ nyii kélee pâi kɛ̂i lai, è pà dípɔ é m̀o dîa, ǹyɛɛi, “Gbɛ̂ɛ ƃe ka gɔ́rii?”

⁵ Dí mò ma, dîyɛɛi, “Nâzarɛ Zîsɛ.” Zîsɛ è mò dîa, ǹyɛɛi, “Ńyãa ƃa ǹyaa.” Zudasi nyii kùla bôlui, è kɛ̀ tɔɔ̂ni díkɔlɛ.

⁶ Tãi è mò la dîa, ǹyɛɛi, “Ńyãa ƃa ǹyaâi,” dí kùla pôlu dí tóo ǹɔii ma.

⁷ È ŋɔ́nɔ dímarê kɛ̀, “Gbɛ̂ɛ ƃe ka gɔ́rii?” Dí mò ma, dîyɛɛi, “Nâzarɛ Zîsɛ.”

⁸ Zîsɛ è zu tòo, ǹyɛɛi, “Ŋá mò kâa a gɛɛ ńyãa ƃa ǹyaa. A kɛ̀ ka ŋ́gɔrîi, gɛ̀ ní ka ǹûai ŋí lɛ́ɛ naa dí li.”

⁹ Nyiŋi ƃe ŋ̀óoi ŋa-see kɛ̀, nyii è mò, ǹyɛɛi, “Diai ya dítɛɛ ḿbɔi, fé dɔnɔ da laŋ ni.”

¹⁰ Ƃoa-sɔkpɔ è kɛ̀ Samaŋ Pitɛ nyêei, nya ƃe è gùla é bili zâla láa soŋ-nuu kɛ́tɛi yée-mu-nuui ma é ǹáa-mii-yee mɛi-wolii tée. Ǹyée-mu-nuui láa ƃe kɛ̀ a Makɔɔ.

¹¹ Zîsɛ è mò Pitɛ ma, ǹyɛɛi, “Íƃoai lɔ́ daâi. Ve a sɛŋ a gɛɛ ŋá ŋ́gbele gɔɛi su nyii Ńâŋ a dɛɛ ḿbɔi?”

Dí pà a Zîsɛ zâla láa soŋ-nuu kɛ́tɛi ŋɛi tuɛ

¹² Nya ƃe ǹɔii mɛi-kaa kɔkuluƃa-ŋai da dímɛi-nuui bɛlɛɛ Zûu-ŋai díkɔ kuluƃa-ŋai dîa dí Zîsɛ sòŋ dí ŋ̀iri.

¹³ Maa-ŋuŋ dí lì la Ɛnaa pɔ. Kpɛ́ni fêi, è kɛ̀ a Kaifa m̀ɔ̂lɔ nyii kɛ̀ a zâla láa soŋ-nuu kɛ́tɛi a góraŋ ti.

¹⁴ Kaifa ŋí ƃe Zûu-ŋai lia-woo ƃò a gɛɛ è kɛ̀ a ǹɛ́lɛɛ a gɛɛ fɛ̂ɛ núu tɔnɔ é sáa ǹûai mɛni ma. Pitɛ káa zâla láa soŋ-nuu kɛ́tɛi ŋɔgalai su

Pitɛ è Zîsɛ maa sîa tòo

¹⁵ Samaŋ Pitɛ è lɛ̀ɛ Zîsɛ pôlu. Ŋɔpôlu-ƃelai dɔnɔ da è gɛ̀ ti máŋ. Ŋɔpôlu-nuui ŋí ǹyaŋ è kɛ̀ a zâla láa soŋ-nuu kɛ́tɛi kɔlɔŋɔɔ, nya ƃe è lɛ̀ɛ Zîsɛ pôlu dí lí zâla láa soŋ-nuu kɛ́tɛi ŋɔgalai su,

¹⁶ Pitɛ è lɛ̀ɛ tɔɔ̂ni galai lá. Nya ƃe ŋɔpôlu-nuu tɔnɔi nyii kɛ̀ a zâla láa soŋ-nuu kɛ́tɛi kɔlɔŋɔɔi, è kùla é lono nɛnîi pɔ nyii kɛ̀ gbôŋ mɛi kâai, é lɔ́ a Pitɛ.

¹⁷ Nɛnîi kɛ́ gbôŋ mɛi kâai, è mò Pitɛ ma, ǹyɛɛi, “Kɛrɛ̂e, yá máŋ íkaa a nalôŋ ŋí ŋɔpôlu-ƃelai dɔnɔ?” Nyɛɛ ma, “Fé la.”

¹⁸ Ǹyée-mu-ƃelai da gɔkuluƃa-ŋai dí tiɣi-ŋɔŋ tòo. Kpɛ́ni fêi, è kɛ̀ a kɔ́lɛ-ɣele, gɔlɛi kɛ́ tɛ́ a ŋ̀ánaa. Díkɛ tɔɔ̂ni díkɛ díkɔlɔ ƃo. Pitɛ ǹyaa máŋ è kɛ̀ tɔɔ̂ni naa gɛ gɔlɔ ƃo.

Zâla láa soŋ-nuu kɛ́tɛi è Zîsɛ marê kɛ̀

¹⁹ Nya ƃe zâla láa soŋ-nuu kɛ́tɛi è nâa kɛ́ Zîsɛ marê kɛ̂i é pìlaŋ ŋɔpôlu-ƃelai dîa da Ŋɔɣâla-mɛni-lɛɛi.

²⁰ Zîsɛ è ŋ̀óo su tòo, ǹyɛɛ ma, “Ŋá lóno a zu ponoɔ bànaŋ mà. Ŋ́gaa nɔ́ wɔ́lɔ Ɣâla-mɛni lɛ̂i Ŋ̀âla-fɛli-kêre-ŋai mu da Ŋ̀âla-pɛrɛ Kɛ́tɛi mu, ƃɛ́i Zûu-ŋai kélee da kɔyaŋ naai. Ḿve tá mɛni da ƃo ni loo-pere su.

²¹ Ya ḿarê kɛ̂i lé mɛni ma? Dímarê kɛ́ diai da mɛnii mɛ́ni ŋá mò diai; dí mɛnii kɔ́lɔŋ ŋá mò diai.”

²² Tãi è nyiŋi ƃò lai, gɔkuluƃai dɔnɔ nyii kɛ̀ tɔɔ̂ni díkɔlɛi è Zîsɛ lòkwa a ǹyée, é m̀o mà, ǹyɛɛi, “Bere ƃe ya pɔ̂ri zâla láa soŋ-nuu kɛ́tɛi wóo su toôi la?”

²³ Zîsɛ è ŋ̀óo su tòo, ǹyɛɛi, “À kɛ̀ ŋa lóno a nyɔ́mɔɔ, gɛ̀ ní mɛni nyɔ́mɔɔ maa-sere-faa kɛ́. Kɛ́lɛ, à kɛ̀ ŋa lóno a zã́a, gɛ̀ ní íkaa ńokwâi lé mɛni ma?”

²⁴ Nya ƃe Ɛnaa è dɛ̀ɛ a ŋiriɛɛ zâla láa soŋ-nuu kɛ́tɛi Kaifa pɔ́naa.

Pitɛ è Zîsɛ maa-sîa tòo

²⁵ Samaŋ Pitɛ è kɛ̀ tɔɔ̂ni gɛ gɔ́lɔ ƃò. Nya ƃe dí m̀arê kɛ̀, dîyɛɛi, “Kɛrɛ̂e, ya máŋ íkaa a ŋɔpôlu-ƃelai dɔnɔ?” È ǹá sia tòo, ǹyɛɛi, “Fé lá.”

²⁶ Zâla láa soŋ-nuu kɛ́tɛi ǹyée-mu-nuui nyii Pitɛ è ŋ̀óli tèei, ŋɔnúu da è Pitɛ m̀arê kɛ̀, ǹyɛɛi, “Kɛrɛ̂e, ŋá íkàa zûai su ka ǹyaa?”

²⁷ Pitɛ è ŋɔ́nɔ ǹá sia tòo máŋ. È kɛ̀ nɔ́ tí, tɛ́ɛ-sîrɛ kɛ́ ŋ̀óo pìli.

Zîsɛ káa Pâle ŋɛ́i túɛ

²⁸ Nya ƃe dí kùla a Zîsɛ Kaifa ŋɔgalai su dí li la mɛni-saa ƃó-pɛrɛi lá. È kɛ̀ a ɣele-waa pɛ-pɛ. Dia kpîŋ dífe lɔ ni mɛni-saa ƃo-pɛrɛi mu, a gɛɛ dífe láa dítia kara la, a gɛɛ dí dɛɛ-mɛi mii.

²⁹ Nya ƃe Pâle e lì dípɔ. E dímarê kɛ̀, ǹyɛɛi, “Le ƃe nalôŋ ŋi e gɛ̀?”

³⁰ Dí ŋ̀óo su tòo, dîyɛɛ ma, “Eêi kɛ̀ nalôŋ ŋí fe a mɛni nyɔ́mɔɔ kɛ́-nuu kúfei pâi la ípɔ.”

³¹ Pâle e mò dîa, ǹyɛɛi, “Ka lí la ká ŋɔmɛnii ŋá tée kútɔ̂ŋ su káa kpîŋ.” Zûu-ŋai dí mò ma, dîyɛɛi, “Ve dɔ̂ŋ wóo ma a gɛɛ ku núu da paa.”

³² Nyiŋi e kɛ̀ a gɛɛ ŋ̀óoi ŋa-see e kɛ́ nyii Zîsɛ e mò a gɛɛ e zaai lɛ a pâi gɛ̂i.

³³ Pâle è lì pôlu ŋɔ́nɔ mɛni-saa ƃo-pɛrɛi mu é Zîsɛ tôli, é m̀arê kɛ̀, ǹyɛɛ ma, “Yá ƃa Zûu-ŋai Díkâloŋ?”

³⁴ Zîsɛ è m̀arê kɛ̀, ǹyɛɛ ma, “Íkaa nyiŋi ƃôi íkpɔɔi-yee ma, kpaa nûa da kpɛni dí mò yâ é pîlaŋ mâ?”

³⁵ Pâle è zu tòo, ǹyɛɛ ma, “Ya ŋ́gaâi a Zûu-nuu? Íkpɔɔi-nuai da zâla láa soŋ-ƃela kpaya-kpayai da pá a yá ḿbɔ. Lé ƃe í gɛ̀?”

³⁶ Zîsɛ è zu tòo, ǹyɛɛ ma, “Ŋákâloŋ-laai fé kula ní ǹɔii ŋí su. Eêi kɛ̀ ŋákâloŋ-laai eêi kɛ̀ a ǹɔii ŋí ŋɔ̂i, ńyee-mu-ƃelai díi pɔ̂ri kɔ̂i, a gɛɛ dífe pà a ńyãa Zûu-ŋai pɔ. Kɛ́lɛ, ŋákâloŋ-laai fé kula ní ǹɔii ŋí su.”

³⁷ Pâle è m̀arê kɛ̀, ǹyɛɛi, “Gɛ̀ ní kâloŋ ƃa yá, Kɛrɛ̂e?” Zîsɛ è zu tòo, ǹyɛɛi, “Ya mò a gɛɛ ŋ́gaa a kâloŋ. Nyiŋi mɛni ƃe dí ńzɔlɔ ƃô la, nyiŋi mɛni ƃe ǹyaŋ ŋa bá kɛ̀ ǹɔii su, a gɛɛ ŋá dɔ̃yâi maa-sere-faa kɛ́. Núu nyii kélee gáa dɔ̃yâi mai a ŋ́oo mɛni.”

³⁸ Pâle e mò ma ǹyɛɛi, “Lé ƃa dɔ̃yâi?” Tãi è nyiŋi ƃò lai, è lì ŋɔ́nɔ Zûu-ŋai pɔ, é m̀o dîa, ǹyɛɛi, “Fé mɛni nyɔ́mɔɔ kélee da kâai gbonôi.

Dí fàa Zîsɛ paa-mɛni ma

³⁹ Kɛ́lɛ, ǹyaŋ kɛ-mɛni-pɔlɔ káa káyêei a gɛɛ ŋa tée núu tɔnɔ ma Dɛɛ-mɛi-kuui su. Gɛ̀ ní ka pâi ǹɛɛ̂i naa ŋá tée Zûu-ŋai Díkâloŋ ma kámɛni ma?”

⁴⁰ Dí ŋɔ́nɔ làɣi, dîyɛɛ ma, “Nalôŋ ŋí fêi. Kɛ́lɛ, tée Barâƃa ma!” Barâƃa ǹyaŋ è kɛ̀ a ŋúma-nuu.