Emɔ 1 - Ŋ̀âla Kɔlɔ Maa Waai

¹ Emɔ, nyii kɛ̀ m̀ála mɛi-kaa-ƃelai sáma Tikoai, ŋɔwóo-ŋai ká ŋí nyii-ŋai bîlaŋɔɔi Eezuɛ-ŋai dîai. È ŋ̀óo-ŋai ŋí mɛ̀ni a Zuda-kaloŋ Uzia ŋɔtãi da Zɛoasi ǹóŋ Zɛroboaŋ ŋɔtãi, nyii kɛ̀ a Eezuɛ-ŋai díkâloŋ kóraŋ feerɛ tɛɛ pôlu ma ǹɔii é lɛ́ɛ pâi kpɛ̃lînii.

² Emɔ è mò ǹyɛɛi, “Yâwɛɛ kpéɣe-woo è kùla Zãiyɔŋ, ŋ̀óo é kúla Zerusâlɛŋ. Ǹyaŋ gala ŋûnu lɔii a pâi wɔ̂lɔi, Kamɛɛ Yeei tôŋ é kpála.”

Ɣâla a Eezuɛ kɔlɛ ma lɔii-ŋuŋ kula maa kɛ̂i Siria

³ Yâwɛɛ e mò, ǹyɛɛi, “Dɛmɛika ŋɔsɔnyɔ̂ŋ saaƃa kpaa náaŋ mɛ̂ni ma, fé pâi dɔŋ-kpɛ-maai siɣêi pôlu mà kpɛ́ni fêi, da Gilia táŋ a mɔlɔŋ táŋ-kɔli.

⁴ Mɛni ma, ŋa pâi ŋɔŋ pilîi Aziɛ ŋɔpɛ́rɛi ma a gɛɛ é Bɛŋ-aada ŋɔkóli-ŋai kéreŋ.

⁵ Ŋa pâi Dɛmɛika ŋɔsiɣãŋ gbôŋ wôloi, ŋá Bɛtɛdaŋ-ƃelai zu kara, ŋá ǹúui su kara, nyii gáloŋ-wuruii káa ǹyéei Bɛ-idɛŋ. Kúnuu-namui è mò, ǹyɛɛ, Siria-ƃelai da pâi liî luɛ-laa su Kîɛ.”

Felesia-ŋai

⁶ Ɣâla Yâwɛɛ è mò, ǹyɛɛi, “Geza ŋɔsɔnyɔ̂ŋ saaƃa kpaa náaŋ mɛni ma, fe pâi dɔŋ-kpɛ-maai siɣêi pôlu mà, kpɛ́ni fêi, dí li a ǹûai kélee Idɔŋ luɛ-lâa su.

⁷ M̀ɛni ma, ŋa pâi ŋɔŋ pilîi Geza ŋɔsiɣãŋ ma a gɛɛ é ŋɔkɔli-ŋai kéreŋ.

⁸ Ŋa pâi Asɔdɔ-ƃelai su karâi, ŋá ǹúui su kara, nyii gâloŋ-wuruii káa ǹyéei Asikɛlɔŋ. Ŋa pâi ńyee tínanîi Ɛkulɔŋ pɔ́-pere é lɛ́ɛ la zu Felesia-ŋai kpêli su é kara.”

Taya-ŋai

⁹ Ɣâla Yâwɛɛ è mò ǹyɛɛi, “Taya ŋɔsɔnyɔ̂ŋ saaƃa kpaa náaŋ mɛni ma, fe pâi dɔŋ-kpɛ-maai siɣêi pôlu mà kpɛ́ni fêi, dí lì a ǹûai kélee Idɔŋ luɛ-laa su, dí nia díkono-tee-wooi mɛni ma da dîa-ni díkîe-ni loai.

¹⁰ Ŋa pâi ŋɔŋ pilîi Taya ŋɔsiɣãŋ ma a gɛɛ é ŋɔkóli-ŋai kélee kéreŋ.”

Idɔŋ-ŋai

¹¹ Ɣâla Yâwɛɛ è mò ǹyɛɛ, “Idɔŋ ŋɔsɔnyɔ̂ŋ saaƃa kpaa náaŋ mɛni ma, fé pâi dɔŋ-kpɛ-maai siɣêi pôlu mà, kpɛ́ni fêi, è ǹêɣe kpɛ̀ a gbálai kɛ̀ ǹyéei, maloŋ-kaa kélee fé kɛ́ ní ǹyêei m̀ɛni ma, ŋɔlii-ŋwanai su è kɛ̀tɛ, è ƃò nɔ́ gíli ŋá wɔ́lɔ-wɔlɔ.

¹² M̀ɛni ma ŋa pâi ŋɔŋ pilîi Temaŋ ma a gɛɛ é Bozira ŋɔkili-tɔɔ ma kwaa ŋai mâ kéreŋ.”

Amɔŋ-ŋai

¹³ Ɣâla Yâwɛɛ è mò, ǹyɛɛ, “Amɔŋ ǹônii dísɔnyɔ̂ŋ saaƃa kpaa náaŋ mɛni ma, fé pâi dɔŋ-kpɛ-maai siɣêi pôlu dîa kpɛ́ni fêi, dí Gilia koo-nɛyãai koi ƃêla a gɛɛ dí dílɔii su kɛ́tɛ.

¹⁴ M̀ɛni ma ŋa pâi ŋɔŋ pɔnîi Laba ŋɔsiɣãŋ ma a gɛɛ é ŋɔkili-tɔɔ maa kwaa-ŋai mâ kéreŋ, a láɣi-woo su kɛ́tɛ a kɔ́ kɔ́-tãi da fãa kɛ́tɛ tɛɛ-tãi,

¹⁵ ǹyaŋ díkâloŋ a pâi liî luɛ-laa su, da ǹyaa kpîŋ é pɛ́lɛ ŋɔtíi kɛ́ ƃela kpaya-kpayai dîa.”