Felepiɛŋ 3 - Ŋ̀âla Kɔlɔ Maa Waai

Dɔ̃yâ-laa kpîŋ-kpîŋ

¹ Gbɛɛ ŋái, ŋánûa, ka lii-nɛ̃ɛ kula Kúnuu-namui kponôi. Vé ḿâ a mɛni kpanaŋ a gɛ́ɛ ŋa m̀ɛni tɔnɔi pɔ̃yɛ kâa, ǹyaŋ ǹɛ́lɛɛ̂i kámɛni ma.

² Ka kámɛi káa a ŋ̀îla-ŋai. Ka kámɛi káa a díi nyɔ́mɔɔ-kɛ-ƃelai. Ka kámɛi káa a diai da dísua tèe-tee diai.

³ Kpɛ́ni fêi, kúa ƃe dí kúsee kpono mâ a tɔ̃yâ, kúai kwa Ɣâla fɛli mɔlêŋ su, kúkɛ lii-nɛ̃ɛ kula Zîsɛ Kôrai kponôi. Kúfa lâa a núu kpono seɛɛ kpono mâ mɛni.

⁴ É máŋ kɛ́ ti ńyãa kpîŋ sâpo káa ńyêei máŋ a gɛ́ɛ ŋá láa a núu seɛɛ kpono mâ mɛni. À kɛ̀ sâpo káa núu da kpɛni yêei a gɛ́ɛ é láa a núu seɛɛ kpono mâ mɛni, sâpo támaa káa ńyêei.

⁵ Ŋ́gaa a Eezuɛ-nuu, ŋ́gɛ ƃo a Bɛŋsima ŋɔsuui su-nuu da. Dí ńzee kpono mâ a tãi ŋá kɛ̀ la a fólo lɔ́ɔlu mɛi saaƃai. Ŋ́gaa a Ibulu-nuu nyíi Ibulu-ŋa dí zɔlɔ ƃoi. À kɛ̀ a dɔ̂ŋ su-pere, ŋ́gaa a Faresii-nuu.

⁶ À kɛ̀ a ŋátii kɛ-pere su, ŋá kɛ̀ a Kôrai-toli-kpɔŋ kpɔara-nuu. À kɛ̀ a tɔ̃yâ laa-la yɛ̂ɛ berei dɔ̂ŋ káa lai, ńzɔŋ fe kɛ́ ni má.

⁷ Kɛ́lɛ, zɛŋ kélee kɛ̀ ńyêei ŋá gàa nɔ́ kpɛ́ni-kpɛni Kôrai mɛni ma.

⁸ Tɔ̃yâ ma ŋá ńyee ŋá-sɛŋ kélee kàa kpɛ́ni-kpɛni, kpɛ́ni fêi, Ŋánuu-namui Zîsɛ Kôrai kɔlɔŋɔɔ mî tɛɛ̂i mɛni kélee ma. Ŋá sɛŋ kélee làŋ m̀aa mɛni ma. Ŋa sɛŋ kélee káa nɔ́ a kala, kpɛ́ni fêi, ŋa ŋ̀wɛ̂lii ŋa Kôrai sɔlɔ ƃo.

⁹ Ŋa ŋ̀wɛ̂lii ŋá kɛ́ gbonôi, a gɛ́ɛ ŋ́gbîŋ tɔ̃yâ laa-la fé kɛ̀ ńyêei nyíi kula dɔ̂ŋ sui. Kɛ́lɛ, fɛ̂ɛ dɔ̃yâ-laai nyíi gáa Kôrai kponôi laa-la sarâi. Gáa a dɔ̃yâ-laai kúla Ɣâla yêei nyíi kúla laa-la sui,

¹⁰ a gɛ́ɛ ŋa gɔ́lɔŋ da ŋɔmu-siɣe saa-yeei ŋɔwála-walai, ŋa ŋɔmɛni-soli-kaai da sɔlɔ ƃo, ŋá tela kɛ́ yɛ̂ɛ ǹyaa ŋɔsaai su.

¹¹ À kɛ̀ ŋɔ́nɔ pere à kɛ̀ naa, ŋá mu-siɣe saa-yeei sɔlɔ ƃo.

Gáa kɔ̂i é seri gíli ŋá mɛnii ma

¹² Vé a sɛŋ a gɛ́ɛ ŋa nâa nyíŋi sɔlɔ ƃo, kpaa máŋ da ŋ́gɛ ńaa a fɛ̂ɛ. Kɛ́lɛ, ŋa kɔ̂i a gɛ́ɛ ŋá gɛ́ a ḿbɔɔ, kpɛ́ni fêi, Zîsɛ Kôrai a ŋ́gɛ a bɔ́ɔ.

¹³ Ŋánûa, fé m̀ôi a gɛ́ɛ ŋá gɛ́ a ḿbɔɔ. Kɛ́lɛ, ŋá mɛni tɔnɔ kɛ̂i. Ŋa niâi m̀ɛnii ma gáa ḿbôlu-perei. Ŋa kɔ̂i a gbanaŋɔɔ m̀ɛnii nyíi gáa ńduɛ-perei mɛni ma.

¹⁴ Ŋa kɔ̂i a gɛ́ɛ ŋa seri m̀ɛnii mâ gáa ŋ́gili ŋái, a gɛ́ɛ ŋá m̀aa pui sɔlɔ ƃo gáa Ŋ̀âla-taa-tolii mɛni ma nyíi Ɣâla a m̀ôi a kua Zîsɛ Kôrai kponôi.

¹⁵ Tɔɔ kûai kú seriɛi zui kúkili-ŋa-siai é kɛ́ ŋí. A kɛ̀ kákili-ŋa-siai à kɛ̀ a da kpɛni mɛni kélee su, Ɣâla a pâi kákili-ŋa-sia nyɔ́mɔɔi lɛ̂i kâa máŋ.

¹⁶ Tɔɔ nɔ́ zɛŋ nyíi kwa zɔlɔ ƃói, kú maa-tua kɛ́.

¹⁷ Ŋánûa, ka kɛ́ a ḿbɔkɔɔŋ-ƃela gîe ma ka diai maa kpɛ́ɛ da sîa yɛ̂ɛ berei kwa sîa lai.

¹⁸ Kpɛ́ni fêi, núu támaa káa naa ŋa wɔ́lɔ dímaa-mɛni ƃó kâa a tãi támaa, ŋ́gaa nâa m̀ôi kâa wɔlɔ-woo su a gɛ́ɛ díkaa a Kôrai ŋɔsaa-wurui kpɔara-ƃela.

¹⁹ Díkpɛɛ ŋá ƃa su-kara. Díɣâlai ƃa díkoi. Da dínîa kɛ̀ díŋumɛ-mɛni su. Díkili káa ǹɔii-su-sãai dîa.

²⁰ Kɛ́lɛ, kúlɔii-namu-laai káa Ɣâla-taa, ƃɛi máŋ kwa kúƃalo-nuui maa kpɛŋ naai, nyíi gáa a Kúnuu-namui Zîsɛ Kôrai.

²¹ A pâi kúkpono maa-yeŋɔɔ-ŋai kɛ̂i a gɛ́ɛ dí kɛ́ yɛ̂ɛ ŋɔfólo-laa-kponoi ŋɔwála-walai sarâi nyíi a pɔ̂ri kɛ̂ mì a gɛ́ɛ é pá a sɛŋ kélee gbîŋ kpono mai.