Zɔ̂ŋ 11 - Ŋ̀âla Kɔlɔ Maa Waai

Tãi Lâzara e sàa lai

¹ Nalôŋ tɔnɔ è wɔlɔ kɛ̀ kɔ́lɛ̂i. Ǹáa ƃe kɛ̀ a Lâzara. Nalôŋ ŋí séɛɛ è kɛ̀ Bɛtɛni taai su. Mere da ǹêɣe Maatɛ díkɛ daai ŋí su máŋ.

² Mere da Maatɛ díkɛ a ǹalôŋ ŋí zaaƃɔlɔ-ni. Mere ŋí ƃe wɔ́lɔ ŋúrɔ-kúŋ nɛ̃ɛi pú Kunuu-namui kɔ́ɔ mâ é m̀aa kɔ̀ɔ a ŋ̀uŋ-leɣa.

³ Nya ƃe ŋɔsaaƃɔlɔ-ŋai dí núu tɛ̀ɛ Zîsɛ pɔ́naa, dîyɛɛ ma, “Kúnuu-namui, ǹúui nyii í ŋ̀wɛ̂li níi, gáa kɔ́lɛ̂i.”

⁴ Kɛ́lɛ, tãi Zîsɛ è mɛ̀ni lai, è mò, ǹyɛɛi, “Gɔlɔ-felai ŋí fé zaa mɛni ma. Gáa Ɣâla ŋɔfólo-laai mɛni ma, a gɛɛ Ɣâla Ǹóŋ ŋɔfólo-laai é tɛ́ zarâi.”

⁵ È kɛ̀ tí, Zîsɛ è kɛ̀ a Maatɛ wɛ́liɛɛ da ǹîa Mere, da Lâzara.

⁶ Nya ƃe tãi è m̀ɛni la a gɛɛ Lâzara è kɛ̀ kɔ́lɛ̂i, è gɛ̀ a ɣele-kuu feerɛ ƃɛ́i è kɛ̀ naai.

⁷ Nyiŋi pôlu ma è mò ŋɔpôlu-ƃelai dîa, ǹyɛɛi, “Kwaa li ŋɔ́nɔ Zuda.”

⁸ Ŋɔpôlu-ƃelai dí mò mà, dîyɛɛi, “Kaamɔ̂ɔ, Zûu-ŋai dí kɛ̀ íkɔ̂rii a gɛɛ dí ísɔɔ, nya ƃe ŋɔ́nɔ íkaa liî naai?”

⁹ Zîsɛ è zu tòo, nyɛɛi, “Kɛrɛ̂e, aƃa puu kao feerɛ ƃe gáa ɣele tɔnɔ sui? A kɛ̀ núu da à sìa a voloi, ve pâi gɔ́ɔ tuâi. Kpɛ́ni fêi, a ǹɔii ŋi ŋɔkwaa-ponoɔi kâai.

¹⁰ Kɛ́lɛ, à kɛ̀ núu da à sìa a gbínii, a gɔ́ɔ tùa. Kpɛ́ni fêi, gwaa-ponoɔi fe gbonôi.”

¹¹ E mò ti, naa pôlu ma e mò dîa, ǹyɛɛi, “Kúwɛli-nuui Lâzara a nyiî. Kɛ́lɛ, ŋa liî a gɛɛ ŋa ŋ̀ɛi la ƃo.”

¹² Ŋɔpôlu-ƃelai dí mò ma, dîyɛɛi, “Kúnuu-namui, à kɛ̀ gáa nyiî, a pâi ƃálôi.”

¹³ Ǹyaŋ Zîsɛ e kɛ̀ lônoi é pîlaŋ ŋɔsaa mɛni ma. Kɛ́lɛ, dí kɛ̀ gáâi yɛ̂ɛ a lônoi é pîlaŋ nyii kpîŋ ma.

¹⁴ Nya ƃe Zîsɛ e mò dîa a zu-ponoɔ, ǹyɛɛi, “Lâzara aâ saa.

¹⁵ Kámaa-mɛni ma, ńii nɛɛ̂i a gɛɛ fe kɛ́ ni naa, a gɛɛ ká láa la. Kɛ́lɛ, kwaa li bɔ naa.”

¹⁶ Tama, nyii da kɛ̂ ma Ǹyuâi, e mò m̀arâa polu-ƃelai dîa, ǹyɛɛi, “Kúa máŋ kwaa lí a gɛɛ kwa dîa-ni ku sáa.”

Zîsɛ ƃa mu-siɣe saa-yeei da vulu-laai

¹⁷ Tãi Zîsɛ e pà lai, e gàa Lâzara a nâa gɛ́ molôŋ su a ɣele náaŋ.

¹⁸ Bɛtɛni e kɛ̀ Zerusâlɛŋ kɔlɛ, yɛ̂ɛ aƃa tɔnɔ sia.

¹⁹ Zûu-ŋai dámaa dí pà Mere da Maatɛ pɔ a gɛɛ dí díŋa-kpɛ́ dísaaƃɔlɔ mɛni ma.

²⁰ Tãi Maatɛ e mɛ̀ni a gɛɛ Zîsɛ a kɛ̀ pâi, e lì duɛ, Mere ǹyaŋ è kɛ̀ seêni bɛ́rɛi mu.

²¹ Maatɛ è mò Zîsɛ ma, ǹyɛɛi, “Kúnuu-namui, eêi kɛ̀ iî kɛ̀ ƃɛ, ńzaaƃɔlɔ fei saa.

²² Loníi ma kpîŋ ŋá gɔ́lɔŋ a gɛɛ nyii kélee ya vɛ́li Ɣâla mai, Ɣâla a pâi dɛɛ̂i ípɔ.”

²³ Zîsɛ e mò mà, ǹyɛɛi, “Ísaaƃɔlɔ a pâi mu siɣêi ŋɔ́nɔ.”

²⁴ Maatɛ è mò mà, ǹyɛɛi, “Ŋá gɔ́lɔŋ a gɛɛ a pâi mu siɣêi ŋɔ́nɔ mu-siɣe saa-yeei su a ŋelei gbɛɛ ŋái.”

²⁵ Zîsɛ è mò ma, ǹyɛɛi, “Ńyãa ƃa mu-siɣe saa-yeei da vulu-laai. Ǹúui nyii a làa a ńyãai, berei máŋ zaâi lai, kɛ́lɛ, a pâi kɛ̂i a vulu.

²⁶ Ǹyaŋ ǹúui nyii kélee gáa ɣele mai, nyii a làa a ńyãai, ve pâi wɔ́lɔ saâi. Ya nyiŋi síɣe a tɔ̃yâ?”

²⁷ È mò ma, ǹyɛɛi, “Ooei, Kúnuu-namui. Ǹáai la a gɛɛ yá ƃa Kôrai, Ɣâla Ǹóŋ, nyii gáa pâi ǹɔii sui.”

Zîsɛ è wɔ́lɔ

²⁸ Tãi è kpɛ̀ɛ a nyiŋi ƃoɔi, è lì é ǹîa-nɛnii Mere toli. È mò a ŋóo maa yeŋɔɔ, ǹyɛɛi, “Gaamɔ̂ɔi káa ƃɛ, a ítolîi.”

²⁹ Tãi è mɛ̀ni è mu sìɣe a maa felaa é lí bɔ.

³⁰ Zîsɛ ǹyaŋ fé niî kɛ̀ pá ní daai su. Kɛ́lɛ, è kɛ̀ niî ƃɛi Maatɛ è gàa naai.

³¹ Tãi Zûu-ŋai kɛ̀ Mere kɔlɛ bɛ́rɛi mui, dí kɛ̀ ŋá kpɛ̂i, dí gàa Mere é mu siɣe a maa felaa é lí ŋini ŋái, dí lɛ̀ɛ bôlu. Kpɛ́ni fêi, dí kɛ̀ gáâi a gɛɛ Mere a liî molôŋ la é wɔ́lɔ naa.

³² Nya ƃe tãi Mere è pà ƃɛi Zîsɛ è kɛ̀ naai, è gàa é too gɔ́ɔ mu, é m̀o ma, ǹyɛɛi, “Kúnuu-namui, eêi kɛ̀ iî kɛ̀ ƃɛ ńzaaƃɔlɔ fei saa.”

³³ Tãi Zîsɛ è gàa, gɛ wɔlɔi da Zûu-ŋai nyii lɛ̀ɛ bôlui dí kɛ̀ wɔ́lɔ̂i, malôŋ è tòo ma a ŋ̀ánaa ŋɔmɔ̂leŋ su.

³⁴ È m̀o ma, ǹyɛɛi, “Mí ƃe ká ǹaa naai?” Dí mò ma, dîyɛɛi, “Kúnuu-namui, pá í gáa.”

³⁵ Zîsɛ è wɔ̀lɔ.

³⁶ Nya ƃe Zûu-ŋai dí mò, dîyɛɛi, “Ka gáa berei e ŋ̀wɛli ni lai!”

³⁷ Kɛ́lɛ, da-ni dí mò, dîyɛɛi, “Ǹúui nyii a ŋɛi-pu-nuu ŋɛi lá ƃoi, vei pɔ̂ri nalôŋ ŋí kɛ̂i vé saa?”

Lâzara è ŋɔ́nɔ pà pôlu fulu-laa su

³⁸ È kɛ̀ tí malôŋ támaa ŋɔ́nɔ tòo Zîsɛ ma é pa molôŋ lá. Molôŋ è kɛ̀ a loa, fɛ̃ɛ-ƃela laa mɛi.

³⁹ Zîsɛ è mò dîa, ǹyɛɛi, “Ka vɛ̃ɛ-ƃelai siɣe naa.” Maatɛ nyii gáa a zaa-nuui zaaƃɔlɔi, è mò ma, ǹyɛɛi, “Kúnuu-namui, tãi ŋí su gúŋ káa nâa mà. Kpɛ́ni fêi, zàa a nâa kɛ́ a ɣele-kuu náaŋ.”

⁴⁰ Zîsɛ è mò ma, ǹyɛɛi, “Kɛrɛ̂e, ŋá mò yâ, a gɛɛ yà làa la ya pâi Ɣâla ŋɔfólo-laai kâai?”

⁴¹ Nya ƃe dí vɛ̃ɛ-ƃelai kùla naa. Zîsɛ è ŋ̀ɛi tɛ̀ ɣelêi, é m̀o, ǹyɛɛi, “Ńâŋ, ŋa ísɛɣɛ̂i fé a gɛɛ ya ŋ́oo mɛ́ni.

⁴² Ŋá gɔ́lɔŋ a gɛɛ ya ŋ́oo mɛ̀ni nɔ a tãi kélee. Kɛ́lɛ, ŋa nyiŋi ƃôi nɔ ǹûai ŋí mɛni ma díkaa tɔɔ ni ŋ́gɔlɛi, a gɛɛ dí láa la a gɛɛ yá ƃe ńdɛ̀ɛ.”

⁴³ Tãi è nyiŋi ƃò lai, è làɣi a ŋ̀óo su kɛ́tɛ, ǹyɛɛi, “Lâzara, kula.”

⁴⁴ Zaa-nuui è kùla ǹyée da gɔ́ɔ lá ɣiriɛ a seɣe, ŋ̀uŋ ma ɣiriɛ a seɣe. Zîsɛ è mò dîa, ǹyɛɛi, “Ka vúloŋ, ká ƃó mà é lí.”

Dí Zîsɛ maa-kiri tèe

⁴⁵ Zûu-ŋai dámaa diai pà da Mere-ni dí mɛnii káa è gɛ̀i, dí láa la.

⁴⁶ Kɛ́lɛ, díta-ni dí lì Faresii-ŋai pɔ. Dí mò dîa mɛnii Zîsɛ a gɛ́i.

⁴⁷ Nya ƃe zâla láa soŋ-ƃela kpaya-kpayai da Faresii-ŋai dí kɔyâŋ tòo dí m̀o, díyɛɛi, “Lé ƃe kwa pɔ̂ri gɛ̂i? Kpɛ́ni fêi, nalôŋ ŋí a ŋɛi-kɛ-maa támaa kɛ̂i.

⁴⁸ A kɛ̀ kwà nɛ̀ɛ naa é lí nɔ́ tí, ǹúui kélee a pâi lâai la, gɛ̀ ní Lomaŋ-ŋai da pâi pâi dí kúkɛ̂i maa waai su kara da kúnûai.”

⁴⁹ Kɛ́lɛ, dítɔnɔ ta, da kɛ̂ ma Kaifa, nyii kɛ̀ a zâla láa soŋ-nuu kɛ́tɛi a maa-koraŋ tíi, è mò dîa, ǹyɛɛi, “Káfe mɛni da kélee kɔlɔŋ.

⁵⁰ Káfe tárêi zu a gɛɛ ǹɛ́lɛɛ̂i kámɛni ma a gɛɛ núu tɔnɔ é sáa ǹûai mɛni ma, a gɛɛ ǹyaŋ ǹɔii kélee ŋuŋ lá fe píli.”

⁵¹ Ve nyiŋi ƃo ni gbɔɔ̂i-yee ma. Kɛ́lɛ, gɛɛ a zâla láa zoŋ-nuu kɛ́tɛi a maa-goraŋ ti, e mɛnii ƃò nyii pâi kɛ̂i a gɛɛ Zîsɛ a pâi saâi ǹɔii mɛni ma,

⁵² ǹyaŋ ǹɔii mɛni ma tɔnɔ nɔ fêi. Kɛ́lɛ, é Ɣâla ŋɔnîa-pɛlɛɛi kélee ŋá-tɛ́ gîe-ma tɔnɔɔ, diai dí táa-taa.

⁵³ É síɣe maa-foloi ti ma dí lì kɔyâŋ su a gɛɛ da pɔ̂ri gɛ́i leŋ dí bàa.

⁵⁴ È kɛ̀ tí, Zîsɛ fé ŋɔ́nɔ sia ni a maa ponoɔ dísama. Kɛ́lɛ, è síɣe naa é líi ǹɔii su vɛ̃ɛ-kpâlaŋ kɔlɛ daai su da kɛ̂ ma Ifiraŋ. Ǹaa ƃe è kɛ̀ naa da ŋɔpôlu-ƃelai.

⁵⁵ Ǹyaŋ Zûu-ŋai Dítɛɛ-mɛi-kuui è kɛ̀ lɛɣɛ̂i. Núu támaa dí kùla ǹɔii su. Dí lí Zerusâlɛŋ Dɛɛ-mɛi-kuui tuɛ a gɛɛ dí díkpîŋ maa waa.

⁵⁶ Dí kɛ̀ Zîsɛ kɔ́rîi díkɛ mo díkîe-ni dîa Ŋ̀âla-pɛrɛ Kɛ́tɛi mu, dîyɛɛi, “Lé ƃe gáa íkili ŋá? A gɛɛ ve pâi pâi gúui su?”

⁵⁷ Ǹyaŋ zâla láa soŋ-ƃela kpaya-kpayai da Faresii-ŋai da nâa díwoo tɛ́ɛ a gɛɛ, à kɛ̀ núu da e ƃɛ́i kɔ́lɔŋ gáa naai, é dílɛɛ naa dí gɔ́lɔŋ a gɛɛ dí zoŋ.