Galesiɛŋ 6 - Ŋ̀âla Kɔlɔ Maa Waai

Ka kpɔŋ-mâa tɛɛ kákîe-ni pɔ́

¹ Ŋánûa, à kɛ̀ máŋ kà núu da kàa gɛ mɛni nyɔ́mɔɔ kɛ̀, káai M̀ɔlêŋ káa kákponôi ka pá a maa-nuui tí pôlu a pere lɛ́lɛɛ. Ka gɔ́lɔŋ a gɛ́ɛ ɣele da ka pâi pilîi yee-laa-maa su káa máŋ.

² Ka kákîe-ni díkpîri wuyɛɛ-ŋai síɣe, a gɛ́ɛ ká Kôrai ŋɔtɔ̂ŋ ŋ̀aa-see kɛ́.

³ Kpɛ́ni fêi, à kɛ̀ núu da a gíli ŋá sìa a gɛ́ɛ gáa a núu kɛ́tɛ, ǹyaŋ núu kɛ́tɛ fei, gáa gbîŋ pɛlɛ̂i.

⁴ Kɛ́lɛ, tɔɔ núu kélee é gbîŋ-tii su káa. Ǹyaŋ ŋɔyoŋkai maa-sapoi a pâi gulâi naai, gáa gbîŋ mɛni ma. Ve ŋɔkɔlɛ-ma-nuui mɛni ma.

⁵ Kpɛ́ni fêi, fɛ̀ɛ núu kélee é gbîŋ tìã siɣe.

⁶ Kɛ́lɛ, tɔɔ ǹúui da ŋ̀óoi lɛ̀ mai, é mɛni lɛ́lɛɛ-ŋai kélee ƃó zɛŋ-lɛ-nuui ma.

⁷ Káfe kákpîŋ pɛ̀lɛ. Núu fa ɣɛ́lɛ-maa kùla Ɣâla kponôi, kpɛ́ni fêi, zɛŋ núu a zìi, ǹyaa ƃe a gùla.

⁸ Kpɛ́ni fêi, núu a sɛŋ sí ŋɔkɛ-pere-nyɔŋ mɛni mai, a su-kara kùla ŋɔkɛ-pere-nyɔŋ su. Kɛ́lɛ, núu a sɛŋ sí M̀ɔlêŋ mɛni mai, a wɔlɔ-wɔlɔ fulu-laa kùla M̀ɔlêŋ kponôi.

⁹ Kúfii fé kpɛ̀ɛ a mɛni lɛ́lɛɛ kɛ́ɛ, kpɛ́ni fêi, tãi a pâi, kwa pâi sɛŋ da kulâi zu, à kɛ̀ kúfe kpera ni.

¹⁰ Mɛni ma, tãi pɔ̂ri-mâa káa la kúyêei, kwaa mɛni lɛ́lɛɛ kɛ́ núu kélee mî, é tela kɛ́ a diai díkaa a naa-lai su-ƃela-kpului.

Pɔ̂ɔ a zaa-wurui maa-yoŋka teêi

¹¹ Ka ŋ̀óo-kɛ-sɛŋ kpaya-kpayai káa ŋ́gaa kɔlɔ pɔ̃yɛ̂i la kápɔ a ŋ́gbîŋ yeei.

¹² Diai ŋ̀wɛ̂lii a gɛ́ɛ dí mɛni lɛ́lɛɛ lɛ́ díkpîŋ-tua-perei sui, dia ƃa ká kɛ̀ a wála-wala a gɛ́ɛ dí kásee kpono mâ, ǹyaŋ da gɛ̀ nɔ́ tí a gɛ́ɛ núu fé díkpɔ̀ara Kôrai ŋɔsaa-wurui mɛni ma.

¹³ Kpɛ́ni fêi, diai máŋ da díyee sèe núu-seɛɛ kpono mâ mɛni mui, dia kpîŋ dífa dɔ̂ŋ mɛi kâa, kɛ́lɛ, da ŋ̀wɛli dí kásee kpono mâ a gɛ́ɛ dí yoŋka tée kákpîŋ tua-perei su.

¹⁴ Kɛ́lɛ, é folôŋ mâ kpɔ́ a zu kôyaa a gɛ́ɛ ŋá yoŋka tée, fɛ̀ɛ nɔ́ ŋá Kúnuu-namui Zîsɛ Kôrai ŋɔsaa-wurui maa-yoŋka tée, zaa-wurui a gɛ́ ŋ̀éniɛi a saa ŋ́ɛi, ńyaŋ ŋa saa ŋ̀éniɛi ŋɛi.

¹⁵ Kpɛ́ni fêi, diai díseɛɛi kpono mâ da diai dífe see-ní kpono mai, dífe a sɛŋ da, kɛ́lɛ, fɛ̂ɛ núu maa sɔlɔ ƃóɔɔ a nina.

¹⁶ Lii-see da maloŋ-kâa é kɛ́ diai kélee dîa da sîa dɔ̂ŋ ŋí lá-woo mai, da Eezuɛ-ŋai díkaa a Ɣâla pɔ́ɔi.

¹⁷ É síɣe tãi ŋí ma núu da fé ŋɔ́nɔ ḿvũa-fũa. Kpɛ́ni fêi, Zîsɛ pɔ́ɔ káa ŋ́gbono ma.

Ǹûai

¹⁸ Ŋánûa, Kúnuu-namui Zîsɛ Kôrai ŋɔƃɛlɛ-sêei é kɛ́ kámɔlêŋ kɔlɛ. É kɛ́ ti.