Ɛtɛ 7 - Ŋ̀âla Kɔlɔ Maa Waai

¹ Nya ƃe gâloŋ da Emaŋ dí lì Ɛtɛ pɔ́ naa a gɛɛ dí dílaa míi.

² Díkɛɛ dílaa miî, gâloŋ è Ɛtɛ marê kɛ̀ ǹyɛɛ mai, “Ɛtɛ, lé ƃé ya ŋ̀wɛ̂lii ŋá gɛ́ yɛ̂i? Ya kɛ̀ kpîŋ ŋá ŋákâloŋ lɔii ŋáa kɔ́lɛ zâmai ŋá gbua tɔ̂nɔ tɛɛ ípɔ, ŋa pâi dɛɛ̂i ípɔ.”

³ Ɛtɛ è ŋ̀óo su tòo ǹyɛɛ mai, “Óo Gâloŋ, à kɛ̀ gáa a ílii láa mɛni, íyee sée m̀ɛnii ŋí mu ŋa pâi m̀ôi yâi. Í pêɛi ífe ǹɛɛ naa dí ŋáfulu-laai su-kara kwa ŋánûai kélee.

⁴ Da kúsuui tɛ́ɛ nûa pɔ́ a gɛɛ dí zu-kara. Eêi kɛ̀ da ŋ̀wɛ̂lii nɔ́ dí kúkɔlɛ, ŋ́âi lɛ̀ɛ a ḿɛi saa, fêi fũa-fũa tɔɔ yâ. Kɛ́lɛ da gbɛ̀tɛ a gɛɛ dí kúsuu kpɛ́ɛ ɣele ma.”

⁵ Gâloŋ Atasɛra è Ɛtɛ marê kɛ̀ ǹyɛɛ mai, “Ǹúui nênɛ ƃé ŋɔkili ŋa siai a pɔ̂ri m̀ôi ma a gɛɛ é píli m̀ɛni kɛ́ɛ tí sui. Maa surɔ̂ŋ kɔ̂ɔ?”

⁶ Ɛtɛ è ŋ̀óo su tòo ǹyɛɛ mai, “Emaŋ nalôŋ ŋí ƃe. Gáa a kúmaa wûlu-nuu, kúkpɔara-nuu da kúmaa nɔ̃́ɔ-nuu.” Emaŋ è gâloŋ da Ɛtɛ dí ŋɛ́i kàa kpɔ́ sĩ́i é yao kpɔ́ a ŋánaa.

⁷ Nya ƃe gâloŋ è ǹíi ŋwâna kpɔ́ a ŋ̀ánaa é mu-siɣe loŋpoi su é kúla bɛ́rɛi ŋɛ́i-tuɛ-pere. Emaŋ è gɔ̀lɔŋ a gɛɛ gâloŋ a pá gula ma kɛ̂i. Nya ƃe è lɛ̀ɛ pôlu a gɛɛ é pɛ́lɛ a Ɛtɛ kɔ́ɔ a gɛɛ vé ǹɛɛ ǹaa dí ŋɔfulu-laai su-kara.

⁸ Gâloŋ páa pôlui, è Emaŋ kàa pɛlɛ̂i Ɛtɛ kɔ́ɔ mu. Tãi gâloŋ è nàa kàa lai, è làɣi ǹyɛɛi, “Nalôŋ ŋí a ŋ̀wɛ̂lii é ŋánɛnîi tée perêi a ŋ́ɛi-tuɛ, ŋápɛrɛi mu?” Ǹûai dí gâloŋ wóo mɛni ɣelêi-pere. Nya ƃe dípà naa ŋáa ma dí Emaŋ soŋ dí seɣe kpíniŋ a ŋuŋ.

⁹ Aabona nyii kɛ̀ a gâloŋ ŋɔnɛyâai mɛi káa-nuui dɔnɔi, è mò ǹyɛɛi, “Emaŋ a yeŋkêŋ tɔɔ ŋɔpɛ́rɛi pôlu. Ǹyeŋkêŋ ŋí ŋɔtɔɔ-mɛi káa a kɔ́ɔ ƃɔ́rɔni buu lɔ́ɔlu mɛi-feerɛ káo lɔ́ɔlu. È dɔ̀ɔ a gɛɛ é Mɔdikai, nyíi wɔ́lɔ ífulu-laai ŋuŋ ma ƃoi, sɛ̂lɛŋ ma.” Gâloŋ è mò dîa ǹyɛɛi, “Ka Emaŋ kpîŋ sɛ̂lɛŋ ma!”

¹⁰ Nya ƃe dí Emaŋ sɛ̀lɛŋ ǹyeŋkêŋ mâ nyii è dɔ̀ɔ Mɔdikai mɛni mai ḿâ. Nyíŋi pôlu ma, gâloŋ líi ŋáa è yèŋ.