Emɔ 6 - Ŋ̀âla Kɔlɔ Maa Waai

Eezuɛ su a pâi karâi

¹ “Kpalo ƃêlaai diai dîa díkaa fii-tɔ̂ɔ ma Zãiyɔŋ, da diai gáa díkili ŋá a gɛɛ díkaa maa-kɔ̃ɔ-pere su Sameria Yeei mai, da ǹɔii-ŋûŋ-ŋai su-nuu kpaya-kpayai, nyii-ŋai Eezuɛ ǹônii dí pa dípɔi!

² Ka tɛɛ Kaanɛ ká ǹaa káa. Ka lí Ama taa kɛ́tɛi su. Ka yeŋ Felesia-ŋai dítaai su da dòli a Gaai. Dí ta wála-walai é tɛ́ɛ Zuda da Eezuɛ-ni dîa, kpaa máŋ dílɔii su kɛ̂tɛi é tɛ́ɛ káwɔ̂i mâ?

³ Óo káai ka zɔnyɔ̂ŋ-ɣelei pîli pôlu-pere ká ŋwana-lɔ̂ɔ seêi kulâi?

⁴ Kpalo ƃêlaai diai dîa díkaa laâni séle-nyiŋ gbìŋ-ŋai ŋá díkɛ dísama lɔ̀ dí làli-ŋai su, díkɛ díƃala sua-ŋai mîi da díniŋa wúlɔɔ-ŋai.

⁵ Ka wule-folo-ŋa tòo kákɔniŋ ma, kákɛ ɣale-sãa kpɛ̀tɛ kákpîŋ mɛni ma yɛ̂ɛ berei Deeƃé è kɛ̀ gɛ̂i lai.

⁶ Ka ŋwã̂ai kpèle ƃôri-ŋa su, kákɛ wúlɔ lɛ́lɛɛ sìa kâa, kɛ́lɛ Zôsɛ ŋɔsuui su-kara mɛni maa-kpaaŋ fé kâa!

⁷ M̀ɛni ma káa ƃé pâi kɛ̂i a ǹûai maa-ŋuŋ-ŋai ká lí luɛ-laa su. Diai da dísama lɔ̀i, dísama-lɔi maa lii-laai a pâi kpɛɛ̂i.”

⁸ Yâwɛɛ Ɣâla è vòo ǹyaa kpîŋ m̀a ǹyɛɛi, “Ŋa Zeeka ŋɔyoŋkai kpɔara da ŋɔpɛ́rɛ-ŋai. Ŋa pâi kulâi daa-leei pôlu da zu-sãa kélee.”

⁹ A pâi kɛ̂i a tãi da, núu puu à kɛ̀ pɛ́rɛ tɔ̂nɔ mu, da pâi saâi.

¹⁰ À kɛ̀ núu ŋɔkáayɔɔ à pà boma kulâi bɛ́rɛi mu a gɛɛ é géreŋ, à ǹúui marê kɛ̀, nyii gáa bɛ́rɛi kpîŋ mɛi, ǹyɛɛ ma, “Núu da káa naa íkɔlɛ?” A pâi m̀ôi, ǹyɛɛ, “Kpao.” Gɛ̀ ní a pâi môi, ǹyɛɛ, “Ímɛi sáa! Kúfe Ɣâla Yâwɛɛ láa tòli.”

¹¹ Kpɛ́ni fêi, ka gáa, Ɣâla Yâwɛɛ è mò a gɛɛ bɛ́rɛ kɛ́tɛi a pâi wôloi, bɛ́rɛ-loŋ é fũa.

¹² Soo a kîrɛ siɣe kɔni ŋá? Núu a yúo ŋá siŋ a niŋa? Kɛ́lɛ ka teniŋ ƃô pène a ŋ̀ale-maa, ka sã́a-laa ŋɔƃá pene a wúru ŋwánaa.

¹³ Káai ka lii-nɛ̃ɛ kùla Lo-diƃa mɛni ma, kákɛ mò kâa, “Kúfe Kanayiŋ siɣe ní a kúpɔɔ a kúkpɔɔi wala-wala?”

¹⁴ Ɣâla Yâwɛɛ nyii gáa a Ŋ̀wála-wâla kélee Ɣâlai ǹyɛɛi, “Óo Eezuɛ-ƃelai, ka gáa, ŋa pâi lɔii-ŋuŋ tɔnɔ tɔɔ̂i káŋɛi túɛ, ǹyaŋ da pâi ká lúanîi é síɣe Ama perei ma é seri Araba Yai ma.”