Emɔ 2 - Ŋ̀âla Kɔlɔ Maa Waai

Môa-ŋai

¹ Ɣâla Yâwɛɛ è mò ǹyɛɛi, “Môa ŋɔsɔnyɔ̂ŋ saaƃa kpaa náaŋ mɛni ma fé pâi dɔ̀ŋ-kpɛ-maai siɣêi pôlu mà kpɛ́ni fêi, è Idɔŋ kaloŋ kèreŋ é kɛ́ a luu.

² M̀ɛni ma ŋa pâi ŋɔŋ pilîi Môa mà, a gɛɛ é Kɛriɔ ŋɔkili-tɔɔ maa kwaa-ŋai mâ kéreŋ, ǹyaŋ Môa a pâi saâi láɣi-woo su da túru-woo.

³ Ŋa pâi gâloŋ kulâi dísama, ŋá díkelee dípaa da ŋɔtíi-kɛ-ƃela kpaya-kpayai.”

Zuda-ŋai

⁴ Ɣâla Yâwɛɛ è mò, ǹyɛɛ, “Zuda ŋɔsɔnyɔ̂ŋ saaƃa kpaa náaŋ mɛni ma, fé pâi ŋɔtɔŋ-kpɛ-maai siɣêi pôlu mà kpɛ́ni fêi, da díyee kúla ŋátɔ̂ŋ mu, dífe mɛi káa ní. Dílɛɛ-mɛni-ŋai dínâŋ-ni dí sìa dípôlui, da díkɛ da láŋ.

⁵ M̀ɛni ma, ŋa pâi ŋɔŋ pilîi Zuda ma, a gɛɛ é Zerusâlɛŋ ŋɔkili-tɔɔ maa kwaa-ŋai mâ kéreŋ.”

Ɣâla a pâi Eezuɛ kula maa kɛ̂i

⁶ Ɣâla Yâwɛɛ è mò, ǹyɛɛi, “Eezuɛ ŋɔsɔnyɔ̂ŋ saaƃa kpaa náaŋ mɛni ma, fé pâi ŋɔtɔŋ-kpɛ-maai siɣêi pôlu ma kpɛ́ni fêi, da dɔ̃yâ-nuui kɔ́lɛ káne pôlu, da gôlo-nuui kɔ́lɛ kɔ́ɔ ŋá-kɔlɔ pôlu.

⁷ Da gôlo-ƃelai ŋuŋ pîlaŋ bɔ̂rɔi su dí maa-yeŋ-ƃelai perêi kpáaŋ. Naŋ-nuu da ǹóŋ da nɛnî tɔnɔ soŋ a wɛ́li a gɛɛ dí ńaa maa waai kara.

⁸ Da láa ŋ̀âla-teƃele-ŋai kɔlɛ dísɛɣɛ-seɣe-ŋai dîa, díkɛ ŋwã̂ai kpèle díɣâla-pɛrɛi mu, nyii da nyà a zɛŋ-kaoi da gula diai dîa díkpa káa dîai.

⁹ “Nyaa ƃe Amɔra-ŋai su kàra díŋɛi túɛ, nyii-ŋai dítɔɔ-mɛi e kɛ̀ yɛ̂ɛ sîda wuru-ŋai, díkpanaŋɔɔ yɛ̂ɛ teenâ-wuruii. É máŋ kɛ́ tí ŋá sîda-wuru-ŋai su kàra ŋ̀elei su-pere, ŋá dísame su kara ǹɔii mu-pere.

¹⁰ Ńyãa ƃe kákùla Ize lɔii su ŋá tɔ́ɔ kátuɛ vɛ̃ɛ-kpâlaŋ su a kóraŋ buu-náaŋ a gɛɛ ká Amɔra-lɔii sɔlɔ ƃó.

¹¹ Ŋá Ɣâla ŋɔlóno kɛ́-ƃela kùla kálônii sáma, ŋá ká nyaŋkpa-ŋai da-ni tɛɛ Ɣâla pɔ́. Vé tí, káai a Eezuɛ-ƃelai?

¹² Kɛ́lɛ diai ŋá dítɛ̀ɛ Ɣâla pɔ́i, ka díkɛ da ŋwã̂ai kpele, ka m̀ó Ɣâla ŋɔlóno kɛ́-ƃelai dîa a gɛɛ dífe mɛni ƃò ǹaa túɛ.

¹³ Ka gáa berei ŋa pâi ká lúanîi la yɛ̂ɛ berei kéleŋ a lɔii lûaŋ la à kɛ̀ ǹaa fɛ̂ɛi.

¹⁴ Pere fé pâi kɛ̂i kɔɔ-maa fêla-nuu yêei é pú, ŋ̀wála-wâla-nuui ŋɔwála-wâlai a pâi kɛ̂i kpɛ́ni-kpɛni, ŋ̀wála-wâla-nuui fé pâi gbîŋ ŋuŋ ma ƃôi.

¹⁵ Gerâŋ pili-nûui fé pâi tɔɔ̂i, gɔɔ-maa fêla-nuui fé pâi gbîŋ ŋuŋ ma ƃôi, kpaa máŋ zoo-sia-nûui é gbîŋ ŋuŋ ma ƃó

¹⁶ Ǹíi kpêle-nuui gáa gɔ́ kɔ́-ƃelai sámai, a pâi pûi a gaŋ a maa-ɣêlei tí.”